Latest / ദൈവത്തിലുള്ള യഥാർത്ഥ ജീവിതം - TLIG / Ep 71: എന്റെ രഹസ്യങ്ങൾ യുക്തിയിൽ വിവരിക്കാൻ ശ്രമിക്കുന്നു
Transcript
- എപ്പിസോഡ് 71. 4. 6. 1988. കർത്താവേ. ഇത് ഞാനാണ്; ഞാൻ നിന്നെ ഒരിക്കലും നിരാശപ്പെടുത്തുകയില്ല. എന്റെ സഭയിൽ കടന്നുകൂടിയിരിക്കുന്ന ആശയക്കുഴപ്പത്തെക്കുറിച്ച് ഞാൻ നിനക്ക് പറഞ്ഞുതരാം. എന്നെ ശ്രദ്ധിച്ച് ശ്രവിക്കുവാൻ പരിശ്രമിക്കുക; പരിശുദ്ധ ജപമാല പ്രാർത്ഥിച്ചുകൊണ്ട് എന്നെ പ്രസാദിപ്പിക്കുക; ജപമാലയിലെ ദൈവീക രഹസ്യങ്ങൾ ധ്യാനിച്ച് അനുഭവിച്ചറിയുക. നിങ്ങളുടെ പരിശുദ്ധ മാതാവിന്റെ കണ്ണുകളിലൂടെ ജപമാല രഹസ്യങ്ങൾ കാണുക. നിങ്ങളുടെ ഈ കാലഘട്ടം, ഈ ദൈവീക രഹസ്യങ്ങളെ യുക്തിപൂർവ്വം വിലയിരുത്തുവാൻ പരിശ്രമിക്കുകയാണ്. മനുഷ്യർ ശിശുക്കളെപ്പോലെ, ശിശുസഹജമായ വിശ്വാസത്തോടെ, നിഷ്കളങ്കരായിരിക്കണം എന്നുള്ള എന്റെ ആഗ്രഹത്തെക്കുറിച്ച് അവർ ഇതുവരെ മനസ്സിലാക്കിയിട്ടില്ല. അനേകം വ്യക്തികളെയും ജനതകളെയും ആത്മീയമായി പോഷിപ്പിക്കേണ്ടതിന്, എന്റെ സഭയെ ഞാൻ കൃപയാലും മഹിമയാലും നിറച്ച് സമ്പന്നമാക്കി. നിങ്ങളിൽ പലരും ഈ ജപമാല രഹസ്യങ്ങളെ ദൈവീക രഹസ്യങ്ങളാക്കി അംഗീകരിക്കുന്നില്ല. എന്റെ ജനത്തിന് ഇപ്പോൾ എളിമയും ലാളിത്യവും നിഷ്കളങ്കമായ വിശ്വാസവുമില്ല. നിങ്ങളുടെ ഈ കാലഘട്ടം, സർവ്വതിനെയും, എന്റെ ദൈവീക രഹസ്യങ്ങളെ പോലും യുക്തികൊണ്ട് വിലയിരുത്തുകയാണ്. തങ്ങളുടെ ദൈവമായ എന്നെ അനാവൃതമാക്കുവാൻ തങ്ങൾക്ക് കഴിയുമെന്ന് വിശ്വസിക്കുവാൻ അവർക്ക് എങ്ങനെ സാധിക്കുന്നു? എന്റെ ദൈവീക രഹസ്യങ്ങളെ അവർ യുക്തിപൂർവ്വം വിശദീകരിക്കുന്നു. മകളേ, ഞാൻ നിന്നോട് പറഞ്ഞ "വിതക്കാരനും കാക്കക്കൂട്ടങ്ങൾ" എന്ന ഉപമയിലെ കാക്കകളാണ് ഇവർ. കാക്കക്കൂട്ടങ്ങളെപ്പോലുള്ള, എന്നിലുള്ള വിശ്വാസം നഷ്ടപ്പെട്ട ഇവർ, തങ്ങളുടെ ബുദ്ധിക്ക് അനുയോജിച്ച വിധത്തിൽ, പത്രമാധ്യമങ്ങളെ സന്തോഷിപ്പിക്കുവാൻ വേണ്ടി, തങ്ങളുടെ തന്നെ സിദ്ധാന്തങ്ങൾക്ക് രൂപം കൊടുക്കുവാൻ പരിശ്രമിച്ചുകൊണ്ടിരിക്കുകയാണ്. വാസ്തവത്തിൽ അവർക്ക് എന്നിൽ വിശ്വാസം നഷ്ടപ്പെട്ടതുകൊണ്ടാണ് ഇതെല്ലാം ചെയ്യുന്നത്. എന്റെ ദൈവീക രഹസ്യങ്ങൾ, മാറ്റമില്ലാതെ, അതിന്റെ തനിമയോടെ തന്നെ നിലനിൽക്കേണ്ടതാണ്. ഈ കാക്കക്കൂട്ടങ്ങൾ, എന്റെ സഭയിലേക്ക് ഗുരുതരമായ തെറ്റുകളുള്ള സിദ്ധാന്തങ്ങൾ കൊണ്ടുവന്ന്, സത്യത്തെയും എന്റെ വചനത്തെയും