Latest / ദൈവത്തിലുള്ള യഥാർത്ഥ ജീവിതം - TLIG / Ep 80: എന്റെ സാന്നിദ്ധ്യത്തിന്റെ രഹസ്യത്തിൽ വിശ്വസിക്കൂ
Transcript
- എപ്പിസോഡ്സ് 80. 16.10.1988. ലോസന്നായിലെ ആംഗ്ലിക്കൻ ദേവാലയം ഞാൻ സന്ദർശിച്ചു, കാരണം ഞാൻ ആ ദേവാലയത്തിൽ നിന്നാണ് വിശുദ്ധ കുർബാന സ്വീകരിക്കുന്നത്. ഞങ്ങൾ എല്ലാവരും അൾത്താരയുടെ അടുത്തേക്ക് ചെന്ന് അവിടെ മുട്ടുകുത്തി നിൽക്കും. പുരോഹിതൻ ആദ്യം യേശുവിന്റെ തിരുശരീരം ഞങ്ങൾക്ക് കൊണ്ടുവന്ന് നൽകും; അതിനുശേഷം കാസയിൽ യേശുവിന്റെ തിരുരക്തം കൊണ്ടുവന്ന് ഞങ്ങൾക്ക് നൽകും. വിശുദ്ധ കുർബാനയിൽ യേശുവിന്റെ തിരുശരീരവും തിരുരക്തവും സ്വീകരിക്കേണ്ട ഉത്തമ രീതിയാണിത്; യേശു ആഗ്രഹിക്കുന്നതും ഈ രീതി തന്നെയാണ്. ആംഗ്ലിക്കൻ ദേവാലയത്തിൽ സാധാരണ "നന്മ നിറഞ്ഞ മറിയമേ" എന്ന പ്രാർത്ഥന ചൊല്ലാറില്ല; അതിനാൽ ആരും കേൾക്കാതെ "നന്മ നിറഞ്ഞ മറിയമേ" എന്ന പ്രാർത്ഥന ചൊല്ലി പരിശുദ്ധ മാതാവിനെ വണങ്ങുന്നതിന് ഞാൻ അവിടെ പോകാറുണ്ട്. ആ ആംഗ്ലിക്കൻ ദേവാലയത്തിൽ മുഴങ്ങിയ ആദ്യത്തെ "നന്മ നിറഞ്ഞ മറിയമേ" എന്ന പ്രാർത്ഥന ഞാനായിരിക്കും ചൊല്ലിയത്. 18.10. 1988. എന്റെ കർത്താവേ. ഞാനാണ് കർത്താവ്. എന്റെ ദൈവമേ. ഇത് ഞാനാണ്. എന്റെ സുഹൃത്തുക്കൾ എനിക്ക് നൽകിയിട്ടുള്ള മെഡലുകൾ അങ്ങ് അനുഗ്രഹിക്കാമോ? അവയെടുത്ത് എന്റെ അധരത്തോട് അടുപ്പിക്കുക; അനുഗ്രഹിക്കേണ്ടവ ഞാൻ അനുഗ്രഹിക്കാം. മെഡലുകളിൽ ഒരെണ്ണം യേശു അനുഗ്രഹിക്കുകയില്ലെന്ന് അവിടെ തന്നെ ബോധ്യപ്പെടുത്തി, കാരണം ഒരെണ്ണം ആത്മീയ അർത്ഥം സൂചിപ്പിക്കുന്ന മെഡൽ ആയിരുന്നില്ല. കർത്താവേ, മെഡലുകളിൽ ചിലത് സെൽഫോണിന്റെ കവറിനുള്ളിലാണ്; അവയും അങ്ങേയ്ക്ക് ചുംബിച്ചു ആശീർവദിക്കുവാൻ കഴിയുമോ? നിന്റെ നിഷ്കളങ്കത എനിക്ക് ഇഷ്ടമാണ്; അവ സ്ഥിതി ചെയ്യുന്നതുപോലെ തന്നെ അവയെ എടുക്കുക. ഞാൻ സർവ്വശക്തനാണ്; നീ എന്നിൽ അർപ്പിക്കുന്ന നിന്റെ ചെറിയ വിശ്വാസത്തെ ഞാൻ എടുത്ത് എന്റെ തിരുഹൃദയത്തിൽ സൂക്ഷിക്കും. എന്റെ തിരുഹൃദയം നിന്റെ ചെറിയ വിശ്വാസത്തെ ശക്തമായ വിശ്വാസമായി മാറ്റും. ഇപ്പോൾ വന്ന് വിശ്രമിക്കുക. ഓ, എന്റെ കർത്താവേ, എന്റെ കർത്താവേ, അങ്ങേയ്ക്ക് നന്ദി. 19.10.1988. ദൈവത്തിന് മഹത്വം ഉണ്ടാകട്ടെ. വിശുദ്ധ മിഖായേൽ മാലാഖയോടുള്ള പ്രാർത്ഥനയ്ക്ക് ഉത്തരമായി ലഭിച്ച സന്ദേശം. നമ്മുടെ കർത്താവിന് സ്തുതി ഉണ്ടാകട്ടെ. പരിശുദ്ധ മറിയത്തോടുള്ള പ്രാർത്ഥനയ്ക്ക് ഉത്തരമായി ലഭിച്ച സന്ദേശം. ഞാൻ നിനക്ക് എന്റെ സമാധാനം നൽകുന്നു; വരൂ. യേശുവിന്റെ തിരുഹൃദയത്തോടുള്ള പ്രാർത്ഥനയ്ക്ക് ഉത്തരമായി ലഭിച്ച സന്ദേശം. കർത്താവായ ഞാൻ അവരോട് ഇപ്രകാരം പറയുന്നു. ഒരു