Latest / ദൈവത്തിലുള്ള യഥാർത്ഥ ജീവിതം - TLIG / Ep 74: സഭയുടെ മഹത്തായ മാനസാന്തരം
Transcript
- എപ്പിസോഡ് 74. 9/8/1987, റോം. യേശുവേ. ഇത് ഞാനാണ്, പ്രിയപ്പെട്ട ദേഹി, ഞാൻ നിന്നെ വളരെയധികം സ്നേഹിക്കുന്നു. സഭ എന്നിലൂടെ പുനർജീവിക്കും; എന്റെ മീറായേ, നിന്നിലൂടെ എന്നെ വെളിപ്പെടുത്തുവാൻ അനുവദിക്കുക. നിന്റെ കർത്താവായ എനിക്ക് പരിമളം ഏകുക. എന്റെ തിരുഹൃദയം ഞാൻ നിന്നെ കാണിച്ചു തന്നിട്ടുണ്ട്; ദേഹി, എന്റെ മാർഗങ്ങൾ നിന്നെ പഠിപ്പിക്കുന്നതിനും നിന്നെ സത്യത്തിലേക്ക് നയിക്കുന്നതിനുമായി ഞാൻ നിന്റെ അടുക്കൽ വന്നിരിക്കുന്നു. സത്യം സ്നേഹം തന്നെയാണെന്നിരിക്കെ, നിങ്ങളുടെ ഈ തലമുറ സത്യം അന്വേഷിച്ചു കൊണ്ടിരിക്കുകയാണ്. എന്നാൽ അവരിൽ സ്നേഹമില്ല; എന്റെ നാമം സ്നേഹമെന്നാണ്. എന്റെ നാമം അവരെ സംബന്ധിച്ച് ഒന്നുമല്ല. എന്നിരുന്നാലും, എന്നെ അവഹേളിക്കുന്നവരുടെ മേലുള്ള എന്റെ കാരുണ്യം വളരെ വലുതാണ്. എന്റെ സൃഷ്ടികൾ എന്നെ പരിത്യജിച്ചിരിക്കുന്നു; അന്ധരായ വഴികാട്ടികളാൽ വഴിനയിക്കപ്പെടുന്നതിന് അവർ അവരെ തന്നെ അനുവദിച്ചിരിക്കുന്നു. എന്റേതല്ലാത്ത ഒരു നിയമം പഠിപ്പിച്ചുകൊണ്ട് എന്റെ നിയമത്തിനെതിരെ അവർ കലഹിച്ചിരിക്കുന്നു. സൃഷ്ടികളേ, നിങ്ങൾ നാശത്തിന്റെ വക്കിൽ എത്തിയിരിക്കുന്നെന്ന് നിങ്ങൾ അറിഞ്ഞിരുന്നെങ്കിൽ, സഭാപുരോഹിതർ പരസ്പരം പീഡിപ്പിക്കുന്നതിന് പകരം അന്യോന്യം സ്നേഹപൂർവ്വം കരുതലേകട്ടെ. ജ്ഞാനത്തിന്റെ മാർഗമായ എന്റെ മാർഗങ്ങൾ പഠിക്കുക; നിങ്ങളുടെ ഓരോ ചിന്തയും പ്രവർത്തിയും സ്നേഹത്താൽ ആവരണം ചെയ്യപ്പെട്ടതാകട്ടെ. പുഷ്പമേ, ഞാൻ നിന്റെ ആത്മാർത്ഥതയുള്ള പരിപാലകനാണ്; അതിനാൽ എന്നെ വിശ്വസിക്കുക. എന്റെ ജീവരസത്താൽ നിന്നെ പോഷിപ്പിച്ചുകൊണ്ട്, നിന്റെ പ്രകാശത്തിന് കീഴിൽ നിന്നെ ഞാൻ സംരക്ഷിക്കുന്നു. നിന്റെ ദൈവമായ എന്നെ വിശ്വസിക്കുക; എന്തെന്നാൽ ഞാൻ നിന്നോട് അത്യധികം കൃപ കാണിച്ചിരിക്കുന്നു. നിന്നെ അലങ്കരിച്ച്, നിന്നെ മൂടിപിടിപ്പിച്ചുകൊണ്ട്, എപ്പോഴും ഞാൻ നിന്നോടൊപ്പം ഉണ്ടായിരിക്കും. ഞാൻ ഏറ്റവും വിശ്വസ്തനാണ്. വരൂ, നമ്മൾ, നമുക്ക്, എന്നോടൊന്നായിത്തീരുക. എന്റെ ദൈവമേ, അങ്ങേയ്ക്ക് നന്ദി. ദൈവീക സൗന്ദര്യത്തിന്റെ ഒരു അപൂർണ്ണ ദർശനം എനിക്ക് ലഭിച്ചു. ദൈവത്താൽ വലയം ചെയ്യപ്പെട്ടിരിക്കുന്ന അനുഭവം എനിക്കുണ്ടായതിൽ ഞാൻ അത്യന്തം ആനന്ദാനുഭൂതിയിലായി. പിന്നീട്, നമ്മുടെ പരിശുദ്ധ മാതാവ് സംസാരിക്കുന്നു. പോരാട്ടം അവസാനിച്ചിട്ടില്ല. ഓരോ ദിനവും എത്രയധികം മനുഷ്യർ നരകത്തിൽ പതിക്കുന്നുണ്ടെന്ന് നീ അറിഞ്ഞിരുന്നെങ്കിൽ, നരകത്തിൽ നിബധിക്കുന്നവരുടെ സംഖ്യ ഭീതിജനകമാണ്. ആരൊക്കെയാണ് നരകത്തിൽ നിബധിക്കുന്നതെന്ന് ഞാൻ ചോദിച്ചു. നമ്മുടെ പരിശുദ്ധ മാതാവ് പറയുവാൻ മടിച്ചു. വലിയ വേദന മാതാവിന്റെ മുഖത്ത് എനിക്ക് അനുഭവപ്പെട്ടു. കർദിനാളന്മാർ മുതൽ കുഞ്ഞുങ്ങൾ വരെ നരകത്തിൽ നിബധിക്കുന്നു. നിങ്ങളുടെ കാലഘട്ടം അധപ്പതിച്ചിരിക്കുന്നു. നമ്മുടെ എതിരാളിയായ സാത്താന്റെ ആധിപത്യത്തിലാണ് ഈ കാലഘട്ടം. സാത്താൻ അവന്റെ ആധിപത്യം അവന്റെ പൂർണ്ണതയിൽ എത്തിച്ചിരിക്കുന്നു. അല്ലയോ, വാസുലാ, ദൈവം ദിവസങ്ങൾ എണ്ണിക്കൊണ്ടിരിക്കുന്നു; നിങ്ങളുടെ മേൽ അവിടുത്തെ കൃപയുടെ മഞ്ഞു പൊഴിച്ചുകൊണ്ട്, നിങ്ങളെ പുനർജീവിപ്പിച്ച്, ഒരു പുതിയ അനുഗ്രഹീത തോട്ടമാക്കാനുള്ള ദിവസങ്ങളെ അവിടുന്ന് കാത്തിരിക്കുന്നു. ഇത് പുതിയ പെന്തക്കോസ്ത എന്നറിയപ്പെടും. വന്ന് അവിടുത്തെ സന്നിധിയിൽ മുട്ടുകുത്തി, ആ മഹോന്നത സംഭവത്തിനു വേണ്ടി തീക്ഷ്ണതയോടെ പ്രാർത്ഥിക്കുവിൻ. ഈ മഹാസുദിനം അടുത്തുവരുന്നതിനു വേണ്ടി പ്രാർത്ഥിക്കുവിൻ. സ്നേഹത്തിന്റെ തിരിച്ചുവരവിനു വേണ്ടി പ്രാർത്ഥിക്കുവിൻ. വാസുലാ, ഞാൻ ജപമാല റാണിയാണ്. പരിശുദ്ധ മാതാവേ, അങ്ങ് എന്തിനാണ് ഈ വിധത്തിൽ പ്രത്യക്ഷയായത്? എന്തെങ്കിലും പ്രത്യേക സന്ദേശമുണ്ടോ? അതെ, ഞാൻ ഫാത്തിമയിൽ പറഞ്ഞിട്ടുള്ളതെല്ലാം ഈ കാലഘട്ടത്തിന്റെ അവസാനത്തിനു മുമ്പ് നിറവേറ്റപ്പെടും. ഇപ്പോൾ വന്ന് എന്റെ വിമല ഹൃദയത്തിലും യേശുവിന്റെ തിരുഹൃദയത്തിലും വിശ്രമിക്കുക. ഞങ്ങളെ സ്നേഹിക്കാത്തവർക്കുള്ള പരിഹാരമായി, നീ ഇപ്പോൾ ചെയ്യുന്നതുപോലെയും പ്രവർത്തിക്കുന്നതുപോലെയും ചെയ്തുകൊണ്ട് യേശുവിനെ പ്രസാദിപ്പിക്കുക. നമ്മൾ, നമുക്ക്. അതെ, എന്നേക്കും. 15/8/1988, പരിശുദ്ധ മാതാവിന്റെ സ്വർഗ്ഗാരോപണ തിരുനാൾ. കർത്താവായ യേശുവേ, അങ്ങ് വാഴ്ത്തപ്പെടട്ടെ. കർത്താവായ ഞാൻ നിന്നെ അനുഗ്രഹിക്കുന്നു. എന്റെ തിരുഹൃദയം വേദനയാൽ പുളയുന്നു; എന്റെ തിരുഹൃദയത്തിൽ മുള്ളുകൾ നിറഞ്ഞിരിക്കുന്നു. എന്നെ സ്നേഹിക്കുന്ന എല്ലാവരിൽ നിന്നും ഞാൻ ആശ്വാസവും ശാന്തിയും തേടുന്നു. എന്നെ മഹത്വപ്പെടുത്തുക, എന്നെ തേടുക. എന്റെ ചെറിയവരിൽ നിന്ന് എനിക്ക് സമാശ്വാസം ലഭിക്കുന്നതുകൊണ്ട്, ഞാൻ അവരുടെ അടുക്കലേക്ക് തിരിയുന്നു. അവരിൽ ഞാൻ സമാശ്വാസം കണ്ടെത്തുന്നു. ഓ, യേശുവേ, അങ്ങ് ഇത്രയധികം വേദനിക്കുന്നത് വളരെ വേദനയോടെയാണ് ഞാൻ കാണുന്നത്. രക്ഷിക്കപ്പെടേണ്ട മനുഷ്യർക്ക് വേണ്ടി പ്രാർത്ഥിക്കുക. എന്നോട് പ്രാർത്ഥിക്കുക. എന്തെന്നാൽ എന്റെ നാമത്തിന്റെ അർത്ഥം 'രക്ഷിക്കുന്നവൻ' എന്നാണ്. മണിക്കൂറുകൾ അതിവേഗം പറന്നുപോകുന്നു; കണക്കെടുപ്പിന്റെ വിധിദിനങ്ങൾ ആരംഭിച്ചിരിക്കുന്നു. പ്രതികാരത്തിനുള്ള ദിനങ്ങൾ അടുത്തിരിക്കുന്നു. മനുഷ്യരുടെ അനീതിയും വ്യക്തമായ കുറ്റകൃത്യങ്ങളും മൂലം, എന്റെയും പരിശുദ്ധ മാതാവിന്റെയും ഇരുഹൃദയങ്ങൾ കുത്തിത്തുളയ്ക്കുന്ന വിധം ഈ തലമുറയുടെ അനീതിയും വിശ്വാസത്യാഗവും അത്രയ്ക്ക് ഭയങ്കരവും ഗുരുതരവുമാണ്. എന്റെ പക്കലേക്ക് തിരിച്ചു മടങ്ങി വരണമെന്ന് ഞാൻ കേണപേക്ഷിക്കുന്നു. ഞാൻ നിങ്ങളോട് ക്ഷമിക്കാം. സ്നേഹത്തോട് ഒട്ടിച്ചേർന്ന് നിൽക്കുക. ഞാൻ നിങ്ങളുടെ മേൽ അനുഗ്രഹങ്ങൾ ചൊരിയാം. പരസ്പരം നീതി പുലർത്തുകയും അന്യോന്യം ദയ കാണിക്കുകയും ചെയ്യുവിൻ. പരസ്പരം സ്നേഹിക്കുവിൻ. എന്റെ പ്രകാശത്തിന്റെ മക്കളായി തീരുവിൻ. അനേകം ദുരന്തങ്ങൾ നിങ്ങളുടെ ഇടയിൽ സംഭവിച്ചത് എന്തുകൊണ്ടാണെന്ന് ഗ്രഹിക്കുവിൻ. നിങ്ങളിൽ അടിഞ്ഞുകൂടിയിരിക്കുന്ന തിന്മകൾ മൂലമാണ് അവ സംഭവിച്ചത്. എന്റെ അടുക്കലേക്ക് മടങ്ങി വരുക; എന്റെ തിരുരക്തം നിങ്ങളെ ശുദ്ധീകരിക്കും. പിന്നീട്. ഞാൻ നിങ്ങളുടെ പരിശുദ്ധ മാതാവാണ്. എന്റെ മക്കളേ, ദൈവത്തിന്റെ അടുക്കലേക്ക് മടങ്ങി വരുവിൻ. നിങ്ങൾ ദൈവത്തിലേക്ക് മടങ്ങി വരണമെന്ന് ഞാൻ കേണപേക്ഷിക്കുന്നു. ദൈവം നിങ്ങളോട് ക്ഷമിക്കും. സൃഷ്ടികളേ, മഞ്ഞുതുള്ളി പോലെ അവിടുത്തെ കാരുണ്യം നിങ്ങളിലേക്ക് പെയ്തിറങ്ങുന്നു. പുഷ്പങ്ങളെ പോലെ നിങ്ങൾ വിടർന്ന് അവിടുത്തെ പ്രകാശം സാംശീകരിക്കുക. ഞാൻ നിങ്ങളെ വിളിക്കുകയാണ്; ഞാൻ നിങ്ങളെ പ്രോത്സാഹിപ്പിക്കുകയാണ്. എന്നാൽ നിങ്ങളിൽ എത്രപേർ ഞങ്ങളുടെ വിളികൾ കേൾക്കുന്നുണ്ട്? ഞങ്ങളുടെ ഈ വിളികൾ എത്രപേർ വിശ്വസിക്കുന്നുണ്ട്? നിങ്ങളിൽ വളരെ കുറച്ചു പേർ മാത്രമേ ഞങ്ങളുടെ ഈ വിളികളിൽ വിശ്വസിക്കുന്നുള്ളൂ. ഈ തലമുറയുടെ ഹൃദയം കരിങ്കല്ലിന് സമാനം കഠിനമായിരിക്കുന്നു. ഇക്കാലത്തെ മനുഷ്യരുടെ യുക്തിചിന്തയാൽ, ദൈവത്തിന്റെ മാർഗങ്ങളും ദൈവത്തിന്റെ അത്ഭുത പ്രവർത്തികളും അവർ മറന്നിരിക്കുന്നു. ദൈവം സർവ്വശക്തനാണെന്നും അവിടുന്ന് അനന്തകാരുണ്യവാനും ആണെന്നുള്ളത് അവർ വിസ്മരിച്ചിരിക്കുന്നു. ഒരിക്കലും ദൈവത്തിന്റെ സൃഷ്ടികൾ ഇത്രമാത്രം അധപതിച്ചിട്ടില്ല. സോദോം ഗോമോറോ നിവാസികളുടെ കാലത്ത് പോലും ഇത്രമാത്രം മനുഷ്യർ അധപതിച്ചിട്ടില്ല. ദൈവീക കാര്യങ്ങളോടുള്ള നിങ്ങളുടെ താല്പര്യമില്ലായ്മ നിത്യതയെ തന്നെ തുളച്ചു കയറിയിരിക്കുന്നു. നിങ്ങളുടെ വിശ്വാസരാഹിത്യം നിങ്ങളെ തന്നെ കുറ്റം വിധിക്കുന്നു. എന്റെ പ്രത്യക്ഷപ്പെടലുകളെ കുറിച്ചും, ദൈവം പ്രത്യേകമായി അനുഗ്രഹിച്ച ദർശനവും അവിടുത്തെ സന്ദേശവും ലഭിച്ച മക്കളെയും കുറിച്ചും ഉള്ള നിങ്ങളുടെ വിട്ടുവീഴ്ചയില്ലാത്ത കടുത്ത എതിർപ്പും വിമർശനങ്ങളും നിങ്ങളുടെ പതനത്തിനുള്ള ഒരു കാരണമായി തീരുകയാണ്. നിങ്ങൾ അനുതപിച്ച് മാനസാന്തരപ്പെടണമെന്ന് നിങ്ങളുടെ പരിശുദ്ധ മാതാവും നിങ്ങളുടെ രക്ഷകന്റെ അമ്മയുമായ ഞാൻ നിങ്ങളോട് കേണപേക്ഷിക്കുകയാണ്. ഞങ്ങളുടെ അടുക്കലേക്ക് മടങ്ങി വരുക. വിശുദ്ധമായ ജീവിതം നയിക്കുക. ദൈവത്തിന്റെ ദൃഷ്ടിയിൽ വിശുദ്ധരായി ജീവിക്കുക. വിശുദ്ധിയിൽ സൽപ്രവർത്തികൾ നിറഞ്ഞ കരങ്ങളുമായി ദൈവത്തെ അഭിമുഖീകരിക്കാൻ ഒരുങ്ങുക. ദേവാലയത്തിൽ നിന്ന് ഞാൻ സിമന്റ് നടകൾ ഇറങ്ങി പുറത്തേക്ക് പോയി. ഒരു റോസാ പൂന്തോട്ടത്തിലൂടെ നടക്കുന്ന അനുഭവം എനിക്കുണ്ടായി. അത്രമാത്രം സൗരഭ്യം അവിടെയെല്ലാം നിറഞ്ഞിരിക്കുന്നു. ഒരു റോസാ ചെടി പോലും അവിടെ ഉണ്ടായിരുന്നില്ല. പിന്നീട്. എന്റെ സൗരഭ്യത്താൽ ഞാൻ നിന്നെ കുളിപ്പിച്ചു. എന്റെ സാന്നിധ്യം നീ അനുഭവിച്ചറിയണമെന്ന് ഞാൻ ആഗ്രഹിച്ചു. കുഞ്ഞേ, ഈ കൃപാവരം നിനക്ക് നൽകിയതിലൂടെ നീ എത്രമാത്രം ഞങ്ങൾക്ക് പ്രിയപ്പെട്ടവളാണെന്ന് നിന്നെ ഓർമ്മിപ്പിക്കുവാൻ ഞാൻ ആഗ്രഹിച്ചു. ഞാൻ നിന്റെ പരിശുദ്ധ മാതാവാണ്. നിന്റെ അടുക്കൽ വീണ്ടും വരുന്നതിൽ ഞങ്ങൾക്ക് സന്തോഷമുണ്ട്. നിന്നെയും നിന്റെ കുടുംബം മുഴുവനെയും ഞാൻ അനുഗ്രഹിക്കുന്നു. പരിശുദ്ധ മാതാവേ, എല്ലാത്തിനും ഞാൻ അങ്ങേയ്ക്ക് നന്ദി പറയുന്നു. പുഷ്പമേ. അതെ, യേശുവേ. ഇനിമുതൽ നിന്റെ പരിശുദ്ധ അമ്മയെ 'മാമ' എന്ന് വിളിക്കുക. നീ എന്നോട് കാണിക്കുന്ന അടുപ്പം പരിശുദ്ധ അമ്മയോടും കാണിക്കുക. നമ്മൾ, നമുക്ക്, എന്റെ പ്രബോധനങ്ങൾ അനുസ്മരിക്കുക. അതെ, കർത്താവേ. കർത്താവായ ഞാൻ നിങ്ങൾ എല്ലാവരെയും അനുഗ്രഹിക്കുന്നു. 16/8/1988, കർത്താവേ. ഇത് ഞാനാണ്, ഒരിക്കലും സംശയിക്കേണ്ട. യേശുക്രിസ്തുവായ ഞാനാണിത്. എന്റെ കുരിശിൽ നിന്നാണ് ഞാൻ നിന്നെ രക്ഷിച്ചത്. എന്റെ സഭയുടെ ശിരസ്സായ എന്നെ എപ്രകാരമാണ് ഇക്കാലത്ത് കാണുവാൻ കഴിയുന്നതെന്ന് നിന്നെ കാണിക്കുവാനാണ്, അതിദാരുണമായ വേദനയ്ക്കിടയിലും ഞാൻ നിന്നെ എന്റെ കുരിശിൽ നിന്ന് വിളിച്ചത്. എന്റെ അമ്മയുടെ കൈകളിൽ കിടത്തിയിരിക്കുന്ന എന്റെ മൃതദേഹത്തിന്റെ രൂപം എപ്രകാരമാണ് നിങ്ങളുടെ വിശ്വാസത്യാഗം എന്റെ സഭയെ ഒറ്റിക്കൊടുത്തിരിക്കുന്നതെന്ന് നിങ്ങൾ എല്ലാവരെയും കാണിക്കുവാനുള്ള ഒരു പ്രതീകമാണ്. റോമിലെ സാൻ സിൽവസ്ട്ര ദേവാലയത്തിലുള്ള രൂപത്തെയാണ് സൂചിപ്പിച്ചിരിക്കുന്നത്. മകളേ, സഭയുടെ ഇപ്പോഴത്തെ അവസ്ഥ വെളിപ്പെടുത്തുന്ന ശരിയായ രൂപം കാണിക്കുന്നതിന് വേണ്ടി ഞാൻ നിന്നെ ഇവിടേക്ക് നയിച്ചിരിക്കുന്നു. ഈ രൂപത്തിലുള്ള എന്റെ അമ്മയുടെ മുഖത്ത് അവളുടെ ദുഃഖം മുഴുവനും പ്രതിഫലിച്ചിരിക്കുന്നത് നീ കണ്ടു. അവളുടെ കൈകളിൽ ഒറ്റിക്കൊടുക്കപ്പെട്ട, മുറിവേൽപ്പിക്കപ്പെട്ട, ചെമ്മട്ടികളാൽ അടിക്കപ്പെട്ട, ക്രൂശിക്കപ്പെട്ട എന്റെ മൃതദേഹം നീ കണ്ടു. ഈ വിധത്തിലാണ് എന്റെ സഭ ഇപ്പോൾ കാണപ്പെടുന്നത്. ഗാഗുൽതായിൽ എന്റെ മൃതശരീരത്തെ നോക്കിക്കൊണ്ട് എന്റെ അമ്മ കരഞ്ഞതുപോലെ, സഭയുടെ ഇപ്പോഴത്തെ അവസ്ഥയെ പ്രതി എന്റെ അമ്മ രക്തക്കണ്ണീർ പൊഴിച്ചു കരയുകയാണ്. കർത്താവായ ഞാൻ ഉയർത്തെഴുന്നേറ്റതുപോലെ, അധികം താമസിയാതെ എന്റെ സഭ നവീകരിക്കപ്പെടുകയും രൂപാന്തരപ്പെടുകയും ഉയർപ്പിക്കപ്പെടുകയും ചെയ്യും. അതിനുശേഷം എന്റെ സഭ പിന്നെ ഒരിക്കലും പരിതാപകരമായ അവസ്ഥയിൽ സ്ഥിതി ചെയ്യുകയില്ല. എന്റെ ശത്രുക്കൾ എന്റെ ശരീരമായ ദേവാലയത്തെ നശിപ്പിച്ചു; എന്നാൽ ഉന്നതത്തിൽ നിന്ന് ഇറങ്ങിവന്ന ശക്തിയാലും എന്റെ കൃപയാലും, കർത്താവായ ഞാൻ എന്റെ ദേവാലയമായ എന്റെ ശരീരത്തെ മൂന്നാം ദിനം ഉയർപ്പിച്ചു. എന്റെ സഭ പുനർജീവിക്കുമെന്ന് ഞാൻ ഉറപ്പു പറയുന്നു. ഞാൻ രൂപാന്തരപ്പെട്ടതുപോലെ എന്റെ സഭയെ ഞാൻ നവീകരിക്കുകയും രൂപാന്തരപ്പെടുത്തുകയും ചെയ്യും. എന്റെ സഭയെ ഞാൻ പുനർനിർമ്മിക്കും. സത്യസന്ധത അവളുടെ അരക്കച്ചയും വിശ്വസ്തത അവളുടെ അരപ്പട്ടയും ആയിരിക്കും. എന്റെ നാമം അശുദ്ധമാക്കിയ എല്ലാവരെയും വഴികാണിച്ച് അവളുടെ പ്രകാശത്തിൽ നയിക്കുന്നതിനും അവരെ വിശുദ്ധീകരിക്കുന്നതിനും നൈർമല്യം അവളുടെ ദീപസ്തംഭമായിരിക്കും. ദേവന്മാരുടെ കർത്താവായ കുഞ്ഞാടായ ഞാൻ അവളിൽ വസിക്കും. എന്റെ പുനരുദ്ധാനത്തിനു ശേഷം എന്റെ ശിഷ്യന്മാർ എന്നെ സ്വീകരിച്ചതുപോലെ, അവളെയും അവളുടെ മക്കൾ സ്വീകരിക്കും. അതിനുശേഷം തന്റെ കുഞ്ഞിനെ ആശ്വസിപ്പിക്കുന്ന ഒരു അമ്മയെ പോലെ, ഞാനും നിങ്ങളെ അതിനേക്കാൾ കൂടുതലായി ആശ്വസിപ്പിക്കും. വലിയ സ്നേഹത്തോടെ എന്റെ കരങ്ങൾ നിങ്ങളെ ആശ്ലേഷിച്ചു പിടിക്കും. അല്ലയോ, പ്രിയപ്പെട്ട മക്കളേ, നിങ്ങൾക്ക് വസിക്കുവാൻ വേണ്ടി ഞാൻ ഒരു പുതിയ ആകാശവും പുതിയ ഭൂമിയും ഒരുക്കിക്കൊണ്ടിരിക്കുകയാണ്. ജീവന്റെ വൃക്ഷത്തിൽ നിന്നുള്ള പഴങ്ങളാൽ സമൃദ്ധമായിരിക്കും ആ ഭൂമി. ആ ജീവന്റെ വൃക്ഷത്തിന്റെ വേര് സ്നേഹമായതുകൊണ്ട്, അതിന്റെ പഴങ്ങൾക്ക് സമാധാനം, വിശുദ്ധി, സ്നേഹം എന്നീ പേരുകൾ ഉണ്ടായിരിക്കും. ആദ്യ പെന്തക്കോസ്തായിലെ പോലെ, എന്റെ പരിശുദ്ധാത്മാവിനാൽ പൂരിതരായ നിങ്ങൾ, നിങ്ങളുടെ ദൈവമായി എന്നെ കാണും. എന്റെ ആത്മാവ് നിങ്ങളെ സ്നേഹത്താൽ നിറയ്ക്കും. എന്റെ തോട്ടമായ സഭയെ അലങ്കരിച്ചു മൂടിപിടിപ്പിക്കും. എന്റെ പൂച്ചെടികളെ ഞാൻ തന്നെ നനയ്ക്കും. പ്രിയപ്പെട്ടവരെ, നീതിയുടെ എന്റെ മഞ്ഞുതുള്ളികൾ നിങ്ങളിൽ പെയ്തിറങ്ങും. നിങ്ങളിൽ അച്ചരക്കം ശോഭിക്കേണ്ടതിന് എന്റെ പ്രകാശം നിങ്ങളുടെ തായ്ത്തണ്ടിനെ ശക്തിപ്പെടുത്തും. മകളേ, ധൈര്യമായിരിക്കുവിൻ. പ്രിയപ്പെട്ടവരെ, ധൈര്യമായിരിക്കുവിൻ. മരുഭൂമിയിൽ ജീവിക്കുന്നത് ഏറെ ദുഷ്കരമാണെന്ന് എനിക്കറിയാം. എന്നാൽ വിശ്വാസത്യാഗമുള്ള ഈ കാലഘട്ടത്തിന്റെ അന്ത്യം നിങ്ങൾ താമസിയാതെ കാണും. നിങ്ങളെ ശുദ്ധീകരിക്കുന്നതിന് വേണ്ടി താമസിയാതെ ഞാൻ നിങ്ങളിലേക്ക് ഇറങ്ങി വരും. നിങ്ങൾ ഒട്ടും പ്രതീക്ഷിക്കാത്ത സമയത്ത് എന്റെ പ്രകാശം നിങ്ങളുടെ മേൽ പ്രസരിപ്പിച്ചുകൊണ്ട് ഞാൻ നിങ്ങളെ പിടികൂടുമെന്ന് കർത്താവായ ഞാൻ ഗൗരവമായി നിങ്ങളോട് പറയുന്നു. എന്റെ ആകാശഗോളങ്ങൾ ഈ ഭൂമിയെ പ്രകമ്പനം കൊള്ളിക്കും. എന്നെ സ്നേഹിക്കുന്നവർ തങ്ങളുടെ മുട്ടുകൾ എന്റെ മുന്നിൽ മടക്കിക്കൊണ്ട് എന്നെ മഹത്വപ്പെടുത്തും. അനേകർ എന്നെ ഓർക്കുകയും എന്റെ പക്കലേക്ക് മടങ്ങി വരുകയും ചെയ്യും. ഈ സംഭവം 'സഭയുടെ മഹത്തായ മാനസാന്തരം' എന്നറിയപ്പെടും. എന്നാൽ എനിക്ക് വലിയ ദുഃഖം വരുത്തിക്കൊണ്ട് എന്റെ പരിശുദ്ധ നാമത്തെ ദുഷിപ്പിക്കുകയും എന്റെ എതിരാളിയായ സാത്താന്റെ പക്ഷം ചേർന്നുകൊണ്ട് എനിക്കെതിരെ പോരാടുകയും ചെയ്യുന്ന മനുഷ്യർ അപ്പോഴും ഉണ്ടായിരിക്കും. ഇത്തരം മനുഷ്യർ എന്നെ കൂടുതലായി