Latest / ദൈവത്തിലുള്ള യഥാർത്ഥ ജീവിതം - TLIG / Ep 3: ആരംഭം: പുരോഹിതന്റെ പീഡനങ്ങൾ, അന്തിമമായ "അതേ"
Transcript
- എപ്പിസോഡ് 3. വൈദികനിൽ നിന്നുള്ള പീഡനം. വൈദികൻ തന്റെ എതിർപ്പ് തുടർന്നുകൊണ്ടിരുന്നു. സന്ദേശങ്ങൾ എന്ന് പറയുന്നതെല്ലാം വെറും ചവറാണെന്നും, എന്നെപ്പോലെയുള്ള ഒരാൾക്ക് ഇതുപോലുള്ള കൃപാവരം ഒരിക്കലും ലഭിക്കുകയില്ലെന്നും അദ്ദേഹം തറപ്പിച്ചു പറഞ്ഞു. ദൈവത്തിനുവേണ്ടി പ്രവർത്തിക്കുന്ന മദർ തെരേസയെ പോലെയുള്ളവർക്കാണ് ഈ കൃപാവരം ലഭിക്കുന്നതെന്ന് അദ്ദേഹം കൂട്ടിച്ചേർത്തു. പിന്നീട് ഇവ പൈശാചികം എന്ന് പറഞ്ഞ് വിരട്ടി. ഈ എഴുത്തുകളിൽ നിന്ന് എന്നെ പിന്തിരിപ്പിക്കുവാൻ ശ്രമിച്ചു. ഇതിൽ കുറെയൊക്കെ അദ്ദേഹം വിജയിച്ചു. കാരണം, ദൈവം എന്നെ സമീപിച്ചപ്പോൾ ഞാൻ ദൈവത്തിൽ നിന്ന് അകന്നുമാറി. എന്റെ മാലാഖയെ പോലും സ്വീകരിക്കുവാൻ എനിക്ക് കഴിഞ്ഞില്ല. ദൈവം എന്നോട്, "യഹോവയായ ഞാൻ നിന്നെ സ്നേഹിക്കുന്നു" എന്ന് പറയുമ്പോൾ ഞാൻ അത് കേട്ടില്ലെന്ന് നടിച്ച് ഇത് എഴുതിയെടുക്കുവാൻ വിസമ്മതിച്ചു. യേശു എന്നെ സമീപിച്ചു. എന്റെ കുഞ്ഞേ, "സമാധാനം" എന്ന് പറഞ്ഞപ്പോൾ അത് സാത്താൻ ആണെന്ന് വിചാരിച്ച് ഞാൻ യേശുവിനെ അകറ്റുകയായിരുന്നു. എന്നെപ്പോലുള്ള ഒരാളുമായി ദൈവത്തിന് സംസർഗ്ഗം ചെയ്യാൻ കഴിയില്ല. ദൈവം വിശുദ്ധരുടെ അടുക്കലേ ചെല്ലുകയുള്ളൂ എന്ന ആശയം വൈദികൻ എന്റെ തലയിൽ കയറ്റി. യേശു എന്റെ അടുക്കൽ സംസാരിക്കാൻ വരുമ്പോൾ അത് പിശാച് ആണെന്ന് വിചാരിച്ച് ഞാൻ ചിലപ്പോൾ വളരെ അസ്വസ്ഥയാകുമായിരുന്നു. ഞാൻ യേശുവിനെ ശക്തമായി തെറ്റിദ്ധരിച്ച് പെരുമാറുമായിരുന്നു. അവസാനം ഞാനും ഒരു വഴി കണ്ടെത്തി. എന്നോട് പറയുവാനായി യേശുവിൽ നിന്നൊരു സന്ദേശമുണ്ട് എന്ന് പറഞ്ഞുകൊണ്ട് എന്റെ മാലാഖ എന്റെ അടുക്കൽ വന്നു. മാലാഖ എന്റെയും യേശുവിന്റെയും ഇടനിലക്കാരനായി തീർന്നു. ഇത് എനിക്ക് അംഗീകരിക്കുവാൻ കഴിഞ്ഞു. എന്നാൽ അപ്പോഴും വൈദികരുടെ വാക്കുകളുടെ സ്വാധീനത്തിൽ ആയിരുന്നതുകൊണ്ട് എപ്പോഴും അംഗീകരിക്കാൻ സാധിച്ചുമില്ല. പരിശുദ്ധനായവന്റെ കണ്ണുകൾ എന്നെപ്പോലെ നിന്ദയുമായ ഒരു ആത്മാവിന്റെ മേൽ എങ്ങനെ നോക്കും? എന്തിനു നോക്കും? പിന്നീടല്ലേ സംസാരിക്കുന്നത്? സർവ്വശക്തനായ ദൈവം ഇത്ര ലളിതമായ രീതിയിൽ എന്നോട് സംസാരിക്കുകയും സംസർഗ്ഗം പുലർത്തുകയും ചെയ്യുന്നു എന്ന് ഞാൻ എങ്ങനെ വിശ്വസിക്കും? ഇതുപോലെയൊന്നും എന്റെ ജീവിതകാലത്ത് ഞാൻ കേട്ടിട്ടില്ല. മോശ, അബ്രഹാം, പ്രവാചകന്മാർ, പുരോഹിതന്മാർ എന്നിവരുമായി ദൈവം സംസാരിച്ചു എന്ന് വേദപുസ്തകത്തിൽ രേഖപ്പെടുത്തിയിട്ടുണ്ട്. എന്നാൽ അത് വേറൊരു കാലഘട്ടമായിരുന്നു. ഇതൊക്കെയാണെങ്കിലും ദൈവം എന്നോട് സംസാരിക്കുന്നു എന്നുള്ളത് എനിക്കറിയാമായിരുന്നു. സാവധാനം, കാലപ്പഴക്കത്തിൽ മാത്രമേ വൈദികരിൽ നിന്ന് എനിക്കേറ്റ മുറിവുകൾ പൊറുത്തു തുടങ്ങിയുള്ളൂ. ദിവസവും മണിക്കൂറുകൾ എന്നോട് പ്രസംഗിച്ചുകൊണ്ട് എന്റെ കാവൽ മാലാഖ എനിക്ക് വളരെയധികം സമാധാനം നൽകി. ഇടയ്ക്കിടെ യേശുവിന് തന്റെ വചനം എന്നെ അറിയിക്കുവാനായി മാലാഖ മാറി നിന്നിരുന്നു. ആദ്യം ഇത് സംഭവിച്ചപ്പോൾ യേശുവിന്റെ വാക്കുകൾ എഴുതിയെടുത്ത് ഞാൻ മായ്ച്ചു കളയുവാൻ തുടങ്ങുകയായിരുന്നു. ഉടൻ തന്നെ മാലാഖ ഇടപെടുകയും ഇത് യേശുവിന്റെ വാക്കുകൾ ആയതിനാൽ മായ്ച്ചു കളയരുതെന്ന് നിർദ്ദേശിക്കുകയും ചെയ്തു. ഞാൻ "യേശു, നിന്നെ സ്നേഹിക്കുന്നു" എന്നായിരുന്നു ഈ വാക്കുകൾ. ഞാൻ കുറെ നാൾ എഴുതിയെടുക്കാതിരുന്നതിനു ശേഷം യേശുവിൽ നിന്നുള്ള ആദ്യ വാക്കുകൾ ആയിരുന്നു ഇവ. 1986 ജൂൺ 20 നായിരുന്നു ഇത്. സാവധാനം, പടിപടിയായി എത്രയും ആർദ്രതയോടെ യേശു വീണ്ടും എന്റെ പക്കൽ വന്നു. 1986 ജൂലൈ ഒൻപതിന് ദൈവം ഒഴിഞ്ഞു. "ദൈവമായി ഞാൻ നിന്നെ സ്നേഹിക്കുന്നു." എന്റെ സങ്കോചം കണ്ടുകൊണ്ട് ഇത് ദൈവത്തിൽ നിന്നാണെന്നും ദൈവം എന്റെ അരികെ ഉണ്ടെന്നും അതുകൊണ്ട് ഈ വാക്കുകൾ കാത്തുസൂക്ഷിക്കണമെന്നും മാലാഖ എന്നോട് പറഞ്ഞു. പിന്നീടുള്ള സന്ദേശത്തിൽ ദൈവം പറഞ്ഞു, "ഞാൻ നിന്നെ ആത്മീയമായി പരിപോഷിപ്പിച്ചിരിക്കുന്നു. ഞാൻ നിനക്ക് ഈ ആത്മീയ ആഹാരം നൽകാനായി വന്നിരിക്കുന്നു. മറ്റുള്ളവർക്കും ഈ ആഹാരം നൽകി അവരെയും സഹായിക്കുക. എന്റെ പക്കലേക്ക് വരുവാൻ തക്കവണ്ണം അവരെ പുഷ്ടിപ്പെടുത്തുക. ഞാൻ നിനക്ക് ആഹാരം നൽകിയും നിന്നെ വളർത്തുകയും നിന്നെ സുഗന്ധം പൂശുകയും ചെയ്തിരിക്കുന്നു. മറ്റുള്ളവരെയും പോഷിപ്പിക്കുക. എന്റെ പക്കലേക്ക് വരാനായി അവരെ സഹായിക്കുക. ഞാൻ നിനക്ക് സ്നേഹം നൽകിയിരിക്കുന്നു. അതുകൊണ്ട് എന്നെ അനുഗമിക്കുക. എനിക്ക് നിന്നോട് അനുഗമം തോന്നി ഈ ആഹാരം നിനക്ക് നൽകിയിരിക്കുന്നു. മറ്റുള്ളവർക്കും സന്തോഷം ലഭിക്കാനായി ഈ ആഹാരം അവർക്കും നൽകുക." 1986 ജൂലൈ 31ന് തിരുഹൃദയ സാദൃശ്യത്തിൽ യേശു എന്റെ അടുക്കൽ വന്നു എന്നോട് പറഞ്ഞു, "എന്റെ പ്രിയപ്പെട്ടവളെ, എന്റെ ഹൃദയമധ്യത്തിൽ നിനക്ക് സ്ഥലം ഒരുക്കിയിരിക്കുന്നു. അവിടെ നീ വസിക്കുന്നതാണ്." 1986 ആഗസ്റ്റ് ഏഴിന് പിതാവ് ഒരിക്കൽ കൂടി പറഞ്ഞു, "ദൈവമായി ഞാൻ നിന്നെ എന്നോട് ബന്ധിച്ചിരിക്കുന്നു." എനിക്ക് സംശയം ഉണ്ടായതിനാൽ ഭയപ്പെട്ടുകൊണ്ട് അവിടുത്തെ പേര് പറയുവാൻ ആവശ്യപ്പെട്ടു. "യഹോവ" എന്ന് അവിടുന്ന് മറുപടി നൽകി. സന്തോഷത്താലും സ്നേഹത്താലും നിറയപ്പെട്ട ഞാൻ അവിടുത്തോടുള്ള എന്റെ ആത്മാവിന്റെ ഉൽക്കടതാഹത്തോടെ പറഞ്ഞു, "നിത്യനായ പിതാവേ, ഞാൻ അവിടുത്തെ സ്നേഹിക്കുന്നു. " അവിടുന്ന് മറുപടി