Latest / ദൈവത്തിലുള്ള യഥാർത്ഥ ജീവിതം - TLIG / Ep 43: അവസാനം വരെ എന്നിൽ അന്ധമായി വിശ്വസിക്കുക.
Transcript
- എപ്പിസോഡ് 43. 16/8/1987. എന്റെ ദൈവമേ, ഞാൻ അങ്ങയെ സ്നേഹിക്കുന്നു. വസൂല, എന്റെ ദൃഷ്ടിയിൽ നിന്നിൽ നല്ല മാറ്റം സംഭവിച്ചിട്ടുണ്ട്. എന്നെ ശ്രവിച്ച് എഴുതുക: ഇന്നത്തെ ആബേൽ ജീവിക്കും; നിന്റെ ദൈവത്തിൽ ആശ്രയിക്കുക, ആബേൽ ജീവിക്കും; ഇത്തവണ ആബേൽ ജീവിക്കും. പ്രിയപ്പെട്ടവളേ, ലോകം അതിന്റെ ബലഹീനതയിൽ കായന്മാരെ കൊണ്ട് നിറഞ്ഞിരിക്കുന്നു. എന്റെ ആബേലുമാർ കായന്മാരാൽ നിന്ദിക്കപ്പെടുകയും കൊല്ലപ്പെടുകയും ചെയ്യുന്നത് ഞാൻ എക്കാലവും നോക്കി കണ്ടുകൊണ്ടിരിക്കുമോ? എന്റെ കൺമുൻപിൽ എത്രപേർ കൊല്ലപ്പെടണം? ഇല്ല, വസൂല, എന്റെ മുറിവുകൾ വീണ്ടും തുറക്കപ്പെട്ടിരിക്കുകയാണ്; ഈ തലമുറ കായന്മാരുടെ സന്തതി പരമ്പരയാണ്. പ്രിയപ്പെട്ടവളേ, ഓരോ തവണയും ഒരു ആബേൽ ഉയർന്നുവരുമ്പോൾ, യാതൊരു മടിയും കൂടാതെ ഒരു കായൻ തന്റെ കുറ്റകൃത്യം ആവർത്തിക്കുന്നു. പ്രിയപ്പെട്ടവളേ, നീ ഈ കാര്യം മനസ്സിലാക്കുക. ദൈവം സങ്കടത്തോടെയാണ് ഇത് പറയുന്നത്, ഞാനും സങ്കടത്തിലായി. എന്താണ് അതിന് കാരണം? ആബേലുമാർ എന്റെ സന്തതികൾ ആയതുകൊണ്ട്. ആബേലുമാർ എന്നിൽ നിന്ന് വരുന്നു. കായന്മാരോ? കായന്മാരോ, അവർ ഈ ലോകത്തിന്റേതാണ്. അവർ മനുഷ്യരിൽ നിന്നുള്ളവരാണ്. എന്നാൽ ഇത്തവണ ഞാൻ കായന്റെയും ആബേലിന്റെയും മധ്യേ ഇടപെടും. കായനിൽ നിന്നുള്ളതെല്ലാം ഞാൻ ഉന്മൂലനം ചെയ്യും. ഞാൻ കായനിൽ നിന്ന് അവന്റെ ആയുധം പിടിച്ചുമാറ്റി അവനെ നിരായുധനാക്കും, അവനെ നഗ്നനാക്കും. അവൻ ആബേലിനെ നിരായുധനായി നേരിടേണ്ടി വരും. വസൂല, ഞാൻ ഇതെല്ലാം നിനക്ക് വ്യക്തമാക്കി തരികയാണ്. എന്നെ നോക്കുക; എന്റെ അധരങ്ങളെ നീ നിരീക്ഷിക്കുമ്പോൾ നിനക്ക് മനസ്സിലാകും. ഇപ്പോഴും നീ എനിക്കുവേണ്ടി പ്രവർത്തിക്കുവാൻ തയ്യാറാണോ? അതെ, ദൈവമേ, അങ്ങനെ അനുവദിക്കുകയാണെങ്കിൽ. അതെ, കർത്താവേ, എനിക്ക് സന്തോഷമാണ്; കർത്താവ് പുഞ്ചിരിക്കുന്നു. എന്നാൽ വരൂ, നമുക്ക് ഒന്നിച്ച് പ്രവർത്തിക്കാം. 20/8/1987. എന്റെ ദൈവമേ. ഞാനാണ്. അങ്ങ് കഴിഞ്ഞ ദിവസം നൽകിയ സന്ദേശം എനിക്ക് മനസ്സിലാക്കുവാൻ കഴിഞ്ഞെന്ന് തോന്നുന്നു. കുഞ്ഞേ, നീ ഒരു ഭാഗം മാത്രമേ മനസ്സിലാക്കിയിട്ടുള്ളൂ. കായൻ എന്ന് ഞാൻ മനസ്സിലാക്കിയതിൽ മനുഷ്യരുടെ ശാസ്ത്ര-സാങ്കേതിക അറിവ്, ആത്മീയമല്ലാത്തവ എന്നിവ ഉൾപ്പെടുമോ? അതെ, കായൻ പ്രതിനിധീകരിക്കുന്നത് ലോകത്തിന്റേതായ എല്ലാ കാര്യങ്ങളെയും ആണ്. എഴുതുക: എന്റെ കണ്ണുകൾ വെറുക്കുന്ന എല്ലാറ്റിനെയും ആണ് കായൻ പ്രതിനിധീകരിക്കുന്നത്. ഈ യുഗത്തിലെ തിന്മകൾ—ഭൗതികവാദം, വിപ്ലവങ്ങൾ, വെറുപ്പ്, യുക്തിവാദം, ഞാൻ തിരഞ്ഞെടുത്തവരെ പീഡിപ്പിക്കൽ, അധാർമികത—ഇവയെല്ലാമാണ് കായൻ പ്രതിനിധീകരിക്കുന്നത്. എന്റെ പ്രതിഛായയിൽ ഞാൻ രൂപം കൊടുത്ത ആബേലിനെ കായൻ ഒരിക്കലും മനസ്സിലാക്കുവാൻ കഴിഞ്ഞില്ല. ആബേൽ എന്നിൽ നിന്ന് വരുന്നു; അവൻ എന്റെ സന്തതിയാണ്. ഇതിന്റെ അർത്ഥം ആബേൽ ആത്മീയനും അങ്ങയെ സ്നേഹിക്കുന്നവനും ആണെന്നല്ലേ? കൃത്യമായി അങ്ങനെ തന്നെ. ഈ വ്യത്യാസം കൊണ്ട് തന്നെയാണ് ആബേലിനെ കായൻ വെറുത്തത്. ഞാൻ പറഞ്ഞിട്ടുണ്ടല്ലോ, ആത്മാവിൽ നിന്ന് വരുന്നത് ബുദ്ധിമാന്മാർ ഗ്രഹിക്കുകയില്ലെന്ന്. കർത്താവേ, ഒരു കാര്യത്തെക്കുറിച്ച് ഞാൻ വിഷമിക്കുന്നു. അത് ഇവിടെ എഴുതുവാൻ ഞാൻ ആഗ്രഹിക്കുന്നില്ല. എനിക്കറിയാം. അവന്റെ ബുദ്ധിയെ ഉണർത്തുവാൻ ഞാൻ ആഗ്രഹിക്കുന്നു. നിന്നെ സംബന്ധിച്ച് ഏതാണ് പ്രധാനപ്പെട്ടത്? കഠിനമായ തിരികല്ലുകളുടെ കീഴിൽ അവനെ വിടുന്നതാണോ, അഥവാ നീ അവനുവേണ്ടി സഹിക്കുവാൻ തയ്യാറാകുന്നതാണോ? ഏതാണ് നീ തിരഞ്ഞെടുക്കുന്നത്? യാതൊരു മടിയും കൂടാതെ ഞാൻ അവനുവേണ്ടി സഹിക്കാം. ഞാൻ നിന്നെ നിന്റെ ഉറക്കത്തിൽ നിന്ന് ഉണർത്തി. മറ്റുള്ളവർക്ക് വേണ്ടിയും നീ സഹിക്കുകയില്ലേ? ഓ, കർത്താവേ. എന്റെ കരത്താൽ വിശുദ്ധീകരിക്കപ്പെട്ടവളേ, അങ്ങനെയെങ്കിൽ നിന്നിലൂടെ പ്രവർത്തിക്കുവാൻ എന്നെ അനുവദിക്കുക. പ്രിയപ്പെട്ടവളേ, എന്റെ ആത്മാവ് നിന്റെ മേലുണ്ട്. വിവാഹ ഉടമ്പടി ചെയ്യപ്പെട്ടവളേ, എന്റെ പ്രിയപ്പെട്ടവളേ, ഞാൻ നിനക്ക് സൗജന്യമായി നൽകിയിരിക്കുന്നു; നീയും സൗജന്യമായി നൽകുക. വന്ന് എന്നിൽ സ്വയം ഇല്ലാതായി തീരുക, എന്നോടൊന്നായി തീരുക. വസൂല, ഞാൻ നിന്നെ സ്നേഹിക്കുന്നു. യേശുവേ, അങ്ങ് ആഗ്രഹിക്കുന്നതെല്ലാം ഞാൻ ചെയ്യാം. എനിക്ക് വാക്കുകൾ കിട്ടുന്നില്ല, കാരണം ഞാൻ പറയുന്നതൊന്നും മതിയാകുന്നില്ല. എന്നാൽ വരൂ, ഞാൻ എന്റെ സൃഷ്ടിയെ പുനരുദ്ധരിക്കും. നമ്മൾ നമുക്ക്. അതെ. 23/8/1987. ഇന്നലെ വളരെ വിശേഷമായ ഒരു സംഭവം നടന്നു. വളരെ തിരക്കുള്ള ദിവസമായിരുന്നു; അത് തുണി അലക്കുവാനുള്ള ദിവസവും ആയിരുന്നു. ഞാൻ വാഷിങ് മെഷീനിൽ തുണി അലക്കുകയും ഡ്രയറിൽ അവ ഉണക്കുകയും ചെയ്തുകൊണ്ടിരുന്നു. നല്ല ചൂടുള്ള ദിവസമായിരുന്നതുകൊണ്ട് എന്റെ ഭർത്താവും മകനെയും കൂട്ടിക്കൊണ്ട് നീന്തൽക്കുളത്തിലേക്ക് പോയി. ഉച്ച കഴിഞ്ഞ് 3 മണിക്ക് തിരിച്ചുവന്ന് ഊണ് കഴിക്കാം എന്ന് പറഞ്ഞുകൊണ്ട് 11 മണിക്ക് അവർ നീന്തൽക്കുളത്തിലേക്ക് പോയി. ഉച്ചഭക്ഷണം 3 മണിക്ക് എനിക്ക് തയ്യാറാക്കണം; ഞാൻ മാത്രമേ വീട്ടിൽ ഉണ്ടായിരുന്നുള്ളൂ. വീട്ടിൽ പലവിധ ജോലികളിൽ ഞാൻ വ്യാപൃതയായി. 2 മണിക്ക് 10 മിനിറ്റ് ഉള്ളപ്പോൾ ഞാൻ ഉച്ചഭക്ഷണം തയ്യാറാക്കുവാൻ അടുക്കളയിലേക്ക് ചെന്നു. ബട്ടർ ഉരുക്കുന്നതിന് ഞാൻ അടുപ്പിന്റെ സ്വിച്ച് ഓൺ ചെയ്തു. പെട്ടെന്ന് എല്ലാ ലൈറ്റുകളും ഓഫ് ആയിപ്പോയി. മെയിൻ സ്വിച്ച് തനിയെ ഓഫ് ആയിപ്പോയി. എല്ലാ മെഷീനുകളും പ്രവർത്തനം നിർത്തി. വീട്ടിൽ എവിടെയെങ്കിലും കറന്റ് ഉണ്ടോ എന്ന് ഞാൻ പരിശോധിച്ചു. വീട്ടിൽ മൊത്തം കറന്റ് നിലച്ചു. ഫ്യൂസ് മാറ്റുവാൻ നോക്കിയപ്പോൾ മനസ്സിലായി എന്റെ ഭർത്താവ് ഫ്യൂസുകൾ മറ്റെവിടെയോ മാറ്റിവെച്ചിരിക്കുന്നു. അന്ന് ഞായറാഴ്ച ആയിരുന്നതിനാൽ കടകളെല്ലാം അടച്ചിരിക്കുന്നു. ഞങ്ങളുടെ കാർ കേടായതിനാൽ അത് ഉപയോഗിക്കുവാനും പറ്റുന്നില്ല. എനിക്ക് നിരാശ തോന്നി. നിരാശ മൂലം ഞാൻ ബെഡ്റൂമിലേക്ക് പോയി. ഏതാണ്ട് 5 മിനിറ്റ് സമയം കഴിഞ്ഞപ്പോൾ അടുക്കളയിൽ നിന്ന് എന്തോ ശബ്ദം കേട്ടു. ഞാൻ അടുക്കളയിൽ ചെന്നപ്പോൾ അടുപ്പ് പ്രവർത്തിക്കുന്നുണ്ട്, എന്നാൽ മറ്റു മെഷീനുകൾ ഒന്നും പ്രവർത്തിക്കുന്നില്ല. വീട്ടിൽ മറ്റൊരിടത്തും കറന്റ് ഇല്ലായിരുന്നു. മെയിൻ സ്വിച്ച് ഓഫ് ആയി കിടക്കുമ്പോൾ അടുപ്പ് പ്രവർത്തിക്കുന്ന കാര്യം എനിക്ക് മനസ്സിലാക്കുവാൻ കഴിഞ്ഞില്ല. ഞാൻ ഭക്ഷണം തയ്യാറാക്കി. 3 മണിക്ക് എന്റെ ഭർത്താവ് തിരിച്ചെത്തിയപ്പോൾ ഞാൻ ഇക്കാര്യം പറഞ്ഞു. അദ്ദേഹം വീട് പരിശോധിച്ചപ്പോൾ അടുപ്പൊഴികെ മറ്റൊരിടത്തും കറന്റ് ഇല്ല. മെയിൻ സ്വിച്ച് പരിശോധിച്ചപ്പോൾ അത് പ്രവർത്തനരഹിതമായി കിടക്കുന്നത് അദ്ദേഹം കണ്ടു, എന്നാൽ മീറ്റർ കറങ്ങിക്കൊണ്ടിരുന്നു. എന്നാൽ ഭക്ഷണം തയ്യാറായിരിക്കുന്നു എന്ന് ഞാൻ പറഞ്ഞ നിമിഷത്തിൽ തന്നെ മീറ്റർ കറങ്ങുന്നത് നിന്നുപോയി, പക്ഷേ അടുപ്പ് പ്രവർത്തിക്കുന്നു. ഞാൻ അടുപ്പ് ഓഫ് ആക്കി. പിന്നീട് എന്റെ ഭർത്താവ് ഫ്യൂസ് മാറ്റി. അപ്പോൾ കറന്റ് പ്രവർത്തിക്കുവാൻ തുടങ്ങി. അദ്ദേഹത്തിനും ഇക്കാര്യം വിശദീകരിക്കുവാൻ കഴിഞ്ഞില്ല. ആഗസ്റ്റ് നമ്മുടെ വാർഷിക ഉത്സവമാണ്. നമ്മുടെ ഉത്സവം തടസ്സപ്പെടുത്തുവാൻ നമ്മൾ ആഗ്രഹിക്കുന്നില്ല. അങ്ങ് എന്താണ് അർത്ഥമാക്കുന്നത്? നമ്മുടെ വാർഷിക ഉത്സവ സമയത്ത് നീ വിഷമിക്കുവാൻ ഞാൻ ആഗ്രഹിക്കുന്നില്ല. വസൂല, നീയാണ് എന്റെ പുഷ്പം. പുഷ്പം എന്തിനെ സൂചിപ്പിക്കുന്നു എന്ന് നിനക്കറിയാമോ? പുഷ്പം ബലഹീനതയുടെ പ്രതീകമാണ്, അതുകൊണ്ടാണ് നിന്റെ ബലഹീനത നിനക്ക് ദോഷം ചെയ്യാതിരിക്കാൻ ഞാൻ വേണ്ട കരുതൽ എടുക്കുന്നത്. ദൈവമേ, അങ്ങേയ്ക്ക് നന്ദി. അങ്ങ് എന്റെ ഏറ്റവും