Latest / ദൈവത്തിലുള്ള യഥാർത്ഥ ജീവിതം - TLIG / Ep 90: തിരുവചനം ഒരിക്കലും കളവു പറയുന്നില്ല
Transcript
- എപ്പിസോഡ്സ് 90. 29.03.1989. സ്വിറ്സർലൻഡിന്റെ വടക്കുഭാഗത്തുള്ള കോട്ടറ്റലിലെ എന്ന സ്ഥലത്ത് സംഘടിപ്പിച്ച യോഗത്തിന് വേണ്ടി നൽകപ്പെട്ട സന്ദേശം. സമാധാനം നിങ്ങളോടുകൂടെ. ഞാൻ കർത്താവാണ്; എന്റെ സാന്നിധ്യം അനുഭവിച്ചറിയുക. ഇന്ന് ഞാൻ എന്റെ ശുശ്രൂഷയിലൂടെ നിങ്ങളോട് സംസാരിക്കാൻ എത്തുന്നു. നിങ്ങളുടെ ജീവിതത്തിലെ ഓരോ നിമിഷത്തിലും, എപ്പോഴും ഞാൻ നിങ്ങളോടൊപ്പമുണ്ട്. എന്നോടുള്ള നിങ്ങളുടെ സ്നേഹം അനുഭവിക്കുമ്പോൾ എന്റെ തിരുഹൃദയം ആനന്ദിക്കുന്നു. എന്റെ കുഞ്ഞാടുകളെ, നിങ്ങളെല്ലാവരെയും എന്റെ കരങ്ങൾക്കുള്ളിൽ ചേർത്തുപിടിച്ച്, ദുഷ്ടനിൽ നിന്ന് നിങ്ങളെ മറച്ച് സംരക്ഷിക്കണമെന്ന് എപ്പോഴും ഞാൻ എത്രയധികമായി ആഗ്രഹിച്ചു. ഞാൻ നിങ്ങളെ സ്നേഹിക്കുന്നു; നിത്യമായ സ്നേഹത്താൽ ഞാൻ നിങ്ങളെ സ്നേഹിക്കുന്നു. അസൂയാവഹമായ ഒരു സ്നേഹത്താൽ ഞാൻ നിങ്ങളെ സ്നേഹിക്കുന്നത് നിങ്ങൾ സ്വർഗ്ഗത്തിൽ എത്തുമ്പോൾ മാത്രമേ ഗ്രഹിക്കുകയുള്ളൂ. എങ്കിലും, എന്റെ അഗാഥമായ ഈ സ്നേഹത്തിന്റെ നടുവിലും, എന്റെ മക്കളിൽ അനേകരും തങ്ങളുടെ പുറം എന്റെ നേർക്ക് തിരിച്ച് പോയിരിക്കുന്നു. എന്റെ പീഡാനുഭവം അവർ മറന്നിരിക്കുന്നു; പരിണാമ സിദ്ധാന്തത്തിന്റെ പേരിൽ എന്റെ നാമം അവർക്ക് അർത്ഥശൂന്യമായി തീർന്നിരിക്കുന്നു. അവർക്ക് വിഗ്രഹങ്ങളെ നൽകുക; അവരായിരിക്കും അവയെ ആരാധിക്കാൻ ആദ്യം ഓടിവരുന്നത്. എന്നാൽ അവർക്ക് പരിശുദ്ധമായിരിക്കുന്നത് നൽകുക; അവർ അതിനെ പരിഹസിക്കും. നിങ്ങളുടെ പരിശുദ്ധനായവൻ സഹിക്കുന്നു. ഈ ഇരുണ്ട ലോകത്തിലെ അനുസരണമില്ലായ്മയും അശുദ്ധിയും അകൃത്യവും നിമിത്തം എന്റെ ശരീരം വികൃതമാക്കപ്പെട്ടിരിക്കുന്നു. അല്ലയോ, സൃഷ്ടികളേ, എന്റെ വേദനയാലുള്ള നിലവിളി മുഴുവൻ സ്വർഗ്ഗത്തെയും പ്രകമ്പനം കൊള്ളിക്കുന്നു. അത് കേട്ട് എന്റെ ദൂതന്മാർ ഭയന്നു വീണ് സാഷ്ടാംഗം പ്രണമിക്കുന്നു. എന്റെ പുത്രിമാരേ, പുത്രന്മാരേ, നിങ്ങൾ ഇനിയും എന്റെ നിലവിളി കേട്ടിട്ടില്ലേ? എന്റെ നിലവിളികൾ കേട്ട് നിങ്ങളുടെ ബധിരത കണ്ട് പിശാചുക്കൾ പോലും സ്തംഭിച്ചുപോകുന്നു. നിങ്ങളെ കാത്തിരുന്ന് എന്റെ കണ്ണുകളിൽ നിന്ന് രക്തക്കണ്ണീർ പകലും രാത്രിയും മണിക്കൂറുകളായി അവിരാമം ഒഴുകുന്നു. എന്റെ ആത്മാവിനെ നിങ്ങൾ എന്നേക്കുമായി തിരസ്കരിച്ചു കളഞ്ഞോ? നിങ്ങൾക്ക് വിശ്രമമേകുവാൻ ഒരു പച്ച പുൽത്തകിടി പോലുമില്ലാത്ത, നിങ്ങൾക്ക് ഉന്മേഷം നൽകുവാൻ ഒരു നീറിറവ പോലുമില്ലാത്ത ഈ നാശകരമായ മരുഭൂമിയിൽ എന്റെ നിലവിളി പ്രതിധ്വനിക്കുന്നു. ഉന്നതങ്ങളിലെ എന്റെ സിംഹാസനത്തിൽ നിന്ന് ഞാൻ എന്റെ പഴയ മേച്ചിൽ പുറങ്ങളിലേക്ക് വരുമ്പോൾ കാണുന്നത്, അവ അവഗണിക്കപ്പെട്ടും ഫലശൂന്യമായി ഉപേക്ഷിക്കപ്പെട്ട നിലയിലും കിടക്കുന്നതാണ്. എന്റെ സ്വന്തം കൈകൾ കൊണ്ട് വലിയ സ്നേഹത്തോടെ ഞാൻ നട്ടുവളർത്തിയ പുഷ്പങ്ങൾ ഓരോന്നായി നശിച്ചുകൊണ്ടിരിക്കുന്നു. എന്റെ പുഷ്പതടങ്ങൾ ഉപേക്ഷിക്കപ്പെട്ട് വരണ്ട നിലയിൽ കിടക്കുന്നു. എന്റെ കിണറുകൾ ഇപ്പോൾ ശൂന്യമായി പൊടി നിറഞ്ഞ ഇരുണ്ട കുഴികളായി മാറിയിരിക്കുന്നു. അണലി സർപ്പങ്ങൾ അവയിൽ പാർക്കുന്നു. എന്റെ കാവൽക്കാർ എവിടെ പോയി? എന്തുകൊണ്ടാണ് അവർ എന്റെ പൂന്തോട്ടത്തെ അവഗണിച്ചത്? ഞാൻ മടങ്ങി വരുമ്പോൾ ഒരു പുഷ്പമെങ്കിലും ഞാൻ കണ്ടെത്തുമോ? സ്നേഹരാഹിത്യവും വിശ്വാസരാഹിത്യവും സമാധാനരാഹിത്യവും നിമിത്തം എന്റെ ആത്മാവ് തകർന്നിരിക്കുന്നു. എന്റെ തിരുഹൃദയത്തിന്റെ മക്കളേ, ഈ മരുഭൂമിയിൽ എന്റെ നിലവിളി കേൾക്കുക; എന്റെ സ്വരം തിരിച്ചറിയുക; കുറഞ്ഞപക്ഷം കാലത്തിന്റെ അടയാളങ്ങളെ തിരിച്ചറിയുക. എന്നോട് രമ്യതപ്പെട്ടിട്ടില്ലാത്തവർ വന്ന് ഇപ്പോൾ എന്നോട് രമ്യതപ്പെടുക. നിങ്ങളുടെ അകൃത്യങ്ങൾ നിങ്ങളെ എന്നിൽ നിന്ന് അകറ്റിക്കൊണ്ട് മുഴുവൻ നിത്യതയെ തന്നെയും കീറിമുറിച്ചിരിക്കുന്നു. തിന്മ ചെയ്യരുത്; തിന്മ നിങ്ങൾക്ക് സംഭവിക്കുകയില്ല. പരസ്പരം നന്മ ചെയ്യുവിൻ; പരസ്പരം സ്നേഹിക്കുവിൻ. നിങ്ങളുടെ ശത്രുക്കളോട് ക്ഷമിക്കുവിൻ. നിങ്ങൾക്ക് എല്ലാവർക്കും അറിയാവുന്ന എന്റെ വചനങ്ങൾ ഞാൻ വീണ്ടും ആവർത്തിക്കുകയാണ്; എന്നാൽ നിങ്ങളിൽ എത്രപേർ അവ ജീവിതത്തിൽ പ്രാവർത്തികമാക്കുന്നുണ്ട്? ഹൃദയപൂർവ്വം പ്രാർത്ഥിക്കുക. എനിക്ക് സ്നേഹം വേണം. നിങ്ങളുടെ ഹൃദയത്തിൽ നിന്ന് വരുന്ന പ്രാർത്ഥനകളാൽ എന്നെ അലങ്കരിക്കാൻ വരൂ. സ്നേഹത്തിന്റെ അഗാഥ സമുദ്രമായ എന്റെ ഹൃദയത്തിൽ നിന്ന് കോരിയെടുത്ത് നിങ്ങളുടെ ഹൃദയം നിറയ്ക്കുവിൻ. ഞാൻ വളരെ ഗൗരവത്തോടെ പറയുന്നു: മണിക്കൂറുകൾ അതിവേഗം പാഞ്ഞുകൊണ്ടിരിക്കുന്നു. പ്രിയപ്പെട്ടവരെ, എന്റെ അടുക്കലേക്ക് മടങ്ങി വരുവിൻ. സമാധാനം, സമാധാനം, സമാധാനം. എല്ലാ ജനതകളോടും സമാധാനത്തിനു വേണ്ടി വിളിച്ചു പറയുവിൻ: ഐക്യപ്പെടുന്നതിന് സമാധാനം, സ്നേഹിക്കുന്നതിന് സമാധാനം, എന്നെ മഹത്വപ്പെടുത്തുന്നതിന് സമാധാനം. എന്റെ പ്രവാചകർ കണ്ട ഓരോ ദർശനവും സത്യമായി സംഭവിക്കും; എന്തെന്നാൽ ഞാൻ പ്രസ്താവിക്കുന്നത് ഞാൻ നിറവേറ്റും. എന്റെ പ്രിയപ്പെട്ടവരെ, എന്റെ പത്രോസിനായി, മാർപാപ്പയ്ക്ക് വേണ്ടി പ്രാർത്ഥിക്കുക. പാത്രിയാർക്കീസിനു വേണ്ടി പ്രാർത്ഥിക്കുക. എന്റെ പുരോഹിതന്മാർക്ക് വേണ്ടി പ്രാർത്ഥിക്കുവിൻ. പുരോഹിതന്മാർ എന്ന് പറഞ്ഞപ്പോൾ യേശുവിന്റെ തിരുഹൃദയം ഒരു പ്രത്യേകമായ സ്നേഹത്താൽ ത്രസിച്ചു. അതോടെ ഒരു വലിയ വേദനയും അവിടുത്തെ തിരുഹൃദയത്തിനുണ്ടായി; യേശുവിന്റെ വേദന എന്റെ ഹൃദയത്തെയും തുളച്ചു. എന്റെ കണ്ണുകൾ നിറഞ്ഞൊഴുകി. ഞാനും പിതാവും ഒന്നായിരിക്കുന്നതുപോലെ, എന്റെ ആട്ടിൻപറ്റവും ഒന്നായിത്തീരട്ടെ. ഞാൻ മടങ്ങി വരുന്നതുവരെ എന്റെ കുഞ്ഞാടുകൾ ഒറ്റത്തൊഴുത്തിലേക്ക് മടങ്ങി വരുന്നതിനു വേണ്ടി പ്രാർത്ഥിക്കുവിൻ. നിങ്ങൾ എന്റെ സ്വരം കേട്ട് അനുസരിച്ചിരുന്നെങ്കിൽ, ഇപ്പോൾ നിങ്ങൾ സ്വർഗ്ഗസ്ഥനായ ഞങ്ങളുടെ പിതാവേ എന്ന പ്രാർത്ഥന ചൊല്ലാമോ? ഞാൻ ഇപ്പോൾ ശ്രദ്ധിക്കുന്നു. ഞാൻ നിങ്ങളോട് വാഗ്ദാനം ചെയ്യുന്നു: എന്റെ രാജ്യം വരും. എന്റെ ഇഷ്ടം സ്വർഗ്ഗത്തിലെ പോലെ ഭൂമിയിലും നടപ്പാകും. മക്കളേ, സമാധാനത്തിൽ ഫലം പുറപ്പെടുവിക്കുവിൻ. നിങ്ങളെല്ലാവരെയും കർത്താവായ ഞാൻ സ്നേഹിക്കുകയും അനുഗ്രഹിക്കുകയും ചെയ്യുന്നു. യോഗത്തിനു വേണ്ടി നമ്മുടെ പരിശുദ്ധ മാതാവ് നൽകിയ സന്ദേശം. പ്രിയപ്പെട്ടവരെ, യേശുവിനെ ആശ്വസിപ്പിക്കുവിൻ; യേശുവിനെ സമാശ്വസിപ്പിക്കുവിൻ. പരസ്പരം സമാധാനത്തിൽ വർത്തിക്കുവിൻ; പരസ്പരം സ്നേഹിക്കുവിൻ. ദൈവത്തോട് വിശ്വസ്തരായിരിക്കുവിൻ. നിങ്ങളെ തന്നെ പൂർണ്ണമായി ദൈവത്തിന് വിട്ടുകൊടുത്തുകൊണ്ട് സമർപ്പിക്കുക. നിങ്ങൾ സമർപ്പിക്കുന്നത് സ്നേഹത്തിന് തന്നെയാണ്; അതുവഴി അവിടുന്ന് നിങ്ങളെ സ്നേഹവും സമാധാനവും കൊണ്ട് പോഷിപ്പിക്കും. കർത്താവും ഞാനും നിങ്ങളെല്ലാവരെയും അനുഗ്രഹിക്കുന്നു. ഞാൻ നിങ്ങളെ സ്നേഹിക്കുന്നു. ഈ ഹാളിലുള്ള എല്ലാ ആത്മീയ വസ്തുക്കളെയും കർത്താവും ഞാനും ആശീർവദിക്കുന്നു. മകളേ, എന്റെ സമാധാനം സ്വീകരിക്കുക. സ്നേഹത്തിന്റെ കരങ്ങളിലേക്ക് നിന്നെ തന്നെ സമർപ്പിക്കുവിൻ. സ്നേഹം നിന്നെ എപ്പോഴും നയിക്കും. ഞാൻ നിന്നെ സ്നേഹിക്കുന്നു. എന്റെ അനുഗ്രഹങ്ങൾ സ്വീകരിക്കുക. 1.04.1989. യേശുവേ. ഇത് ഞാനാണ്. സ്നേഹം നിന്നെ നയിക്കട്ടെ. ബുദ്ധിമാന്മാരുടെ അഭിപ്രായങ്ങൾ കേൾക്കരുത്; അവർ ഞാൻ ഭൂമിയിൽ മനുഷ്യനായി ജീവിച്ചിരുന്ന കാലത്തിലെ നിയമജ്ഞരെ പോലെയാണ്. സ്നേഹത്തിനായി സ്നേഹപൂർവ്വം സുവിശേഷം പ്രഘോഷിക്കുക. എല്ലാവരും എന്റെ അനന്തമായ സ്നേഹം രുചിച്ചറിയട്ടെ. കർത്താവേ, ഞാൻ അങ്ങയെ തീഷ്ണമായി ആഗ്രഹിക്കുന്നു. കുഞ്ഞേ, കർത്താവേ, ഞാൻ അങ്ങയെ തീക്ഷ്ണമായി ആഗ്രഹിക്കുന്നു എന്ന് നീ പറയുന്നത് കേട്ട് അനുഭവിച്ചറിയുന്നതിൽ എന്റെ തിരുഹൃദയം സന്തോഷിക്കുന്നു. ഇങ്ങനെ പറയുന്നത് ദൈവഭക്തിയുടെ ഫലമാണ്. എന്റെ പ്രതിബിംബമായി തീരുക; എന്റെ ഒരു പകർപ്പായി തീരുക. പിതാവിനെ തീക്ഷ്ണമായി ആഗ്രഹിക്കുക. ഞാൻ ഭൂമിയിലായിരുന്നപ്പോൾ പിതാവിനെ തീക്ഷ്ണമായി ആഗ്രഹിച്ചിരുന്നു. ഞാൻ ഇടവിടാതെ പ്രാർത്ഥിച്ചു. സ്നേഹത്തിന്റെ ഐക്യത്തിൽ എന്റെ പിതാവിനോടൊപ്പം സ്ഥിരമായ ബന്ധത്തിൽ ആയിരിക്കണമെന്ന് ഞാൻ തീക്ഷ്ണമായി ആഗ്രഹിച്ചു. ശിഷ്യേ, ജ്ഞാനത്താൽ നിന്നെ വളർത്തിയെടുത്ത നിന്റെ ഗുരുവാണ് ഞാൻ. അതിനാൽ എന്നെ ആനന്ദിപ്പിക്കുക; എന്നോട് സ്ഥിരമായി ബന്ധത്തിൽ ആയിരിക്കുക. എനിക്ക് പ്രഥമ സ്ഥാനം നൽകുക; എപ്പോഴും എന്നെ ആഗ്രഹിക്കുക. ഞാൻ നിനക്ക് നൽകിയിരിക്കുന്ന ഈ വിധത്തിൽ എന്നെ കാണുമ്പോൾ സന്തോഷിക്കുക. എന്നോട് ചേർന്ന് നിൽക്കുക. നിന്നിൽ നിന്ന് ഞാൻ ആഗ്രഹിക്കുന്നത് സ്നേഹം മാത്രമാണ്. കർത്താവേ, നരകത്തിലേക്ക് പോകുന്ന വ്യക്തികളോട് എനിക്ക് ദയ തോന്നുന്നു. എന്തായാലും അവർ ഞങ്ങളെപ്പോലെ തന്നെ ആയിരുന്നല്ലോ ഈ ഭൂമിയിൽ. അവരെ നരകത്തിൽ നിന്ന് പുറത്തു കൊണ്ടുവരാൻ ഒരു മാർഗം ഉണ്ടായിരുന്നെങ്കിൽ. നന്മയും തിന്മയും തിരഞ്ഞെടുക്കുവാനുള്ള സ്വാതന്ത്ര്യം ഞാൻ അവർക്ക് നൽകിയിട്ടുണ്ടായിരുന്നു. എന്നാൽ എന്റെ യാചനകളും സ്നേഹം നിറഞ്ഞ വിളികളും ഉണ്ടായിട്ടും അവർ തിന്മയെ തിരഞ്ഞെടുത്തു. എങ്കിലും കർത്താവേ, ഇനിയൊരു അവസരം കൂടി ഉണ്ടായിരിക്കാമായിരുന്നില്ലേ? കുഞ്ഞേ, അവർ എന്നെ പൂർണ്ണമായി തിരസ്കരിച്ചത് നീ മനസ്സിലാക്കുന്നില്ല. അവരുടെ അവസാന നിമിഷം വരെ ഞാൻ അവരെ സ്നേഹിച്ചു. സാത്താനാൽ നയിക്കപ്പെട്ട അവർ അവനെ പിന്തുടരാൻ തീരുമാനിച്ചു. അവരുടെ മരണത്തിനു ശേഷവും ഞാൻ അവരുടെ മുമ്പിൽ നിന്നിരുന്നു. എങ്കിലും അല്പം പോലും മടികൂടാതെ അവർ സ്വമനസ്സാൽ സാത്താനെ പിന്തുടർന്നു. അത് അവരുടെ പൂർണ്ണമായ സ്വതന്ത്രമായ തിരഞ്ഞെടുപ്പായിരുന്നു. അവർ നരകത്തെ എന്നെന്നേക്കുമായി തിരഞ്ഞെടുത്തു. കർത്താവേ, ഞാൻ എപ്പോഴും അങ്ങയുടെ അഭീഷ്ടം പ്രവർത്തിക്കട്ടെ. വസൂല, ഒരിക്കലും എന്റെ കരം വിടരുത്. എന്നെന്നേക്കുമായി നമ്മൾ നമുക്ക് സ്നേഹത്തിന്റെ ഓരോ കണികയും ഉപയോഗിക്കപ്പെടുന്നു. നിത്യനാശത്തിലേക്കുള്ള വഴിയിലൂടെ സഞ്ചരിക്കുന്നവരെ രക്ഷിക്കാൻ എനിക്ക് സ്നേഹം ആവശ്യമാണ്. വരൂ. 2. 04.1989. കർത്താവേ. ഇത് ഞാനാണ്. ശിശുസഹജമായ വിശ്വാസത്തോടെ എന്നെ നോക്കുക; എന്റെ സഭയെ അലങ്കരിക്കുക. കർത്താവേ, ഈ കാലഘട്ടത്തിലെ പ്രവാചകന്മാരെയും അങ്ങയുടെ വചനത്തെയും സ്വീകരിക്കാൻ എന്തുകൊണ്ടാണ് ചിലർക്ക് ഇത്രയധികം ബുദ്ധിമുട്ട്? എന്റെ ആടുകൾ എന്റെ സ്വരം തിരിച്ചറിയുമെന്ന് ഞാൻ വളരെ ഗൗരവത്തോടെ നിന്നോട് പറയുന്നു. അങ്ങയുടെ ഈ സന്ദേശം സ്വീകരിച്ച വലിയ പാപികളിൽ സംഭവിച്ച മാനസാന്തരങ്ങളും സൗഖ്യങ്ങളും അവിശ്വാസികളോട് പറഞ്ഞു തെളിയിച്ചാലും അവർക്ക് ബോധ്യം വരുന്നില്ല. എന്റെ വസൂല, അവരുടെ കൺമുമ്പിൽ ആരെങ്കിലും മരിച്ചവരിൽ നിന്ന് ഉയർത്താലും അവർ വിശ്വസിക്കുകയില്ല. ഇവരെക്കുറിച്ച് യേശയ്യാ പ്രവാചകൻ പറഞ്ഞത് ഇന്നും നിലനിൽക്കുന്നു. നിങ്ങൾ വീണ്ടും വീണ്ടും കേൾക്കും; എന്നാൽ മനസ്സിലാക്കുകയില്ല. നിങ്ങൾ വീണ്ടും വീണ്ടും കാണും; എന്നാൽ ഗ്രഹിക്കുകയില്ല. എന്തെന്നാൽ അവർ കണ്ണുകൊണ്ട് കാണാതിരിക്കാനും ചെവികൾ കൊണ്ട് കേൾക്കാതിരിക്കാനും ഹൃദയം കൊണ്ട് മനസ്സിലാക്കാതിരിക്കാനും അവർ മാനസാന്തരപ്പെട്ട് ഞാൻ അവരെ സൗഖ്യപ്പെടുത്താതിരിക്കാനും ഈ ജനം തങ്ങളുടെ ഹൃദയം കഠിനമാക്കിയിരിക്കുന്നു. അവരുടെ കാതുകൾ മന്ദീഭവിച്ചിരിക്കുന്നു; അവർ തങ്ങളുടെ കണ്ണുകൾ അടച്ചിരിക്കുന്നു. എന്റെ പ്രവാചകന്മാർ എന്റെ ശരീരമായ സഭയുടെ ഭാഗമാണെന്ന് പലരും മറന്നുപോകുന്നു. നിങ്ങൾ എല്ലാവരും ചേർന്ന് ഐക്യത്തിൽ സഭ വളരേണ്ടതിന് ഞാൻ നിങ്ങൾ ഓരോരുത്തർക്കും പ്രത്യേകം പ്രത്യേകം കൃപകൾ നൽകിയിരിക്കുന്നു. പ്രിയപ്പെട്ട കുഞ്ഞേ, ഞാൻ ചിലർക്ക് അപ്പസ്തോലന്മാരാകാനും ചിലർക്ക് പുരോഹിതന്മാരാകാനും ചിലർക്ക് അധ്യാപകരാകാനും കലഹത്തിന്റെ നാളുകളിൽ മറ്റു ചിലർക്ക് പ്രവാചകന്മാരാകാനും വരം നൽകിയിരിക്കുന്നു. പിന്നെ എന്തിന് എന്റെ പ്രവാചകന്മാരെ കണ്ട് അവർ ആശ്ചര്യപ്പെടുകയും അവരെ തിരസ്കരിക്കുകയും ചെയ്യുന്നു? ഒരു അവയവം മുറിച്ചു മാറ്റപ്പെട്ടിരിക്കുമ്പോൾ എന്റെ ശരീരമായ സഭ എങ്ങനെ ശരിയായി പ്രവർത്തിക്കും? ഞാൻ ക്ഷീണിച്ചിരിക്കുന്നു. എന്റെ ശരീരമായ സഭ നിരന്തരം മുറിക്കപ്പെടുകയും കീറപ്പെടുകയും ചെയ്യപ്പെടുന്നു. പുഷ്പമേ, നിന്നെ പീഡിപ്പിക്കുന്നവരെ സ്നേഹപൂർവ്വം സ്വീകരിക്കുക; അവരെ കുറ്റം വിധിക്കരുത്. എന്റെ പ്രവാചകന്മാർ എപ്പോഴും പീഡിപ്പിക്കപ്പെടും, കുറ്റപ്പെടുത്തപ്പെടും, ചാട്ടവാറ് കൊണ്ട് അടിക്കപ്പെടും, അടിച്ചമർത്തപ്പെടും. ഒരു പട്ടണത്തിൽ നിന്ന് മറ്റൊന്നിലേക്ക് പിന്തുടരപ്പെടും, അവഹേളിക്കപ്പെടും, ക്രൂശിക്കപ്പെടും. അങ്ങനെ ഈ ഭൂമിയിൽ ചൊരിയപ്പെട്ട എല്ലാ വിശുദ്ധരുടെയും രക്തത്തിന്റെ ഉത്തരവാദിത്വം ഈ തലമുറയിൽ വന്നു ഭവിക്കും. തിരുലിഖിതങ്ങൾ ഒരിക്കലും വ്യാജം പറയുകയില്ല. ഞാനാണ് വചനം. എന്റെ കുഞ്ഞേ, ശുദ്ധീകരണ സ്ഥലത്തുള്ളവർക്ക് വേണ്ടി പരിഹാരം ചെയ്യാൻ ഞാൻ നിന്നെ രൂപപ്പെടുത്തിയിരിക്കുന്നു. പുഷ്പമേ, പ്രാർത്ഥിക്കുക. പ്രാർത്ഥനകൾ ശുദ്ധീകരണ സ്ഥലത്തുള്ളവരുടെ മേൽ എത്രമാത്രം സ്വാധീനം ചെലുത്തുന്നുണ്ടെന്ന് നീ അറിയുന്നില്ല. അവരുടെ അഗ്നിയെ പ്രാർത്ഥനകൾ കൊണ്ട് അണച്ചുകളയൂ. വരൂ, അവർക്ക് വേണ്ടി പരിഹാരം ചെയ്യുക.