Latest / ദൈവത്തിലുള്ള യഥാർത്ഥ ജീവിതം - TLIG / Ep 13: കർത്താവായ ഞാൻ എന്റെ കുഞ്ഞുങ്ങളെ നിത്യമായി സ്നേഹിക്കുന്നു

Transcript

Ep 13: കർത്താവായ ഞാൻ എന്റെ കുഞ്ഞുങ്ങളെ നിത്യമായി സ്നേഹിക്കുന്നു · ദൈവത്തിലുള്ള യഥാർത്ഥ ജീവിതം - TLIG

• എപ്പിസോഡ് 13. 19/1 1987. ഇതാ ഞാൻ, കർത്താവായ യേശുക്രിസ്തുവാണ് ഞാൻ. കുഞ്ഞേ, എന്റെ ഉപദേശങ്ങൾ കൊണ്ട് നിന്നെ പോഷിപ്പിക്കുവാൻ എന്നെ അനുവദിക്കുക. ജ്ഞാനം കൊണ്ട് നിന്നെ പോഷിപ്പിക്കുവാൻ എന്നെ അനുവദിക്കുക. കുഞ്ഞേ, ഫലം പുറപ്പെടുവിക്കുന്നതിനു വേണ്ടി നീ വളരണം. അനേകരെ പോഷിപ്പിക്കുവാൻ പ്രാപ്തയാകുന്നതിന് നീ ഫലസമൃദ്ധിയായി തീരണം. ഞാൻ നിനക്ക് നൽകിക്കൊണ്ടിരിക്കുന്ന ദൗത്യത്തിൽ ജാഗ്രതയുള്ളവളായിരിക്കുന്നതിനും ഞാൻ നിന്നെ പഠിപ്പിക്കും. എന്റെ ജോലി നീ പൂർത്തിയാക്കുന്നതുവരെ നിന്റെ കണ്ണുകൾ എന്റെ മേൽ ഞാൻ പതിപ്പിക്കും. എന്റെ സദസ്സുകളിൽ പ്രവേശിച്ച് നിന്റെ രാജാവിന്റെ ശുശ്രൂഷയിൽ ആയിരിക്കുന്നതിന് ഞാൻ നിന്നെ അനുവദിച്ചിരിക്കുന്നു. അവിടുന്ന് നിന്നെ എല്ലാ കാര്യങ്ങളും പഠിപ്പിക്കും. നിനക്ക് ലഭിക്കുന്ന സന്ദേശങ്ങളുടെ പരിഭാഷകൾ എല്ലാ ജനതകളിലേക്കും വ്യാപിച്ച് എന്റെ സുഭാഷിതങ്ങളുടെ നിഗൂഢാശയം അവരോട് പ്രഘോഷിക്കും. ഈ സന്ദേശങ്ങൾ ശ്രവിക്കുന്നതിന് എന്റെ മക്കൾ ഒന്നിച്ചുകൂടും. ഉണർന്ന് എന്നെ മഹത്വപ്പെടുത്തുക, ഞാൻ നിന്നെ ശക്തിപ്പെടുത്തും. സമുദ്രത്തേക്കാൾ വിശാലമായ പ്രബോധനങ്ങൾ കൊണ്ട് യേശുവായ ഞാൻ നിന്നെ പഠിപ്പിക്കും. പ്രവചനം പോലെ ഞാൻ നിന്റെ മേൽ പ്രബോധനം വർഷിക്കും. ജ്ഞാനത്തിൽ നിന്ന് പഠിച്ച് തൃപ്തിപ്പെടുക. വിശന്നു ദാഹിക്കുന്നവരായ നിങ്ങളെല്ലാവരും വരുവിൻ, എന്തെന്നാൽ എന്റെ അപ്പം സൗജന്യമാണ്. വന്ന് നിങ്ങൾക്ക് തൃപ്തിയാവോളം ഭക്ഷിക്കുക. വന്ന് നിങ്ങളുടെ പാനപാത്രം നിറയ്ക്കുക. പ്രബോധനത്തിന്റെയും ഗ്രഹണശക്തിയുടെയും അപ്പമായ സ്വർഗ്ഗത്തിൽ നിന്നുള്ള എന്റെ അപ്പം കൊണ്ട് നിങ്ങളുടെ അണ്ണാക്കിനെ തൃപ്തിപ്പെടുത്തുക. അല്ലയോ, മകളെ, നീ വളർന്ന് നിന്റെ ശാഖകൾ സമാധാനത്തിന്റെയും സ്നേഹത്തിന്റെയും ഫലങ്ങൾ പുറപ്പെടുവിക്കുന്ന ദിനത്തിനുവേണ്ടി, അതെ, എന്റെ മഹത്വത്തിന്റെ ദിനത്തിനുവേണ്ടി ഞാൻ എത്രമാത്രം കൊതിക്കുന്നുണ്ട്. കർത്താവായ ഞാൻ എന്റെ മക്കളെ നിത്യമായി സ്നേഹിക്കുന്നു. അവരെ ഞാൻ എപ്രകാരം സ്നേഹിക്കുന്നു എന്ന് അവരോട് പറയുക. എന്റെ സ്നേഹത്തെക്കുറിച്ച് അവർ അറിയട്ടെ. അടിക്കുറിപ്പ്: ദൈവത്തിന് നമ്മോടുള്ള സ്നേഹം വാക്കുകളിൽ വിവരിക്കാൻ എനിക്ക് കഴിയുന്നില്ല. ദൈവം ഈ വാക്കുകൾ പറയുന്നതിനിടയിൽ അവിടുന്ന് വളരെ ദുഃഖിതനുമായിരുന്നു. ദൈവത്തിൻറെ വലിയ സ്നേഹം നമ്മൾ അവഗണിക്കുന്നതോർത്ത് ഞാനും വളരെ ദുഃഖിതയായി. കർത്താവേ, ഞാൻ അവരോട് പറയാം. വസൂല, എന്റെ സമീപം നിലകൊള്ളുക, എന്തെന്നാൽ നീ എന്നെ എപ്രകാരം സ്നേഹിക്കുന്നു എന്ന് എനിക്കറിയാം. അടിക്കുറിപ്പ്: അവിടുത്തേക്ക് വളരെയധികം സമാശ്വാസം ആവശ്യമുള്ളതായി എനിക്ക് തോന്നി. എങ്ങനെയാണ് എന്നെ സ്നേഹിക്കുന്നതെന്ന് അവരെ പഠിപ്പിക്കുക. നീ എന്റെ പ്രസാദവരത്തിൽ ആണെന്ന് ഓർക്കുക. കർത്താവേ, ഞാൻ എന്ത് ചെയ്യണമെന്നാണ് അങ്ങ് ആഗ്രഹിക്കുന്നത്? എന്റെ എഴുതപ്പെട്ട സന്ദേശങ്ങൾ നീ പ്രചരിപ്പിക്കണം. ഞാൻ നിന്നെ സഹായിക്കാം. നീ ആഗ്രഹിക്കുമ്പോൾ എന്നെ വിളിക്കുക. എപ്പോഴും ഞാൻ നിന്റെ സമീപത്തുണ്ട്. ഇപ്പോൾ സമാധാനത്തിൽ പോവുക. ദൈവമായ ഞാൻ നിന്നെ സ്നേഹിക്കുന്നു. ഞാനും അങ്ങയെ സ്നേഹിക്കുന്നു. 19/1 1987. യഹോവ നിങ്ങളെ എപ്പോഴെങ്കിലും സന്ദർശിച്ചിട്ടുണ്ടോ? അവിടുത്തെ സാന്നിധ്യത്തെക്കുറിച്ച് നിങ്ങൾക്ക് എന്തെങ്കിലും ഊഹമുണ്ടോ? യഹോവയോടൊപ്പം നിങ്ങൾ എപ്പോഴെങ്കിലും സഞ്ചരിച്ചിട്ടുണ്ടോ? നിങ്ങൾക്ക് ആ അനുഭവം ഉണ്ടെങ്കിൽ അതിനെക്കുറിച്ച് എന്നോട് പറയുക. ദൈവം ഭയാവഹമായ തേജസ്സ് അണിഞ്ഞിരിക്കുന്നു. എന്നോടൊപ്പമുള്ള അവിടുത്തെ സാന്നിധ്യം എന്റെ ബുദ്ധിക്ക് അതീതമാണ്. പരമാധികാരിയായ അവിടുത്തെ ഞാൻ ഭയപ്പെടുന്നു. യഹോവ എന്നെ എവിടേക്കാണ് കൊണ്ടുപോകുന്നത്? എന്നെക്കുറിച്ചുള്ള യഹോവയുടെ ഉദ്ദേശങ്ങൾ എന്താണ്? കർത്താവേ, മുമ്പ് അങ്ങയെക്കുറിച്ച് എനിക്ക് കേട്ടറിവ് മാത്രമേ ഉണ്ടായിരുന്നുള്ളൂ. എന്നാൽ ഇപ്പോൾ ഞാൻ എന്താണ് പറയേണ്ടത്? മനുഷ്യന് വിദൂരത്തുനിന്ന് പോലും വീക്ഷിക്കാൻ കഴിയാത്ത ഒരു ദർശനമായ അങ്ങയുടെ സ്വർഗ്ഗീയ സഭകളുടെ ഒരു ദർശനം എനിക്ക് നൽകപ്പെട്ടു. ഞാൻ എങ്ങനെയാണ് അവിടുത്തെ ഭയപ്പെടാതിരിക്കുക? അവിടുത്തെ സ്നേഹസംഗീതം എല്ലായിടത്തും പ്രഘോഷിക്കുന്നതിനും എല്ലാ ജനതകളോടും അത് ആലപിക്കുന്നതിനും വേണ്ടി എന്നെ കാരുണ്യപൂർവ്വം പുനരുദ്ധരിച്ചവനോട് ഞാൻ പ്രാർത്ഥിക്കുന്നു. മുമ്പോട്ട് പോകുവാനുള്ള എന്റെ പാത യഹോവ തുറന്നു. കർത്താവേ, എനിക്ക് അഗ്രാഹ്യമായ കാര്യങ്ങളെക്കുറിച്ചും എന്റെ ബുദ്ധിക്ക് അതീതമായ അറിവിനെക്കുറിച്ചും ഞാൻ എങ്ങനെ പോയി സംസാരിക്കും? നിഗൂഢമായി നിലകൊള്ളുവാൻ ആഗ്രഹിക്കുന്നതായി ഞാൻ അങ്ങയോട് കേണപേക്ഷിച്ചാൽ, അങ്ങ് അത് ഒരു കുറ്റമായി കണക്കാക്കുമോ? ഇതാ ഞാൻ, ഞാൻ നിന്നെ കേട്ടു. വെളിപ്പെടുന്നതിന് നീ എന്തിനാണ് ഭയപ്പെടുന്നത്? അങ്ങ് സർവ്വശക്തനാണെന്ന് എനിക്കറിയാം. എങ്കിലും, എന്തുകൊണ്ടാണ് യഹോവ തന്നെ തന്നെ 1987ൽ എനിക്ക് വെളിപ്പെടുത്തി തന്നുകൊണ്ടിരിക്കുന്നതെന്ന് എനിക്ക് മനസ്സിലാക്കാൻ കഴിയുന്നില്ല. എന്റെ കർത്താവേ, എന്തിനാണ് അങ്ങ് എനിക്ക് ഈ സന്ദേശങ്ങൾ എല്ലാം നൽകുന്നത്? എപ്രകാരമാണ് ഞാൻ പ്രവർത്തിക്കുന്നതെന്ന് നിന്നെ അറിയിക്കുവാൻ ഞാൻ ആഗ്രഹിക്കുന്നു. സ്വപ്നങ്ങളിലൂടെയും ദർശനങ്ങളിലൂടെയും അടയാളങ്ങളിലൂടെയും ഞാൻ സംസാരിക്കാറുണ്ടെന്ന് നീ കേട്ടിട്ടില്ലേ? ആദ്യം ഞാൻ ഒരു രീതിയിൽ സംസാരിക്കുന്നു, പിന്നീട് എന്നെ ശ്രവിക്കുന്നതുവരെ ഞാൻ മറ്റു രീതിയിൽ സംസാരിക്കുന്നു. ഭയപ്പെടേണ്ട, ജ്ഞാനം നിന്നെ വളർത്തി, അത് നിന്നെ പരിശീലിപ്പിക്കും. ഞാൻ നിന്നെ പുനരുദ്ധരിച്ചു, പിന്നെ എന്തിനാണ് നീ ഭയപ്പെടുന്നത്? ഞാൻ എപ്രകാരമാണ് പ്രവർത്തിക്കുന്നതെന്ന് നീ മനസ്സിലാക്കുന്നുണ്ടോ? ഞാൻ സൈന്യങ്ങളുടെ കർത്താവായ ദൈവമാണ്. കുഞ്ഞേ, എന്നോട് പറയൂ, എന്നെ കൂടുതലായി സ്നേഹിക്കുവാൻ നിന്നെ പഠിപ്പിച്ചത് ആരാണ്? എന്റെ ദൈവമേ, ഈ സന്ദേശങ്ങളിലൂടെ അങ്ങാണ് എന്നെ പഠിപ്പിച്ചത്. അതെ, ഞാനാണ് നിന്നെ പഠിപ്പിച്ചത്. ദൈവത്തിൽ നിന്ന് എന്നെ വേർതിരിച്ചു നിർത്തിയ തിരുശീല പെട്ടെന്ന് കീറിപ്പോയി. ഈ തിരുശീലക്ക് പിന്നിൽ മഹിമയാർന്ന ദൈവം അവിടുത്തെ സിംഹാസനത്തിൽ ഉപവിഷ്ടനായിരിക്കുകയാണെന്നാണ് ഞാൻ ഇതുവരെ വിചാരിച്ചത്. എന്നാൽ ഇതാ, ഈ മണിക്കൂർ എന്നെ ഭയപ്പെടുത്തുന്നു. മനുഷ്യർക്ക് വിലക്കപ്പെട്ടിരിക്കുന്ന ഒരു സ്ഥലമായ എന്റെ സൃഷ്ടാവിന്റെ മുമ്പിലാണ് ഞാൻ ഇപ്പോൾ നിൽക്കുന്നത്. തേജസ്സിന്റെയും പരിശുദ്ധിയുടെയും മുമ്പിൽ നിന്ന് ഞാൻ വിറകൊള്ളുകയാണ്. നീ ഭയപ്പെടുന്നതിന്റെ കാരണം, ഇത് യഹോവയായ ഞാനാണ് എന്ന് നീ തിരിച്ചറിയുവാൻ തുടങ്ങിയിരിക്കുന്നു എന്നതാണ്. അതെ, മകളെ, ആയിരിക്കുന്നവനും ആയിരുന്നവനും വരാനിരിക്കുന്നവനുമാണ് ഞാൻ. ഞാൻ അങ്ങയെ ഭയപ്പെടുന്നു. അങ്ങയുടെ സർവ്വശക്തിയുടെ മുമ്പിൽ നിന്ന് ഞാൻ വിറകൊള്ളുന്നു. ഭയപ്പെടേണ്ട, വരൂ, എന്നെ സമീപിക്കുക. ഞാൻ നിന്നെ സ്നേഹിക്കുന്നു. ഞാൻ ആകുലപ്പെടുകയും ഭാവിഫലത്തെക്കുറിച്ച് ഭയപ്പെടുകയും ചെയ്യുന്നു. ആകുലപ്പെടേണ്ട, ദൈവമായ ഞാനാണ് നിന്റെ പിതാവ്. സ്വർഗ്ഗവും സർവ്വ സൃഷ്ടിജാലവും സൃഷ്ടിക്കപ്പെട്ടത് എന്റെ വിരലുകളാലാണ്. ഞാൻ നിന്റെ മുമ്പിൽ ഉണ്ടെന്ന് ഓർക്കുക. നിന്റെ ശൈശവത്തിൽ ഞാൻ സന്തോഷിക്കുന്നു. നിന്റെ ശൈശവത്വത്തിൽ ഞാൻ സന്തോഷിക്കുന്നു. എന്റെ രക്ഷാകരമായ സ്നേഹം നിങ്ങൾക്കെല്ലാവർക്കും നൽകുന്നതിന് എന്റെ വലിയ സ്നേഹത്തിൽ ഞാൻ ഇറങ്ങി വരുന്നതെന്ന് ഗ്രഹിക്കുവിൻ. കുഞ്ഞേ, എന്റെ സന്ദേശവാഹകയായിരിക്കുക. ഭയപ്പെടേണ്ട, ഞാൻ വഴി നടത്തും. നീ എന്നെ സന്തോഷിപ്പിക്കുന്നു. എന്റെ സന്ദേശങ്ങൾ എഴുതിയെടുത്തുകൊണ്ട് എന്നോടൊപ്പം പ്രവർത്തിക്കുക. എന്റെ സമീപം നിലകൊള്ളുക. എന്നെ ഭയപ്പെടേണ്ട. എന്റെ മധുര സംഭാഷണം കൊണ്ട് ഞാൻ നിന്നെ എന്നോട് ബന്ധിക്കും. അങ്ങനെ എന്റെ സഭയെ ഞാൻ കാത്തു രക്ഷിക്കും. എന്റെ സഭയിൽ വിഷം വ്യാപിച്ചു കൊണ്ടിരിക്കുന്നു. എന്നാൽ എന്റെ ശത്രുക്കളെ ഞാൻ വീഴ്ത്തും. എന്റെ മാർഗങ്ങൾ ഞാൻ നിന്നെ പഠിപ്പിക്കും. മകളെ, എന്നോടൊപ്പം നടക്കുവാൻ നീ പഠിക്കും. ആഗ്രഹിക്കപ്പെടുക, അനുഗ്രഹിക്കപ്പെടുക. ഞാൻ നിന്നെ എത്രമാത്രം സ്നേഹിക്കുന്നുണ്ടെന്നുള്ളത് മറക്കരുത്. അനുഗ്രഹിക്കപ്പെടുക. ഞാൻ നിന്നെ എത്രമാത്രം സ്നേഹിക്കുന്നുണ്ടെന്നുള്ളത് മറക്കരുത്. 25/1 1987. മകളേ, ധൈര്യമായിരിക്കുക. നീ വഹിക്കുന്ന കുരിശു സമാധാനത്തിന്റെയും സ്നേഹത്തിന്റേതുമായ എന്റെ കുരിശാണെന്ന് ക്രിസ്തുവായ ഞാൻ നിന്നെ പഠിപ്പിച്ചിട്ടുണ്ട്. മകളേ, എന്റെ അമൂല്യമായ കുരിശു വഹിക്കുന്നതിന് നീ ഏറെ ആത്മത്യാഗം ചെയ്യേണ്ടിവരും. ശക്തയായി തീർന്ന് സ്നേഹപൂർവ്വം എന്റെ കുരിശു വഹിക്കുക. എന്നോടൊപ്പം നീ അതിൽ പങ്കുചേരും. എന്റെ സഹനങ്ങളിലും നീ പങ്കുചേരും. നിന്റെ സമർപ്പണ പ്രാർത്ഥന കേൾക്കുവാൻ എനിക്ക് സന്തോഷമായിരുന്നു. നിന്നെ എനിക്ക് സമർപ്പിച്ചിരിക്കുന്നതിനാൽ ഞാൻ നിന്നെ ഉന്നതങ്ങളിലേക്ക് ഉയർത്തുകയും എപ്രകാരമാണ് ഞാൻ പ്രവർത്തിക്കുന്നതെന്ന് കാണിച്ചു തരികയും ചെയ്യും. നീ എന്നെ അനുവദിക്കുകയാണെങ്കിൽ ഞാൻ നിന്നെ ഒരു നല്ല വ്യക്തിയായി രൂപപ്പെടുത്തും. എന്റെ മണവാട്ടിയായി തീരുന്നതിന് നിന്റെ സമ്മതം നീ എനിക്ക് നൽകിയിരിക്കുന്നു. ഒരു മണവാട്ടിക്ക് തന്റെ മണവാളനെ അനുഗമിക്കുന്നതിനേക്കാൾ സ്വാഭാവികമായി മറ്റെന്താണുള്ളത്? നിന്റെ വിലയില്ലായ്മ നീ മനസ്സിലാക്കുന്നതിൽ എനിക്ക് സന്തോഷമുണ്ട്. ഭയപ്പെടേണ്ട, ഏതുവിധത്തിലായാലും ഞാൻ നിന്നെ സ്നേഹിക്കുന്നു. എന്നെ ശ്രദ്ധിക്കുക. നിന്റെ ദൗർബല്യങ്ങൾ ഞാൻ നിനക്ക് ചൂണ്ടിക്കാണിച്ചു തരുമ്പോൾ നീ നിരുത്സാഹപ്പെടരുത്. എന്തെന്നാൽ, നിന്നെ സഹായിക്കുവാൻ ഞാൻ നിന്നോടൊപ്പമുണ്ട്. എപ്പോഴും എന്നെ വിശ്വസിക്കുകയും എന്നെ ആശ്രയിക്കുകയും ചെയ്യുക. എന്റെ വചനം വായിച്ചുകൊണ്ട് എന്നെ മനസ്സിലാക്കുക. കണികളിൽ വീഴരുത്. തിന്മയെക്കുറിച്ച് ജാഗ്രതയുള്ളവളായിരിക്കുക. എന്നോട് ചേർന്നിരിക്കുക. നീ സുരക്ഷിതയായിരിക്കും. ഉണർന്നിരിക്കുവാൻ ഞാൻ നിന്നെ എപ്പോഴും അനുസ്മരിപ്പിക്കും. അല്ലയോ, മകളെ, ആ ദിവസത്തിനുവേണ്ടി ഞാൻ എത്രമാത്രം കൊതിക്കുന്നുണ്ട്. ഏതു ദിവസം? എന്റെ സമ്മാനമായി നിന്റെ മനുഷ്യവർഗ്ഗം മുഴുവനിലേക്കും ഞാൻ അയക്കുന്ന ദിവസം. അവരും എന്നെ സ്നേഹിക്കുവാൻ പഠിക്കും. അവർ എന്നെ കൂടുതലായി മനസ്സിലാക്കും. ജ്ഞാനം അവളുടെ നിധികൾ മനുഷ്യവർഗ്ഗം മുഴുവനുമായി പങ്കുവെക്കും. ഇപ്പോൾ സമാധാനത്തിൽ പോയി നിന്റെ ജോലികൾ പൂർത്തിയാക്കുക. നമുക്ക് ഒരുമിച്ചു പോകാം. അതേ ദിവസം തന്നെ കുറച്ചു കഴിഞ്ഞ് എന്റെ ദൈവമായ കർത്താവേ, അങ്ങയുടെ സാന്നിധ്യത്തിൽ എന്റെ ആത്മാവ് എന്റെ ഉള്ളിൽ ഉരുകുന്നു. സന്തോഷവും സമാധാനവും എന്നെ ആവരണം ചെയ്യുന്നു. എന്തെന്നാൽ, ഒരു അനുഗ്രഹ പ്രവാഹത്തിന്റെ കീഴിലാണ് ഞാൻ. വസൂല, എന്റെ സൗഹാർദ്ദവും എന്റെ ഹൃദയത്തിന്റെ സമാധാനവും നീ അനുഭവിച്ചറിഞ്ഞു. നീ ചെന്ന് അവരോട് ഇത് പറയുക: എന്റെ ഹൃദയം ക്ഷമയുടെയും കാരുണ്യത്തിന്റെയും സമാധാനത്തിന്റെയും ഒരു അഗാത ജലധിയാണെന്ന് അവർ എല്ലാവരും അറിയട്ടെ. കുഞ്ഞേ, എന്റെ വിളി ശ്രവിച്ചതിനെ പ്രതി ഞാൻ നിന്നെ സ്നേഹിക്കുന്നു. വരൂ, നമുക്ക് പോകാം. എന്നെ വിവേചിച്ചറിയുകയും എന്നോടൊപ്പം വസിക്കുകയും ചെയ്യുക. 26/1 1987. യേശുവായ ഞാൻ നിന്നെ നിത്യമായി സ്നേഹിക്കുന്നു. എന്നെ ശ്രവിക്കുക. ഇക്കാര്യം എപ്പോഴും ഓർക്കുക. നിന്റെ രക്ഷകനായ യേശുക്രിസ്തുവായ ഞാൻ എന്റെ ഹൃദയത്തിന്റെ അഗാതങ്ങളിൽ നിന്ന് നിന്നെ സ്നേഹിക്കുന്നു. എന്നെ സമീപിച്ച് എന്നെ ശ്രദ്ധിക്കുക. നിന്റെ വിശ്വാസം മുഴുവനും നീ എന്നിൽ അർപ്പിക്കണമെന്ന് ഞാൻ ആഗ്രഹിക്കുന്നു. എന്നിൽ വിശ്വാസം ഉണ്ടായിരിക്കുക. എന്താണ് സംഭവിക്കാൻ ഇരിക്കുന്നത് എന്നതിനെക്കുറിച്ച് നിനക്ക് മുന്നറിയിപ്പ് നൽകുവാൻ ഞാൻ ആഗ്രഹിക്കുന്നു. നിന്നെ വഴി നടത്തുന്നത് യാതൊരു ദുഷ്ടാരൂപിയും അല്ലെന്ന് കാണുമ്പോൾ അവർ നിന്നിൽ മറ്റൊരു സിദ്ധാന്തം ആരോപിക്കും. ഉപബോധമനസ്സ് നിന്നിൽ പ്രവർത്തിച്ചു കൊണ്ടിരിക്കുന്നു എന്ന സിദ്ധാന്തം. പ്രിയപ്പെട്ടവളെ, ഈ തത്വം മസ്തിഷ്കത്തിന്റെ മനഃശാസ്ത്രപരമായ ഒരു വ്യാപാരമാണ്. അനേകർ നിനക്കെതിരെ സംഘടനിക്കും, അനേകർ എന്റെ പ്രമാണം ലംഘിക്കും. നിന്നെ കുറ്റക്കാരിയായി കണക്കാക്കി കൊണ്ട് അനേകർ നിന്നെ വേട്ടയാടും. അവരുടെ ദുഷ്ടത നിന്നെ പീഡിപ്പിക്കും. എന്നാൽ ഞാൻ നിനക്കുവേണ്ടി മറുപടി നൽകും. നിന്റെ വായിലൂടെ ഞാൻ സമാധാനം ആഹ്വാനം ചെയ്യുമ്പോൾ പോലും അവർ എല്ലാവരും യുദ്ധത്തിനുവേണ്ടി മുറവിളി കൂട്ടും. മകളെ, ഞാൻ നിനക്ക് മുന്നറിയിപ്പ് നൽകുന്നു. നിന്റെ കാലഘട്ടം നിന്നെ മാറ്റാതിരിക്കട്ടെ. നിന്റെ രക്ഷകനായ എന്നോട് ഒട്ടിച്ചേർന്നിരിക്കുക. ഞാൻ എപ്പോഴും നിന്റെ സമീപത്തുണ്ട്. നിന്നെ മാനസികമായി പീഡിപ്പിക്കുവാൻ അവരെ അനുവദിക്കരുത്. നിന്നെ സഹായിച്ചുകൊണ്ട് ഞാൻ നിന്റെ സമീപം ഉണ്ടായിരിക്കും. ചിലപ്പോഴൊക്കെ നീ എന്റെ സാന്നിധ്യം വിസ്മരിക്കുന്നതായി തോന്നുന്നു. എന്നോടൊപ്പം വസിക്കുക. അല്ലയോ, വസൂല, മഹത്വത്തിന്റെ ദിവസത്തിനുവേണ്ടി ഞാൻ ഏറെ കൊതിക്കുന്നു. എന്തിനാണ് നിന്റെ ചോദ്യം നീ പിടിച്ചു വെച്ചത്? ശരിയാണ്, യേശുവേ, മഹത്വത്തിന്റെ ദിവസം എന്നതുകൊണ്ട് എന്താണ് അർത്ഥമാക്കുന്നത്? ഞാൻ നിന്നോട് പറയാം, സർവ്വ വെളിപാടുകളും വെളിപ്പെടുന്ന ദിവസമായിരിക്കും അത്. ഞാനും എന്റെ പിതാവും എഴുതിയിട്ടുള്ള സർവ്വതും വെളിപ്പെടുന്ന ദിവസമായിരിക്കും അത്. സത്യം മറഞ്ഞിരിക്കുകയില്ല. വരൂ, ഇപ്പോൾ നീ ഗ്രഹിച്ചു കൊണ്ടിരിക്കുന്നു. അടിക്കുറിപ്പ്: എന്റെ ദൗത്യത്തിനുള്ള സമയം ഇനിയും വന്നെത്തിയിട്ടില്ലെന്ന് എനിക്ക് മനസ്സിലായി. ഞാൻ ഇപ്പോഴും പഠിച്ചുകൊണ്ടിരിക്കുകയാണ്. 28/1 1987. മകളെ, ഇതാ ഞാൻ. ഞാൻ ജ്ഞാനമാണ്. എന്റെ സന്ദേശം മുഴുവൻ മനുഷ്യവർഗ്ഗത്തിനും എത്തിച്ചു കൊടുക്കുവാൻ തയ്യാറാവുക. യേശുക്രിസ്തുവായ ഞാൻ എന്റെ കൃപകൾ വർദ്ധിപ്പിക്കും. ഞാൻ മടിച്ചുനിന്നു. വസൂല, എന്റെ ദൃഷ്ടിയിൽ നീ വ്യത്യസ്തയല്ല. എന്നാൽ, യേശുവേ, അങ്ങയിൽ നിന്ന് സന്ദേശങ്ങൾ സ്വീകരിച്ചിട്ടുള്ള മറ്റുള്ളവരിൽ നിന്ന് ഞാൻ വ്യത്യസ്തയാണ്. അവരിൽ അധികം പേരും ആത്മീയ ജീവിതം നയിച്ചിരുന്നവരാണ്. ഭക്തരായ കന്യാസ്ത്രീകൾ ആയിരുന്നു അവർ. എന്നാൽ ഞാൻ മറ്റു ലൗകിക മനുഷ്യരെ പോലെയാണ്. ഈ ചിത്രത്തിന് ഞാൻ യോജിക്കുകയില്ല. കുഞ്ഞേ, നീ ചിന്തിക്കുന്നത് മാനുഷികമായ രീതിയിലാണ്. എന്റെ സ്നേഹം അനുഭവിച്ചറിയുക. ഇനി തുടർന്നുവരുന്ന സന്ദേശങ്ങൾ യേശു പെട്ടെന്ന് പറഞ്ഞതാണ്. കൂടുതലായി അസംബന്ധം പറയുന്നതിന് എന്റെ വായ് തുറക്കുന്നതിനു മുൻപ് ഈ സന്ദേശങ്ങൾ അരുൾ ചെയ്യുവാൻ അവിടുന്ന് ആഗ്രഹിച്ചു എന്ന് തോന്നത്തക്ക വിധത്തിലായിരുന്നു അവിടുത്തെ സംഭാഷണ രീതി. മകളെ, വരൂ, നമുക്ക് ഒന്നിച്ചായിരിക്കാം. എന്റെ സ്നേഹം അനുഭവിച്ചറിയുക. വന്ന് എന്നോടൊപ്പം പ്രാർത്ഥിക്കുക. ഞങ്ങൾ ഒന്നിച്ചു പ്രാർത്ഥിച്ചു. ദൈവത്തിനു മഹത്വം. നിന്നെ തന്നെ സ്വതന്ത്രയാക്കുകയും എന്നോട് അടുത്തുവരികയും ചെയ്യുക. എന്റെ മേൽ ചാരുക. എന്നെ സന്തോഷിപ്പിക്കുകയും എന്റെ മേൽ ചാരുകയും ചെയ്യുക. വസൂല, ഞാൻ നിന്നെ സ്നേഹിക്കുന്നുണ്ടെന്ന് നീ മനസ്സിലാക്കണമെന്ന് ഞാൻ ആഗ്രഹിക്കുന്നു. നീ എനിക്ക് ചേർന്നവളല്ല എന്ന് നിനക്ക് തോന്നുന്നതിനാൽ എന്നെ സമീപിക്കുന്നത് നീ ഒഴിവാക്കുന്നു. എന്നിൽ നിന്ന് അകന്ന് എന്നെ നിഷേധിക്കുവാൻ പോലും നീ തയ്യാറായി. അടിക്കുറിപ്പ്: വാസ്തവത്തിൽ, യേശുവിന് മനസ്സ് വിഷമിച്ചു. എനിക്ക് പകരം എന്റെ ദാസനായ ദാനിയേൽ നിന്റെ സമീപം ആയിരിക്കുന്നതിന് നീ അപേക്ഷിച്ചു. അടിക്കുറിപ്പ്: യേശുവിന്റെ സ്നേഹത്തിന് ഞാൻ അയോഗ്യമാണെന്ന് എനിക്ക് തോന്നിയതിനാൽ എന്റെ കാവൽമാലാഖയായ ദാനിയേൽ എന്റെ അടുത്ത് വരണമെന്ന് ഞാൻ വിളിച്ചപേക്ഷിച്ചു. ഓ, മകളെ, ഞാൻ നിന്നെ സ്നേഹിക്കുന്നു. എന്റെ ജീവൻ ഞാൻ നിനക്ക് അർപ്പിച്ചിട്ടില്ലേ? അടിക്കുറിപ്പ്: ഒരു വിലാപം പോലെയാണ് ഇത് പറഞ്ഞത്. അങ്ങേയ്ക്കും അങ്ങയുടെ സ്നേഹത്തിനും ഞാൻ യോഗ്യയല്ല എന്ന് എനിക്ക് തോന്നുന്നു. ഈ വിധത്തിൽ ചിന്തിക്കുവാൻ നിനക്ക് എങ്ങനെ കഴിഞ്ഞു? അടിക്കുറിപ്പ്: യേശു വിസ്മയഭരിതനായി കാണപ്പെട്ടു. യോഗ്യർക്കും അയോഗ്യർക്കും എല്ലാവർക്കും വേണ്ടി ഞാൻ എന്റെ ജീവൻ അർപ്പിച്ചു. അത്തരം ചിന്തകൾ ഉപേക്ഷിച്ചുകൊണ്ട് എന്റെ അടുക്കലേക്ക് വരിക. ഞാൻ നിന്നെ വിളിച്ചു കൊണ്ടിരിക്കുന്നു. അതിനാൽ എന്നെ സമീപിക്കുക. എന്നിൽ വിശ്രമിക്കുവാൻ നിന്നെ തന്നെ അനുവദിക്കുക. ഒരിക്കലും എന്നെ നിഷേധിക്കരുത്. നീ ആയിരിക്കുന്നതുപോലെ നികൃഷ്ടയും നിസ്സഹായയും കുറ്റക്കാരിയുമായ നിന്നെ ഞാൻ സ്നേഹിക്കുന്നു. നിന്നെ രൂപപ്പെടുത്തുമെന്ന് ഇതിനോടകം ഞാൻ നിന്നോട് പറഞ്ഞിട്ടുണ്ട്. നിന്നെ തന്നെ എന്റെ കരങ്ങളിൽ നീ സ്വതന്ത്രമായി വിട്ടുതരണം. നീ എന്തായിരിക്കണമെന്ന് ഞാൻ ആഗ്രഹിക്കുന്ന വിധത്തിൽ നിന്നെ രൂപപ്പെടുത്തും. പ്രിയപ്പെട്ടവളെ, വരൂ, ഞാൻ നിന്നോടൊപ്പമുണ്ട്. നിന്നെ വഴി നടത്തുന്ന നിന്റെ പരിശുദ്ധ ചങ്ങാതിയാണ് ഞാൻ. യേശുക്രിസ്തുവായ ഞാൻ നിന്നെ താമസിയാതെ വെളിപ്പെടുത്തും. നീ മനുഷ്യരുടെ ഇടയിൽ ആയിരിക്കേണ്ടവളാണ്. സംഭവിച്ചുകൊണ്ടിരിക്കുന്നത് എന്താണെന്ന് എനിക്ക് മനസ്സിലാകുന്നില്ലെന്ന് യേശുവേ, അങ്ങേയ്ക്ക് അറിയാമല്ലോ. എന്നാൽ ഈ വിധത്തിൽ അങ്ങയോടൊപ്പം ആയിരിക്കുന്നതിൽ എന്റെ ആത്മാവ് സന്തോഷിക്കുന്നു. എന്റെ കണ്ണുകൾ അങ്ങയിൽ പതിഞ്ഞിരിക്കുന്നു. അങ്ങ് ജീവിക്കുന്ന രക്ഷകനാണെന്ന് ഞാൻ ഇപ്പോൾ അറിയുന്നു. ഇതാ, എന്റെ മുറിയിൽ അങ്ങ് എന്റെ ചെവിയിൽ ഒരു സന്ദേശം മന്ത്രിച്ചു കൊണ്ടിരിക്കുന്നു. അങ്ങയുടെ സ്നേഹസംഗീതവുമായി ജനതകളുടെ അടുക്കലേക്ക് അയക്കപ്പെടുന്നതിന് ആയിരങ്ങളിൽ നിന്ന് അങ്ങ് എന്നെ തെരഞ്ഞെടുത്തിരിക്കുന്നു. കൂടുതലായി എന്താണ് എനിക്ക് ചോദിക്കുവാൻ സാധിക്കുക? അങ്ങയുടെ തിരഞ്ഞെടുപ്പ് മൂലം അനേകർ ആശയക്കുഴപ്പത്തിൽ ആകുമെങ്കിലും, അങ്ങയുടെ തീവ്രാഭിലാഷം അവരുടെ ഹൃദയങ്ങളെ നേടിയെടുക്കും. ഈ പ്രവാസത്തിൽ നിന്ന് എന്റെ ആത്മാവിനെ പൊക്കിയെടുക്കുന്നതിനു വേണ്ടി അങ്ങ് അങ്ങയുടെ സിംഹാസനത്തിൽ നിന്ന് അങ്ങയുടെ രാജകീയ കിരീടം മാറ്റിവെച്ചുകൊണ്ട് വീണ്ടും ഈ നിമിഷം ഇറങ്ങി വന്നിരിക്കുന്നു. അതെ, അങ്ങയെ അനുഗമിക്കുവാൻ ഞാൻ ആഗ്രഹിക്കുന്നു. നിന്നെ എന്നോടൊപ്പം കൊണ്ടുപോകാൻ എനിക്ക് സന്തോഷമാണ്. എന്നെ അനുഗമിക്കുക. നീ ചെയ്യുന്നതെല്ലാം എന്നോടൊപ്പം ചെയ്യപ്പെടുന്നതായിരിക്കും എന്ന് ഓർക്കുക. അവസാനം വരെ ഞാനായിരിക്കും നിന്റെ വഴികാട്ടിയും, നിന്റെ വിളക്കും, നിന്റെ അഭയസങ്കേതവും. അപ്പോൾ ഞാൻ വന്ന് നിന്നെ രക്ഷിക്കും. നീ ആഗ്രഹിക്കുമ്പോൾ എന്നെ വിളിക്കുക. ഞാൻ സ്വർഗ്ഗത്തിൽ നിന്ന് ഇറങ്ങി വരും. എന്റെ സാന്നിധ്യം വിസ്മരിക്കരുത്. നിന്നെ തന്നെ എനിക്ക് പൂർണമായി വിട്ടുതരിക. എന്റെ സ്നേഹത്താൽ ഞാൻ നിന്നെ ദഹിപ്പിക്കും. നിന്റെ നികൃഷ്ടത എന്നെ ആകർഷിക്കുന്നു. വന്ന് നിനക്ക് എന്നോടുള്ള സ്നേഹത്താൽ എന്നെ മഹത്വപ്പെടുത്തുക. എന്റെ പ്രബോധനങ്ങൾ സ്വീകരിക്കുക. എന്നാൽ അവ അനേകരെ പോഷിപ്പിക്കുവാൻ ഉദ്ദേശിച്ചിട്ടുള്ളതാണ്. രക്ഷ എന്നിൽ നിന്നാണ് വരുന്നത്. ഞാൻ നിന്നോട് പറയട്ടെ, ദരിദ്രർക്ക് തൃപ്തി വരുവോളം ഭക്ഷിക്കുവാൻ ലഭിക്കും. ദരിദ്രരെ ഞാൻ വിസ്മരിക്കുന്നതായി ഒരിക്കലും കേട്ടിട്ടില്ല. അതിനാൽ വരൂ, എന്റെ ഹൃദയത്തിന്റെ അഗാതങ്ങളിലേക്ക് നിന്നെ പ്രവേശിപ്പിക്കുവാൻ എന്നെ അനുവദിക്കുക. എന്റെ സ്നേഹം അളവറ്റതാണ്. മകളെ, എന്റെ ഹൃദയത്തിൽ വസിക്കുക. നീ സുഖപ്പെടും.