പറഞ്ഞു, "നിന്റെ ദൈവമായി എന്നെ സ്നേഹിക്കുക. എന്നെ സ്തുതിക്കുക. ഞാൻ നിന്റെ നിത്യനായ പിതാവാണ്." അപ്പോൾ ഞാൻ ദൈവത്തോട് ചോദിച്ചു, "എന്റെ സന്തോഷവും എന്റെ ഭയങ്ങളും എന്റെ സ്നേഹവും എന്റെ വിഷമതകളും അവിടുത്തേക്ക് അനുഭവിച്ചറിയാൻ കഴിയുന്നുണ്ടോ? " "ഉണ്ട്" എന്ന് അവിടുന്ന് മറുപടി പറഞ്ഞു. അപ്പോൾ ഞാൻ പറഞ്ഞു, "അങ്ങനെയെങ്കിൽ ഇപ്പോൾ എനിക്ക് എങ്ങനെ അനുഭവപ്പെടുന്നു എന്ന് അങ്ങേയ്ക്ക് അറിയാമല്ലോ. എന്നെ മുഴുവനായിട്ട് അവിടുന്ന് മനസ്സിലാക്കുന്നുവല്ലോ." അപ്പോൾ ദൈവം ഏറ്റവും ആർദ്രതയോടെ പറഞ്ഞു, "അതെ, ഞാൻ മനസ്സിലാക്കുന്നു, എന്റെ പ്രിയപ്പെട്ടവളെ." ദൈവം വീണ്ടും എന്നോട് പറഞ്ഞു, "ദൈവം നിങ്ങളെ എല്ലാവരെയും സ്നേഹിക്കുന്നു. ഈ സന്ദേശങ്ങൾ നിങ്ങളുടെ അടിസ്ഥാനങ്ങളെ കുറിച്ച് നിങ്ങളെ ഓർമ്മിപ്പിക്കുവാനാണ്. എന്റെ സന്ദേശങ്ങൾ മറ്റുള്ളവരെ അറിയിക്കുക." കമ്പി സന്ദേശങ്ങൾ പോലെ വളരെ ഹൃസ്വമായ സന്ദേശങ്ങളാണ് ആദ്യം എനിക്ക് ലഭിച്ചത്. ഇതിനിടയിലും വൈദികരുമായിട്ടുള്ള ബന്ധം ഞാൻ വിച്ഛേദിച്ചിരുന്നില്ല. എന്നാൽ സന്ദേശങ്ങളെ അവലംബിക്കുകയും എനിക്ക് വളരെയേറെ പ്രയാസങ്ങൾ വരുത്തുകയും ചെയ്ത വൈദികനോട് ഞാൻ സന്ദേശങ്ങളെ കുറിച്ച് പിന്നീട് സംസാരിച്ചിരുന്നില്ല. എങ്കിലും കുറെ കഴിഞ്ഞ ശേഷം സന്ദേശങ്ങൾ എനിക്ക് തുടർന്നും ലഭിക്കുന്നുണ്ടെന്ന് അദ്ദേഹത്തോട് പറയാൻ തീരുമാനിച്ചു. ഇപ്രാവശ്യം ഒറ്റപ്പെട്ട കടലാസുകൾക്ക് പകരം സന്ദേശം അടങ്ങിയ നോട്ട്ബുക്കുകൾ ഞാൻ അദ്ദേഹത്തെ കാണിച്ചു. ആദ്യം വെറും കടലാസിൽ ഞാൻ എഴുതിയിരുന്നുവെങ്കിലും എന്റെ ദൗത്യം ആരംഭിക്കേണ്ട സമയമായപ്പോൾ നോട്ട്ബുക്കുകൾ ഉപയോഗിക്കുവാനും അവയ്ക്ക് ക്രമനമ്പർ ഇടാനും പരിശുദ്ധാത്മാവ് എന്നെ ഉപദേശിച്ചു. എന്റെ വീട്ടിലേക്ക് തന്നെ ഞാൻ ആ വൈദികനെ ക്ഷണിച്ചു. നോട്ട്ബുക്കുകൾ കാണുവാൻ അദ്ദേഹം ആഗ്രഹിച്ചു. ഒരു ദിവസത്തേക്ക് അദ്ദേഹത്തിന്റെ കൈവശം ഞാൻ അവ കൊടുത്തു. അടുത്ത ദിവസം അദ്ദേഹത്തിന്റെ വളരെ പരുഷമായ ഒരു എഴുത്ത് എനിക്ക് കിട്ടി. "എന്റെ നോട്ട്ബുക്കുകൾ എല്ലാം കത്തിച്ചു കളയണമെന്നും ഇവ വായിക്കുന്ന എന്റെ സ്നേഹിതരോട് ഇവയെല്ലാം മറക്കാൻ ആവശ്യപ്പെടണം" എന്നുമാണ് അദ്ദേഹം എഴുതിയത്. സാത്താന്റെ എതിർപ്പ് ഇതിലൂടെ ഞാൻ മനസ്സിലാക്കി. എന്റെ സ്നേഹിതർക്ക് വൈദികന്റെ പ്രതികരണത്തോട് യോജിക്കാൻ കഴിഞ്ഞില്ല. ഞാൻ അവരുടെ അഭിപ്രായം വൈദികനോട് പറയുകയും എന്റെ നോട്ട്ബുക്കുകൾ തിരികെ വാങ്ങുകയും ചെയ്തു. ദൈവം എന്നോട് വളരെ കോപിച്ചിരിക്കാൻ സാധ്യതയുണ്ടെന്നും അങ്ങനെ എന്നെ എന്റെ വിധിക്ക് വിട്ടിരിക്കുകയാണെന്നും വൈദികൻ പറഞ്ഞു. ദൈവം ഒന്നോ രണ്ടോ പ്രാവശ്യം ക്ഷമിക്കുമെന്നും, എന്നാൽ ഇപ്പോൾ ഞാൻ ദൈവത്തെ അനുസരിക്കാത്തതിനാൽ എന്നെ സാത്താൻ വിട്ടിരിക്കുകയാണെന്നും അദ്ദേഹം പറഞ്ഞു. എന്റെ മാലാഖ എനിക്ക് നൽകിയ വിവേചനത്തിന്റെ പാഠങ്ങൾ എനിക്ക് മനസ്സിലായി തുടങ്ങിയിരുന്നു. ഈ അവസരത്തിൽ, പ്രത്യേകിച്ചും, അവ എന്നെ സഹായിച്ചു. ഇപ്രാവശ്യം ഞാൻ വഞ്ചിക്കപ്പെട്ടില്ല. വൈദികന്റെ എഴുത്തിന് മറുപടിയായി, "അദ്ദേഹത്തിന്റെ ദൈവമല്ല എന്റെ ദൈവം" എന്ന് ഞാൻ പറഞ്ഞു. അദ്ദേഹത്തിന്റെ ദൈവം പെട്ടെന്ന് ദേഷ്യപ്പെടുന്ന, ക്ഷമയില്ലാത്ത, സഹതാപമില്ലാത്ത, സ്നേഹമില്ലാത്ത ഒരു ഭീകര ദൈവമാണ്. എന്നാൽ ഞാൻ അറിയുന്ന ദൈവം, ദിനംതോറും ഞാനുമായി ബന്ധപ്പെടുന്ന ദൈവം, എന്റെ ദൈവം പൂർണമായും സ്നേഹമാണ്. അനന്തമായി ക്ഷമയുള്ളവനും ആർദ്രനുമാണ്. സ്വർഗ്ഗത്തിൽ നിന്ന് താണിറങ്ങി വന്ന് എന്നോട് സംസാരിക്കുന്ന ദൈവം സൗമ്യനാണ്. കോപിക്കുന്നതിൽ വിമുഖനാണ്. കരുണയുടെ സമുദ്രമാണ്. സ്നേഹം കൊണ്ട് എന്റെ ആത്മാവിനെ പൊതിയുന്നവനാണ്. എല്ലാ ദിവസവും എന്റെ മുറിയിൽ എന്നെ സന്ദർശിക്കുന്ന ദൈവം, വൈദികൻ പിശാച് എന്ന് വിളിക്കുന്ന പ്രതിഭാസം, എന്റെ ആത്മാവിനെ സമാധാനവും പ്രത്യാശയും കൊണ്ട് നിറയ്ക്കുന്നു. എന്റെ ദൈവം ആത്മീയമായി എന്നെ പോഷിപ്പിച്ചുകൊണ്ട് അവിടുത്തെ വിശ്വാസത്തിൽ എന്നെ വളർത്തുന്നു. അവിടുന്ന് എന്നെ ആത്മീയ കാര്യങ്ങൾ പഠിപ്പിക്കുകയും അവിടുത്തെ ഹൃദയത്തിന്റെ നിക്ഷേപങ്ങൾ എനിക്ക് വെളിപ്പെടുത്തി തരികയും ചെയ്യുന്നു. ഇതിനുശേഷം കുറെ ദിവസങ്ങൾ കൂടി എഴുത്തുനിർത്തുവാനും, അപ്പോൾ എന്താണ് സംഭവിക്കുന്നതെന്ന് നിരീക്ഷിക്കുവാനും വൈദികൻ എന്നോട് ആവശ്യപ്പെട്ടു. വൈദികൻ ആവശ്യപ്പെട്ടതുപോലെ സന്ദേശങ്ങൾ എഴുതിയെടുക്കാതെ ഏതാനും ദിവസങ്ങൾ ഞാൻ തള്ളിവിട്ടു. ഞാൻ പ്രാർത്ഥിക്കുകയും യഥാർത്ഥമായി ആരാണ് എന്നെ നയിക്കുന്നതെന്ന് എനിക്ക് വെളിപ്പെടുത്തി തരുവാൻ ആവശ്യപ്പെടുകയും ചെയ്തു. സന്ദേശങ്ങൾ യഥാർത്ഥമായി ദൈവത്തിൽ നിന്നാണെങ്കിൽ, "യഹോവയായ ഞാൻ നിന്നെ നയിക്കുന്നു" എന്ന വാക്കുകൾ എന്നോട് പറയുവാൻ ആവശ്യപ്പെട്ടു. ദൈവം എന്റെ പ്രാർത്ഥന പോലെ മറുപടി നൽകി. സന്ദേശങ്ങൾ തുടർന്നു. 1986 ഡിസംബർ 15 ന് ദൈവം ഈ സന്ദേശം നൽകി: "മകളെ, എല്ലാ ജ്ഞാനവും എന്നിൽ നിന്ന് വരുന്നു. നിനക്ക് ജ്ഞാനം നേടണമോ? " ദൈവം എനിക്ക് വാഗ്ദാനം ചെയ്യുന്നതെന്തെന്ന് മനസ്സിലാക്കാതെ തന്നെ, "ഓ" എന്ന് ഞാൻ മറുപടി പറഞ്ഞു. അപ്പോൾ അവിടുന്ന് എന്നോട് പറഞ്ഞു: "ഞാൻ നിനക്ക് ജ്ഞാനം നൽകാം, എന്നാൽ നീ അത് എന്നിൽ നിന്ന് നേടണം." ഇതെങ്ങനെ സാധിക്കുമെന്ന് ഞാൻ ചിന്തിക്കുന്നത് കണ്ടപ്പോൾ, അവിടുന്ന് സർവ്വശക്തനാണെന്നും, അവിടുന്ന് എന്നെ പഠിപ്പിക്കാം എന്നും പറഞ്ഞു. ദൈവം എനിക്ക് നൽകിയതിനെക്കുറിച്ച് ഞാൻ ധ്യാനിച്ചപ്പോൾ, ധ്യാനിക്കുംതോറും