ദുഷിപ്പിച്ച്, എന്റെ സഭയിൽ ഉണ്ടാകേണ്ട സമൃദ്ധമായ കൊയ്ത്തിനെ ഇല്ലാതാക്കുകയാണ് ചെയ്യുന്നത്. എന്റെ വചനവും എന്റെ ദൈവീക രഹസ്യങ്ങളും സഭയിൽ നിന്ന് മാറ്റാനാവാത്തതായി നിലനിൽക്കേണ്ടതാണ്. എന്റെ സഭ ഇപ്പോൾ അജ്ഞതയുടെ അന്ധകാരത്തിലും ആശയക്കുഴപ്പത്തിലുമാണ്. ഒരു പാഷണ്ടത പോലെ ഈ ആശയക്കുഴപ്പം എന്റെ സഭയിൽ പ്രവേശിച്ച്, എന്റെ പുരോഹിതന്മാരിൽ അനേകരെ തെറ്റുകൾ ചെയ്യുവാൻ പ്രേരിപ്പിച്ചുകൊണ്ടിരിക്കുന്നു. ആത്മാവ് സഭകളോട് വിളിച്ചു പറയുന്നു: "അസത്യത്തെ ഖണ്ഡിക്കുക, തെറ്റുകൾ തിരുത്തുക, അനുസരണത്തിന് ആഹ്വാനം ചെയ്യുക." എന്നാൽ ഇതെല്ലാം ചെയ്യുന്നത് ക്ഷമയോടും സത്യവചനം പഠിപ്പിക്കുവാനുള്ള ലക്ഷ്യത്തോടും ആയിരിക്കണം. യേശു പറഞ്ഞതനുസരിച്ച്, 2 തിമോത്തിയോസ് 2:2-5 തിരുവചനങ്ങൾ ചുവടെ ചേർക്കുന്നു: "വചനം പ്രസംഗിക്കുക, സാഹചര്യങ്ങൾ അനുകൂലമാണെങ്കിലും അല്ലെങ്കിലും, ജാഗരൂകതയോടെ വർത്തിക്കുക; മറ്റുള്ളവരിൽ ബോധ്യം ജനിപ്പിക്കുകയും അവരെ ശ്വാസിക്കുകയും ഉദ്ബോധിപ്പിക്കുകയും ചെയ്യുക; ക്ഷമ കൈവിടാതിരിക്കുകയും പ്രബോധനത്തിൽ ശ്രദ്ധിക്കുകയും ചെയ്യുക." ജനങ്ങൾ ഉത്തമമായ പ്രബോധനത്തിൽ സഹിഷ്ണത കാണിക്കാത്ത കാലം വരുന്നു. കേൾവിക്ക് ഇമ്പമുള്ളവയിൽ ആവേശം കൊള്ളുകയാൽ, അവർ തങ്ങളുടെ അഭിരുചിക്ക് ചേർന്ന പ്രബോധകരെ വിളിച്ചുകൂട്ടും. അവർ സത്യത്തിനു നേരെ ചെവിയടച്ച് കെട്ടുകഥകളിലേക്ക് ശ്രദ്ധ തിരിക്കും. നീയാകട്ടെ, എല്ലാ കാര്യങ്ങളിലും സമചിത്തത പാലിക്കുക; കഷ്ടതകൾ സഹിക്കുകയും സുവിശേഷകന്റെ ജോലി ചെയ്യുകയും നിന്റെ ശുശ്രൂഷ നിർവഹിക്കുകയും ചെയ്യുക. 2 തിമോത്തിയോസ് 4:2-5 വാക്യങ്ങൾ. വസൂല, എന്നോട് മറുപടി പറയുക: സുവിശേഷം മാത്രം തിരുവചനത്തിൽ നിന്ന് അടർത്തി വേർപെടുത്താമോ? ഇല്ല, കർത്താവേ, ഇത് അസാധ്യമാണ്. ഈ വസ്തുത എന്റെ ശരീരത്തെ സംബന്ധിച്ച് ഒരു ഉദാഹരണമായി സ്വീകരിക്കാവുന്നതാണ്. എന്റെ ശരീരത്തെയും രക്തത്തെയും വേർപെടുത്താനാവില്ല. എന്നാൽ അവർ സഭയെ വേർപെടുത്തിയിരിക്കുന്നു. അനുസരണക്കേട് കലാപം എന്നപോലെ എന്റെ സഭയിലേക്ക് നുഴഞ്ഞു കയറിയിരിക്കുന്നു. അനുസരണക്കേട് എന്ന കലാപം, സാത്താന്റെ സ്വാധീനത്താൽ, എന്റെ പുരോഹിതന്മാരിലും മെത്രാന്മാരിലും കർഡിനാൾമാരിലും പ്രവേശിച്ചിരിക്കുന്നു. സാത്താന്റെ ചിറകുകളിൻ കീഴിൽ മറയ്ക്കപ്പെട്ടിരിക്കുന്ന ഇവർ, സാത്താന്റെ കെണിയിൽ വീണിരിക്കുന്നു. അവരിലുള്ള അനുസരണക്കേട് എന്ന കലാപം എന്റെ തിരുഹൃദയത്തെ മുറിവേൽപ്പിച്ചുകൊണ്ടിരിക്കുന്നു. ആരംഭത്തിൽ അനുസരണക്കേട് എന്ന കലാപത്തിന്റെ വിത്ത്, സാത്താനിൽ നിന്ന് സ്വീകരിച്ച എന്റെ പുരോഹിതന്മാർ, അതിനെക്കുറിച്ച് ചിന്തിച്ച്, പഠിച്ച്, ആലോചിച്ച്, തെറ്റായ തീരുമാനങ്ങളും പദ്ധതികളും തയ്യാറാക്കുന്നു. അവരുടെ ഹൃദയങ്ങളിൽ സത്യത്തിനെതിരായ വിരോധം പാകപ്പെട്ട്, എന്റെ ആടുകളുടെ ഇടയനായി ഞാൻ തിരഞ്ഞെടുത്ത പത്രോസിന്റെ പിൻഗാമിക്കെതിരെ, മാർപാപ്പയ്ക്കെതിരെ, അവർ സംസാരിക്കുകയും പ്രവർത്തിക്കുകയും ചെയ്യുന്നു. ഈ അനുസരണക്കേട് എന്ന കലാപം പൂർണ്ണ വളർച്ച പ്രാപിച്ച്, എന്റെ സഭയ്ക്കെതിരെ പരസ്യമായി വിഷശരങ്ങൾ തൊടുത്ത്, സഭയെ വീണ്ടും പിളർത്തുവാനുള്ള ശക്തി അവർക്ക് നൽകിയിരിക്കുന്നു. യൂദാസ് ഗെത്സമനിൽ എന്നെ ഒറ്റിക്കൊടുത്തതുപോലെ, ഇക്കൂട്ടർ സ്നേഹം നിറഞ്ഞ എന്റെ ഹൃദയത്തെ ഒറ്റിക്കൊടുത്തിരിക്കുന്നു. ചമ്മട്ടികൊണ്ട് അടിക്കുന്നതിന് വേണ്ടി അവർ എന്നെ വലിച്ചിഴച്ച് കൊണ്ടുപോവുകയാണ്. അല്ലയോ, വസൂല, അവർ എന്നെ ചമ്മട്ടികൊണ്ട് അടിച്ചുകൊണ്ടിരിക്കുകയാണ്; ഞാൻ എത്രമാത്രം വേദന സഹിക്കുന്നു. ഓ, എന്റെ കർത്താവേ! കർത്താവിനെ ഒരു കൽത്തൂണിൽ കെട്ടിയിട്ട് ചമ്മട്ടികൊണ്ട് അടിക്കുന്നതും, ഓരോ അടിയിലും അവിടുത്തെ ശരീരം കീറിമുറിയുന്നതും, ശരീരം കിടുകിടാ വിറയ്ക്കുന്നതും, അവിടുത്തേക്ക് ശ്വാസതടസ്സം അനുഭവപ്പെടുന്നതും, ഞാൻ ഒരു ആന്തരിക ദർശനത്തിൽ കണ്ടു. അവിടുത്തെ ശരീരം മുഴുവനും ഒരൊറ്റ മുറിവുപോലെയായി തീർന്നു. കർത്താവേ, അവർ എപ്പോഴാണ് ഈ പീഡനം നിർത്തുക? അവർ ഈ പീഡനം അവസാനിപ്പിക്കുകയില്ല. അവർ എന്നെ അതിക്രൂരമായി ചമ്മട്ടികൊണ്ട് അടിച്ചുകൊണ്ടിരിക്കുന്നു. അഹങ്കാരത്താലും അനുസരണക്കേടിനാലും ലഹരി പിടിച്ച അവർ, അനുസരിക്കുന്നതും വിശ്വസ്തത പുലർത്തുന്നതും എന്റെ ശത്രുവായ സാത്താനോട് മാത്രമാണ്. എന്റെ സഭയെയാണ് അവർ നശിപ്പിച്ചുകൊണ്ടിരിക്കുന്നത്. അവർ എന്റെ ആടുകളെ ചിതറിച്ചു കളയുന്നു; പത്രോസിന്റെ പിൻഗാമിയായ മാർപാപ്പയുടെ പാദത്തിൽ ചവിട്ടിക്കൊണ്ട് അവനെ അവർ തള്ളിമാറ്റുകയാണ്. അവർ മാർപാപ്പയെ നിശബ്ദനാക്കുവാൻ പരിശ്രമിച്ചുകൊണ്ടിരിക്കുന്നു. കായൻ ഒരിക്കലും എന്റെ ആബേലിനെ മനസ്സിലാക്കിയിട്ടില്ല. അല്ലയോ, ആബേലേ, ഞാൻ നിന്നെ പരിത്യജിക്കുകയില്ല. നിന്റെ ദൈവം നിന്റെ സമീപത്തുണ്ട്; നിന്റെ ദൈവം ഒരുവിധം മാലാഖമാരോടൊപ്പം നിന്നെ സംരക്ഷിക്കുവാനും, എന്റെ ശത്രുവും നിന്റെ ശത്രുവുമായ സാത്താനെ ചവിട്ടി താഴ്ത്തുവാനാണ് വരുന്നത്. ഞാൻ എന്റെ മാലാഖമാരെ സജ്ജരാക്കിയിരിക്കുന്നു. കായൻ ഇനിമേൽ നിന്നെ അടിക്കുകയില്ല; അവൻ നിന്നെ അടിക്കാൻ ഒരുമ്പിട്ടാൽ, അവന്റെ കൈ നേരിടുന്നത് അവന്റെ ദൈവമായ എന്റെ കരങ്ങളെയായിരിക്കും. കർത്താവായ ഞാൻ അവനെ ആശ്ചര്യഭരിതനാക്കും. എന്റെ തിരുഹൃദയവും നിങ്ങളുടെ പരിശുദ്ധ മാതാവിന്റെ വിമലഹൃദയവും മുഖേന എന്റെ സഭ ഐക്യപ്പെടും. ഞങ്ങളുടെ ഇരുഹൃദയങ്ങളും ഐക്യപ്പെട്ടിരിക്കുന്നതുപോലെ, എന്റെ സഭയും ഐക്യപ്പെടും; എന്റെ സഭ ഒന്നായിത്തീരും. 7. 6. 1988. കർത്താവേ. ഇത് ഞാനാണ്; കുഞ്ഞേ, ഞാൻ നിന്റെ വളരെ അടുത്ത് തന്നെയുണ്ട്. എന്റെ ഹൃദയസ്പന്ദനങ്ങളെ ശ്രദ്ധിക്കുക; എന്റെ മുറിവുകൾ കണ്ട് തൊട്ടറിയുന്നതിന് വേണ്ടി എന്റെ മാലാഖമാരെ ഞാൻ എന്റെ തിരുഹൃദയത്തിനുള്ളിലേക്ക് പ്രവേശിപ്പിക്കും. എന്റെ മാലാഖമാർ അവരുടെ ദൈവത്തിന്റെ മുറിവുകൾ തൊട്ട് അനുഭവിച്ചറിയുമ്പോൾ, അവരുടെ സ്തുതിയുടെ ശബ്ദം അത്യുച്ചത്തിലാവുകയും, അതുവഴി എന്റെ ശത്രുവായ സാത്താൻ ഞടുങ്ങി വിറയ്ക്കുകയും, ഭൂമിയുടെ അടിസ്ഥാനങ്ങൾ തന്നെ പ്രകമ്പനത്താൽ കുലുങ്ങുകയും ചെയ്യും. എന്റെ കീറിമുറിക്കപ്പെട്ട തിരുഹൃദയത്തിന്റെ അവസ്ഥ അവർ കണ്ട് അനുഭവിച്ചറിയുമ്പോൾ, അവരുടെ ദൈവമായ എന്നോടുള്ള സ്നേഹജ്വാല അവരുടെ ഹൃദയത്തിൽ ഉയരുന്നു. നമ്മുടെ സഭയെ സംരക്ഷിക്കുന്നതിന് വേണ്ടി നിങ്ങളുടെ പരിശുദ്ധ മാതാവ് സ്നേഹത്താൽ ഒരുക്കി നിർത്തിയിരിക്കുന്ന ഈ മാലാഖമാരാണ് നിങ്ങളുടെ പരിശുദ്ധ മാതാവിന്റെ സ്വർഗ്ഗദൂതന്മാരുടെ സൈന്യം. ഈ മാലാഖമാർ സ്നേഹത്താൽ തിന്മയെ എതിർക്കുവാനുള്ളവരാണ്. എന്റെ തിരുഹൃദയത്തിന്റെ വസൂല, വരൂ. കർത്താവായ ഞാൻ നിന്നെ സ്നേഹിക്കുന്നു; എന്റെ മുഖത്ത് നോക്കുക. മനുഷ്യവർഗ്ഗത്തിന് മുഴുവനും കൊടുക്കേണ്ടതിന്, ഇതാ, ഞാൻ എന്റെ തിരുഹൃദയം എന്റെ ഉള്ളംകയ്യിൽ വെച്ചുകൊണ്ട് നിങ്ങളുടെ അടുക്കലേക്ക് വരുന്നു. ഞാൻ എത്രയധികമായി നിങ്ങൾ എല്ലാവരെയും സ്നേഹിക്കുന്നു. സൂര്യനുള്ളിൽ പരിശുദ്ധ മാതാവ് നിൽക്കുന്നതും, ഒരു ഹൃദയവും ഒരു കുരിശും, ആന്തരിക ദർശനത്തിലൂടെ ഞാൻ കണ്ടു. വസൂല, പരിശുദ്ധ ജപമാല പ്രാർത്ഥന അവഗണിക്കരുത്. യേശുവേ, ഞാൻ ജപമാല പ്രാർത്ഥന അവഗണിക്കുകയില്ല. വരൂ, നമുക്ക്, നമ്മൾ. അതെ, കർത്താവേ, നമ്മൾ, നമുക്ക്, കർത്താവിന് സ്തുതി. 