തിരസ്കരിക്കും. ഇത് സംഭവിക്കുമ്പോൾ, സാത്താൻ അവരെ തുടച്ചുമാറ്റി തന്നോടൊപ്പം നിത്യാഗ്നിയിലേക്ക് അവരെ വലിച്ചിഴച്ചു കൊണ്ടുപോകും. വസൂല, എന്റെ തിരുഹൃദയത്തെ തൊട്ട് അനുഭവിച്ചറിയുക. നിന്നോട് ഇക്കാര്യം പറയേണ്ടി വരുന്നതിൽ മനുഷ്യരുടെ വാക്കുകൾക്ക് അതീതമായ ദുഃഖവും വേദനയും ഞാൻ സഹിക്കുന്നു. എന്തെന്നാൽ ഞാൻ സ്നേഹമായ ദൈവമാണ്. ഞാൻ കാരുണ്യമായ ദൈവമാണ്. എന്നാൽ ഞാൻ നീതിമാനായ ദൈവവുമാണ്. എന്റെ സൃഷ്ടികൾ എന്നോട് എതിരിടുമ്പോൾ എനിക്ക് അവരുടെ വിധികർത്താവാകേണ്ടി വരും. എന്റെ ദേഹിക്ക് മുറിവേറ്റിരിക്കുന്നു. എന്റെ രക്തം പുഴ പോലെ ചീറ്റിയൊഴുകുന്നു. ഞാൻ നിങ്ങൾ എല്ലാവരെയും സ്നേഹിക്കുന്നു. എന്നാൽ നിങ്ങൾ എന്നെ മുറിവേൽപ്പിച്ചിരിക്കുന്നു. ഞാൻ നിങ്ങളുടെ പരിശുദ്ധനായ ദൈവമാണ്. എന്നാൽ നിങ്ങൾ എന്നെ കുത്തിത്തുളച്ചിരിക്കുന്നു. എന്റെ കുരിശിൽ കിടന്നുകൊണ്ട് ഇന്ന് നിങ്ങളോട് നിലവിളിച്ചു കരയുന്ന നിങ്ങളുടെ രക്ഷകനാണ് ഞാൻ. എന്റെ അടുക്കലേക്ക് തിരിച്ചു വരുക. എന്റെ പക്കലേക്ക് മടങ്ങി വരുവിൻ. വരൂ, ഞാൻ പരിശുദ്ധനായിരിക്കുന്നതുപോലെ നിങ്ങളും പരിശുദ്ധരായിരിക്കുവിൻ. കുഞ്ഞേ, വരൂ, ഞാൻ നിന്നോടൊപ്പമുണ്ട്. എന്നെ നിന്റെ ഹൃദയത്തിൽ സൂക്ഷിച്ച് എനിക്ക് വിശ്രമമേകുക. എന്നോടൊപ്പം ഒന്നായിത്തീരുക. അതെ, എന്റെ കർത്താവേ, ഞാൻ അങ്ങയെ ആരാധിക്കുന്നു. എന്നെ ആരാധിക്കുക. ഞാൻ ഏറെ തളർന്നിരിക്കുന്നു. എനിക്ക് വിശ്രമമേകുക. നമുക്ക്, നമ്മൾ, കർത്താവേ. അതെ, നമുക്ക്, എന്നെന്നേക്കും, നമ്മൾ. ആമേൻ. പിന്നീട്, പരിശുദ്ധ മറിയം സംസാരിക്കുന്നു. വാസുല, എന്നോട് അടുത്ത ബന്ധത്തിൽ ആയിരിക്കുക. എന്നെ 'അമ്മ' എന്ന് വിളിക്കുക. നിനക്ക് എന്റെ സമാധാനം ഉണ്ടാകട്ടെ. ഞാൻ നിന്നെ സ്നേഹിക്കുന്നു. ഞാനും അങ്ങയെ സ്നേഹിക്കുന്നു. അങ്ങയെ കൂടുതലായി സ്നേഹിക്കുവാൻ എന്നെ പഠിപ്പിക്കുക. യേശു സംസാരിക്കുന്നു. വസൂല, ഞാൻ നിന്നെ എന്റെ തിരുഹൃദയത്തിൽ സൂക്ഷിച്ചിരിക്കുന്നു. കർത്താവേ, ഇങ്ങനെ അങ്ങയെ കണ്ടുമുട്ടുന്നതിനും അങ്ങയെ അനുഭവിച്ചറിയുന്നതിനുമുള്ള കൃപാവരം എനിക്ക് നൽകിയതിന് ഞാൻ അങ്ങേയ്ക്ക് നന്ദി പറയുന്നു. ഇത് നിനക്കുള്ള എന്റെ സൗജന്യദാനമാണ്. എന്നിരുന്നാലും, ഈ കൃപാവരം ഞാൻ നിനക്ക് നൽകിയിരിക്കുന്നത് എന്റെ താല്പര്യങ്ങൾക്കും എന്റെ മഹത്വത്തിനും വേണ്ടിയാണ്. നിന്റെ സ്നേഹം കൊണ്ട് എന്നെ തഴുകുക. നിന്റെ സ്നേഹത്താൽ എനിക്ക് സുഗന്ധം