ദൈവം എനിക്ക് നൽകിക്കൊണ്ടിരുന്ന അമൂല്യമായ ദാനത്തെക്കുറിച്ച് എനിക്ക് ബോധ്യം വന്നു. ഞാൻ അവിടുത്തേക്ക് ഇതിനായി നന്ദി പോലും പറഞ്ഞില്ലല്ലോ എന്ന് എനിക്ക് മനസ്സിലായി. അടുത്ത ദിവസം ഞാൻ അവിടുത്തോട് നന്ദി പറഞ്ഞപ്പോൾ, ഞാൻ ജ്ഞാനം പ്രാപിക്കണമെന്നും, അതിനായി അവിടുന്ന് എന്നെ സഹായിക്കാം എന്നും പറഞ്ഞു. എന്നെ ശുശ്രൂഷിക്കുവാൻ നീ ആഗ്രഹിക്കുന്നുവോ? കാവൽ മാലാഖയുടെ സ്ഥാനത്ത് യേശു കൂടുതലായി വരാൻ തുടങ്ങി. അവിടുന്ന് തിരുഹൃദയ സാദൃശ്യത്തിൽ എന്റെ അടുക്കൽ വന്നു. ഈ ദൗത്യത്തിലൂടെ അവിടുത്തെ ശുശ്രൂഷിക്കുവാൻ ഞാൻ ആഗ്രഹിക്കുന്നുണ്ടോ എന്ന് ചോദിച്ചാൽ, ഒരു ദിവസം അവിടുന്ന് എന്നെ അത്ഭുതപ്പെടുത്തി. എന്താണ് മറുപടി പറയേണ്ടത് എന്നറിയാതെ ഞാൻ കുഴങ്ങി. ഇത് എഴുതിയെടുക്കുവാൻ ഞാൻ ആഗ്രഹിച്ചില്ല. എന്റെ വീട് വിട്ട് മഠത്തിൽ ചേർന്ന് കന്യാ സ്ത്രീ ആകുവാൻ യേശു എന്നോട് ആവശ്യപ്പെടുമോ എന്ന് ഞാൻ സംശയിച്ചു. ഞാൻ ഇതിനു തയ്യാറല്ലായിരുന്നു. എന്റെ അവിശ്വാസം യേശുവിനെ ദുഃഖത്തിൽ ആഴ്ത്തി. "നിന്റെ അപാരമായ ബലഹീനതയിലും എനിക്ക് നിന്നിൽ വസിക്കുവാൻ കഴിയും" എന്ന് അവിടുന്ന് പറഞ്ഞപ്പോൾ, അവിടുത്തെ ശബ്ദം ദുഃഖമയമായിരുന്നു. യേശുവിനെ ദുഃഖത്തിൽ ആക്കിയത് കൊണ്ട് ഞാൻ അസ്വസ്ഥയായി. എന്നാൽ അതേസമയം ദൈവമാകുന്ന യേശുവിനെ എനിക്ക് ഭയവുമായിരുന്നു. അവിടുന്ന് എന്നോട് പറഞ്ഞു: "നീ എന്നെ ശുശ്രൂഷിക്കുകയാണെങ്കിൽ, ഞാൻ നിന്നിലൂടെ നിങ്ങളോടുള്ള എന്റെ സ്നേഹവികാരം വെളിപ്പെടുത്തുന്നതായിരിക്കും." രാത്രി മുഴുവൻ ഞാൻ ഇതെക്കുറിച്ച് ചിന്തിച്ചു കൊണ്ടിരുന്നു. അതിനുശേഷം ഞാൻ അവിടുത്തെ ഇഷ്ടത്തിന് കീഴടങ്ങാൻ തീരുമാനിച്ചു. എന്നിട്ട് ഞാൻ അവിടുത്തോട് ചോദിച്ചു: "ഞാൻ അങ്ങയെ ശുശ്രൂഷിക്കണമെന്നാ അവിടുന്ന് ആഗ്രഹിക്കുന്നുവോ? " ഉടൻ തന്നെ യേശുവിന്റെ സന്തോഷം എനിക്ക് അനുഭവപ്പെട്ടു. അവിടുന്ന് എന്നോട് പറഞ്ഞു: "അതെ, ഞാൻ വളരെയധികം ആഗ്രഹിക്കുന്നു. വസൂല വരിക. എന്നെ എങ്ങനെ ശുശ്രൂഷിക്കണമെന്നും, എവിടെ ശുശ്രൂഷിക്കണമെന്നും ഞാൻ നിനക്ക് കാണിച്ചുതരാം. ഇപ്പോഴത്തെ പോലെ തന്നെ നീ എന്നെ ശുശ്രൂഷിക്കുക. നീ ആയിരിക്കുന്നതുപോലെ തുടരുക. സ്നേഹം ഏറ്റവുമധികം ആവശ്യമുള്ളിടത്ത് ശുശ്രൂഷിക്കുവാൻ എനിക്ക് ശുശ്രൂഷകരെ ആവശ്യമുണ്ട്. നീ തിന്മയുടെയും അവിശ്വാസികളുടെയും ഇടയിൽ വസിക്കുന്നത് കൊണ്ട് കഠിനമായി പരിശ്രമിക്കണം. തിന്മയുടെ ആഴങ്ങളിലാണ് നിങ്ങൾ വസിക്കുന്നത്. അന്ധകാരം നിറഞ്ഞുനിൽക്കുന്നിടത്താണ് നീ നിന്റെ ദൈവത്തെ ശുശ്രൂഷിക്കുവാൻ പോകുന്നത്. നിനക്ക് യാതൊരു വിശ്രമവും ഉണ്ടാകുകയില്ല. എല്ലാ നന്മയും തിന്മയായി തീർന്നിരിക്കുന്നിടത്ത് നീ എന്നെ ശുശ്രൂഷിക്കും. അതെ, നികൃഷ്ടതയുടെയും തിന്മയുടെയും ലോകത്തിന്റെ പാപങ്ങളുടെ നടുവിൽ നീ എനിക്ക് വേണ്ടി ശുശ്രൂഷ ചെയ്യുക. ദൈവവിശ്വാസമില്ലാത്ത ആളുകളുടെ ഇടയിൽ എന്നെ നിന്ദിക്കുന്നവരുടെയും എന്റെ ഹൃദയത്തെ കൊത്തിത്തുളക്കുന്നവരുടെ ഇടയിൽ എന്നെ ശുശ്രൂഷിക്കുക. എന്നെ ദ്രോഹിക്കുകയും എന്നെ വിധിക്കുകയും ചെയ്യുന്നവരുടെ ഇടയിൽ എന്നെ ശുശ്രൂഷിക്കുക. എന്നെ വീണ്ടും ക്രൂശിക്കുകയും തുപ്പുകയും ചെയ്യുന്നവരുടെ ഇടയിൽ എന്നെ ശുശ്രൂഷിക്കുക. ഓ, വസൂല, ഞാൻ എന്തുമാത്രം വേദന അനുഭവിക്കുന്നു! വന്ന് എന്നെ ആശ്വസിപ്പിക്കുക. എന്നോടുകൂടി പീഡകൾ സഹിക്കുക. എന്റെ കുരിശ് വഹിക്കുക." 1987 മെയ് 24. ദൈവത്തിൻറെ പഠിപ്പിക്കലുകൾ തുടർന്നുകൊണ്ടിരുന്നു. ഇത് എഴുതുന്ന ദിവസം വരെയും അവിടുത്തെ സന്ദേശങ്ങൾ എനിക്ക് ലഭിച്ചുകൊണ്ടിരുന്നു. എന്റെ മരണദിവസം വരെയും ഈ കൃപാവരം തുടരുമെന്ന് ദൈവം എന്നോട് പറഞ്ഞിട്ടുണ്ട്.