Latest / ദൈവത്തിലുള്ള യഥാർത്ഥ ജീവിതം - TLIG / Ep 84: സ്വന്തമായി ഒരിക്കലും പദ്ധതിയിടരുത്
Transcript
- എപ്പിസോഡ് 84. 20/12/1988, കർത്താവേ. ഇതു ഞാനാണ്. ഓ ദൈവമേ, യേശു 'ഇതു ഞാനാണ്' എന്നു പറഞ്ഞത് തീഷ്ണമായ സ്നേഹത്തോടെയാണ്. വസൂലാ, എന്റെ കുരിശിനെ ആശ്ലേഷിക്കുക; എന്റെ കുരിശ് വഹിക്കാൻ എന്നോടൊപ്പം പങ്കുചേരുക. എന്റെ കുരിശ് നിന്നെ എന്റെ രാജ്യത്തിലേക്ക് നയിക്കും. എന്റെ തിരുഹൃദയത്തിൽ വസിക്കുക; എന്റെ തിരുഹൃദയത്തിന്റെ ആഴങ്ങളിലേക്ക് ഊർന്നിറങ്ങുക; അവിടെ നീ സമാധാനം കണ്ടെത്തും. എന്റെ കുഞ്ഞേ, എന്നെ പരിത്യജിച്ച നിന്റെ സഹോദരങ്ങൾക്ക് വേണ്ടി പ്രാർത്ഥിക്കുക; അവർ ലൗകിക സമ്പത്തിൽ മാത്രം മയങ്ങി നിൽക്കുന്നവരാണ്. എന്റെ കുരിശിനെ ഭയപ്പെടുന്ന, നാശത്തിന്റെ പാതയിലൂടെ സഞ്ചരിക്കുന്നവർക്ക് വേണ്ടി പ്രാർത്ഥിക്കുക. എന്റെ കുഞ്ഞേ, എന്റെ സഭ ഐക്യപ്പെട്ട ഒന്നായി തീരുന്നതിന് വേണ്ടി പ്രാർത്ഥിക്കുക. കർത്താവായ ഞാൻ ഈ ഐക്യം ആഗ്രഹിക്കുന്നെന്ന് ഓരോ പുരോഹിതനും മനസ്സിലാക്കണം. യാതൊരു ഭിന്നതയും എന്നിൽ നിന്ന് വരുന്നതല്ല; അത് എന്റെ എതിരാളിയിൽ നിന്ന് വരുന്നതാണ്. എന്റെ രാജ്യം ഏകവും പരിശുദ്ധവുമായിരിക്കണം. കർത്താവേ. ഇതു ഞാനാണ്. കർത്താവേ, ഏതാനും ഗ്രീക്ക് ഓർത്തഡോക്സ് പുരോഹിതന്മാർ അങ്ങ് എനിക്ക് നൽകിയിട്ടുള്ള വെളിപാട് സന്ദേശങ്ങൾ വായിച്ചു; സഭകൾ ഐക്യപ്പെടണമെന്ന അങ്ങയുടെ സന്ദേശത്തോട് അവർ യോജിക്കുന്നില്ല. മാർപാപ്പയുമായി ഐക്യപ്പെടണമെന്ന സന്ദേശം വായിച്ചപ്പോൾ അവർ കോപവെറിയോടെ പറഞ്ഞു, ഈ സന്ദേശങ്ങൾ പിശാചിൽ നിന്നുള്ളതാണെന്ന്. ഒരു ഗ്രീക്ക് ഓർത്തഡോക്സ് സ്ത്രീ നല്ല മനസ്സോടെ ഈ സന്ദേശങ്ങൾ വായിച്ചു; തുടർന്ന് അവൾ ഒരു കത്തോലിക്കാ ദേവാലയത്തിൽ പോയി. അവളുടെ കുമ്പസാരക്കാരനായ പുരോഹിതൻ ഇക്കാര്യം അറിഞ്ഞപ്പോൾ അവളെ കുറ്റപ്പെടുത്തിക്കൊണ്ട് പറഞ്ഞു, ഈ സന്ദേശങ്ങൾ പിശാചിൽ നിന്ന് വരുന്നതാണെന്ന്. അതിനുശേഷം ആ പുരോഹിതൻ അവളെ സഭയിൽ നിന്ന് പുറത്താക്കി. സഭകളുടെ ഐക്യത്തെക്കുറിച്ച് കേൾക്കുവാൻ പോലും അദ്ദേഹം ആഗ്രഹിക്കുന്നില്ല. എന്നാൽ ഗ്രീക്ക് ഓർത്തഡോക്സ് സഭയിലെ സാധാരണ വിശ്വാസികൾ ഈ സന്ദേശം വായിച്ചപ്പോൾ, സഭകളുടെ ഐക്യം അങ്ങ് ആഗ്രഹിക്കുന്നുണ്ടെന്ന് അവർ മനസ്സിലാക്കി. എന്നാൽ ഗ്രീക്ക് ഓർത്തഡോക്സ് പുരോഹിതന്മാർ കോപാകുലരാകുന്നു. എന്റെ കുഞ്ഞേ, ഇതെല്ലാം ഞാൻ അറിയുന്നതല്ലേ? എന്റെ ചിന്തകൾ അവരുടെ ചിന്തകളല്ല; എന്റെ വഴികൾ അവരുടെ വഴികളല്ല. അവരുടെ പാപങ്ങളാൽ അവർ എന്നെ ഭാരപ്പെടുത്തുന്നു; അതിനാൽ അവർ യാതൊന്നും വ്യക്തമായി കാണുന്നില്ല. ഐക്യം ഉന്നതത്തിൽ നിന്ന് വരും. ഇപ്പോഴത്തെ അവസ്ഥയിൽ നിങ്ങൾ ആകെപ്പാടെ ഭിന്നിച്ചു കഴിയുന്നു; നിങ്ങൾ എന്റെ ദൈവീക ഛായയിൽ ജീവിക്കുന്നില്ല. നിങ്ങൾ എന്റെ കല്പന അനുസരിക്കുന്നുമില്ല. നിങ്ങളുടെ ഭിന്നത മലീമസമായ പടർച്ച വ്യാധിയാണ്; അത് പടർന്ന് വ്യാപിച്ചുകൊണ്ടിരിക്കുന്നു. നിങ്ങളുടെ ഭിന്നത തുടർന്നുകൊണ്ടേയിരിക്കും; നിങ്ങളുടെ ഭിന്നത ഞാൻ അവസാനിപ്പിക്കുന്നില്ലെങ്കിൽ അത് തുടരും. നിങ്ങളുടെ ഇടയിൽ സ്നേഹമില്ലാതിരിക്കെ നിങ്ങൾക്ക് ഐക്യപ്പെടുവാൻ കഴിയുമെന്ന് എങ്ങനെ നിങ്ങൾക്ക് വിശ്വസിക്കുവാൻ പറ്റുന്നു? നിങ്ങളിൽ അനേകരും ഇരുമ്പുതണ്ടുപോലെ കടുപ്പമേറിയതും വഴക്കമില്ലാത്തവരുമാണ്. എന്നാൽ ഞാൻ നിങ്ങളെല്ലാവരെയും വളക്കുകയും ഐക്യപ്പെടുത്തുകയും ചെയ്യും. ഈ മരുഭൂമിയെ ഞാൻ ഒരു തടാകമാക്കി മാറ്റും; ഈ വരണ്ട ഭൂമിയെ ഞാൻ ഒരു ജലസ്രോതസ്സാക്കി മാറ്റും. പ്രിയപ്പെട്ടവരെ, നിങ്ങൾ എല്ലാവരെയും ഞാൻ ഈ പുതിയ ഭൂമിയിൽ നിവസിപ്പിക്കും; ഭൂമിയിലെ എന്റെ രാജ്യം സ്വർഗ്ഗത്തിലേതുപോലെയാകും. എന്റെ രാജ്യം വരും. ഈ പുതിയ കാലഘട്ടത്തിനായി ഞാൻ എത്രമാത്രം ആകാംക്ഷയോടെ കാത്തിരിക്കുന്നു! നിങ്ങളെല്ലാവരും എന്റെ പരിശുദ്ധ നാമത്തിന് കീഴിൽ പരിപൂർണ്ണ ഐക്യത്തിൽ ജീവിക്കും. ജീവന്റെ പരമോന്നത ഉറവിടമായ ഞാൻ നിങ്ങളെല്ലാവരെയും ഒരു വിശുദ്ധ ജനമായി വീണ്ടും ജനിപ്പിക്കും. ഉന്നതത്തിൽ നിന്ന് എന്റെ ദൈവീക ഛായ ഒരു കണ്ണാടിപോലെ നിങ്ങളുടെ മേൽ പ്രതിഫലിക്കും. പരിശുദ്ധരിൽ പരിശുദ്ധനായ ഞാൻ നിങ്ങളെല്ലാവരെയും പുനസ്ഥാപിച്ചിരിക്കുന്നെന്ന് നിങ്ങൾ മനസ്സിലാക്കും. തിരുലിഖിതങ്ങൾ നിറവേറിക്കൊണ്ടിരിക്കുന്നു; ജ്ഞാനം കാത്തിരിക്കുകയില്ല. ഉഴവുകാരനെ പോലെയും വിത്ത് വിതയ്ക്കുന്നവനെ പോലെയും ജ്ഞാനം നിങ്ങളെ പരിപോഷിപ്പിക്കും. ജ്ഞാനം വരണ്ട ഭൂമിയെ വയലുകളാക്കി മാറ്റും. ഞാൻ അവളെ ഉഴുത് അവളുടെ വയലുകൾ സമാധാനത്തിന്റെയും സ്നേഹത്തിന്റെയും വയലുകളാക്കി മാറ്റും. ഞാൻ ഈ ലോകത്തിന്റെ പ്രകാശമാണ്; നിങ്ങൾ അന്ധകാരത്താൽ മൂടപ്പെട്ടിരിക്കുന്നതായി ഞാൻ കാണുമ്പോഴെല്ലാം ഞാൻ നിങ്ങളിലേക്ക് ഇറങ്ങിവരും. കർത്താവേ, എന്നിലൂടെ അങ്ങേയ്ക്ക് ഇപ്രകാരം അങ്ങയെ തന്നെ വെളിപ്പെടുത്തുവാൻ കഴിയുമെന്നത് കേൾക്കാനോ വിശ്വസിക്കാനോ തയ്യാറല്ലാത്ത അനേകം പുരോഹിതന്മാർ ഉണ്ട്. അവർ പറയുന്നു, യേശു തങ്ങൾക്ക് സത്യം വെളിപ്പെടുത്തിയിട്ടുണ്ടെന്നും, അതിനാൽ തങ്ങൾക്ക് പരിശുദ്ധ ബൈബിൾ അല്ലാതെ മറ്റൊന്നും ആവശ്യമില്ലെന്നും. മറ്റു വാക്കുകളിൽ പറഞ്ഞാൽ, ഈ സന്ദേശങ്ങൾ വ്യാജമാണെന്നാണ് അവരുടെ അഭിപ്രായം. പിതാവ്, എന്റെ നാമത്തിൽ അയക്കുന്ന സഹായകനായ പരിശുദ്ധാത്മാവ് നിങ്ങളെ എല്ലാ കാര്യങ്ങളും പഠിപ്പിക്കുമെന്നും, ഞാൻ നിങ്ങളോട് പറഞ്ഞിട്ടുള്ളവ നിങ്ങളെ അനുസ്മരിപ്പിക്കുമെന്നും ഞാൻ നിങ്ങളോട് പറഞ്ഞിട്ടുണ്ട്. ഞാൻ നിങ്ങൾക്ക് യാതൊരു പുതിയ പ്രമാണവും നൽകുന്നില്ല; സത്യത്തെക്കുറിച്ച് നിങ്ങളെ ഓർമ്മിപ്പിക്കുകയും, വഴിതെറ്റി അലഞ്ഞുതിരിയുന്നവരെ സത്യത്തിന്റെ പൂർണ്ണതയിലേക്ക് മടക്കിക്കൊണ്ടുവരികയും മാത്രമാണ് ഞാൻ ചെയ്യുന്നത്. കർത്താവായ ഞാൻ ഓർമ്മപ്പെടുത്തലുകൾ കൊണ്ട് നിങ്ങളെ ഉണർത്തിക്കൊണ്ടിരിക്കും. സഹായകനായ എന്റെ പരിശുദ്ധാത്മാവ് എന്റെ വചനത്തിന്റെ ഓർമ്മപ്പെടുത്തലുകാരനായി നിങ്ങളുടെ മധ്യേ എപ്പോഴും ഉണ്ടായിരിക്കും. അതിനാൽ എന്റെ പരിശുദ്ധാത്മാവ് നിങ്ങളോട് സംസാരിക്കുമ്പോൾ നിങ്ങൾ ആശ്ചര്യപ്പെടരുത്. എന്റെ കൃപയാൽ നിങ്ങളെ മാനസാന്തരപ്പെടുത്തുന്നതിനും, എന്റെ വഴികൾ നിങ്ങളെ അനുസ്മരിപ്പിക്കുന്നതിനുമാണ് ഈ ഓർമ്മപ്പെടുത്തലുകൾ ഞാൻ നൽകുന്നത്. വരൂ, പുഷ്പമേ, നീ എന്നെ കാണുമ്പോൾ എന്റെ നേരെ പുഞ്ചിരിക്കുക. കർത്താവേ, അങ്ങയുടെ നാമം വാഴ്ത്തപ്പെടട്ടെ. അങ്ങയുടെ പ്രബോധനങ്ങളെ പ്രതി അങ്ങേയ്ക്ക് നന്ദി. കുഞ്ഞേ, ഞാനും നിന്നെ പഠിപ്പിക്കും; നമ്മൾ നമുക്ക്. എന്നെന്നേക്കും. 21/12/1988, കർത്താവേ, അങ്ങയുടെ സന്ദേശത്തിലെ അങ്ങയുടെ സ്നേഹത്തെ ചിലർ തെറ്റിദ്ധരിക്കുകയും, വികാരാത്മക സ്നേഹത്തോട് അതിനെ താരതമ്യം ചെയ്യുകയും ചെയ്യുമ്പോൾ അങ്ങേയ്ക്ക് ദുഃഖം ഉണ്ടാകുമല്ലോ. ചിലരിൽ നിന്നുള്ള ഒന്ന് രണ്ട് അഭിപ്രായങ്ങൾ ഞാൻ കേട്ടിട്ടുണ്ടായിരുന്നു. കർത്താവേ. ഇതു ഞാനാണ്; ഈ കാലഘട്ടത്തിൽ എന്റെ സ്നേഹം വിലമതിക്കപ്പെടുന്നില്ല, അതിനെ മനസ്സിലാക്കപ്പെടുന്നുമില്ല. എന്റെ മക്കളെ ഞാൻ എത്രമാത്രം സ്നേഹിക്കുന്നുണ്ടെന്ന് നീ അറിയുന്നു. യേശു എന്റെ നേർക്ക് തിരിഞ്ഞ് എന്നെ നോക്കിക്കൊണ്ടാണ് ഇത് പറഞ്ഞത്. ഞാൻ അവരെ ഭോഷത്വത്തോളം സ്നേഹിക്കുന്നു. എന്നാൽ നിങ്ങളുടെ ദൈവമായ എന്നെ തിരിച്ചറിയുവാൻ സാധിക്കാത്ത വിധം അത്രമാത്രം വളരെ ഗൗരവമേറിയതാണ് ഈ കാലഘട്ടത്തിന്റെ പാപങ്ങൾ. ഞാൻ അവർക്കുവേണ്ടി നൽകിയ മോചനദ്രവ്യം അവർ മറന്നുപോയോ? ഞാൻ അപമാനിക്കപ്പെട്ടു, പീഡിപ്പിക്കപ്പെട്ടു, കഠിനമായി മർദ്ദിക്കപ്പെട്ടു. ഏറ്റവും വേദനാജനകമായ മരണത്തെ ഞാൻ സ്വമനസ്സാൽ സ്വീകരിച്ചു. ഇവയെല്ലാം