ചെറിയ പ്രാർത്ഥനാ സമൂഹത്തിന് വേണ്ടിയുള്ള സന്ദേശം. നിങ്ങൾ ഓരോരുത്തരെയും ഞാൻ അനുഗ്രഹിക്കുന്നു. എന്റെ ദൈവീക സന്ദേശം പ്രചരിപ്പിക്കുന്നതിന് വേണ്ടി സഹായിക്കുന്നവരെയെല്ലാം, പ്രത്യേകിച്ച് തങ്ങളുടെ ഒഴിവുസമയം തികയ്ക്കുന്നവരെയെ ഞാൻ അനുഗ്രഹിക്കുന്നു. എന്റെ ആഹ്വാനങ്ങൾ നിഷ്ഫലമാവുകയില്ല; ഞാൻ നിങ്ങളെ സ്നേഹിക്കുന്നതുപോലെ നിങ്ങൾ പരസ്പരം സ്നേഹിക്കുവിൻ. നിങ്ങളെ പരിഹസിക്കുന്നവരിലേക്കും എന്റെ സന്ദേശം പ്രചരിപ്പിക്കുവിൻ. ബോധജ്ഞാനം ലഭിക്കുന്നതിന് വേണ്ടി പ്രാർത്ഥിക്കുവിൻ. പരസ്പരം തുല്യമായി കരുതിക്കൊണ്ട് പെരുമാറുവിൻ. പ്രിയപ്പെട്ടവരെ, ഞാൻ എല്ലായ്പ്പോഴും സന്നിഹിതനാണ്; യേശുവായ ഞാൻ നിങ്ങൾ എല്ലാവരെയും നിത്യമായ സ്നേഹത്താൽ സ്നേഹിക്കുന്നു. എന്റെ അടുക്കലേക്ക് വരുവിൻ; വസൂല, എന്റെ തിരുഹൃദയം അവരെ കാണിച്ചു കൊടുക്കുക. കർത്താവായ ഞാൻ അവരെ എന്നോടൊപ്പം നടക്കുവാൻ പഠിപ്പിക്കും; ദൈവത്തിലുള്ള യഥാർത്ഥ ജീവിതം എന്താണെന്ന് ഞാൻ അവർക്ക് കാണിച്ചു കൊടുക്കും. അവർ എല്ലാവരും എന്റെ മക്കളാണെന്നും, അവർ എന്റെ സ്വന്തമാണെന്നും ഞാൻ അവരെ ബോധ്യപ്പെടുത്തും. സാത്താൻ അവരെ എങ്ങനെ വഞ്ചിച്ചുവെന്നും, അവൻ എങ്ങനെയുള്ള വഞ്ചകനാണെന്നും ഞാൻ അവർക്ക് മനസ്സിലാക്കി കൊടുക്കും. വീണ്ടും വീണ്ടും ഞാൻ അവരോട് പറയുന്നു: സാത്താൻ ഉണ്ട്; അവൻ ദുഷ്ടനാണ്. ആരംഭം മുതൽ നിങ്ങളെ വഞ്ചിച്ചവനാണ് അവൻ; അവസാനം അവൻ കീഴടക്കപ്പെടുകയും തകർക്കപ്പെടുകയും ചെയ്യും. എന്റെ പ്രിയപ്പെട്ടവരെ, നിങ്ങൾ പ്രാർത്ഥിക്കുവിൻ; ഞാൻ നിങ്ങളെ ശ്രവിക്കുന്നു. എന്നോട് പ്രാർത്ഥിക്കുകയും എന്നോട് സംസാരിക്കുകയും ചെയ്യുവിൻ; ഞാൻ സദാ സന്നിഹിതനാണ്. ഞാൻ നിങ്ങളുടെ പരിശുദ്ധനായ സന്തത സഹചാരിയാണ്; എപ്പോഴും ഞാൻ നിങ്ങളുടെ മധ്യേ ഉണ്ട്. എന്റെ സാന്നിധ്യത്തിന്റെ ഈ രഹസ്യത്തിൽ വിശ്വസിക്കുക; നിങ്ങളോടുള്ള എന്റെ സ്നേഹം നിത്യമാണ്. നിങ്ങൾ സ്വർഗ്ഗത്തിൽ എത്തുമ്പോൾ മാത്രമേ എന്റെ ഈ സ്നേഹത്തിന്റെ ആഴവും അതിന്റെ സമ്പൂർണ്ണതയും നിങ്ങൾ ഗ്രഹിക്കുകയുള്ളൂ. എന്റെ സാന്നിധ്യം അനുഭവിച്ചറിയുവിൻ; എന്റെ സാന്നിധ്യം അനുഭവിച്ചറിയുവിൻ. ഞാൻ നിങ്ങൾ എല്ലാവരെയും സ്നേഹിക്കുന്നു. 23.10. 1988. എന്റെ കുഞ്ഞേ, ഞാൻ നിന്നെ എപ്രകാരം സ്നേഹിക്കുന്നുണ്ടെന്ന് നീ മനസ്സിലാക്കുന്നുണ്ടോ? വസൂല, എന്നെ തീക്ഷ്ണമായി ആഗ്രഹിച്ചുകൊണ്ട് എന്നെ മഹത്വപ്പെടുത്തുക; ഒരു പുഷ്പം വെള്ളം അന്വേഷിക്കുന്നതുപോലെ എനിക്ക് വേണ്ടി ദാഹിക്കുക. ദൈവത്തെ ആഗ്രഹിക്കുക എന്നത് അവിടുത്തെ മഹത്വപ്പെടുത്തലാണ്. നീ ഭൂമിയിൽ വച്ച് ദൈവത്തെ ആഗ്രഹിക്കുന്നില്ലെങ്കിൽ, ശുദ്ധീകരണ സ്ഥലത്ത് വച്ച് ദൈവത്തെ ആഗ്രഹിക്കുവാൻ നീ പഠിക്കും. ശുദ്ധീകരണ സ്ഥലത്ത് ദൈവത്തോടുള്ള ആഗ്രഹം മാത്രമാണ് ഉള്ളത്. ഇതിലോടകം നീ എന്നോട് അടുത്തിരിക്കുന്നു. ഭൂമിയിലുള്ള ദിനങ്ങൾ കുറഞ്ഞുകൊണ്ടിരിക്കുന്നു; ദൈവസന്നിധിയിൽ എത്താനുള്ള സമയം അടുത്തുകൊണ്ടിരിക്കുന്നു. അതെ, ആകാംക്ഷയോടെ ഞാൻ നിന്റെ ദിനങ്ങൾ എണ്ണിക്കൊണ്ടിരിക്കുന്നു. നിന്റെ മനസ്സുകൊണ്ട് എന്നെ കാണുക; നിന്റെ ഹൃദയം കൊണ്ട് എന്നെ കാണുക; നിന്റെ ദേഹി കൊണ്ട് എന്നെ കാണുക. എന്നെ ദർശിക്കുവാനുള്ള കൃപാവരം ഞാൻ നിനക്ക് നൽകിയിട്ടുണ്ട്; അതിനാൽ നീ ആ കൃപാവരം ഉപയോഗിക്കുക. എന്നെ ദർശിച്ച് എന്റെ നേർക്ക് പുഞ്ചിരിക്കുക; സ്നേഹപൂർവ്വം എന്നോട് പുഞ്ചിരിക്കുക. ഒരിക്കലും എന്നോട് പുഞ്ചിരിക്കാത്തവരും, എന്നാൽ തങ്ങളുടെ ആവശ്യങ്ങൾക്ക് വേണ്ടി മാത്രം എന്നെ സമീപിക്കുന്നവർക്കും വേണ്ടി പരിഹാരം ചെയ്യുക. നമ്മൾ, നമുക്ക്. അതെ, കർത്താവേ, നമ്മൾ, നമുക്ക്. 24.10. 1988. എന്റെ കർത്താവേ, എന്റെ ദൈവമേ. ഇത് ഞാനാണ്; എന്റെ സമാധാനം ഞാൻ നിനക്ക് നൽകുന്നു. കുഞ്ഞേ, ഞാൻ നിന്നെ സ്നേഹിക്കുന്നു. മകളേ, നിന്റെ പ്രാർത്ഥനകൾ വഴി മനുഷ്യരെ എന്റെ അടുക്കലേക്ക് നയിക്കുക; അവരുടെ രക്ഷയ്ക്ക് വേണ്ടി പ്രാർത്ഥിക്കുക. നിന്നെ തിരസ്കരിക്കുന്നവരോട് ക്ഷമിച്ചുകൊണ്ട് എന്റെ തിരുഹൃദയത്തെ പ്രസാദിപ്പിക്കുക. ഒരിക്കലും അവരെ കുറ്റപ്പെടുത്തരുത്; ഒരിക്കലും അവരുടെ മേൽ കുറ്റം ചുമത്തരുത്. ഞാനാണ് വിധികർത്താവ്; വിധിദിവസം ഞാൻ അവരെ വിധിക്കും. അതിനാൽ, എന്റെ കുഞ്ഞേ, നീ അവരോട് ക്ഷമിക്കണം; ദുഷ്ടതയ്ക്ക് പകരം സ്നേഹം നൽകുക. എന്നിൽ ആശ്രയിച്ചുകൊണ്ട് നീ വിശ്രമിക്കുക; എന്റെ തിരുഹൃദയത്തിൽ നിന്റെ സമാശ്വാസം കണ്ടെത്തുക. അതെ, എന്റെ കർത്താവേ. എന്നെ മറക്കരുത് എന്ന് നീ പറയുന്നത് കേൾക്കുവാൻ ഞാൻ ആഗ്രഹിക്കുന്നു. എന്റെ സാന്നിധ്യം അനുസ്മരിക്കുക; എന്റെ സാന്നിധ്യത്തെക്കുറിച്ച് നീ ധ്യാനിക്കണമെന്ന് ഞാൻ എപ്രകാരം ആഗ്രഹിക്കുന്നുണ്ടെന്ന് നിനക്ക് അറിയാമോ? എന്റെ സാന്നിധ്യത്തെക്കുറിച്ചുള്ള നിരന്തരമായ സ്മരണ പലരും മറക്കാറുള്ള വളരെ പ്രധാനപ്പെട്ട ഒരു രഹസ്യമാണ്. എന്റെ സാന്നിധ്യത്തെക്കുറിച്ച് ധ്യാനിക്കുക; നിത്യമായ സ്നേഹത്താൽ ഞാൻ സ്നേഹിക്കുന്ന എന്റെ മക്കളെ, എന്റെ യഥാർത്ഥ സാന്നിധ്യത്തെ ധ്യാനിച്ചുകൊണ്ട് എന്നെ പ്രസാദിപ്പിക്കുക. നമ്മൾ, നമുക്ക്, നീയും ഞാനും, ഞാനും നീയും, നമുക്ക് എന്നീ വാക്കുകൾ ഉപയോഗിച്ചുകൊണ്ട് നിങ്ങൾ സ്വയം പരിശീലിക്കുക. നിങ്ങളുടെ പ്രവർത്തികളിലും ചർച്ചകളിലും ചിന്തകളിലും എന്നെയും ഉൾപ്പെടുത്തുക. എന്റെ സാന്നിധ്യത്തെ ബഹുമാനിക്കുക; ഞാൻ പരിശുദ്ധനായ ദൈവമാണെന്നുള്ളത് ഒരിക്കലും മറക്കരുത്. എന്നെ ഓർക്കുന്നതിലൂടെ, ഞാൻ നിങ്ങളോടൊപ്പം ഉണ്ടെന്ന യാഥാർത്ഥ്യം ഓർക്കുന്നതിലൂടെ, നിങ്ങൾ പാപത്തിൽ അധികം നിബന്ധിക്കുകയില്ല. നസ്രായനായ യേശുക്രിസ്തുവായ ഞാൻ നിങ്ങളെല്ലാവരെയും അനുഗ്രഹിക്കുന്നു. 25.10. 1988. എന്റെ കർത്താവേ. ഇത് ഞാനാണ്; മകളേ, ആനന്ദിക്കുവിൻ, കാരണം നിനക്ക് ഒരിക്കലും മനസ്സിലാക്കുവാൻ കഴിയാത്ത വിധത്തിലുള്ള സ്നേഹത്താൽ, നിത്യമായ സ്നേഹത്താൽ, അനാദികാലം മുതൽ തന്നെ ഞാൻ നിന്നെ സ്നേഹിച്ചു. ഒരു പ്രത്യേക വാത്സല്യത്താൽ ഞാൻ നിന്നെ സ്നേഹിച്ചു. എന്റെ ആത്മാവിനെ ആനന്ദിപ്പിക്കുവാനും, നിന്റെ സ്നേഹത്താൽ എന്റെ ഹൃദയത്തെ നിറയ്ക്കുവാനുമായി ഞാൻ നിന്നെ സൃഷ്ടിച്ചു. എന്റെ ക്രോധത്തെ ശമിപ്പിക്കുന്നതിനും, നിന്റെ കണ്ണുനീർ കൊണ്ട് എന്റെ മുറിവുകൾക്ക് ആശ്വാസം ഏകുന്നതിനുമായി ഞാൻ നിന്നെ സൃഷ്ടിച്ചു. ഞാൻ ക്ഷീണിതനാകുമ്പോൾ എനിക്ക് വിശ്രമം നൽകുന്നതിനും, എന്നെ മനുഷ്യർ വിസ്മരിക്കുമ്പോൾ എന്നോട് സംസാരിക്കുന്നതിനുമായി ഞാൻ നിന്നെ സൃഷ്ടിച്ചു. ഞാൻ നിന്നെ ഭോഷത്തോളം സ്നേഹിച്ചു. എന്റെ തിരുഹൃദയത്തിന്റെ ആഗ്രഹങ്ങൾ അറിയുന്നതിനു വേണ്ടി ഞാൻ നിന്നെ സൃഷ്ടിച്ചു. എനിക്കുള്ളതെല്ലാം പങ്കുവെക്കുന്നതിനായി ഞാൻ നിന്നെ തിരഞ്ഞെടുത്തു. എന്റെ തിരുഹൃദയത്തിന്റെ അഭിലാഷങ്ങൾ നീ അറിയുന്നതിനും, അവ മറ്റുള്ളവരോട് പങ്കുവെക്കുന്നതിനുമായി ഞാൻ നിന്നെ തിരഞ്ഞെടുത്തു. എന്റെ പ്രകാശത്തിന്റെ മകളാകുക; നിന്നെ ഏറ്റവുമധികം സ്നേഹിക്കുന്നവൻ ഞാനാണ്; നിന്നെ ഏറ്റവുമധികം അനുഗ്രഹിക്കുന്നവൻ ഞാനാണ്. എന്റെ അസൂയാവഹമായ സ്നേഹം നിന്റെ കൊച്ചു ഹൃദയത്തെ ഒരു പ്രകാശതീപ്പന്തമാക്കും. നീ നിന്റെ ഊഴത്തിൽ തീപ്പന്തമായി തീരുന്ന നീ, എന്നെ സ്നേഹിക്കുവാൻ മറ്റുള്ളവരുടെ ഹൃദയങ്ങളെ ജ്വലിപ്പിക്കും. എന്റെ സ്നേഹത്താൽ ജ്വലിക്കുന്ന എന്റെ ബലിപീഠമായി തീരുക; ഈ ജ്വാലയെ മറ്റുള്ളവരിലേക്ക് പകർന്നു കൊടുത്തുകൊണ്ട് ശിലാഹൃദയരെ പോലും എന്റെ ഭക്ത അനുയായികളാക്കി മാറ്റും. ജാതി, മത, വർണ്ണങ്ങളിൽ വ്യത്യാസം കാണരുത്; നിങ്ങളെല്ലാവരും എന്റെ സാദൃശ്യത്തിൽ സൃഷ്ടിക്കപ്പെട്ടവരാണ്. സർവ്വ ജനതകൾക്കും വേണ്ടിയുള്ളതായിരുന്നു എന്റെ കുരിശുമരണം. എന്റെ പരിശുദ്ധ നാമത്തിൽ ഐക്യപ്പെട്ട് ഒന്നാകുവിൻ. സൃഷ്ടികളേ, ഞാൻ നിങ്ങളെ ഭോഷത്തോളം സ്നേഹിക്കുന്നു; സൃഷ്ടികളേ, നിങ്ങളെ നവീകരിക്കുക; നിങ്ങളുടെ മധ്യത്തിലുള്ള എന്റെ സാന്നിധ്യത്തിൽ വിശ്വസിക്കുക. ഞാൻ നിങ്ങളെല്ലാവരെയും സുഖപ്പെടുത്തേണ്ടതിന് നിങ്ങളുടെ ഹൃദയത്തിൽ പ്രവേശിക്കുവാൻ എന്നെ അനുവദിക്കുക. പുഷ്പമേ, എന്നെ ആഗ്രഹിക്കുക; എന്റെ കല്പനയെ ബഹുമാനിക്കുക; എന്നെ പ്രസാദിപ്പിക്കുക. എനിക്ക് ഒന്നാം സ്ഥാനം നൽകുക; ലൗകികമായ സകലതും വെറുക്കുക. ഈ ലോകത്തിൽ മനുഷ്യർ ചെയ്യുന്ന സകല തിന്മകൾക്കും വേണ്ടി വലിയ പരിഹാരം ചെയ്യേണ്ടതുണ്ട്; മറ്റുള്ളവർക്ക് വേണ്ടി പരിഹാരം ചെയ്യുക. വസൂല, ഞാൻ നിന്നെ ഒരിക്കലും ഉപേക്ഷിക്കുകയില്ല; എന്റെ പ്രബോധനങ്ങൾ നിന്നെ എന്റെ അടുക്കൽ എത്തിച്ചു; ഞാനും നീയും, നീയും ഞാനും, നിത്യമായി ഐക്യപ്പെട്ടിരിക്കുന്നവർ. എന്റെ സമാധാനം നിനക്കുണ്ടാകട്ടെ; വരൂ. 31.10. 1988. റോഡോസിൽ ഞാൻ പട്ടണത്തിലേക്കുള്ള ഒരു ബസിൽ കയറി; കണ്ടക്ടറോട് ഒരു ടിക്കറ്റ് വേണമെന്ന് പറഞ്ഞു. അദ്ദേഹം എനിക്കൊരു ടിക്കറ്റ് നൽകി. യേശു എന്റെ അരികിൽ ഇരിക്കുന്നതായി എനിക്ക് ദർശനത്തിൽ ഒരു അനുഭവം ഉണ്ടായി. ഞാൻ യേശുവിന്റെ നേർക്ക് തിരിഞ്ഞ് ചിരിച്ചുകൊണ്ട് ഇങ്ങനെ പറഞ്ഞു: "ഞാൻ ഒരു ടിക്കറ്റിന് വേണ്ടി ചോദിച്ചു; യഥാർത്ഥത്തിൽ നമ്മൾ രണ്ടുപേരുണ്ടല്ലോ." കണ്ടക്ടർക്ക് ഇക്കാര്യം മനസ്സിലായിട്ടില്ല. യേശു ആശ്ചര്യത്തോടെ തിരിഞ്ഞ് എന്നോട് ചോദിച്ചു. എന്താണ് നീ ഇങ്ങനെ പറയുന്നത്? നമ്മൾ ഐക്യപ്പെട്ട് ഒന്നായി തീർന്നവരാണല്ലോ; വരുക. 2.11.1988. വസൂല, എന്റെ സമാധാനം നിനക്കുണ്ടാകട്ടെ; വരൂ. ഞാൻ നിന്നെ ഏതു സാഹചര്യത്തിലാണ് നിയോഗിച്ചിട്ടുള്ളതെങ്കിലും, നീ എന്നെ ഗ്രഹിക്കുവാൻ പരിശ്രമിച്ചുകൊണ്ടിരിക്കുന്നതിൽ ഞാൻ സന്തോഷിക്കുന്നു. പ്രിയപ്പെട്ടവളേ, എന്നെ സ്നേഹിച്ചുകൊണ്ട് എന്റെ വേദനകൾക്ക് ശമനം നൽകുക. ശിശുസഹജമായ നിന്റെ വിശ്വാസം നിന്റെ ദൈവത്തോട് പുലർത്തുക. ആ വിധത്തിൽ എന്നെ പ്രസാദിപ്പിക്കുകയും എന്നെ പൂർണ്ണമായും ആശ്രയിക്കുകയും ചെയ്യുക. കർത്താവേ, ഞാൻ അങ്ങനെ തന്നെ അങ്ങിൽ ആശ്രയിക്കും; എന്റെ സ്വന്തം പിതാവിന്റെ അടുക്കലേക്കല്ലാതെ മറ്റാരിലേക്കാണ് ഞാൻ തിരിയേണ്ടത്? അങ്ങല്ലാതെ എനിക്ക് മറ്റൊരു ദൈവമില്ല. എന്റെ മകളേ, എപ്പോഴും എന്നെ പ്രസാദിപ്പിക്കുക; എന്റെ ആനന്ദമായിരിക്കുക. ഞാനാണ് നിന്റെ പിതാവ്. എന്റെ മകളേ, വളർന്ന് അഭിവൃദ്ധിപ്പെടുക; നിന്റെ ജീവിതത്തിലെ ഫലങ്ങൾ അനേകരെ പോഷിപ്പിക്കട്ടെ. നീ ജനിക്കുന്നതിനു മുമ്പ് തന്നെ എന്റെ പദ്ധതികൾ ഞാൻ തയ്യാറാക്കിയിരിക്കുന്നു; എന്തെന്നാൽ ഞാനാണ് അധികാരി. ഭൂമിയിൽ നിന്നല്ല, നേരെ മറിച്ച് അത്യുന്നതങ്ങളിൽ നിന്ന് എന്റെ സഭ നയിക്കപ്പെടുമെന്ന സത്യം മനുഷ്യർ എളുപ്പം മറക്കുന്നു. എല്ലാ അധികാരവും അത്യുന്നതങ്ങളിൽ നിന്നാണ് ലഭിക്കുന്നതെന്ന് അവർ മറക്കുന്നു. അതിനാൽ ഞാൻ നിന്നോട് പറയുന്നു: ഭൂമിയിലെ ഏത് അധികാരമോ, ഭൂമിയിലെ ഏത് രാജത്വമോ, എന്റെ സഭയ്ക്കുള്ളിൽ നുഴഞ്ഞു കയറിയാലും അവ നിലനിൽക്കുകയില്ല. ഞാൻ അവയെ തകർത്ത് പൊടിക്കൂമ്പാരമാക്കി എറിഞ്ഞുകളയും. ഇതെല്ലാം നിങ്ങൾ നേരത്തെ തന്നെ അറിഞ്ഞിരുന്നതാണെങ്കിലും, നിങ്ങൾ എന്നെ കേൾക്കുകയോ അനുസരിക്കുകയോ ചെയ്തിട്ടില്ല. നിങ്ങൾ എന്നെ സഭയിൽ നിന്നും പുറത്താക്കി. എന്നാൽ എന്റെ സഭയിൽ എന്റെ ആത്മാവിന് സ്വതന്ത്രമായി നിശ്വസിക്കുവാൻ കഴിയേണ്ടതിന്, നിങ്ങളുടെ എല്ലാ വാതിലുകളും ജനലുകളും ഞാൻ തുറന്നിടും. ഞാൻ തുറക്കുന്ന വഴികൾ ആർക്കും അടച്ചുപൂട്ടുവാൻ കഴിയുകയില്ല. ഞാൻ ആൽഫയും ഒമേഗയും ആണെന്ന് ഞാൻ അവരെ ഒരിക്കൽ കൂടി ഓർമ്മിപ്പിക്കും. പരമാധികാരിയായ, പരിശുദ്ധരിൽ പരിശുദ്ധനായ, പരിശുദ്ധ ത്രിയേക ദൈവം ഞാൻ തന്നെയാണ്. ഞാൻ അധികം വൈകാതെ നിങ്ങളുടെ കൂടെ ഉണ്ടാകും. എന്നെ സ്നേഹിക്കുന്ന എല്ലാവർക്കും എന്റെ തിരുഹൃദയത്തിൽ ഞാൻ അഭയസങ്കേതം നൽകും. എന്റെ തിരുഹൃദയമായിരിക്കും അവരുടെ പുതിയ ഭവനം. ഞാൻ ഉന്നതത്തിൽ നിന്ന് വരുന്നു; ഉന്നതത്തിൽ നിന്ന് തന്നെ നിങ്ങളുടെ ഭവനം ഇറങ്ങി വരും. ഇത് എന്റെ വരദാനമായിരിക്കും. എന്റെ പ്രിയപ്പെട്ടവർക്ക് എന്റെ പുതിയ പരിശുദ്ധ നാമം വീണ്ടും ഒരിക്കൽ കൂടി നൽകപ്പെടും. ആകയാൽ വരൂ, എന്നെ സ്തുതിക്കുവിൻ; വരൂ, എന്നെ മഹത്വപ്പെടുത്തുവിൻ; വന്ന് എന്നോട് സമാധാനത്തിലാകുവിൻ. അപ്പോൾ എന്റെ ഭവനം ഞാൻ നിങ്ങൾക്കായി തുറന്ന് നിങ്ങളെ എന്റെ സ്വന്തമായി സ്വീകരിക്കും. എന്റെ അടുക്കലേക്ക് വരുവിൻ; നിങ്ങളെ സ്നേഹിക്കുന്ന കർത്താവാണ് ഞാൻ. എന്റെ കുഞ്ഞേ, അനുഗ്രഹിക്കപ്പെടുക; നമ്മൾ, നമുക്ക്. അതെ, കർത്താവേ. നമ്മൾ, നമുക്ക്. അതെ, പരിശുദ്ധ മറിയമേ. 8. 11.1988. ഇന്ന് എനിക്ക് യേശുവിന്റെ കുരിശ് അനുഭവപ്പെട്ടു; യേശു ദുഃഖിതനായി ഇരിക്കുന്നതായി എനിക്ക് അനുഭവപ്പെട്ടു, അവിടുത്തെ ചിത്രത്തിൽ പോലും. ഇത് ഞാനാണ്; എന്റെ പ്രിയപ്പെട്ടവളേ, എന്റെ കുരിശേറ്റെടുത്ത് എന്നെ ആശ്വസിപ്പിക്കുക. നിങ്ങളുടെ ക്രിസ്തു അത്യന്തിം ക്ഷീണിതനായിരിക്കുന്നു. എന്നെ ആശ്വസിപ്പിക്കുന്നതിനായി എന്റെ തിരുരക്തത്തിന്റെ കുറെ തുള്ളികൾ ഞാൻ നിന്റെ ഹൃദയത്തിൽ വീഴാൻ അനുവദിച്ചിട്ടുണ്ട്. സാത്താൻ ഇപ്പോൾ നിന്നെ നിരൂത്സാഹപ്പെടുത്തുവാൻ തീരുമാനിച്ചിരിക്കുന്നു; എന്നാൽ നിന്നെ സ്പർശിക്കുവാൻ ഞാൻ അവനെ അനുവദിക്കുകയില്ല. ഞാൻ ആരംഭിച്ച് അനുഗ്രഹിച്ചിട്ടുള്ള ഈ ദൈവീക പ്രവർത്തികൾ എന്നെ മഹത്വപ്പെടുത്തിക്കൊണ്ട് പൂർത്തിയാകും. ഞാൻ നിനക്ക് നൽകിയിരിക്കുന്ന കൃപകളെക്കുറിച്ച് ഇതുവരെ പൂർണ്ണമായി മനസ്സിലാക്കാത്തവർക്ക് ബോധ്യം വരേണ്ടതിന്, എന്റെ സ്വരം ശ്രവിച്ചുകൊണ്ട് എഴുതുവാനുള്ള കൃപയും ഞാൻ നിനക്ക് നൽകിയിട്ടുണ്ടെന്ന് അവർ തിരിച്ചറിയുന്നതിന്, ഇന്ന് നീ നിന്റെ സ്വന്തം കൈയക്ഷരത്തിൽ എന്റെ സന്ദേശം എഴുതിയെടുക്കണം. എന്റെ സന്ദേശം നിനക്ക് പറഞ്ഞു തരുവാൻ എന്നെ അനുവദിക്കൂ; എന്നെ ശ്രവിച്ച് എഴുതുക. വസൂല, ഇനിയുള്ള ദിവസങ്ങൾ നിങ്ങളുടെ ശുദ്ധീകരണത്തിനുള്ള ദിവസങ്ങൾ എണ്ണപ്പെട്ടിരിക്കുന്നു. എന്റെ സഭയുടെ നവീകരണത്തിനായി പ്രാർത്ഥിച്ചുകൊണ്ടിരിക്കുന്നവരുടെ പ്രാർത്ഥന ഞാൻ കേട്ടിട്ടുണ്ട്. എന്നോടുള്ള അവരുടെ എല്ലാ പ്രാർത്ഥനകളും ഞാൻ കേട്ടിരിക്കുന്നു. എന്റെ സഭയെ ഞാൻ നവീകരിക്കുമെന്ന് കർത്താവായ ഞാൻ വാഗ്ദാനം ചെയ്യുന്നു. എന്റെ സഭയിലുള്ളവരുടെ അവിശുദ്ധമായ ജീവിതം മൂലം അവളിൽ പറ്റിപ്പിടിച്ചിരിക്കുന്ന കറകളെല്ലാം ഞാൻ തുടച്ചുകളയും. എന്റെ സഭയെ ഞാൻ പുതുക്കി പണിയും. എന്നിരുന്നാലും, പ്രിയപ്പെട്ടവരെ, ഈ ശുദ്ധീകരണ ദിവസം എത്തുന്നതിനു മുമ്പ് അവൾക്ക് എത്രമാത്രം കഷ്ടതകൾ സഹിക്കേണ്ടി വരുമെന്നുള്ള കാര്യം നിങ്ങളോട് പറയുവാൻ ഞാൻ ഭയപ്പെടുന്നു. ഞാൻ അവളെ പൂർണ്ണമായി നവീകരിക്കുവാൻ വേണ്ടി വരുന്നതിനു മുമ്പേ അവളുടെ ഹൃദയത്തിലെ മഹാപീഡകൾ ആരംഭിക്കും. തിരുവെഴുത്തുകൾ പൂർത്തിയാകേണ്ടതിന് ആ ദിവസം വരേണ്ടതാണ്. എന്നാൽ എന്നെ സ്നേഹിക്കുന്ന എല്ലാവരെയും ദുഃഖത്തിന്റെ ആ നാളുകളിൽ ഞാൻ ആശ്വസിപ്പിക്കും. ഞാൻ നിങ്ങളുടെ ഹൃദയങ്ങൾക്ക് സമീപസ്ഥനായിരിക്കും; നിങ്ങൾ എന്നെ അനുഭവിച്ചറിയുവാൻ ഞാൻ ഇടയാക്കും. നിങ്ങളെല്ലാവരെയും ആശ്വസിപ്പിക്കുന്നതിനായി അസംഖ്യം മാലാഖമാരുടെയും വിശുദ്ധരുടെയും ഗണങ്ങളെ നിങ്ങളുടെ അടുക്കലേക്ക് അയക്കും. അതിനാൽ, പ്രിയപ്പെട്ടവരെ, ധൈര്യമായിരിക്കുവിൻ. ഞാൻ ഇപ്പോൾ വേദന സഹിക്കുന്നു. എന്നെ സ്നേഹിക്കുന്നവരെ, എന്നെ അനുഭവിച്ചറിയുക; എന്റെ മുറിവുകൾ അനുഭവിച്ചറിയുക; ദുഃഖഭരിതമായ എന്റെ തിരുഹൃദയം അനുഭവിച്ചറിയുക. സൃഷ്ടികളേ, നിങ്ങളുടെ മേലുള്ള എന്റെ നോട്ടത്തെ അനുഭവിച്ചറിയുക. അന്ധകാരത്തിൽ വീണുകിടക്കുന്ന സൃഷ്ടികളെ, എന്റെ കണ്ണുകൾ രക്തക്കണ്ണീരാൽ നിറഞ്ഞിരിക്കുന്നു. നിങ്ങളിൽ ഭൂരിപക്ഷം പേരും സാത്താന്റെ വലയിൽ വഴുതി വീഴുന്നത് കാണുമ്പോൾ, എങ്ങനെ എന്റെ കണ്ണുകളിൽ നിന്ന് രക്തം ഒഴുകാതിരിക്കും? എന്നെ കേൾക്കുവാൻ ആഗ്രഹമില്ലാത്തവർ തങ്ങളുടെ ദുഷ്ടത തുടരട്ടെ. അനേക വർഷങ്ങളായി ഞാൻ അവർക്ക് മുന്നറിയിപ്പ് നൽകിക്കൊണ്ടിരിക്കുകയായിരുന്നു; അവർ മാനസാന്തരപ്പെടുന്നതിനായി ഞാൻ ആഹ്വാനം ചെയ്തുകൊണ്ടിരിക്കുകയായിരുന്നു. എന്നാൽ എന്റെ മുന്നറിയിപ്പുകൾ അവർ ശ്രദ്ധിക്കുന്നില്ല. അവരുടെ അന്ധതയും മർക്കടമുഷ്ടിയും നിമിത്തം ഞാൻ തളർന്നിരിക്കുന്നു; ഏറെ അവശനായിരിക്കുന്നു. എന്നോടുള്ള അവരുടെ കലഹം മൂടൽമഞ്ഞുപോലെ പടർന്നിരിക്കുന്നു; അത് എന്റെ സഭയിലേക്കും കടന്നു കയറിയിരിക്കുന്നു. സഭയുടെ നേതാവായ പത്രോസ്, അഥവാ മാർപാപ്പ, എങ്ങനെ പ്രവർത്തിക്കണമെന്ന് നിർദ്ദേശം നൽകുന്ന വിധത്തിലേക്ക് ഈ ദുഷിച്ച സ്വാധീനം ചെന്നെത്തിയിരിക്കുന്നു. അതെ, അവർ മാർപാപ്പയെ അനുസരിക്കുന്നില്ല; പിന്നിൽ നിന്ന് അവർ മാർപാപ്പയെ ശപിക്കുന്നു, ചതിക്കുന്നു. അവർ അവനെ അനുസരിക്കുന്നില്ല; അവർ അവനെ മാറ്റി നിർത്തുന്നു. എന്നാൽ അവനെ എതിർക്കുന്നവർ, വഞ്ചിക്കുന്നവർ അനേകരാണ്. എന്റെ സഭ കലഹക്കാരുടെ ഭവനമായി തീർന്നിരിക്കുന്നു. എന്നെ അംഗീകരിക്കുന്നവരും ആദരിക്കുന്നവരുമായ വളരെ കുറച്ചുപേർ മാത്രമേ സഭയിൽ അവശേഷിച്ചിട്ടുള്ളൂ. ശുദ്ധീകരണ ദിനത്തിൽ, കർത്താവായ ഞാൻ എന്റെ എല്ലാ വിശുദ്ധരോടും മാലാഖമാരോടും കൂടെ ഇറങ്ങി വരും. വടക്കുനിന്ന് തെക്ക് വരെയും, കിഴക്കുനിന്ന് പടിഞ്ഞാറ് വരെയും എന്റെ അഗ്നി ഇറങ്ങി വരും. നിങ്ങൾ കാത്തിരിക്കുക; നിങ്ങൾ അത് കാണും. യേശുവേ. കുഞ്ഞേ, നീ നന്നായി എന്നെ കേട്ട് എഴുതിയിരിക്കുന്നു. വസൂല, എന്റെ സന്ദേശം നീ കേൾക്കുന്നില്ലെന്നും, നിന്റെ വിരലുകളെ ഞാൻ നിയന്ത്രിച്ചുകൊണ്ട് നിന്നെക്കൊണ്ട് സന്ദേശം എഴുതിക്കുകയാണ് ചെയ്യുന്നതെന്നും ചിന്തിക്കുന്നവർ മനസ്സിലാക്കുന്നതിനു വേണ്ടിയാണ്, നിന്റെ സ്വന്തം കൈയക്ഷരത്തിൽ എന്റെ സ്വരം ശ്രവിച്ച് സന്ദേശം എഴുതിയെടുക്കുവാൻ ഞാൻ ആവശ്യപ്പെട്ടത്. കർത്താവായ ഞാനാണ് നിന്നെ പ്രചോദിപ്പിക്കുന്നതെന്ന് ചിലർ വിശ്വസിക്കുകയില്ലായിരുന്നു. എന്റെ വസൂല, എനിക്ക് ഇഷ്ടമുള്ള രീതിയിൽ നമുക്ക് സന്ദേശം എഴുതി തുടരാം. പേര് വെളിപ്പെടുത്താതെ, ഒരു പ്രത്യേക വ്യക്തിയുടെ ആവശ്യത്തിനുവേണ്ടി വസൂല യേശുവിനോട് പ്രാർത്ഥിക്കുന്നു. കർത്താവേ, ആ മകളെ സുഖപ്പെടുത്തണമേ. അങ്ങ് ഇവിടെ എന്റെ സമീപം ശരീരത്തോടെ ഉണ്ടായിരുന്നെങ്കിൽ, ഞാൻ അങ്ങയുടെ കരം പിടിച്ച് ആ മകളുടെ അടുക്കലേക്ക് കൊണ്ടുപോകുമായിരുന്നു. അങ്ങ് അവളെ സുഖപ്പെടുത്തുമായിരുന്നു. എന്റെ കുഞ്ഞേ, അവൾ നിന്നെ വിശ്വസിക്കുന്നില്ല. നീ അവളോട് പറയുന്നതെല്ലാം അവൾ ഉടനെ തന്നെ തള്ളിക്കളയുന്നു. അവൾ അവളുടെ ഹൃദയം എനിക്ക് വേണ്ടി തുറക്കുന്നില്ലെങ്കിൽ, എങ്ങനെ എനിക്ക് അവളുടെ ഹൃദയത്തിൽ പ്രവേശിച്ച് അവളെ സമാശ്വസിപ്പിക്കുവാൻ കഴിയും? എങ്കിലും, അവൾ ഞാൻ പറയുന്നത് കേൾക്കാതിരുന്നാലും, അങ്ങേയ്ക്ക് അവളെ സുഖപ്പെടുത്തുവാൻ കഴിയും. വസൂല, അങ്ങനെയെങ്കിൽ, നീ അവൾക്ക് വേണ്ടി പ്രാർത്ഥിക്കുക. ഞാൻ അവളെ സ്നേഹിക്കുന്നു; നിന്റെ പ്രാർത്ഥന തുടരുക. എന്റെ പരിശുദ്ധ സാന്നിധ്യത്തെക്കുറിച്ച് നിന്നെ ഞാൻ അനുസ്മരിപ്പിക്കുന്നതാണ്. ഞാനും നീയും സ്നേഹത്തിന്റെ ഐക്യത്തിൽ. നമ്മൾ, നമുക്ക്. അതെ, കർത്താവേ, നമ്മൾ, നമുക്ക്.