ഏകുക. നിന്റെ സ്നേഹത്താൽ നിന്റെ കർത്താവായി എന്നെ മഹത്വപ്പെടുത്തുക. എന്നിലേക്ക്, എന്നിലേക്ക് മാത്രം നിന്റെ മനസ്സുയർത്തുക. എന്നെ മാത്രമാണ് കണക്കാക്കേണ്ടത്. ഞാൻ സർവ്വവുമാണ്. നിത്യനായവൻ ഞാനാണ്. ഞാൻ ആദിയും അന്ത്യവുമാണ്. നിന്റെ സൃഷ്ടാവായ ഞാൻ രക്ഷിക്കുന്നവൻ. ഞാനാണ് പരിശുദ്ധരിൽ പരിശുദ്ധൻ. സ്നേഹത്തിന്റെ ആത്മാവ് ഞാനായിരിക്കുന്നതിനാൽ എന്റെ അടുക്കലേക്ക് വരിക. നീ എത്രമാത്രം ബലഹീനയാണെന്ന് എനിക്കറിയാം. എന്റെ അടുക്കലേക്ക് വന്ന് എന്നെ സ്നേഹിക്കുക. ഞാനാണ് നിന്റെ ദൈവമെന്ന് ഞാൻ നിന്നെ എപ്പോഴും ഓർമ്മിപ്പിച്ചുകൊണ്ടിരിക്കും. നീ എത്രമാത്രം ബലഹീനയും നികൃഷ്ടയും ആണെങ്കിലും എന്റെ ശക്തി നിന്നെ താങ്ങി നിർത്തും. പ്രിയപ്പെട്ട ദേഹി, എനിക്ക് ആരെയും അത്യാവശ്യമില്ലെന്ന് ഓർക്കണം. എന്റെ പ്രവർത്തികൾ നിറവേറ്റുന്നതിന് എനിക്ക് ഞാൻ തന്നെ മതിയായവനാണ്. എന്നാൽ എന്റെ പ്രവർത്തികൾ എന്റെ സൃഷ്ടികളുമായി പങ്കുവെക്കുന്നത് എനിക്ക് ഇഷ്ടമാണ്. അതിനാൽ, ദേഹി, എന്റെ നേരെ നോക്കുക. ഞാൻ നിന്നോട് കൃപ കാണിച്ചിരിക്കുന്നതിൽ ആനന്ദിക്കുക. നീ ഇപ്പോൾ കാണുന്നത് കാണുവാൻ അതിയായി ആഗ്രഹിച്ചവരും, എന്നാൽ ഒരിക്കലും കാണുവാൻ സാധിക്കാത്തവരും, നീ ഇപ്പോൾ കേൾക്കുന്നവ കേൾക്കുവാൻ അതിയായി ആഗ്രഹിച്ചവരും, എന്നാൽ ഒരിക്കലും കേൾക്കുവാൻ സാധിക്കാത്തവരും, നീ ഇപ്പോൾ അനുഭവിച്ചറിയുന്നത് അനുഭവിച്ചറിയാൻ അതിയായി ആഗ്രഹിച്ചവരും, എന്നാൽ ഒരിക്കലും അനുഭവിച്ചറിയാൻ സാധിക്കാത്തവരുമായ അനേകരുണ്ട്. അതിനാൽ, ദേഹി, നീ ആനന്ദിക്കുക. ആനന്ദിക്കുക. എന്നെ അനവരതം സ്തുതിക്കുക. സ്നേഹമാകുന്ന പുഷ്പചക്രം കൊണ്ട് എന്നെ കിരീടം അണിയിക്കുക. കുന്തിരിക്കധൂപത്താൽ എനിക്ക് സുഗന്ധമേകുക. ശിശുസഹജമായ നിന്റെ സ്നേഹം നിറഞ്ഞ വാക്കുകളാൽ എന്നെ അലങ്കരിക്കുക. പ്രിയപ്പെട്ടവളേ, നിന്റെ കർത്താവായ എന്നെ മഹത്വപ്പെടുത്തുകയും ആരാധിക്കുകയും ചെയ്യുക. എന്റെ അപ്പം എപ്പോഴും നിനക്ക് എന്നിൽ നിന്ന് ലഭിക്കും. നിനക്ക് അത് സമൃദ്ധമായി തന്നെ ലഭിക്കുന്നതാണ്. ദേഹി, നിന്നെ ഞാൻ പരിപോഷിപ്പിക്കും. ഞാൻ നിന്റെ രക്ഷകനാണ്. ഈ സവിശേഷമായ വിധത്തിൽ നിന്റെ ജീവിതാവസാനം വരെ ഞാൻ നിന്നോടൊപ്പം ഉണ്ടായിരിക്കുമെന്ന് ഞാൻ നിന്നോട് വാഗ്ദാനം ചെയ്യുന്നു. ജ്ഞാനം അവളുടെ വിഭവങ്ങൾ നീതിമാന്മാർക്ക് മാത്രമല്ല, അനീതി പ്രവർത്തിക്കുന്നവർക്കും പ്രധാനം ചെയ്യുന്നു. വരൂ.