അടുത്തുണ്ടെന്ന് എനിക്കറിയാം. ഞാൻ അങ്ങയെ സ്നേഹിക്കുന്നു. ഞാൻ ഇതിനൊന്നിനും അർഹതയില്ലാത്തവളാണെന്ന് ചിന്തിച്ച് ഞാൻ വിഷമിച്ചു. ഇന്നലെ വൈകുന്നേരം ഞാൻ എന്റെ മകന്റെ മുറിയിൽ ആയിരിക്കെ കുന്തിരിക്ക് ധൂപത്തിന്റെ സുഗന്ധം അനുഭവപ്പെട്ടു. സുഗന്ധം മുറിയുടെ ഒരു പ്രത്യേക ഭാഗത്ത് മാത്രമേ ഉണ്ടായിരുന്നുള്ളൂ. എനിക്ക് സന്തോഷമായി, എന്റെ ദൈവമേ. ഞാനാണ്. ഞാൻ നിന്നെ സ്നേഹിക്കുന്നു. സംശയിക്കരുത്. നീ ഒറ്റയ്ക്കല്ല. പുഷ്പമേ, യേശുവായ ഞാൻ നിന്നോടൊപ്പമുണ്ട്. ഞാൻ നിന്നെ എപ്പോഴും ഭോഷത്തോടും സ്നേഹിച്ചു. നിന്നെ പഠിപ്പിച്ചിട്ടുള്ളതുപോലെ നിന്റെ സുഗന്ധം പരത്തുക. എന്റെ ഉദ്യാനം അലങ്കരിക്കുക. എന്നെ സന്തോഷിപ്പിക്കുക. വരൂ. വസൂല, നീ എന്നെ മനസ്സിലാക്കുവാൻ തുടങ്ങിയിരിക്കുന്നു. ഇപ്പോൾ ഞാൻ നിന്നെ ന്യായമായി എല്ലാവരിൽ നിന്നും വേർപെടുത്തിയിരിക്കുന്നു. പ്രിയപ്പെട്ടവളേ, ഞാൻ നിന്നോട് ചെയ്തത് എന്താണെന്ന് നീ അറിഞ്ഞില്ല. എന്റെ ഹൃദയത്തിന്റെ അഭിലാഷങ്ങൾ നിന്റെ ചെവിയിൽ പറഞ്ഞുതരേണ്ടതിനായി എല്ലാവരിൽ നിന്നും നിന്നെ വേർപടുത്തുവാൻ വേണ്ടി എന്റെ കരം കൊണ്ട് നിന്റെ തോളിൽ ഞാൻ പിടിച്ചു മാറ്റിയത് നീ അറിഞ്ഞുവോ? ഇപ്പോൾ നീ തലയുയർത്തി നോക്കുമ്പോൾ നിനക്ക് ചുറ്റും ഞാനല്ലാതെ വേറെ ആരുമില്ലെന്ന് നീ പെട്ടെന്ന് മനസ്സിലാക്കുന്നു. ഞാൻ നിന്നെ എത്രമാത്രം സ്നേഹിക്കുന്നു. എനിക്ക് വളരെ സന്തോഷമുണ്ട്. എന്നോടൊപ്പം മാത്രം ആയിരിക്കുവാൻ വേണ്ടി നിന്നെ തന്നെ ഒരുക്കുക. അതെ, നമ്മൾ രണ്ടുപേരും മാത്രം. ഞാനും നീയും, നീയും ഞാനും മാത്രം. അല്ലയോ, വസൂല? ഇപ്പോൾ നീ എന്നെ നോക്കുക. വസൂല, നിന്റെ ദൈവമായ എന്നെ നോക്കുക. ഇപ്പോൾ മുതൽ നിനക്ക് ഞാൻ, ഞാൻ മാത്രമായിരിക്കും നിന്റെ ദൈവം. ഞാനാണ് നിന്റെ ദൈവം. ഞാനാണ് നിന്റെ പരിശുദ്ധനായ കൂട്ടുകാരൻ. ഞാനാണ് നിന്റെ രക്ഷകൻ. ഞാനാണ് നിന്റെ മണവാളൻ. നിന്റെ ആവശ്യങ്ങളെല്ലാം ഞാൻ നിറവേറ്റാം. പ്രിയപ്പെട്ടവളേ, നിനക്ക് സഹായം വേണോ? ഞാൻ നിന്റെ അടുക്കലേക്ക് ഓടിയെത്തും. നിനക്ക് ധൈര്യം ആവശ്യമുണ്ടോ? ഞാൻ നിനക്ക് എന്റെ ശക്തി തരും. നിനക്ക് ആശ്വാസം വേണോ? ഞാൻ നിനക്ക് ആശ്വാസം തരും. എന്റെ കരങ്ങളിലേക്ക് വീഴുക. എന്റെ ഹൃദയത്തിൽ വസിക്കുക. വസൂല, എന്നെ സ്തുതിക്കുക. മകളേ, എന്നെ സ്തുതിക്കുക. വന്ന് എന്നെ മഹത്വപ്പെടുത്തുക. എന്നെ മഹത്വപ്പെടുത്തുക. എന്റെ പാദങ്ങളിൽ സഷ്ടാംഗം വീഴുക. എന്നെ ആരാധിക്കുക. അല്ലയോ, വസൂല, നീ എന്റെ സ്വന്തമായിരിക്കുക. വസൂല, ഞാൻ നിന്നെ സ്നേഹിക്കുന്നതുപോലെ നീ എന്നെയും സ്നേഹിക്കുക. ഞാൻ നിന്നെ അനുഗ്രഹിക്കുന്നതുപോലെ നീ എന്നെ വാഴ്ത്തുക. എന്റെ സുഗന്ധം കൊണ്ട് ഞാൻ നിന്നെ പൊതിയുന്നതുപോലെ നിന്റെ സുഗന്ധത്താൽ നീ എന്നെയും പൊതിയുക. നിന്റെ രക്ഷകനായ ഞാൻ നിന്റെ മുമ്പിൽ നിൽക്കുന്നു. എന്നെ ആരാധിക്കുക. ഇപ്പോൾ ഈ മണിക്കൂറിൽ എന്റെ ഹൃദയത്തെ അനുഭവിച്ചറിയുക. രാത്രി വേഗം വന്നെത്തും. നിന്റെ വിളക്കിൽ എന്നിൽ നിന്ന് എണ്ണ സ്വീകരിച്ച് നിന്റെ വിളക്ക് കത്തിക്കുകയില്ലേ? പകൽ തീരുന്നതുവരെ ഒരിക്കലും കാത്തിരിക്കരുത്. നിന്റെ വിളക്കിൽ എണ്ണ നിറയ്ക്കുവാൻ എന്നെ അനുവദിക്കുക. വന്ന് എന്നിൽ നിന്ന് സ്വീകരിക്കുക. ഞാൻ മാത്രമായിരിക്കട്ടെ നിന്റെ കൂടെ. എനിക്കുവേണ്ടി ജീവിക്കുക. നമ്മുടെ ഏകാന്തതയിൽ ഞാൻ ആനന്ദിക്കുന്നു. ഞാൻ നിന്നെ അസൂയാജനകമാവണ്ണം സ്നേഹിക്കുന്നു. നിന്നോടുള്ള എന്റെ സ്നേഹത്തിന്റെ അതിക്ക് നിമിത്തം ഞാൻ നിന്നെ എല്ലാവരിലും നിന്ന് വേർപെടുത്തിയിരിക്കുന്നു. നീ ഇത് മനസ്സിലാക്കുവാൻ പരിശ്രമിക്കുമോ? ഞാൻ ഏകനായി നിന്നോടൊപ്പം നീയുമായി മാത്രം കഴിയുവാൻ തീക്ഷ്ണമായി ആഗ്രഹിച്ചു. സ്നേഹം ജ്വലിച്ചിരിക്കുന്നു. സ്നേഹം കത്തി ജ്വലിച്ചിരിക്കുമ്പോൾ എനിക്ക് ഇഷ്ടമുള്ളതെല്ലാം ഞാൻ ചെയ്യുന്നു. ഇപ്പോൾ നീ എന്റേതായി തീർന്നിരിക്കുന്നതിനാൽ സ്നേഹത്തിന്റെ പൂമാലകളാൽ നീ എന്നെ പൊതിയണമെന്ന് ഞാൻ ആഗ്രഹിക്കുന്നു. ശിശുക്കളുടേതുപോലുള്ള സംസാരത്താൽ നീ എന്നെ ആനന്ദിപ്പിക്കുക. ഞാൻ ഇഷ്ടപ്പെടുന്നതുപോലെ നിന്നെ സ്നേഹിക്കുവാൻ ഇപ്പോൾ നീ എന്നെ അനുവദിക്കുക. ഞാൻ ആഗ്രഹിക്കുന്നതുപോലെ നിന്നെ ഉപയോഗിക്കുവാനുള്ള സ്വാതന്ത്ര്യം നീ എനിക്ക് നൽകിയിട്ടുള്ളതല്ലേ? ഓ, കർത്താവേ, ഞാൻ തന്നിട്ടുണ്ട്. എന്നാൽ ഞാൻ ആ സ്വാതന്ത്ര്യം ഉപയോഗിക്കും. എന്റെ വിരൽ നിന്റെ ഹൃദയത്തെ സ്പർശിക്കുന്ന മാത്രയിൽ നീ എന്നിൽ നിന്ന് യാതൊന്നും തടഞ്ഞു വെക്കുകയില്ല. ഇത് നമ്മുടെ ഓഗസ്റ്റ് മാസമല്ലേ? നമ്മൾ നമ്മുടെ വാർഷികം ആഘോഷിക്കുകയാണെന്ന് ഞാൻ എപ്പോഴും നിന്നെ ഓർമ്മിപ്പിക്കും. 24/8/1987. വസൂല, അനുതപിക്കുക. ഞാൻ അനുതപിച്ചു. ഞാൻ നിന്റെ പാപങ്ങൾ ക്ഷമിക്കുന്നു. ഇപ്പോൾ നീ എന്നെ സ്തുതിക്കണമെന്ന് ഞാൻ ആഗ്രഹിക്കുന്നു. വസൂല, സർവ്വശക്തനായ ദൈവത്തിന് മഹത്വം ഉണ്ടായിരിക്കട്ടെ എന്ന് പറയുക. ഞാൻ ആരാണെന്ന് നിനക്കറിയാമോ? അങ്ങ് ആൽഫയും ഒമേഗയും ആണ്. സർവ്വത്തിന്റെയും സൃഷ്ടാവുമാണ്. എന്റെ കുട്ടി, നീ ശരിയായി പറഞ്ഞിരിക്കുന്നു. ഞാനാണ് ഈ സന്ദേശം എഴുതിയതെന്ന് കാണാതെ തന്നെ എന്റെ സന്ദേശം വായിക്കുകയും ഇത് ഞാൻ എഴുതിയതാണെന്ന് വിശ്വസിക്കുകയും ചെയ്യുന്നവർ അനുഗ്രഹീതർ. എന്റെ സന്ദേശം കേൾക്കുകയും അത് പാലിക്കുകയും ചെയ്യുന്നവർ അനുഗ്രഹീതർ. ഐക്യത്തിനായി പരിശ്രമിക്കുന്നവരും സമാധാനവും സ്നേഹവും പ്രചരിപ്പിക്കുന്നവരും അനുഗ്രഹീതർ. എന്റെ സന്ദേശം പ്രചരിപ്പിക്കുക. എന്റെ സമാധാനം വ്യാപിപ്പിക്കുക. എന്റെ സമാധാനം എല്ലാ ഹൃദയങ്ങളിലും ഭരണം നടത്തട്ടെ. ഒരിക്കലും എന്റെ സ്നേഹത്തെ സംശയിക്കരുത്. എങ്ങനെയാണ് ഞാൻ ഈ സന്ദേശങ്ങൾ പ്രചരിപ്പിക്കേണ്ടത്? എനിക്ക് എന്ത് ചെയ്യുവാൻ കഴിയും? ഞാൻ നിസ്സഹായയാണ്. വസൂല, കാത്തിരിക്കുക. നീ കാണും. ഞാൻ നിന്നെ സഹായിക്കും. വരൂ. നമ്മൾ നമുക്ക്. അതെ, എന്റെ ദൈവമേ, നമ്മൾ നമുക്ക്.