Latest / ദൈവത്തിലുള്ള യഥാർത്ഥ ജീവിതം - TLIG / Ep 98: ഇന്ന് എന്നെ സ്വീകരിക്കാൻ നിന്റെ ഹൃദയം തയ്യാറാണോ?
Transcript
- എപ്പിസോഡ് 98. 7/8/1989, കർത്താവേ. ഇത് ഞാനാണ്; ചുറ്റും നോക്കി മനസ്സിലാക്കുക. എന്റെ വചനം നിനക്ക് നൽകിയിരിക്കുന്നു; എന്റെ അടയാളങ്ങൾ തിരിച്ചറിയുവിൻ. നീ ഭയപ്പെടേണ്ട. നിന്റെ ഒന്നുമില്ലായ്മ നിമിത്തം ഞാൻ നിന്നിൽ വസിക്കുന്നു; നിന്റെ ബന്ധനങ്ങളിൽ നിന്ന് ഞാൻ നിന്നെ വിമോചിപ്പിച്ചു. നിന്നെ കെണിയിൽ വീഴ്ത്തുവാൻ ആരെയും അനുവദിക്കരുത്. ഞാൻ നിനക്ക് ജ്ഞാനവും വിവേചനശക്തിയും സമൃദ്ധമായി നൽകിയിരിക്കുന്നു. പ്രിയപ്പെട്ടവളേ, ആരും നിന്നെ വഞ്ചിക്കാതിരിക്കട്ടെ. കുഞ്ഞേ, ഞാൻ അവന് എന്റെ സമാധാനവും എന്റെ സ്നേഹവും നൽകുന്നു. കർത്താവായ ഞാൻ അവനോട് ക്ഷമിച്ചതുപോലെ നീയും അവനെ അനുഗ്രഹിക്കുകയും ക്ഷമിക്കുകയും ചെയ്യുക. ഞാൻ തിരുത്തിയ അതേ വ്യക്തിയെക്കുറിച്ച് വീണ്ടും കർത്താവിനോട് ചോദിച്ചപ്പോൾ പറഞ്ഞതാണിത്. എന്റെ വിവേചനം വെറും വൈകാരിക ഭാവനയാണോ, അല്ലെങ്കിൽ യാഥാർത്ഥ്യമാണോ എന്ന സംശയം എനിക്കുണ്ടായിരുന്നു. ആ വ്യക്തിയെ കർത്താവ് അനുഗ്രഹിക്കുന്നതായി സൂചിപ്പിക്കുന്നു. എന്റെ വസൂല, ഞാൻ നിനക്ക് നൽകിയിട്ടുള്ളതെല്ലാം എന്റെ താല്പര്യങ്ങൾ സംരക്ഷിക്കുന്നതിന് വേണ്ടിയിട്ടുള്ളതാണെന്ന് ഞാൻ നിന്നോട് പറഞ്ഞിട്ടുണ്ട്. നിന്നെ പരിപോഷിപ്പിക്കുന്നതിന് വേണ്ടിയായിരുന്നു എന്നിൽ നിന്ന് നേരിട്ട് പ്രബോധനങ്ങൾ സ്വീകരിക്കുവാൻ ഞാൻ നിന്നെ അനുവദിച്ചത്. എന്റെ കൃപയിൽ നിലനിൽക്കുക; എന്റെ കരങ്ങളിൽ നിലനിൽക്കുവിൻ. ഒരിക്കലും ഞാൻ നിന്നെ നിരാശപ്പെടുത്തുകയില്ലെന്ന് കർത്താവായ ഞാൻ നിനക്ക് ഉറപ്പു തരുന്നു. നിന്റെ അച്ചടക്കത്തിന്റെ പേരിൽ അവർ നിന്നെ കർക്കശക്കാരിയായി കരുതും; അവർ നിന്നെ എതിർക്കും, കാരണം എന്റെ വഴികളല്ല അവരുടെ വഴികൾ. ദൈവപ്രചോദിതമായ ഒരു തീരുമാനത്തെ ചിലർ ഭീതിയോടെ സ്വീകരിച്ചതിനാലാണ് യേശു ഇങ്ങനെ പറഞ്ഞത്. എന്നാൽ ഇക്കൂട്ടർ ഒരു നദിയുടെ ശക്തമായ ഒഴുക്കിനെതിരെ നീന്തുന്നവരായിരിക്കും. സമാധാനമായിരിക്കുക; മകളേ, ഞാൻ നിന്നെ അനുഗ്രഹിക്കുന്നു. 9/8/1989, 1989 ഓഗസ്റ്റ് 18-ന് കോക്സിലുള്ള സെന്റ് ജോസഫ് കത്തോലിക്കാ ദേവാലയത്തിൽ നടക്കുന്ന പ്രാർത്ഥനാ സമ്മേളനത്തിന് വേണ്ടി ലഭിച്ച സന്ദേശം: കർത്താവേ. ഇത് ഞാനാണ്; എന്നെ കേൾക്കുക. പ്രിയപ്പെട്ടവരെ, ഞാൻ പരിശുദ്ധനാണ്; പരിശുദ്ധിയുടെ വഴിയിലൂടെ നടക്കാൻ ഞാൻ നിങ്ങളെ ഒരുക്കിക്കൊണ്ടിരിക്കുകയാണ്. എന്റെ കുഞ്ഞുങ്ങളേ, ഭൂമിയിലെ സമ്പത്തുകളോട് പറ്റിച്ചേർന്നിരിക്കരുതെന്ന് ഓർക്കുവിൻ. ഉന്നതത്തിൽ നിന്ന് ഉള്ളവയിലും സ്വർഗീയവും വിശുദ്ധവുമായ കാര്യങ്ങളോടും ചേർന്ന് നിൽക്കുവിൻ. ഞാൻ പരിശുദ്ധനാണ്; നിങ്ങൾ എന്റെ സന്തതികൾ ആയതിനാൽ നിങ്ങൾ പരിശുദ്ധിയിൽ ജീവിക്കണമെന്ന് ഞാൻ ആഗ്രഹിക്കുന്നു. എന്റെ നാമത്തെ പരിശുദ്ധമായി കാത്തുസൂക്ഷിക്കുക; എന്റെ നാമത്തെ പൂജിക്കുവിൻ. എന്റെ സ്വന്തപ്പെട്ടവരെ എന്റെ അടുക്കൽ വന്ന് നിശബ്ദതയിൽ എന്നെ കണ്ടെത്തുക; എന്നെ അനുഭവിച്ചറിയുക. നിങ്ങളെത്തന്നെ പൂർണ്ണമായി എനിക്ക് തുറന്നു തരുവിൻ. നിങ്ങൾ അങ്ങനെ ചെയ്യുമ്പോൾ ഞാൻ നിങ്ങളെ വലിയ ആനന്ദത്തിൽ വളർത്തും. ഞാൻ നിങ്ങളിൽ അറിവ് വർഷിക്കും; നിങ്ങളുടെ ദേഹിയെ എന്റെ അടുക്കലേക്ക് ഉയർത്തി അതിനെ ഞാൻ അലങ്കരിക്കും. എന്റെ പരിശുദ്ധ വചനത്തിന്റെ സ്ഥിരമായ ഓർമ്മപ്പെടുത്തലുകാരനാണ് ഞാൻ; ഞാൻ ശിക്ഷണവും ജ്ഞാനവുമാണ്. തങ്ങളെത്തന്നെ എനിക്ക് സമർപ്പിക്കുന്നവരെ വളർത്തുന്നവനായ ഏകനും അനന്യനുമായ ദൈവം ഞാനാണ്. എന്റെ പ്രകാശത്തിൽ ജീവിക്കുവിൻ; എന്റെ ചിറകുകളുടെ കീഴിൽ നിങ്ങൾ അഭയം കണ്ടെത്തുവിൻ. എന്നിൽ നിന്ന് ഭക്ഷിക്കുക; നിങ്ങളുടെ പൊക്കിൽക്കൊടി ബന്ധം നേരത്തെ തന്നെ മുറിച്ചുമാറ്റരുത്. നിങ്ങളെ പൂർണ്ണമായി ഒരുക്കിക്കൊണ്ട് നിങ്ങൾ ജീവിക്കേണ്ടതിന്, നിങ്ങളുടെ ദേഹിയെ പക്വതയിലും പരിപൂർണ്ണതയിലും എത്തിക്കുവാൻ എന്നെ അനുവദിക്കുക. നിങ്ങൾ എന്നിൽ നിന്നും തിരിഞ്ഞുപോകരുത്; പകലും രാത്രിയും എന്നോടൊപ്പം നടക്കുക. എന്നെ അന്വേഷിച്ചുകൊണ്ട് ഈ മരുഭൂമിയിൽ ഇപ്പോഴും ചുറ്റിത്തിരിയുന്നവരെ ഞാൻ വീണ്ടും വീണ്ടും വിളിക്കുന്നു. ഞാൻ എന്റെ രക്ഷകനെ അന്വേഷിച്ചു, എന്നാൽ ഞാൻ അവനെ കണ്ടെത്തിയിട്ടില്ല എന്ന് പറഞ്ഞുകൊണ്ട് ഈ മരുഭൂമിയിൽ വഴിതെറ്റി നടക്കുന്നവരെ വരുവിൻ. പ്രിയപ്പെട്ടവരെ, നിർമ്മലമായ ഹൃദയത്തോടെ, സ്വാർത്ഥതയില്ലാതെ എന്നെ സ്നേഹിച്ചുകൊണ്ട് എന്നെ കണ്ടെത്തുക. വിശുദ്ധിയിൽ എന്നെ കണ്ടെത്തുക; ഞാൻ നിങ്ങളിൽ നിന്ന് ആഗ്രഹിക്കുന്ന സമർപ്പണത്തിലൂടെ എന്നെ കണ്ടെത്തുക. എന്റെ കല്പനകൾ അനുസരിച്ചുകൊണ്ട് എന്നെ കണ്ടെത്തുക; തിന്മയ്ക്ക് പകരമായി സ്നേഹം നൽകിക്കൊണ്ട് എന്നെ കണ്ടെത്തുക. ഹൃദയ നൈർമല്യം കാത്തുസൂക്ഷിച്ചുകൊണ്ട് എന്നെ കണ്ടെത്തുക. ഇനിമേൽ പാപം ചെയ്യരുത്; തിന്മ പ്രവർത്തിക്കുന്നത് അവസാനിപ്പിക്കുവിൻ. നന്മ ചെയ്യാൻ പഠിക്കുവിൻ. നീതി അന്വേഷിക്കുവിൻ; പീഡിതരെ സഹായിക്കുക. അങ്ങനെ ഈ മരുഭൂമിയും ഈ വരണ്ട നിലവും ആനന്ദിക്കട്ടെ. നിങ്ങളുടെ ആലസ്യം ജ്വലിക്കുന്ന ജ്വാലയായി പരിണമിക്കട്ടെ. നിങ്ങളുടെ താല്പര്യമില്ലായ്മയെ ഉപേക്ഷിച്ചുകൊണ്ട് തീക്ഷ്ണതയിൽ ജ്വലിക്കുവിൻ. ഇവയെല്ലാം ചെയ്യുവിൻ; അങ്ങനെ നിങ്ങൾക്ക് ഇപ്രകാരം പറയാൻ കഴിയട്ടെ: ഞാൻ എന്റെ രക്ഷകനെ അന്വേഷിച്ചു; ഞാൻ അവനെ കണ്ടെത്തിയിരിക്കുന്നു. അവൻ എന്റെ സമീപത്തുണ്ടായിരുന്നു, എന്നാൽ എന്റെ അന്ധകാരത്തിൽ എനിക്ക് അവനെ കാണുവാൻ സാധിച്ചില്ല. ദൈവത്തിന് മഹത്വം ഉണ്ടായിരിക്കട്ടെ; നമ്മുടെ കർത്താവ് വാഴ്ത്തപ്പെടട്ടെ. എന്തുകൊണ്ടാണ് ഞാൻ ഇത്രമാത്രം അന്ധനായി പോയത്? നിങ്ങൾ ജീവിക്കേണ്ടതിന് എന്റെ തത്വങ്ങൾ പാലിക്കുകയും അവ ഹൃദയത്തിൽ സൂക്ഷിക്കുകയും ചെയ്യണമെന്ന് ഞാൻ നിങ്ങളെ ഓർമ്മിപ്പിക്കും. സത്യത്തിൽ നിന്ന് വ്യതിചലിച്ചിട്ടുള്ള ഇടയന്മാരേ, നിങ്ങൾ എല്ലാവരും എന്റെ അടുക്കലേക്ക് വരുവിൻ. നിയമലംഘനത്തിന്റെയും നാശത്തിന്റെയും ഒരു വഴിയും നിങ്ങൾ പരീക്ഷിക്കാതെ വിട്ടുകളഞ്ഞിട്ടില്ലെന്ന് നിങ്ങൾക്ക് എങ്ങനെ പറയുവാൻ കഴിയും? വഴികളില്ലാത്ത മരുഭൂമി നിങ്ങൾ മുറിച്ചുകടന്നെന്ന് നിങ്ങൾക്ക് എങ്ങനെ വീമ്പടിക്കാൻ കഴിയുന്നു? നിങ്ങളുടെ പൊങ്ങച്ചവും ധിക്കാരവും അജഗണത്തിന് എന്താണ് നൽകിയിട്ടുള്ളത്? നിങ്ങൾ അഭിമാനിച്ചിരുന്ന ആട്ടിൻകൂട്ടം ഇപ്പോൾ എവിടെയാണ്? നിങ്ങളുടെ ആട്ടിൻകൂട്ടത്തെ നീതിപൂർവ്വം ഭരിച്ചു എന്ന് നിങ്ങൾക്ക് പറയുവാൻ കഴിയുമോ? ഇടയനായ ഞാൻ നിങ്ങളോട് എപ്രകാരം പെരുമാറിയിരുന്നോ, അപ്രകാരം നിങ്ങളുടെ അജഗണത്തോട് നിങ്ങൾ എപ്പോഴെങ്കിലും പെരുമാറിയിട്ടുണ്ടോ എന്ന് നിങ്ങൾ നിങ്ങളോട് തന്നെ ആത്മാർത്ഥമായി എപ്പോഴെങ്കിലും ചോദിച്ചിട്ടുണ്ടോ? എന്നെ ശ്രവിക്കുവിൻ; എന്റെ ഈ വാക്കുകൾ ഗ്രഹിച്ച് അവയെ ഒരു മുന്നറിയിപ്പായി സ്വീകരിക്കുവിൻ. ഇടയന്റെ ദണ്ഡിനെ അസത്യത്തിന്റെ ദണ്ഡിനു വേണ്ടി കൈമാറിയവരെ, ആയിരങ്ങളെ ഭരിക്കുന്നവരെ, നിങ്ങളുടെ തോളിലുള്ള ഭാരം ഞാനല്ലേ എടുത്തുമാറ്റിയത്? നിങ്ങൾക്കുവേണ്ടി പരിഹാരം ചെയ്തത് ഞാനല്ലേ? കണ്ണീരിന്റെ അപ്പം നിങ്ങൾ ഭക്ഷിക്കുന്നത് എനിക്ക് നോക്കി നിൽക്കുവാൻ പറ്റുമായിരുന്നോ? ഞാൻ ചെയ്തതെല്ലാം നിങ്ങളുടെ ഭാരം എടുത്തുമാറ്റാനും നിങ്ങളെ രക്ഷിക്കാനും വേണ്ടിയായിരുന്നു. വലിയ വാത്സല്യത്തോടെ ഞാൻ നിങ്ങളെ എന്റെ ഇടയന്മാർ എന്ന് പേര് വിളിച്ചു. ഇപ്പോൾ സമയം വളരെ പരിമിതമാണ്; ഞാൻ നിങ്ങൾക്ക് അടയാളങ്ങളും അത്ഭുതങ്ങളും കാണിച്ചു തരുന്നു. ആകാശത്തിൽ പല ലക്ഷണങ്ങളും സൂചനകളും ഞാൻ കാണിക്കുന്നു. വീണ്ടും വീണ്ടും ഞാൻ നിങ്ങൾക്ക് മുന്നറിയിപ്പ് നൽകുന്നു. എന്റെ സ്നേഹത്തിന്റെയും എന്റെ കാരുണ്യത്തിന്റെയും മഹത്തായ അടയാളങ്ങൾ ഞാൻ നിങ്ങളെ കാണിച്ചുകൊണ്ടിരിക്കുന്നു; എന്നാൽ നിങ്ങൾ ഇവയൊന്നും അറിയുന്നതേയില്ല. എന്നെ സ്വീകരിക്കുവാൻ നിങ്ങളുടെ ഹൃദയം ഇന്ന് തയ്യാറാണോ? ഈ നാളുകളിൽ നിങ്ങളുടെ മേൽ ഞാൻ വർഷിച്ചുകൊണ്ടിരിക്കുന്ന കൃപയുടെ ആത്മാവിനെക്കുറിച്ച് ഏറ്റുപറയാനും അംഗീകരിക്കാനും നിങ്ങളുടെ അധരങ്ങൾ ഒരുക്കമാണോ? എന്റെ കൃപയുടെ പ്രവർത്തികളെ നോക്കി കാണാൻ നിങ്ങളുടെ കണ്ണുകൾ തയ്യാറാണോ? എന്റെ സ്നേഹത്തിന്റെ നിലവിളികളെ തിരിച്ചറിഞ്ഞ് അവയെ ശ്രദ്ധിച്ചു കേൾക്കാൻ നിങ്ങളുടെ ചെവികൾ തയ്യാറാണോ? ഈ നാളുകളിലെ എന്റെ കൃപയുടെ പ്രവർത്തികളെ അംഗീകരിക്കാൻ നിങ്ങളുടെ ഹൃദയങ്ങൾ തുറക്കാൻ നിങ്ങൾ തയ്യാറാണോ? മനുഷ്യനായി ഞാൻ കാലിത്തൊഴുത്തിൽ ജനിച്ച വേളയിൽ എന്നെ ആരാധിച്ച് മഹത്വപ്പെടുത്തുവാൻ വന്ന ആദ്യത്തെ ഇടയന്മാരെ പോലെ, എന്റെ മുന്നിൽ സാഷ്ടാംഗം പ്രണമിച്ച് എന്നെ ആരാധിക്കുവാൻ, ആരാധനയുടെ മണിക്കൂറിൽ വരുവാൻ നിങ്ങളുടെ പാദങ്ങൾ ഒരുക്കമാണോ? ഇത്തവണ നിങ്ങളുടെ ഹൃദയം കൊണ്ട് എന്നെ മഹത്വപ്പെടുത്താനും, അതുവഴി എന്നോടുള്ള നിങ്ങളുടെ സ്നേഹവും വിശ്വസ്തതയും എന്റെ ആടുകളെ കാണിച്ചു കൊടുക്കാനും നിങ്ങൾ തയ്യാറാണോ? നിങ്ങൾ മൃതരല്ല, ജീവിച്ചിരിക്കുന്നവരാണെന്ന് നിങ്ങൾ അവകാശപ്പെടുന്നുണ്ടെങ്കിലും, നിങ്ങളിൽ നിന്ന് ഞാൻ യാതൊരു സ്വരവും കേൾക്കാത്തത് എന്തുകൊണ്ടാണ്? നിങ്ങൾ ആരെയും അനുഗ്രഹിക്കുന്ന സ്വരം ഞാൻ കേൾക്കാത്തത് എന്തുകൊണ്ടാണ്? ഞാൻ സ്നേഹിക്കുന്നവർക്ക് ശിക്ഷണം നൽകുകയും അവരെ ശാസിച്ചു തിരുത്തുകയും ചെയ്യുന്നവനാണ് ഞാൻ. വരുവിൻ, പശ്ചാത്തപിക്കുവിൻ; എന്റെ തിരുഹൃദയത്തെ ഇപ്പോൾ ആനന്ദഭരിതമാക്കുവിൻ. ഇനിമേൽ നിങ്ങൾ ലക്ഷ്യമില്ലാതെ ഈ മരുഭൂമിയിൽ വഴിതെറ്റി അലയാതിരിക്കുവാൻ, നിങ്ങളുടെ ഇടയനായ എന്റെ മേൽ നിങ്ങളുടെ ദൃഷ്ടികൾ ഉറപ്പിക്കുവിൻ. സമാധാനത്തിന്റെയും സ്നേഹത്തിന്റെയും ഐക്യത്തിന്റെയും പാതയിലൂടെ നിങ്ങളുടെ പാദങ്ങളെ നയിക്കാൻ ഞാൻ ഇവിടെ സന്നിഹിതനാണ്. എന്റെ രാജ്യത്തിന്റെ താക്കോലെടുത്ത് അത് ഉപയോഗിക്കണമെന്ന് ഞാൻ നിങ്ങളോട് കേണപേക്ഷിക്കുന്നു. എന്റെ രാജ്യത്തിന്റെ താക്കോൽ സ്നേഹമാണ്; സ്നേഹം അതിന്റെ സർവ്വ മഹത്വത്തിൽ തന്നെ. ഐക്യത്തിനുള്ള മറ്റൊരു താക്കോൽ സ്നേഹവും വിനയവുമാണ്. ഈ താക്കോലുകൾ എടുത്ത് അവ ഉപയോഗിക്കുക. എന്റെ പ്രിയപ്പെട്ടവരെ, ഈ താക്കോലുകൾ ഉപയോഗിക്കുവിൻ; നിങ്ങൾ ഐക്യപ്പെട്ട ഒന്നായി തീരുവിൻ; ഒരു വിശുദ്ധ ജനമായി തീരുവിൻ. നിങ്ങളുടെ നെറ്റിത്തടങ്ങളിൽ സ്നേഹത്തിന്റെ എന്റെ നിശ്വാസം ഊതിക്കൊണ്ട് ഞാൻ നിങ്ങൾ ഓരോരുത്തരെയും അനുഗ്രഹിക്കുന്നു. എന്റെ സന്ദേശത്തോട് ഇക്കാര്യം കൂടി ചേർക്കുവാൻ ഞാൻ ആഗ്രഹിക്കുന്നു: താൻ പ്രകാശത്തിലാണെന്ന് പറയുകയും അതേസമയം തന്റെ സഹോദരനെ ദ്വേഷിക്കുകയും ചെയ്യുന്നവൻ ഇപ്പോഴും അന്ധകാരത്തിലാണ്. ക്ഷമിക്കുക; കർത്താവായ ഞാൻ ക്ഷമിക്കുന്നതുപോലെ നിങ്ങളും ക്ഷമിക്കുവിൻ. ഞാൻ പരിശുദ്ധനായിരിക്കുന്നതുപോലെ നിങ്ങളും പരിശുദ്ധരായിരിക്കുവിൻ. എന്റെ സന്ദേശത്തെ ധ്യാനിക്കുവിൻ; എന്റെ സന്ദേശത്തെ ആഴത്തിൽ ധ്യാനിച്ച് സ്വാംശീകരിക്കുവിൻ. സ്നേഹം നിങ്ങളെ എല്ലാവരെയും സ്നേഹിക്കുന്നു. നമ്മുടെ പരിശുദ്ധ മാതാവ് നൽകിയ സന്ദേശം: ഞാൻ നിങ്ങൾ ഓരോരുത്തരെയും അനുഗ്രഹിക്കുന്നു. നിങ്ങൾ നിരന്തരമായി കർത്താവിനെ സ്തുതിക്കണമെന്നും, അവിടുത്തെ സന്ദേശത്തെ പ്രതി അവിടുത്തോട് നന്ദി പ്രകാശിപ്പിക്കണമെന്നും ഞാൻ ആഗ്രഹിക്കുന്നു. ഈ സന്ദേശം വിശ്വസിക്കുകയും ഇത് അനുസരിക്കുകയും ചെയ്യുന്നവർക്ക്, ഇതൊരു ജീവനുള്ള ശക്തി തന്നെയാണ്. കൃപാവരത്തിന്റെ സിംഹാസനത്തെ സമീപിക്കുവാൻ ആത്മവിശ്വാസത്തോടെ വരുവിൻ; കാരണം അവിടുത്തെ കരുണയും സ്നേഹവും നിങ്ങളോടൊപ്പമുണ്ട്. അവിടുന്ന് കരുണാനിധിയാണ്; അവിടുത്തെ നിർദ്ദേശങ്ങൾ പാലിച്ചുകൊണ്ട് അവിടുത്തെ സന്ദേശം നിങ്ങളുടെ ജീവിതത്തിൽ പ്രാവർത്തികമാക്കുവിൻ. അവിടുത്തെ സന്ദേശം വായിക്കുക മാത്രം ചെയ്താൽ പോരാ; സന്ദേശം ഒന്ന് വായിച്ചിട്ട് മാറ്റിവെക്കുക, അടുത്ത സന്ദേശത്തിനു വേണ്ടി കാത്തിരിക്കുക എന്ന രീതിയല്ല. അവിടുത്തെ സന്ദേശം ജീവിതത്തിൽ പ്രാവർത്തികമാക്കുവിൻ; ഇതാണ് അവിടുത്തെ തിരുഹൃദയത്തെ പ്രസാദിപ്പിക്കുന്നത്. എന്റെ മക്കളെ, അവിടുത്തെ സ്വരം ശ്രവിക്കുവിൻ; നിങ്ങളുടെ പ്രശ്നങ്ങളും സഹനങ്ങളും അവിടുത്തേക്ക് സമർപ്പിക്കുവിൻ. അവിടുന്ന് നിങ്ങളെ അനുഗ്രഹിക്കും; അവിടുത്തെ നാമത്തെ പരിശുദ്ധമായി പൂജിക്കുവിൻ. സ്നേഹം നിങ്ങളുടെ മധ്യേ ഉണ്ട്; വരുവിൻ, ഞാൻ നിങ്ങൾ ഓരോരുത്തരെയും അനുഗ്രഹിക്കുന്നു. 12/8/1989, കർത്താവേ. ഇത് ഞാനാണ്; പുഷ്പമേ, ഐക്യവും എന്നോടുള്ള പൂർണ്ണ വിധേയത്വവുമായ ബന്ധവും വിശ്വസ്തതയും തീക്ഷ്ണതയും നിന്നെ എന്റെ അടുക്കലേക്ക് ഉയർത്തും. എന്നെ ആരാധിക്കുക; ഞാനാണ് നിന്റെ ദൈവം. എനിക്ക് വിശ്രമം നൽകുക; ഞാൻ നിന്റെ പരിശുദ്ധ സന്തത സഹചാരിയാണ്. എന്നെ സമാശ്വസിപ്പിക്കുവിൻ; ഞാൻ നിന്റെ മണവാളനാണ്. എന്നിൽ പ്രത്യാശ വയ്ക്കുക; എന്നിൽ മാത്രം ശരണപ്പെടുക, കാരണം ഞാനാണ് രക്ഷിക്കുന്നവൻ. ഞാൻ യേശുവാണ്. 13/8/1989. എന്റെ കുഞ്ഞേ, എന്റെ ആത്മാവ് നിന്റെ മേലുണ്ട്; എന്റെ കരം നിന്റെ കരത്തിന്മേലുണ്ട്; എന്റെ വചനം നിന്റെ അധരങ്ങളിൽ ഉണ്ട്. എന്റെ സുഭാഷിതങ്ങളാണ് നിന്റെ പാദങ്ങൾക്ക് വഴി കാണിക്കുന്ന വിളക്ക്. എപ്പോഴും നീ എന്നെ സ്നേഹിക്കുകയും എന്റെ പ്രമാണങ്ങൾ പാലിക്കുകയും എന്റെ കല്പനകൾ അനുസരിക്കുകയും ചെയ്താൽ, സ്നേഹവും വിശ്വസ്തതയും ഒരിക്കലും നിന്നെ വിട്ടുപിരിയുകയില്ല. ഞാൻ നിന്റെ പ്രത്യാശയായി നിലകൊള്ളും; നീ എന്റെ അവകാശിയായ പുത്രിയായി നിലകൊള്ളും. എന്റെ കുഞ്ഞേ, നിന്നെ വലയം ചെയ്തിരിക്കുന്ന സർവ്വ തിന്മകളെയും ഞാൻ പരാജയപ്പെടുത്തും; നിന്റെ ദുരിതങ്ങളിൽ ഞാൻ ഒരിക്കലും നിന്നിൽ നിന്ന് മാറി നിൽക്കുകയില്ല. എന്റെ കുഞ്ഞേ, നാശാവസ്ഥയിൽ കിടക്കുന്ന ശവങ്ങളെ പോലും രക്ഷിക്കുന്ന എന്റെ നീതിയെയും ശക്തിയെയും നീ പ്രഘോഷിക്കും. ഞാനാണ് പുനരുത്ഥാനം; എല്ലാ ജനങ്ങളും എന്നെ മഹത്വപ്പെടുത്തുകയും സ്തുതിക്കുകയും ചെയ്യും. അവസാനം വരെ ഞാൻ നിന്നോടൊപ്പം ഉണ്ടായിരിക്കും. നമ്മൾ, എന്റെ കുഞ്ഞേ, നമ്മൾ. ഇത് പറഞ്ഞത് നമ്മുടെ പരിശുദ്ധ മാതാവാണ്. നിന്റെ മാതാവായ ഞാൻ എപ്പോഴും നിന്റെ സമീപം ഉണ്ടെന്നുള്ള കാര്യം എപ്പോഴും ഓർക്കുവിൻ; ഇടവിടാതെ പ്രാർത്ഥിക്കുവിൻ. 14/8/1989, പരിശുദ്ധ മാതാവിന്റെ സ്വർഗ്ഗാരോപണ തിരുനാളിന്റെ തലേദിവസം. ഞാൻ കർത്താവാണ്. എന്റെ കുഞ്ഞേ, നിന്റെ പ്രവാസത്തിലേക്ക് ഞാൻ കടന്നുവന്നപ്പോൾ തന്നെ എന്റെ ഹൃദയം സ്നേഹിക്കുന്ന നിന്നെ ഞാൻ കണ്ടെത്തി. ഞാൻ നിന്നെ മുറുകെ പിടിച്ചു; ഞാൻ നിന്നെ നേർവഴിയിലേക്ക് തിരിച്ചു കൊണ്ടുവന്നു. എന്നെ ഗർഭം ധരിച്ച എന്റെ മാതാവിന്റെ ഭവനത്തിലേക്ക് നിന്നെ കൊണ്ടുവരുന്നതിനു മുമ്പ്, ഞാൻ നിന്നെ തനിയെ പോകുവാൻ അനുവദിച്ചില്ല. നാളത്തെ ദിവസം എനിക്കായി സമർപ്പിക്കുക; നിന്റെ ജീവിത സാഹചര്യത്തിൽ എന്റെ സുഗന്ധപൂരിതമായ കുന്തിരിക്കധൂപമായി തീരുക. എന്റെ ആത്മാവ് നിന്റെ മേലുണ്ട്; ധൈര്യമായിരിക്കുവിൻ. ഞാൻ നിന്നെ ഒരിക്കലും കൈവിടുകയില്ല; എന്റെ കുഞ്ഞേ, എന്റെ അനുഗ്രഹങ്ങൾ നിന്റെ മേലുണ്ട്. 16/8/1989. എന്റെ കുഞ്ഞേ, നിനക്ക് സമാധാനം; ഞാൻ നിന്നെ സ്നേഹിക്കുന്നതുപോലെ നീ എന്നെ സ്നേഹിക്കുവിൻ; എന്നെ അനുഭവിച്ചറിയുവിൻ. നീ എന്നെ കാണുമ്പോൾ എന്നെ വിവേചിച്ചറിയുകയും എന്നെ സ്പർശിക്കുകയും ചെയ്യുവിൻ. എന്റെ കുഞ്ഞേ, നിന്നോട് ഇപ്രകാരം ചെയ്യുവാൻ ഞാൻ പറഞ്ഞിട്ടില്ലേ? ഉവ്വ, കർത്താവേ, അങ്ങ് എന്നോട് പറഞ്ഞിട്ടുണ്ട്. നീ അപ്രകാരം ചെയ്യുകയില്ലേ? ഇപ്പോൾ തന്നെ നീ അപ്രകാരം ചെയ്യുകയില്ലേ? അതെ, എന്റെ കരം പിടിക്കുവിൻ; ഞാൻ നിനക്ക് നൽകിക്കൊണ്ടിരിക്കുന്ന ഈ സമാധാനം വഴി നീ എന്നെ തിരിച്ചറിയുവിൻ. എന്റെ കർത്താവേ, ഇനിയും ഞാൻ എന്തിനാണ് ഈ പ്രവാസത്തിൽ അലഞ്ഞു തിരിയുന്നത്? ഇതിന് അവസാനമില്ലാത്തതായി തോന്നുന്നു. എനിക്കതറിയാം; നീ താമസിയാതെ പൂർത്തീകരിക്കുന്ന ഈ ദൗത്യത്തിനു വേണ്ടി ഞാൻ നിന്നെ ചുമതലപ്പെടുത്തിയിരിക്കുന്നു. ഞാൻ നിന്നെ പരിത്യജിക്കുകയില്ല; നീ എന്നെ മഹത്വപ്പെടുത്തുമെന്ന് ഞാൻ ഉറപ്പുവരുത്തും. വസൂല, എന്റെ സമീപം നിലകൊള്ളുക; എനിക്കുവേണ്ടി നീ ഇപ്രകാരം ചെയ്യുകയില്ലേ? എപ്പോഴും എന്റെ കർത്താവായ അങ്ങയെ അനുസരിക്കാൻ ഞാൻ ആഗ്രഹിക്കുന്നു. ഞാൻ നിന്നെ ഒരിക്കലും നിരാശപ്പെടുത്തുകയില്ല; എന്നെ മുറുകെ പിടിക്കുവിൻ; ഞാനാണ് നിന്റെ അധ്യാപകൻ എന്ന് ഓർക്കുവിൻ. നമ്മൾ, നമുക്ക്, അതെ, കർത്താവേ, എന്നേക്കും. 