സ്നേഹം നിമിത്തമാണ്. വസ്തുത അങ്ങനെ ആയിരിക്കുമ്പോൾ ഞാൻ നിങ്ങളെ എത്രമാത്രം സ്നേഹിക്കുന്നുണ്ടെന്ന് കോടിക്കണക്കിന് തവണ ആവർത്തിച്ച് എങ്ങനെ പറയാതിരിക്കും? എന്റെ സ്നേഹത്തിന്റെ ആഴവും മഹത്വവും അവർക്ക് മനസ്സിലാക്കി കൊടുക്കുവാൻ ഞാൻ വീണ്ടും വീണ്ടും പറയുന്നു. എന്റെ വചനങ്ങൾ നിങ്ങളുടെ ഹൃദയത്തിൽ തുളച്ചുകയറുന്നതുവരെ ഞാൻ ഇത് ആവർത്തിച്ച് പറഞ്ഞുകൊണ്ടിരിക്കും. ഇന്നും എന്റെ പീഡാനുഭവം വീണ്ടും സഹിക്കുവാൻ മടികൂടാതെ ഞാൻ സന്നദ്ധനാണ്. അല്ലയോ, സൃഷ്ടികളേ, നിങ്ങൾ എത്രമാത്രം സഹനം എനിക്ക് തരുന്നു! നിങ്ങളോടുള്ള എന്റെ സ്നേഹം അനന്തമാണ്; ഈ സ്നേഹം മനസ്സിലാക്കുവാൻ പരിശ്രമിക്കൂ. 24/12/1988, യേശുവേ. പ്രിയപ്പെട്ടവളേ, ഇതു ഞാനാണ്. ഇന്ന് അങ്ങയുടെ ജന്മദിനത്തിന്റെ തലേദിവസമാണ്; കർത്താവേ, ഞാൻ അത്യധികം സന്തോഷിക്കുന്നു. പ്രിയപ്പെട്ടവനെ, പരിശുദ്ധരിൽ പരിശുദ്ധനെ, നമ്മുടെ കർത്താവിന് സ്തുതി. ദൈവമേ, എന്നെ അങ്ങയുടെ വിശുദ്ധിയിൽ ലയിപ്പിക്കണമേ; എങ്ങനെ വിശുദ്ധമായി ജീവിക്കാമെന്ന് എന്നെ പഠിപ്പിക്കണമേ. നിത്യനായ ദൈവമേ, അങ്ങയുടെ വിശുദ്ധിയിൽ എന്നെ ലയിപ്പിച്ച് എന്നെ ശുദ്ധീകരിക്കണമേ. പ്രിയപ്പെട്ടവനെ, അങ്ങയുടെ മക്കളായ ഞങ്ങളെ വിശുദ്ധീകരിക്കണമേ; ഞങ്ങളെ എല്ലാവരെയും ഐക്യപ്പെടുത്തി ഒറ്റ ആട്ടിൻ തൊഴുത്തിലേക്ക് കൊണ്ടുവരണമേ. അങ്ങനെ അങ്ങയെ മഹത്വപ്പെടുത്തിക്കൊണ്ട്, അങ്ങയെ സ്തുതിച്ചുകൊണ്ട്, ഞങ്ങളെ ഒരു ബലിപീഠത്തിന് ചുറ്റും നിർത്തണമേ. ഞങ്ങൾക്ക് സത്യം കാണിച്ചുതരുവാൻ അങ്ങയുടെ സത്യാത്മാവ് ഞങ്ങളിലേക്ക് ഇറങ്ങി വരാൻ അങ്ങ് അനുവദിക്കണമേ. ഈ അന്ധകാരത്തിൽ അങ്ങയുടെ പ്രകാശം ഞങ്ങളുടെ മാർഗ്ഗദർശിയാകട്ടെ. ഞങ്ങളെ സത്യത്തിലേക്ക് നയിക്കണമേ. അങ്ങയുടെ മടങ്ങിവരവ് വരെ ഞങ്ങളെ ഒരു ഇടയന്റെ കീഴിൽ കൂട്ടിച്ചേർക്കണമേ. കർത്താവേ, വരണമേ. പ്രിയപ്പെട്ടവളേ, നിങ്ങൾ എല്ലാവരെയും ഞാൻ ഒറ്റ ആട്ടിൻ തൊഴുത്തിൽ ഒറ്റക്കൂട്ടമായി ഒന്നിച്ചുകൂട്ടും. എന്റെ സ്വന്തം കരങ്ങൾ നിങ്ങളുടെ സംരക്ഷണ വേലിയും, എന്റെ തിരുഹൃദയം നിങ്ങളുടെ ഭവനവും ആയിരിക്കും. പ്രിയപ്പെട്ടവരെ, എന്റെ മടങ്ങിവരവിനുവേണ്ടി പ്രാർത്ഥിക്കുവിൻ. ഞാൻ സ്നേഹമാണ്; ജീവന്റെ പരമമായ ഉറവിടമാണ് ഞാൻ. അതിനാൽ നിങ്ങളുടെ രക്ഷകനായ എന്റെ അടുക്കലേക്ക് വരിക. വരൂ. അതെ, കർത്താവേ. 26/12/1988, യേശുവേ, ഏതൊരാൾക്കും അങ്ങയോട് നേരിട്ട് അനുഗ്രഹങ്ങൾ ചോദിക്കാമെന്ന് ഇന്ന് എനിക്ക് ബോധ്യപ്പെട്ടു. എന്നെ അനുഗ്രഹിക്കണമെന്ന് എനിക്ക് അങ്ങയോട് നേരിട്ട് ചോദിക്കാൻ പറ്റുമെന്നാണ് ഞാൻ അർത്ഥമാക്കുന്നത്. ഞാൻ വിചാരിച്ചത്, ഒരാൾക്ക് അങ്ങയോട് മറ്റുള്ളവർക്ക് വേണ്ടി അനുഗ്രഹങ്ങൾ ചോദിക്കാമെന്നായിരുന്നു; എന്നാൽ നമുക്ക് വേണ്ടി പറ്റില്ല എന്നായിരുന്നു ഞാൻ വിചാരിച്ചത്. നീ നികൃഷ്ടയാണെന്ന് ഞാൻ നിന്നോട് പറഞ്ഞിട്ടുണ്ട്. വസൂലാ, ലക്ഷക്കണക്കിന് പ്രാവശ്യം ഞാൻ നിന്നെ അനുഗ്രഹിച്ചിട്ടുണ്ട്; നീ അത് ശ്രദ്ധിച്ചിട്ടില്ലേ? നീ എന്നോട് ചോദിച്ചിട്ടില്ലെങ്കിലും ഞാൻ നിന്നെ അനുഗ്രഹിച്ചു. കുഞ്ഞേ, നിന്റെ അജ്ഞത എന്നെ നിരന്തരം ആശയക്കുഴപ്പത്തിലാക്കുന്നു; നിന്റെ നിസ്സഹായത എന്നെ നിന്റെ അടുക്കലേക്ക് ഓടിവന്ന് നിന്നെ എന്റെ തിരുഹൃദയത്തിലേക്ക് വലിച്ചടുപ്പിക്കുവാൻ പ്രേരിപ്പിക്കുന്നു. കുട്ടികളെ, ഞാൻ സ്നേഹിക്കുന്നു; എന്നെ നിന്റെ ഗുരുവായും, നിന്നെ വഴി നയിക്കുന്നവനായും സ്വതന്ത്രമായി നിലനിൽക്കാൻ അനുവദിക്കുക. എന്റെ മേൽനോട്ടത്തിലും അധികാരത്തിലും പൂർണമായി ആശ്രയിക്കുക. അങ്ങനെ ചെയ്യുമ്പോഴാണ് നീ പൂർണമായി നിന്നെ തന്നെ എന്റെ കരങ്ങളിൽ ഏൽപ്പിക്കുന്നത്; അതുവഴി നീ എന്റെ ഇഷ്ടമായിരിക്കും നിർവഹിക്കുന്നത്. 27/12/1988, യേശുവേ. ഇതു ഞാനാണ്; ഞാൻ നിന്നിൽ നിന്ന് ചോദിക്കുന്നത് സ്നേഹം മാത്രമാണ്. എന്റെ സന്ദേശം പ്രചരിപ്പിച്ചുകൊണ്ട് എന്നെ മഹത്വപ്പെടുത്തുക. വസൂലാ, യോഗങ്ങളിൽ എന്റെ സ്നേഹം പ്രകടിപ്പിക്കുക. എന്റെ തോളിനു മീതെ നോക്കി, ഇനി അടുത്തത് എന്തായിരിക്കും എന്ന് അന്വേഷിക്കേണ്ട; ഇന്നത്തെ ദിവസം നിനക്ക് നൽകുന്നത് സ്വീകരിക്കുക. ഞാൻ അടുത്ത മീറ്റിംഗിനെക്കുറിച്ച് ചിന്തിച്ച് ആകുലപ്പെട്ടിരുന്നു; കർത്താവേ, പദ്ധതി തയ്യാറാക്കുന്നത് തെറ്റാണോ? ഞാൻ പറഞ്ഞത്, നാളെയെക്കുറിച്ച് ആകുലപ്പെടരുത് എന്നാണ്. ആകുലപ്പെടരുത്; എന്നിൽ വിശ്വസിക്കുക. നിന്നിൽ വിശ്വസിക്കുവാൻ നീ എനിക്ക് ഇടം നൽകിയിരുന്നെങ്കിൽ, എന്റെ പ്രവർത്തി ചെയ്യുവാൻ എനിക്ക് സ്വാതന്ത്ര്യം കിട്ടുമായിരുന്നു എന്ന് നീ മനസ്സിലാക്കിയിരുന്നെങ്കിൽ എന്ന് ഞാൻ ആശിക്കുകയാണ്. നിനക്കുള്ളതെല്ലാം എന്നിൽ നിന്ന് വരുന്നതാണെന്നും, നീ ഇപ്പോൾ ചെയ്യുന്നത് നിന്റെ പ്രവർത്തിയല്ല, എന്റെ പ്രവർത്തിയാണെന്നും നീ ഒരിക്കൽ പൂർണമായി ഗ്രഹിക്കുമെന്ന് ഞാൻ ആശിക്കുന്നു. എന്നെക്കൂടാതെ നിനക്ക് നിന്റെ കണ്ണ് ഇറുക്കുവാൻ പോലും കഴിയുകയില്ല. അതുകൊണ്ട്, നിന്നെ തന്നെ എനിക്ക് സമർപ്പിക്കുക; നിന്റെ വ്യക്തിപരമായ താല്പര്യങ്ങൾ നിന്നെ വഞ്ചിക്കുവാൻ അനുവദിക്കരുത്. ഞാൻ നിന്നെ സ്നേഹിക്കുന്നു; നീ വീണുപോകാൻ ഞാൻ അനുവദിക്കുകയില്ല. എന്നെ മാത്രം ആഗ്രഹിക്കുക; മറ്റൊന്നും ആഗ്രഹിക്കേണ്ട. നിനക്കുള്ളതും ഞാൻ നിനക്ക് തരുന്നതും സ്വീകരിക്കുക. മനുഷ്യരുടെ പരദൂഷണങ്ങളും അപവാദങ്ങളും കേൾക്കരുത്; എന്നിൽ ആശ്രയിക്കുക. എന്തെന്നാൽ, ഇത് എന്റെ പ്രവർത്തിയാണ്; കാര്യങ്ങൾ സ്വയം സംഭവിക്കുന്നതുപോലെ സംഭവിക്കട്ടെ. അതാണ് ഞാൻ പ്രവർത്തിക്കുന്ന വഴി. കാര്യങ്ങളെയും സംഭവങ്ങളെയും തള്ളിപ്പിടിക്കരുത്; നീ തള്ളുമ്പോൾ നീ എന്നെയും തള്ളിമാറ്റുകയായിരിക്കും ചെയ്യുന്നത്. അതിനാൽ, ഒന്നുമില്ലാത്തവളായി നിലകൊള്ളുക; സർവ്വവും എന്നിൽ നിന്ന് വരട്ടെ. കർത്താവേ, പ്രചോദനവും വ്യക്തിപരമായ താല്പര്യവും തമ്മിലുള്ള വ്യത്യാസം ഞാൻ എങ്ങനെ അറിയും? ഇത് തിരിച്ചറിയാൻ ബുദ്ധിമുട്ടാണ്. പ്രിയപ്പെട്ടവളേ, ഞാൻ നിന്നോട് ഇക്കാര്യം പറയാം: നീ വയ്ക്കുവാൻ ആഗ്രഹിക്കുന്ന ഓരോ ചൂടിനും മുമ്പ് ആദ്യം എന്റെ അടുക്കൽ വരിക. നീ എന്റെ അടുക്കൽ വന്ന് എന്നോട് അഭിപ്രായം ചോദിക്കൂ. ബുദ്ധിയെ പ്രകാശിപ്പിക്കുകയും ഉപദേശം നൽകുകയും ചെയ്യുന്ന പരിശുദ്ധാത്മാവിനോട് പ്രാർത്ഥിക്കുക. ഞാൻ പറയുന്നത്, നീ വയ്ക്കുവാൻ പോകുന്ന ഓരോ ചൂടിനെയും കുറിച്ചാണ്. നീ ആരംഭിക്കുവാൻ പോകുന്ന എല്ലാറ്റിനും മുമ്പ് എന്റെ അടുക്കൽ വരിക; ഞാൻ നിന്നെ നയിക്കാം. ഒരിക്കലും നീ സ്വമേധയാ സ്വന്തം പദ്ധതി ഇടരുത്. വസൂലാ, വിവേചനവരം ലഭിക്കുവാൻ പ്രാർത്ഥിക്കുക; ഒന്നിനും ധൃതി കാണിക്കരുത്. നീ ജനിക്കുന്നതിന് വളരെ മുമ്പ് തന്നെ എന്റെ പദ്ധതികൾ ഞാൻ നിശ്ചയിച്ചിട്ടുണ്ട്. മകളേ, എന്റെ സന്ദേശം ലോകത്തെ അറിയിക്കാനും എല്ലാവരിലേക്കും വ്യാപിപ്പിക്കുവാനും ഞാൻ നിന്നെ നിയോഗിച്ചിരിക്കുന്നു. എന്നാൽ അവരെ എന്റെ സന്ദേശം ബോധ്യപ്പെടുത്തുവാൻ ഞാൻ നിന്നോട് പറയുന്നില്ല; ചെവികൾ ഉള്ളവർ കേൾക്കട്ടെ. പുഷ്പമേ, എന്റെ എല്ലാ നിർദ്ദേശങ്ങളും ഓർക്കുക; നമ്മൾ നമുക്ക്. അതെ, എന്റെ കർത്താവേ. 28/12/1988, ഇതൊരു മീറ്റിംഗിന് വേണ്ടിയുള്ള സന്ദേശമാണ്. ഞാൻ കർത്താവാണ്; എന്റെ പുഷ്പങ്ങളേ, സമാധാനത്തിലായിരിക്കുക. എന്തെന്നാൽ, നിങ്ങളുടെ കർത്താവായ ഞാൻ സമാധാനമാണ്. എന്റെ പ്രിയ സൃഷ്ടികളേ, ഞാൻ നിങ്ങളെ എത്രമാത്രം സ്നേഹിക്കുന്നു! നിങ്ങൾ എനിക്ക് വിലപ്പെട്ടവരാണ്. ഞാൻ നിങ്ങളെ പുഷ്പങ്ങൾ എന്ന് വിളിച്ചു; എന്റെ ദൈവീക പ്രകാശത്തിൽ വളരുക, വളരുക. ഇനിയും എന്റെ പ്രകാശം കണ്ടിട്ടില്ലാത്ത നിങ്ങളുടെ സഹോദരങ്ങൾക്കായി പ്രാർത്ഥിക്കുക; അവരുടെ മാനസാന്തരത്തിനുവേണ്ടി