8. 6. 1988. യേശുവേ. ഇത് ഞാനാണ്; ഏതാനും ദിവസങ്ങൾക്കുമുമ്പ് ഞാൻ നൽകിയ ഒരു സന്ദേശത്തിൽ ഞാൻ പറഞ്ഞ ഒരു ശൈലി, ഞാൻ നിനക്ക് വിശദീകരിച്ച് മനസ്സിലാക്കിത്തരാം. പത്രോസായ മാർപാപ്പയെ നീ കാണുമ്പോൾ, എന്റെ പഴയ വസ്ത്രങ്ങൾ നീ ധരിക്കണമെന്ന് ഞാൻ പറഞ്ഞു. അതിനർത്ഥം, എന്റെ സുവിശേഷത്തിന് മാറ്റം വരുത്തരുത്. ഞാൻ പ്രഘോഷിച്ചതുപോലെ തന്നെ എന്റെ സുവിശേഷം പ്രഘോഷിക്കേണ്ടതാണ്. എന്റെ വസ്ത്രങ്ങൾ വളരെ ലളിതമാണെന്നും ഞാൻ പറഞ്ഞിരുന്നു. അതിനർത്ഥം, സുവിശേഷ വചനങ്ങളെ ഒരു ശിശുവിനെപ്പോലെ, ശിശുസഹജമായ വിശ്വാസത്തോടെ സമീപിക്കണമെന്നാണ്. വസൂല, അനേകം പുരോഹിതർ എന്റെ സുവിശേഷ രഹസ്യങ്ങളിൽ വിശ്വസിക്കുന്നില്ല. അതിനാൽ, എന്റെ സുവിശേഷം പ്രഘോഷിക്കപ്പെടേണ്ട വിധത്തിൽ അവർ പ്രഘോഷിക്കുന്നില്ല. നിങ്ങളുടെ കാലഘട്ടത്തെയും അതിന്റെ സംസ്കാരത്തെയും പ്രീതിപ്പെടുത്തുന്നതിലാണ് അവർക്ക് താൽപ്പര്യമുള്ളത്. ഈ പുരോഹിതർ എന്റെ പഴയ വസ്ത്രത്തിൽ നിന്നും തികച്ചും വ്യത്യസ്തമായ പുതിയ വസ്ത്രങ്ങളാണ് ധരിക്കുന്നത്. എന്റെ സുവിശേഷം തെറ്റുകൂടാതെ പ്രഘോഷിക്കപ്പെടണം; എന്റെ സുവിശേഷ രഹസ്യങ്ങൾ രഹസ്യങ്ങളായി തന്നെ നിലകൊള്ളണം. കർത്താവേ, അങ്ങേയ്ക്ക് നന്ദി. ദൈവത്തിന് മഹത്വം ഉണ്ടായിരിക്കട്ടെ. ആമേൻ. 9. 6. 1988. വസൂല, കർത്താവായ ഞാൻ നിന്റെ ദുരിതാവസ്ഥയിലും നിന്നെ സ്നേഹിക്കുന്നു. നീ ആത്മാവിൽ ദരിദ്രയാണ്; എന്നാൽ ഞാൻ ഇപ്രകാരം പറഞ്ഞിട്ടുണ്ട്: "ആത്മാവിൽ ദരിദ്രർ ഭാഗ്യവാന്മാർ; എന്തെന്നാൽ ദൈവരാജ്യം അവരുടേതാണ്. " ഞാനും നിന്റെ പരിശുദ്ധ മാതാവും അതാണ് ചെയ്തുകൊണ്ടിരിക്കുന്നത്. തങ്ങളെത്തന്നെ ജ്ഞാനികൾ എന്ന് കരുതുന്നവരെ ലജ്ജിപ്പിക്കുന്നതിന് വേണ്ടി, ആത്മാവിൽ ദരിദ്രരായ, എന്റെ സൃഷ്ടികളിൽ ഏറ്റവും നികൃഷ്ടാവസ്ഥയിൽ കഴിയുന്നവരെ, എന്റെ ദൈവീക പ്രവർത്തികൾ വെളിപ്പെടുത്തുന്നതിന് വേണ്ടി, ഞങ്ങളുടെ ഇരുഹൃദയങ്ങളും തിരഞ്ഞെടുത്തിരിക്കുന്നു. ജ്ഞാനികളെ ലജ്ജിപ്പിക്കുന്നതിന് വേണ്ടി, നിങ്ങൾ ഒന്നുമില്ലായ്മയെന്നും നിന്ദ്യരെന്നും കരുതുന്നവരെ, എന്റെ ആത്മാവ് എപ്പോഴും തിരഞ്ഞെടുത്ത് ദൗത്യങ്ങൾ ഏൽപ്പിക്കും. വസൂല, സ്ഥിരമായി പരിശ്രമിക്കുക; ഞാൻ എപ്പോഴും നിന്നെ സഹായിക്കും. വരൂ, നമ്മൾ, നമുക്ക്. പരിശുദ്ധ ജപമാല പ്രാർത്ഥിക്കുന്ന കാര്യമാണ് യേശു ഉദ്ദേശിച്ചത്. അതെ, കർത്താവേ, നമ്മൾ, നമുക്ക്. നമ്മൾ, നമുക്ക്. അതെ, പരിശുദ്ധ മറിയമേ, നമ്മൾ, നമുക്ക്. 10. 6. 1988. പരിശുദ്ധ മാതാവ് സംസാരിക്കുന്നു. പരിശുദ്ധ ജപമാല പ്രാർത്ഥനയിലൂടെ ഞാൻ വിജയം കൈവരിക്കും. മകളേ, ജപമാല പ്രാർത്ഥന സംഭവിക്കാനിരിക്കുന്ന അനേകം ദൈവിക പ്രവർത്തികളുടെ ആരംഭമായിരിക്കും. വാസൂല, ഫാത്തിമയിൽ ജപമാല മാതാവ് എന്ന രീതിയിൽ ഞാൻ പ്രത്യക്ഷയായി സന്ദേശങ്ങൾ നൽകി. വാസൂല, ഞാൻ നിന്നെ അനന്തമായി സ്നേഹിക്കുന്നു. അനുദിനം ജപമാല പ്രാർത്ഥന നടത്തുവാൻ നീ ഒരുക്കമാണോ? അതെ, ഞാൻ ഒരുക്കമാണ്; അങ്ങയെയും യേശുവിനെയും അനുസരിക്കുവാൻ ഞാൻ തയ്യാറാണ്. അനുസരണം. എന്റെ മക്കളേ, അനുസരണം വഴി തിന്മയെ എത്രമാത്രം കീഴടക്കാം എന്ന് അറിയുവിൻ. സഭ നവീകരിക്കപ്പെടും. യേശുവും ഞാനും എപ്പോഴും ഒരുമിച്ച് പ്രവർത്തിക്കുന്നു; കാരണം, ഞങ്ങളുടെ ഇരുഹൃദയങ്ങളും പരസ്പരം ഐക്യപ്പെട്ടിരിക്കുന്നു. മനുഷ്യവർഗ്ഗത്തിലെ ഏറ്റവും ദുർബലയായ, ഏറ്റവും നിസ്സാരമായ, ഏറ്റവും നികൃഷ്ടയായ ഒരു കുഞ്ഞായ നിന്നിലൂടെ, അവിടുത്തെ സമാധാനത്തിന്റെയും സ്നേഹത്തിന്റെയും ആയ സന്ദേശം നൽകുന്നതിന്, യേശുവിന്റെ തിരുഹൃദയം നിന്നെ തിരഞ്ഞെടുത്തു. എന്നാൽ, നിന്റെ അവസ്ഥ എന്തുതന്നെയായാലും, യേശു നിന്നെ അനന്തമായി സ്നേഹിക്കുന്നു. അവിടുത്തെ അനന്തമായ കരുണ ലോകത്തിന് വെളിപ്പെടുത്തി കൊടുക്കുവാനാണ് അവിടുന്ന് നിന്നെ തിരഞ്ഞെടുത്തത്. അവിടുത്തെ സ്നേഹം നിന്നിലൂടെ വെളിപ്പെടുത്തുവാൻ അവിടുന്ന് നിന്നെ തിരഞ്ഞെടുത്തു. സൃഷ്ടികളേ, മടങ്ങി വരുവിൻ; ഞങ്ങളുടെ അടുക്കലേക്ക് മടങ്ങി വരുവിൻ. സമയം ഏതാണ്ട് അവസാനിക്കാറായി; ഞങ്ങളുടെ ആഹ്വാനം ശ്രവിക്കുക. മക്കളേ, ഇനി അധിക സമയം ബാക്കിയില്ല. അല്ലയോ, പ്രിയപ്പെട്ട മക്കളേ, ഞങ്ങളുടെ സ്വരം ശ്രവിക്കുവിൻ; ഞങ്ങളുടെ യാചന കേൾക്കുവിൻ. നിങ്ങൾക്കുവേണ്ടി അവിരാമം വിലപിക്കുന്ന ഞങ്ങളുടെ ഇരുഹൃദയങ്ങളെയും നിങ്ങൾ ശ്രവിക്കുവിൻ. ഞങ്ങളുടെ അടുക്കലേക്ക് മടങ്ങി വരുവിൻ. 20. 6. 1988. പുഷ്പമേ, എഴുതുക: "എന്റെ വസൂല, കർത്താവായ ഞാൻ എന്റെ ചിന്തകൾ കൂടുതലായി വെളിപ്പെടുത്തുവാൻ ആഗ്രഹിക്കുന്നു. നിന്നെ ഉപയോഗപ്പെടുത്തുവാൻ നിന്റെ ദൈവത്തെ നീ അനുവദിക്കുമോ?" ഉവ്വു, കർത്താവേ, എന്നാൽ എന്റെ കഴിവില്ലായ്മയെക്കുറിച്ച് അങ്ങ് മറക്കരുതേ. ഞാൻ മറക്കുകയില്ല. എന്നെ ശ്രവിക്കുക; അതിനുശേഷം പുഷ്പിക്കുക; കുന്തിരിക്കധൂപം പോലെയുള്ള ഒരു മനോഹര സൗരഭ്യം പുറത്തുവിടുക. നിന്റെ സൗരഭ്യം വിദേശങ്ങളിലും പരത്തുക. എന്റെ എല്ലാ ദൈവീക പ്രവർത്തികളെക്കുറിച്ചും നിന്റെ കർത്താവായ എന്നെ മഹത്വപ്പെടുത്തുക. എന്റെ നാമത്തിന്റെ മഹാത്മ്യം പ്രഖ്യാപിക്കുക. എന്റെ ദൈവീക പ്രവർത്തികൾ എത്ര അത്ഭുതകരമെന്ന് പ്രഘോഷിക്കുക. ഞാൻ കൽപ്പിക്കുന്നതെല്ലാം ഉടനടി നിർവഹിക്കപ്പെടുന്നു. ഇതെന്താണ്? എന്തുകൊണ്ടാണ് ഇങ്ങനെ? എന്ന വിധിപ്രസ്താവനകൾ നടത്തരുതെന്ന് എല്ലാവരെയും പഠിപ്പിക്കുവിൻ. യഥാസമയത്ത് എല്ലാ കാര്യങ്ങളും പഠിക്കപ്പെടും. 2002-2004 വർഷങ്ങളിൽ സഭയുടെ വിശ്വാസത്തിന്റെ തിരുസംഘം ഈ സന്ദേശങ്ങളെക്കുറിച്ച് പഠനം നടത്തിയിട്ടുണ്ട്. അനുകൂലമായ നിലപാടാണ് തിരുസംഘം എടുത്തിരിക്കുന്നത്. അവർ ഇപ്രകാരം ഗ്രഹിച്ചു പറയട്ടെ: "കർത്താവിന്റെ പ്രവർത്തികളെല്ലാം നല്ലതാണ്; യഥാസമയത്ത് ഞാൻ വേണ്ടതെല്ലാം ചെയ്യും." ഇത് മറ്റേതിനേക്കാൾ മോശമാണെന്ന് ആരും പറയരുത്. ഓരോന്നിന്റെയും പ്രാധാന്യം യഥാസമയത്ത് തെളിയും. അതിനാൽ ഞാൻ നിന്നോട് പറയുന്നു: നിന്റെ ദൈവമായ എന്നിൽ ആനന്ദിക്കുക; എന്നെ സ്തുതിക്കുക. ഞാൻ നിങ്ങളെല്ലാവരെയും സ്നേഹിക്കുന്നു. എന്നോട് ഐക്യപ്പെട്ട് ഒന്നായിത്തീരുക. എന്നെ അനുഭവിച്ചറിയുക; എന്നെ വിവേചിച്ചറിയുക; എന്നെ അനുഗമിക്കുക. അതെ, കർത്താവേ. 21. 6. 1988. കർത്താവേ. ഇത് ഞാനാണ്; എന്റെ സഭയുടെ നവീകരണത്തിനുവേണ്ടി പ്രാർത്ഥിക്കുക. പത്രോസിന്റെ പിൻഗാമിയായ മാർപാപ്പയെ എതിർക്കുന്നവർക്ക് വേണ്ടി പ്രാർത്ഥിക്കുക. മാർപാപ്പയെ നിശബ്ദനാക്കുവാൻ പരിശ്രമിക്കുന്നവർക്ക് വേണ്ടി പ്രാർത്ഥിക്കുവിൻ. നാളുകൾ എണ്ണപ്പെട്ടിരിക്കുന്നു. എന്റെ അന്തരംഗം ദുഃഖത്തിൽ മുങ്ങിത്താണിരിക്കുന്നു. എന്റെ തിരുഹൃദയത്തിൽ അസഹനീയമായ കയ്പ്പ് നിറഞ്ഞിരിക്കുന്നു. മനുഷ്യർ അവരുടെ തെറ്റുകൾ തിരിച്ചറിയണമെന്ന് ഞാൻ തീക്ഷ്ണമായി ആഗ്രഹിക്കുന്നു. പത്രോസായ മാർപാപ്പയെ എതിർക്കുന്നവർ എന്റെ സഭയെ തന്നെയാണ് എതിർക്കുന്നത്. അവർ എന്റെ കല്പനയെയാണ് എതിർക്കുന്നത്; അവരുടെ കർത്താവും ദൈവവുമായ എന്നെയാണ് അവർ എതിർക്കുന്നത്. എന്റെ ആടുകളുടെ ഇടയനായ പത്രോസിനെയാണ് അവർ എതിർക്കുന്നത്. അങ്ങനെ അവർ എന്റെ കല്പനയെ നിന്ദിക്കുന്നു. സാത്താനാൽ, അഥവാ അഹന്തയാൽ, അന്ധരാക്കപ്പെട്ടിരിക്കുന്ന അവർ യാതൊന്നും വ്യക്തമായി