22/8/1989, അങ്ങയുടെ നാമം സ്തുതിക്കപ്പെടട്ടെ; എന്റെ കർത്താവേ, ജീവശ്വാസമുള്ള സർവ്വരും അങ്ങയെ സ്തുതിക്കട്ടെ. സ്നേഹം നിന്നെ സ്നേഹിക്കുന്നു; എന്റെ പരമാതീത സ്നേഹവും കരുണയും നിന്റെ മേലുണ്ട്. എന്നിൽ ആശ്രയിക്കുക; ഞാനാണ് നിന്റെ വഴികാട്ടി, സംശയിക്കരുത്. എന്റെ പ്രിയപ്പെട്ടവളെ, ഞാൻ നിന്നെ എപ്പോഴും സംതൃപ്തിപ്പെടുത്തും; ഒരു നദിപോലെ എന്റെ സമാധാനവും എന്റെ സ്നേഹവും ഞാൻ നിന്നിലേക്ക് ഒഴുക്കിക്കൊണ്ടിരുന്നില്ലേ? ആനന്ദിക്കുവിൻ, എന്തെന്നാൽ കർത്താവായ ഞാൻ നിന്നോടൊപ്പമുണ്ട്. ഇപ്പോൾ എന്റെ വചനം വായിക്കുക. ഞാൻ ബൈബിൾ തുറന്നപ്പോൾ കിട്ടിയത് യേശയ്യാ 49-ാം അധ്യായം 6-ാം വാക്യം. അവിടുന്ന് അരുളി ചെയ്യുന്നു: "യാക്കോബിന്റെ ഗോത്രങ്ങളെ ഉയർത്താനും ഇസ്രായേലിൽ അവശേഷിച്ചിരിക്കുന്നവരെ ഉദ്ധരിക്കാനും നീ എന്റെ ദാസനായിരിക്കുക വളരെ ചെറിയ കാര്യമാണ്. എന്റെ രക്ഷ ലോകാതിർത്തി വരെ എത്തുന്നതിന് ഞാൻ നിന്നെ ലോകത്തിന്റെ പ്രകാശമായി നൽകും." യേശയ്യാ 49-ാം അധ്യായം 6. പിന്നീട്. എന്റെ സ്വന്തം കരത്താൽ തന്നെ എന്റെ മുന്തിരിത്തോട്ടം ഇപ്പോൾ പരിപാലിക്കപ്പെടുന്നു. എന്തെന്നാൽ അഗതികളുടെയും നീതിമാന്മാരുടെയും വിലാപം ഞാൻ കേട്ടിരിക്കുന്നു; പഴത്തിനുവേണ്ടി അവർ ചോദിക്കുന്നത് ഞാൻ കേട്ടു. അതിനാൽ കാരുണ്യവാനായ കർത്താവായ ഞാൻ അഞ്ചപ്പവും രണ്ടു മത്സ്യവും വർദ്ധിപ്പിച്ച് ജനക്കൂട്ടത്തെ തൃപ്തിപ്പെടുത്തിയതുപോലെ തന്നെ ഇപ്പോൾ ഞാൻ എന്റെ പഴം വർദ്ധിപ്പിക്കും. ഈ പഴമായിരിക്കും ഭൂമിയുടെ സൗന്ദര്യവും മഹത്വവും. എന്റെ ശത്രു കടന്നുകയറി എന്റെ മുന്തിരിത്തോട്ടത്തെ നശിപ്പിക്കാതിരിക്കേണ്ടതിന് ഞാൻ എന്റെ മുന്തിരിത്തോട്ടത്തിന് ചുറ്റും ഒരു സംരക്ഷണ മതിൽ നിർമ്മിക്കും. പ്രിയപ്പെട്ടവരെ, മുന്തിരിത്തോട്ടത്തിന്റെ ഉടമസ്ഥനായ കർത്താവായ ഞാൻ നിങ്ങളുടെ മധ്യേ ഉണ്ട്. എന്റെ പ്രിയപ്പെട്ടവരെ, നിങ്ങൾക്ക് പ്രകാശം ലഭിക്കാതിരുന്നത് എന്തുകൊണ്ടാണെന്ന് എനിക്കറിയാം; എന്തുകൊണ്ടാണ് നിങ്ങൾ അന്ധകാരത്തിൽ തടവുകാരായി കഴിഞ്ഞതെന്നും എനിക്കറിയാം. ഈ അന്ധകാരത്തിന് വിപരീതമായ എന്റെ ജ്വലിക്കുന്ന സ്നേഹാഗ്നിയുമായി ഞാൻ നിങ്ങളിലേക്ക് ഇറങ്ങി വരുന്നു. ഭൂമി മുഴുവൻ ഉജ്ജ്വലമായ പ്രകാശത്താൽ പ്രശോഭിക്കും; സ്നേഹമായ ഞാൻ നിങ്ങളുടെ മധ്യേ വസിക്കും. 