പ്രാർത്ഥിക്കുക. പുഷ്പങ്ങളേ, നിങ്ങൾക്ക് ജലസേചനം നൽകാൻ ഞാൻ ഉദ്ദേശിക്കുന്നു. എന്റെ അരുവി ഒരു നദിയായും, എന്റെ നദി സമാധാനത്തിന്റെയും സ്നേഹത്തിന്റെയും ഒരു മഹാസമുദ്രമായി പരിണമിക്കുകയും ചെയ്യും. എന്റെ പ്രകാശത്തെ ഞാൻ വിദൂരങ്ങളിലേക്ക് വ്യാപിപ്പിക്കുമെന്ന് ഞാൻ പറഞ്ഞിട്ടുണ്ടല്ലോ. ഞാൻ ഇനിയും എന്റെ പ്രബോധനങ്ങൾ പ്രവചനം പോലെ ചൊരിയുകയും ഭാവി തലമുറകൾക്ക് നൽകുകയും ചെയ്യും. പ്രഭാഷകൻ 24-ാം അധ്യായം 33-ാം തിരുവചനം: ഞാൻ നിങ്ങളുടെ ആശ്വാസദായകനും, നിങ്ങളെ ഏറ്റവുമധികം സ്നേഹിക്കുന്നവനുമാണ്. പുഷ്പങ്ങളേ, നിങ്ങൾ ഇപ്പോൾ അന്ധകാരത്തിന്റെ ഒരു കാലഘട്ടത്തിലാണ് ജീവിക്കുന്നതെന്ന് എനിക്കറിയാം. ഈ അന്ധകാരം സഹനങ്ങളും ദുരന്തങ്ങളും വരൾച്ചയും മാത്രമേ കൊണ്ടുവരികയുള്ളൂ. ഈ കാലഘട്ടങ്ങളിൽ പലർക്കും ദൈവീകതയുടെ ബോധം നഷ്ടപ്പെടുകയും, തങ്ങളുടെ സ്വന്തം വഴിയിൽ ജീവിക്കുകയും, നന്മയും തിന്മയും തിരിച്ചറിയാൻ കഴിയാതിരിക്കുകയും ചെയ്യുമെന്ന് പറയപ്പെട്ടിട്ടുണ്ടല്ലോ. പുഷ്പങ്ങളേ, ഒരു വ്യക്തി ഭൗതികതയാൽ നിറഞ്ഞ് ലോകം നൽകുന്ന കാര്യങ്ങളോട് ഒട്ടിച്ചേർന്നിരിക്കുമ്പോൾ, ആ വ്യക്തി അന്ധകാരത്താൽ നിറയുന്നതിന് തന്നെ അനുവദിച്ചിരിക്കുന്നു. ഇക്കാരണത്താൽ ആ വ്യക്തിയിൽ പരിശുദ്ധിക്ക് ഇടമില്ല; എന്റെ ആത്മാവിന് ആ വ്യക്തിയിൽ വളരാൻ ഇടമില്ല. സത്യത്തിനും എന്റെ പ്രകാശത്തിനും ആ വ്യക്തിയിൽ ഇടമില്ല. ആ വ്യക്തി അന്ധകാരത്തിൽ ജീവിക്കുന്നു. അതുകൊണ്ടാണ് ഇന്നത്തെ യുവതലമുറയ്ക്ക് ആത്മീയത നഷ്ടമായിരിക്കുന്നതും, എന്റെ വചനം കേൾക്കാൻ വിസമ്മതിക്കുന്നതും, എന്നെ ദൈവമായി അംഗീകരിക്കാതിരിക്കുന്നതും. അവർ ദൈവീക സത്യത്തെ ഉപേക്ഷിച്ച് ഭൗതിക വസ്തുക്കളുടെ പിന്നാലെ ഓടുന്നതിനാൽ അധപ്പതിച്ച ദുരാഗ്രഹങ്ങളുടെ പിടിയിൽ കഴിയുന്നു. എന്റെ പുഷ്പങ്ങളേ, നിങ്ങളിൽ ചിലർ ഈ അന്ധകാരത്തിൽ നടക്കുകയും, അഗാഥമായ ഉറക്കത്തിൽ തുടരുകയും ചെയ്യുന്നത് കണ്ട് നിങ്ങളിൽ പലരും എത്രമാത്രം വേദനിക്കുന്നുണ്ടെന്ന് എനിക്കറിയാം. എന്നാൽ ഞാൻ നിങ്ങളോട് പറയുന്നു: കർത്താവായ ഞാൻ അവരുടെ വാതിലിന് പുറത്തു നിൽക്കുന്നു; അവർ കേൾക്കുന്നതുവരെ ഞാൻ അവരുടെ വാതിലിൽ മുട്ടിക്കൊണ്ടിരിക്കും. അവരുടെ വാതിലിൽ മുട്ടുന്നതിൽ എനിക്ക് ഒരിക്കലും മടുപ്പ് വരികയില്ല; ഞാൻ അവരെ ഒരിക്കലും പരിത്യജിക്കുകയില്ല. നിത്യമായ സ്നേഹത്താൽ ഞാൻ നിങ്ങൾ എല്ലാവരെയും സ്നേഹിക്കുന്നു. എന്റെ ഈ സ്നേഹത്തെ വളരെയധികം തെറ്റിദ്ധരിക്കപ്പെട്ടിരിക്കുന്നു. നിങ്ങളുടെ എല്ലാ പ്രശ്നങ്ങളോടും കൂടെ എന്റെ അടുക്കൽ വരിക; അവയെ എനിക്ക് സമർപ്പിച്ച് നിങ്ങൾ വിശ്രമിക്കൂ. നിങ്ങൾ എന്റെ അടുക്കൽ വന്ന് എന്നിൽ ആശ്രയിക്കുക; ഞാൻ നിങ്ങളുടെ സമാശ്വാസകനാണ്. എന്റെ സമാധാനം നൽകിക്കൊണ്ട് ഞാൻ നിങ്ങളെ സമാശ്വസിപ്പിക്കും. നിങ്ങളുടെ വിനീത ഹൃദയനായ രക്ഷകന്റെ അടുക്കലേക്ക് വരിക; ഞാൻ നിങ്ങളുടെ മുറിവുകൾ സൗഖ്യമാക്കാം. എന്നെ വിളിച്ച് പ്രാർത്ഥിക്കുന്നതിൽ ഒരിക്കലും മടുത്തുപോകരുത്; ഞാൻ എപ്പോഴും നിങ്ങളോടൊപ്പമുണ്ട്. ഞാൻ നിങ്ങളെ സ്നേഹിക്കുന്നു. ഞാൻ നിങ്ങൾ ഓരോരുത്തരെയും അനുഗ്രഹിക്കുന്നു; ഞാൻ നിങ്ങളുടെ കുടുംബങ്ങളെയും അനുഗ്രഹിക്കുന്നു. പിന്നീട് നമ്മുടെ പരിശുദ്ധ മാതാവ് സംസാരിക്കുന്നു. മക്കളേ, യേശുവിനെ സമീപിക്കൂ; അവൻ തന്റെ കുരിശിൽ നിന്ന് നിങ്ങളെല്ലാവരെയും വിളിക്കുന്നു. അവൻ നിങ്ങളെ സ്നേഹിക്കുന്നതുപോലെ, നിങ്ങൾ പരസ്പരം സ്നേഹിച്ചുകൊണ്ട് അവനെ പ്രസാദിപ്പിക്കുക. കാരണം, മുഴുവൻ നിയമവും ഒരു ഒറ്റ കല്പനയിൽ സംഗ്രഹിച്ചിരിക്കുന്നു: നിന്റെ അയൽക്കാരനെ നിന്നെപ്പോലെ തന്നെ സ്നേഹിക്കുക. സമാധാനവും സ്നേഹവും യേശുവിന്റെ ഹൃദയത്തിൽ കണ്ടെത്തുക. യേശുവിന്റെ സമാധാനവും സ്നേഹവും സ്വീകരിച്ച് അവ നിങ്ങളുടെ ഇടയിൽ വ്യാപിപ്പിക്കുക. യേശുവിന്റെ ദിവ്യമായ സ്നേഹത്താൽ മുഴുവൻ ലോകത്തെയും നിറയ്ക്കൂ. എന്റെ പുത്രൻ നിങ്ങൾക്ക് നൽകുന്ന ആനന്ദത്താൽ നിങ്ങളുടെ വ്യക്തിത്വത്തെ പൂരിതമാക്കൂ. കുഞ്ഞുങ്ങളേ, നിരന്തരം പ്രാർത്ഥിക്കുക; ദൈവത്തോട് സംസാരിക്കുക. നിങ്ങളുടെ സ്വർഗ്ഗീയ പിതാവുമായി ഒരു സ്ഥിരബന്ധം നിങ്ങൾ നിലനിർത്തുവിൻ. തീഷ്ണതയോടെ പ്രാർത്ഥിക്കുക; നിങ്ങളുടെ പ്രാർത്ഥനകൾ ദൈവസന്നിധിയിൽ എത്തട്ടെ. സ്നേഹത്തോടെ പ്രാർത്ഥിക്കുവിൻ; അവിടുന്ന് നിങ്ങളുടെ പ്രാർത്ഥനകൾ അനുഭവിച്ചറിയട്ടെ. അല്ലയോ, മക്കളേ, ഞാൻ നിങ്ങളെ എത്രമാത്രം സ്നേഹിക്കുന്നുണ്ട്! ഞാൻ എപ്പോഴും നിങ്ങളോട് കൂടെയുണ്ട്; ഞാൻ ഇപ്പോൾ ഇവിടെ നിങ്ങളോടൊപ്പമുണ്ട്. നിങ്ങൾ ഈ സ്ഥലത്തുനിന്ന് പുറപ്പെടുമ്പോഴും, നിങ്ങളുടെ ഭവനങ്ങളിൽ പ്രവേശിക്കുമ്പോഴും, ഞാൻ നിങ്ങളോടൊപ്പം ഉണ്ടായിരിക്കും. ഞങ്ങൾ എപ്പോഴും സന്നിഹിതരാണ്; എപ്പോഴും, എന്നേക്കും സന്നിഹിതരായിരിക്കും. പിതാവിന്റെയും പുത്രന്റെയും പരിശുദ്ധാത്മാവിന്റെയും നാമത്തിൽ ഞാൻ നിങ്ങൾ എല്ലാവരെയും അനുഗ്രഹിക്കുന്നു. നമ്മൾ നമുക്ക്. വിശുദ്ധ പൗലോസ് ഗലാത്തിയക്കാർക്ക് എഴുതിയ ലേഖനം അഞ്ച് ആറ് അധ്യായങ്ങൾ യോഗത്തിൽ വായിക്കുവാൻ കർത്താവ് എന്നോട് പറഞ്ഞു; ഞാൻ അപ്രകാരം ചെയ്യും.