കാണുന്നില്ല. പത്രോസായ മാർപാപ്പയെ നിന്ദിക്കുന്നത് വഴി അവർ എന്റെ കല്പന അനുസരിക്കുന്നില്ല; നേരെ മറിച്ച് അവർ എന്റെ കല്പനയുടെ വിധികർത്താക്കൾ ആവുകയാണ് ചെയ്യുന്നത്. ആത്മാവ് സഭകളോട് പറയുന്നത് എന്തെന്ന് ശ്രവിക്കുവിൻ: "മടങ്ങി വരുവിൻ; തിരിച്ചുവരിക." പ്രിയപ്പെട്ടവനേ. ഒരു ബിഷപ്പിനെയാണ് യേശു ഉദ്ദേശിച്ചത്. മടങ്ങി വരുവിൻ. കർത്താവായ ഞാനാണ് പത്രോസിനെ തിരഞ്ഞെടുത്തത്. ഇപ്പോഴത്തെ പത്രോസ് ജോൺ പോൾ രണ്ടാമൻ മാർപാപ്പയാണ്. പ്രിയപ്പെട്ടവനേ, ഞാൻ നിന്നോട് പറയുന്നു: എന്റെ തിരുഹൃദയമാണ് പത്രോസിനെ, അഥവാ മാർപാപ്പയെ, തിരഞ്ഞെടുത്തത്. തിരിച്ചുവരിക; എനിക്കുവേണ്ടി അനുരഞ്ജനപ്പെടുക. പ്രിയപ്പെട്ടവനേ, കർത്താവായ ഞാൻ നിന്റെ പാപങ്ങൾ ക്ഷമിക്കുകയും നിന്നെ ശുദ്ധീകരിക്കുകയും ചെയ്യും. മടങ്ങി വരുവിൻ. എല്ലാവരും പത്രോസായ മാർപാപ്പയുടെ അടുക്കലേക്ക് മടങ്ങി വരുവിൻ. എന്തെന്നാൽ, നിങ്ങളുടെ ദൈവമായ ഞാനാണ് അവനെ തിരഞ്ഞെടുത്തിരിക്കുന്നത്. ഞാനാണ് അവന് ഒരു ശിഷ്യന്റെ ഭാഷാശൈലി നൽകിയിരിക്കുന്നത്. എന്നിലൂടെ അവന് തളർന്നവരോട് മറുപടി പറയുവാൻ സാധിക്കും. അല്ലയോ, സൃഷ്ടികളേ, നിങ്ങളിൽ അല്പം പോലും ജ്ഞാനമില്ലേ? നിങ്ങളോടുള്ള അളവില്ലാത്ത എന്റെ സ്നേഹത്തെ വിലമതിക്കുവാൻ നിങ്ങൾ പരാജയപ്പെട്ടിരിക്കുന്നു. എന്നിരുന്നാലും, എന്നെ വിളിച്ചപേക്ഷിക്കുന്ന എല്ലാവർക്കും ഞാൻ ഉത്തരം നൽകുന്നു. നിങ്ങൾ പ്രതിസന്ധിയിലാകുമ്പോൾ ഞാൻ നിങ്ങളോടൊപ്പം ഉണ്ടാകും. ഞാനാണ് നിങ്ങളുടെ അഭയകേന്ദ്രം. ഇന്ന്, കർത്താവായ ഞാൻ ഒരു കല്പന കൂടി നൽകുന്നു: എഴുതുക; രമ്യതപ്പെട്ട് ഐക്യത്തിനുവേണ്ടി എളിമപ്പെടുക; ഐക്യപ്പെടുന്നതിനുവേണ്ടി വിനീതരാവുക. കുഞ്ഞേ. ഉവ്വു, കർത്താവേ. എന്റെ സമാധാനം ഞാൻ നിനക്ക് നൽകുന്നു; അനുസരണമുള്ളവളായിരിക്കുക. ഞാൻ ആഗ്രഹിക്കുന്നതുപോലെ നിന്നെ ഉപയോഗിക്കുവാൻ എന്നെ അനുവദിക്കുക. എന്നിൽ വിശ്വാസം അർപ്പിക്കുക; നീ നിന്റെ പിതാവിന്റെ കരങ്ങളിലാണ്. കർത്താവേ, ഞാൻ അങ്ങയെ അനുഗമിക്കുന്നു. ഒരു കുഞ്ഞ് അതിന്റെ അമ്മയോടൊപ്പം ഇരിക്കുന്നതുപോലെ, എന്റെ ദേഹി അങ്ങയുടെ സമാധാനത്തിലാണ്. ഒരു ശിശുവിനെപ്പോലെ, അങ്ങയെ പൂർണ്ണമായി വിശ്വസിച്ചുകൊണ്ട്, അങ്ങയെ അനുസരിക്കുവാൻ ഞാൻ ആഗ്രഹിക്കുന്നു. എന്റെ സാന്നിധ്യം അനുസ്മരിക്കുക; ഞാൻ നിന്നോടൊപ്പമുണ്ട്. നമ്മൾ, നമുക്ക്. അതെ, കർത്താവേ, അതെ, പരിശുദ്ധ മറിയമേ.