23/8/1989. വസൂല, ശാന്തമാവുക; സമാധാനത്തിൽ എന്നെ സ്വീകരിക്കുക. നിനക്ക് വേണ്ടിയുള്ള എന്റെ വഴി നിശബ്ദതയിലാണ്; എല്ലായിടത്തും എന്റെ വചനം പ്രഘോഷിക്കുക. ഇക്കാര്യത്തിൽ മടി കാണിക്കരുത്. എന്റെ അനന്തമായ സ്നേഹം നിമിത്തം മുഴുവൻ മനുഷ്യവർഗ്ഗത്തിനുമുള്ള ഒരു സമ്മാനം ഞാൻ നിനക്ക് നൽകിയിട്ടുണ്ട്. എന്നെ സ്തുതിക്കുവിൻ; എന്നെ സ്നേഹിക്കുവിൻ; എന്റെ നാമം പരിശുദ്ധമായി പൂജിക്കുവിൻ; എന്റെ കൃപ നിന്റെ മേലുണ്ട്. എന്നെ ശ്രവിക്കുക; മുന്തിരിപ്പഴങ്ങളുടെ വിളവെടുപ്പ് സമയം എത്തിക്കഴിഞ്ഞാൽ നീ എന്റെ അടുക്കലേക്ക് വരും; നിന്നെ ഞാൻ പൂർണ്ണമായി എന്നോട് ചേർക്കും. നീ ഒന്നുമില്ലായ്മയാണെന്ന് എനിക്ക് അറിയാവുന്നതുകൊണ്ട് അത്യുന്നത ദൈവമായ ഞാൻ നിന്നെ ഒരിക്കലും പരിത്യജിക്കുകയില്ല. നിന്നെ എപ്രകാരം ഞാൻ ആഗ്രഹിക്കുന്നെന്ന് നിനക്ക് മനസ്സിലായില്ലേ? ഒന്നുമില്ലായ്മയായി നിലകൊള്ളുക; നീ എന്നിൽ വസിക്കും. ആത്മസംതൃപ്തയാവുക; ഓരോ വൃന്ദത്തിലുമുള്ള പതിനായിരക്കണക്കിന് മാലാഖമാരാൽ ചുറ്റപ്പെട്ടിരിക്കുന്ന അവർ അനവരതം ആരാധിക്കുന്ന നിന്റെ ദൈവമായ എന്നെ അനുസരിക്കുക. എന്റെ പരിശുദ്ധി അനുഭവിച്ചറിയുക; എന്റെ ദൈവീകത അനുഭവിച്ചറിയുക. നിന്റെ ദൃഷ്ടികൾ എപ്പോഴും എന്നിൽ, എന്റെ തിരുഹൃദയത്തിൽ പതിയട്ടെ; എന്റെ പുഷ്പമായി നിലകൊള്ളുക. വരൂ; ഞാൻ നിന്നെ അനുഗ്രഹിക്കുമ്പോൾ നിന്റെ കണ്ണുകൾ വിനയപൂർവ്വം താഴ്ത്തുക. ഇപ്പോൾ നീ അങ്ങനെ ചെയ്യുമോ? ഞാൻ നിനക്ക് വേണ്ടി തിരഞ്ഞെടുത്തിരിക്കുന്ന ഈ മാർഗം സ്വീകരിക്കുക; ഹൃദയത്തിൽ വിനയമുള്ളവളായി നിലകൊള്ളുക. എന്തെന്നാൽ അതാണ് എന്നെ പ്രസാദിപ്പിക്കുന്നത്. ജ്ഞാനം ലഭിക്കുന്നതിനു വേണ്ടി എന്നോട് ചോദിക്കുക; ഞാൻ നിനക്ക് ജ്ഞാനം സമൃദ്ധമായി നൽകും. വിവേചന വരത്തിനു വേണ്ടി എന്നോട് ചോദിക്കുക; ഞാൻ വിവേചന വരം നിന്റെ മേൽ വർഷിക്കും. നീ എന്നെ ആരാധിക്കുന്ന വേളയിൽ ഇക്കാര്യങ്ങൾ എന്നോട് ചോദിക്കുക. വരൂ; നീ എന്നിൽ നിന്ന് ഇതുവരെ പഠിച്ചിട്ടുള്ള എല്ലാ കാര്യങ്ങളും വിലയിരുത്തുക. ഞാനാണ് നിന്റെ അധ്യാപകൻ; ഞാനാണ് നിന്റെ ഗുരു. ജ്ഞാനത്തിന്റെ അധരങ്ങളിൽ നിന്ന് തന്നെയാണ് നീ പഠിച്ചുകൊണ്ടിരിക്കുന്നത്. എന്റെ വസൂല, ഞാൻ നിന്നെ പോഷിപ്പിച്ചുകൊണ്ടിരിക്കുന്നു; എന്താണ് ഞാൻ നിനക്ക് നൽകുന്നതെന്ന് നിനക്കറിയാമോ? ആത്മീയതയാലാണ് ഞാൻ നിന്നെ പരിപോഷിപ്പിച്ചുകൊണ്ടിരിക്കുന്നത്. അതാണ് എന്റെ പഴം; ജീവന്റെ വൃക്ഷത്തിൽ നിന്നുള്ള എന്റെ പഴം. എന്റെ കർത്താവ് എനിക്ക് നല്ലവനാണ്; അവിടുത്തെ സ്നേഹം ശാശ്വതമാണ്; അവിടുത്തെ വിശ്വസ്തത തലമുറകളോളം നിലനിൽക്കുന്നു. അവിടുന്ന് എന്നെ പാതാളക്കുഴിയിൽ നിന്ന് പിടിച്ചു കയറ്റി; അവിടുന്ന് എന്നെ സൗഖ്യമാക്കി; അവിടുന്ന് എന്റെ പാദങ്ങൾ പാറമേൽ ഉറപ്പിച്ചു; അവിടുന്ന് എന്റെ പാദങ്ങൾ നേരെയാക്കി. എന്റെ കർത്താവേ, എന്തെല്ലാം അത്ഭുതങ്ങൾ അവിടുന്ന് എനിക്കുവേണ്ടി പ്രവർത്തിച്ചു.