Latest / ദൈവത്തിലുള്ള യഥാർത്ഥ ജീവിതം - TLIG / Ep 51: ഞാൻ നിങ്ങളോടു സംസാരിക്കുന്ന സത്യത്തിന്റെ ശബ്ദമാണ്.
Transcript
- എപ്പിസോഡ് 51. 26/10/1987. പരിശുദ്ധ മാതാവിന്റെ വളരെ വലുതായ ഒരു രൂപത്തിലൂടെ എന്റെ കസിന് പരിശുദ്ധ മാതാവ് പ്രത്യക്ഷപ്പെട്ടതിന്റെ അർത്ഥം ഒക്ടോബർ 24-ാം തീയതി രാത്രി ദൈവം എനിക്ക് മനസ്സിലാക്കി തന്നു. ദേവാലയത്തിനുള്ളിൽ യേശുവിന്റെയോ മാതാവിന്റെയോ വിശുദ്ധരുടെയോ രൂപങ്ങൾ ദൈവം അനുവദിക്കുന്നുണ്ടെന്ന് ഇതുവഴി ദൈവം എന്നെ ബോധ്യപ്പെടുത്തി. ദേവാലയത്തിലെ രൂപങ്ങൾ, ചിത്രങ്ങൾ തുടങ്ങിയവ അലങ്കരിക്കുന്നത് ദൈവം അംഗീകരിക്കുന്നതാണെന്ന് ഒക്ടോബർ 25-ാം തീയതി രാത്രി എനിക്ക് ബോധ്യപ്പെടുത്തി തന്നു. എന്റെ സഭയിൽ എന്റെ രൂപം വെച്ച് വണങ്ങുന്നത് ഞാൻ അനുവദിക്കുന്നു. എന്റെ സഭയെ വിവസ്ത്രയാക്കരുത്. എന്റെ സഭയെ അലങ്കരിക്കുക, മനോഹരമാക്കുക. കത്തോലിക്കരും ഓർത്തഡോക്സുകാരും ദേവാലയങ്ങൾ അലങ്കരിക്കുന്ന പാരമ്പര്യം തുടരുക. വസൂല, എന്നെ ശ്രവിക്കുക; ഞാനാണ് സഭ. പിന്നീട്. പ്രിയപ്പെട്ടവളേ, ഞാൻ കർത്താവാണ്. മകളേ, സന്ദേശം എഴുതിയെടുക്കുക. അല്ലയോ, സൃഷ്ടികളേ, യുഗത്തിന്റെ അവസാനത്തെക്കുറിച്ച് നിങ്ങൾക്ക് മുന്നറിയിപ്പ് നൽകുന്നതിന് ഞാൻ വിശുദ്ധരെയും പ്രവാചകന്മാരെയും അയച്ചിട്ടില്ലേ? പൂർത്തീകരിക്കപ്പെടുവാനുള്ള എന്റെ രഹസ്യം നിങ്ങളോട് പ്രഘോഷിക്കുന്നതിന് വേണ്ടി എന്റെ സ്വർഗ്ഗത്തിൽ നിന്ന് ഒരു മാലാഖയെ ഞാൻ അയക്കുമെന്ന് ഞാൻ നിങ്ങളോട് പറഞ്ഞിട്ടില്ലേ? എന്റെ വചനത്തിന്റെ സ്ഥിരത ഉറപ്പിക്കപ്പെടും. എന്റെ വെളിപ്പെടുത്തലുകൾ നിങ്ങളെ അറിയിക്കുക എന്നതാണ് എന്റെ ദൂതന്റെ ദൗത്യമെന്ന് ഞാൻ നിങ്ങളോട് പറഞ്ഞിട്ടില്ലേ? പ്രവചനത്തിന്റെ ആത്മാവാണ് എനിക്കുള്ള സാക്ഷ്യം. എന്നോട് വിശുദ്ധരായിരിക്കുന്നവർ ആനന്ദിക്കുകയും ഹർഷാരവം മുഴക്കുകയും ചെയ്യട്ടെ; എന്നോട് അവിശുദ്ധരായിരിക്കുന്നവർക്ക് ഹാ ദുരിതം! അവരുടെ എല്ലാ അബദ്ധജടിലമായ വിജ്ഞാനത്തെയും തകർത്തുകൊണ്ട് എന്റെ വചനം ഒരു വാൾപോലെ അവരെ പ്രഹരിക്കും. ഈ അബദ്ധവിജ്ഞാനമാണ് എന്റെ കുഞ്ഞാടുകളെ അവിശ്വാസികളും ദൈവഭയമില്ലാത്തവരും അധാർമികരായ മനുഷ്യരുമാക്കി മാറ്റി കൊണ്ട് സാത്താന്റെ വലയിൽ വീഴുവാൻ എന്റെ സൃഷ്ടികളെ പ്രലോഭിപ്പിച്ചത്. വസൂല, സോദോം ഗൊമോറോ നഗരത്തോട് ഞാൻ പ്രവർത്തിച്ചതിനെ സൂചിപ്പിക്കുന്ന ഒരു ദർശനം ഞാൻ നിനക്ക് മുന്നറിയിപ്പായി നൽകിയിട്ടുണ്ട്. എന്റെ മുന്നറിയിപ്പ് അവർ ശ്രദ്ധിക്കട്ടെ. കർത്താവായ ഞാൻ എന്റെ സൃഷ്ടികളോട് മുൻകൂട്ടി പറഞ്ഞിട്ടുണ്ട്: അവർ അനുതപിച്ച് എന്നെ അവരുടെ സൃഷ്ടാവായി സ്വീകരിക്കുന്നില്ലെങ്കിൽ എന്റെ വചനമാകുന്ന വാൾ അവരെ പ്രഹരിക്കും. നിങ്ങൾക്ക് മുന്നറിയിപ്പ് നൽകുന്നതിന് വേണ്ടി എന്റെ അനന്തമായ കരുണ നിമിത്തം ഞാൻ നിങ്ങളുടെ മധ്യേ ഇറങ്ങിവരുന്നു. സത്യാത്മാവായ ഞാനാണ് നിങ്ങളോട് സംസാരിക്കുന്നത്. സൃഷ്ടികളേ, എന്റെ സഭകളോട് എനിക്ക് പറയുവാനുള്ളത് ശ്രവിക്കുക: നിശ്ചലമായിരിക്കരുത്. എന്റെ മുന്നറിയിപ്പ് മറ്റുള്ളവരെ അറിയിക്കുക. ഇതാ, ഞാൻ വാതിലിൽ മുട്ടുന്നു. ആരെങ്കിലും എന്റെ സ്വരം കേട്ട് എനിക്ക് വാതിൽ തുറന്നു തന്നാൽ ഞാൻ അകത്ത് പ്രവേശിച്ച് അവനോടൊപ്പം അവന്റെ ഭക്ഷണത്തിൽ പങ്കുചേരും. ഭയപ്പെടരുത്. ഞാൻ എന്റെ വചനം പൂർത്തീകരിക്കുകയാണ്; ഞാനിതാ നിങ്ങളുടെ മുന്നിലുണ്ട്. കർത്താവേ, അങ്ങയുടെ മുന്നറിയിപ്പാകുന്ന ഈ സന്ദേശങ്ങൾ മറ്റുള്ളവരിലേക്ക് ഞാൻ പ്രചരിപ്പിക്കണമെന്നാണോ അങ്ങ് സൂചിപ്പിക്കുന്നത്? ഫോട്ടോസ്റ്റാറ്റ് കോപ്പികൾ അല്ലാതെ മറ്റുവിധത്തിൽ ഞാൻ ഇവ പ്രചരിപ്പിക്കണമോ? ഞാൻ നിന്നിൽ നിന്ന് ആവശ്യപ്പെടുന്നത് സ്നേഹം മാത്രമാണ്. എന്റെ വചനം നിന്നിൽ ഞാൻ മുദ്രണം ചെയ്യട്ടെ. എന്റെ സന്ദേശം പ്രചരിപ്പിക്കുവാനുള്ളവരെ ഞാൻ ഇതിനോടകം തിരഞ്ഞെടുത്തിട്ടുണ്ട്. വരൂ, ഞാൻ നിന്നോടൊപ്പമുണ്ട്; എന്നെ അനുഭവിച്ചറിയുക. എന്റെ സാന്നിധ്യം അനുഭവിച്ചറിയുക, ശരിയാണ്. ഞാൻ യേശുവിനെ വിവേചിച്ചറിഞ്ഞു. ശരിയായി തന്നെ നീ എന്നെ വിവേചിച്ചറിഞ്ഞു. എന്നെ സ്നേഹിക്കുക. യേശുവേ, ഞാൻ അങ്ങയെ സ്നേഹിക്കുന്നു. ഞങ്ങൾ അങ്ങയെ സ്നേഹിക്കണമെന്ന് അങ്ങ് ആഗ്രഹിക്കുന്ന വിധത്തിൽ കൂടുതലായി അങ്ങയെ സ്നേഹിക്കുവാൻ എന്നെ പഠിപ്പിക്കണമേ. 27/10/1987. ഈ അടുത്ത നാളിൽ ഞാൻ പരിചയപ്പെട്ട കത്തോലിക്കാ ദൈവശാസ്ത്രജ്ഞന് ഇപ്പോൾ എന്നോട് താല്പര്യമില്ല, കാരണം ഞാൻ അദ്ദേഹത്തിന്റെ സഭയിൽ പെട്ടവളല്ല. വസൂല, എന്നാൽ തീർച്ചയായും നീ അവരുടേതല്ല; നീ എന്റേതാണ്. നിന്റെ സൃഷ്ടാവും നിന്റെ പരിശുദ്ധനായ പിതാവും ഞാനാണ്. നീ എന്റെ അധികാരത്തിന് കീഴിലുള്ളവളാണ്. കർത്താവേ, ഞങ്ങൾ അങ്ങയുടെ അധികാരത്തിന് കീഴിലാണെന്നത് ശരി തന്നെയാണ്. എങ്കിലും ഏതെങ്കിലും ഒരു ക്രിസ്തീയ സഭാവിഭാഗത്തിൽ ഉൾപ്പെടുന്ന ഒരു പാരമ്പര്യം നിലവിലുണ്ടല്ലോ. എന്റെ ദൃഷ്ടിയിൽ എല്ലാവരും ഒരുപോലെയാണ്. എന്റെ ശരീരമായ സഭ വിവേചിക്കപ്പെടുവാൻ ഞാൻ ഒരിക്കലും ആഗ്രഹിച്ചിട്ടില്ല. നിങ്ങളാണ് എന്നെ വിഭജിച്ച് അംഗച്ഛേദം നടത്തിയത്. എന്റെ ശരീരമായ സഭയിൽ നിങ്ങളുടെ ഇഷ്ടം നടപ്പാക്കി. നിങ്ങൾ എന്റെ പാദങ്ങൾക്ക് വൈകല്യം ഉണ്ടാക്കി. ഒരു നിമിഷനേരത്തേക്ക് യേശു നിശബ്ദനായി. വളരെ ദുഃഖത്തോടെയാണ് യേശു സംസാരിച്ചത്. ഈ വിഷയം യേശുവിന്റെ അടുക്കൽ പറഞ്ഞതിൽ എനിക്ക് കുറ്റബോധം തോന്നി. ഓ, എന്റെ ദൈവമേ. മകളേ, എന്റെ അമ്മയ്ക്ക് വേണ്ടി നിന്റെ കണ്ണീർ സൂക്ഷിച്ചു വെക്കണമെന്ന് ഞാൻ നിന്നോട് പറഞ്ഞിട്ടില്ലേ? കർക്കശമായിട്ടാണ് യേശു സംസാരിച്ചതെങ്കിലും എന്നെപ്പോലെ തന്നെ യേശുവും ദുഃഖിതനാണെന്ന് എനിക്ക് മനസ്സിലായി. ഉവ്വു, കർത്താവേ, അങ്ങേക്ക് എന്നിൽ നിന്ന് വിഷമം ഉണ്ടായതായി എനിക്ക് തോന്നുന്നു. ഞാൻ വെറും മനുഷ്യനല്ലേ. വസൂല, എന്റെ പാനപാത്രം നമ്മൾ ഒരുമിച്ച് പങ്കുവെക്കുന്നതിനാലാണ് ഇങ്ങനെ സംഭവിക്കുന്നത്. എന്റെ പാനപാത്രത്തിലെ പാനീയത്തിന് നല്ല കൈപ്പുണ്ട്. പരിശുദ്ധ സിംഹാസനത്തോട് പറയുക: ഞാനാണ് നിന്നെ അവരുടെ അടുക്കലേക്ക് അയച്ചിരിക്കുന്നതെന്ന്. നീ ഏത് സഭാവിഭാഗത്തിൽ ഉൾപ്പെട്ടവളാണെന്ന് അവർ നിന്നോട് ചോദിച്ചാൽ നീ എന്റേതാണെന്നും എന്റെ അധികാരത്തിന് കീഴിലുള്ളവളാണെന്നും അവരോട് പറയുക. കർത്താവേ, ആരോടും തർക്കിക്കുവാൻ ഞാൻ ഇഷ്ടപ്പെടുന്നില്ല. പക്ഷേ ഞാൻ ഓർത്തഡോക്സ് അംഗമാണെന്ന് എനിക്ക് അവരോട് പറയാമോ? ഞാൻ ഒരു ഓർത്തഡോക്സ് അംഗമാണല്ലോ. ഓർത്തഡോക്സ്, കത്തോലിക്കർ, പ്രൊട്ടസ്റ്റൻസ്—നിങ്ങളെല്ലാവരും എന്റേതാണ്. എന്റെ ദൃഷ്ടിയിൽ നിങ്ങളെല്ലാവരും ഒന്നുതന്നെയാണ്. ഞാൻ യാതൊരു വ്യത്യാസവും കാണുന്നില്ല. പിന്നെ എന്തിനു നീ ഭയപ്പെടുന്നു? എന്റെ പ്രിയപ്പെട്ട ജോൺ പോൾ രണ്ടാമൻ മാർപാപ്പയോട് ചോദിക്കുക. അദ്ദേഹം യാതൊരു സഭാ വ്യത്യാസവും കാണുകയില്ല. അദ്ദേഹത്തോട് ഇപ്രകാരം പറയുക: പ്രിയപ്പെട്ടവനെ, കർത്താവായ ഞാൻ ഇതാ വാതിലിൽ മുട്ടിക്കൊണ്ടിരിക്കുന്നു. എന്റെ വിളി നീ ശ്രവിക്കുമോ? നീ എനിക്ക് വാതിൽ തുറന്നു തരുമോ? നീ എനിക്ക് വാതിൽ തുറന്നു തന്നാൽ ഞാൻ അകത്ത് പ്രവേശിച്ച് നിന്നോടൊപ്പം നിന്റെ ഭക്ഷണത്തിൽ പങ്കുചേരും. നീ വിജയശ്രീലാളി എന്ന് നീ തെളിയിക്കുക. എന്റെ സിംഹാസനത്തിൽ പങ്കുചേരുവാൻ ഞാൻ നിന്നെ അനുവദിക്കും. എന്നെ ശ്രവിക്കുക. സഭകളോട് ആത്മാവ് പറയുന്നതെന്തെന്ന് ശ്രവിക്കുക. ഞാനാണ് നിന്റെ ഇടയൻ. എന്റെ അടുക്കൽ നിനക്ക് ഒന്നിനും കുറവുണ്ടാവുകയില്ല. പ്രിയപ്പെട്ടവളേ, പച്ചയായ പുൽത്തകിടിയിൽ ഞാൻ നിനക്ക് വിശ്രമം വിരളുന്നു. പ്രശാന്തമായ ജലാശയത്തിലേക്ക് ഞാൻ നിന്നെ നയിക്കുന്നു. അവിടെ വെച്ച് ഞാൻ നിനക്ക് ഉന്മേഷം നൽകുന്നു. എന്റെ സഭയുടെ മഹത്വത്തിനായി ഞാൻ നിന്നെ നന്മയുടെ വഴിയിലൂടെ നയിക്കുന്നു. ഇരുണ്ട വഴികളിലൂടെയാണ് നീ നടക്കുന്നതെങ്കിലും നീ ഭയപ്പെടേണ്ട. നിന്നെ ശക്തിപ്പെടുത്തുവാൻ ഇതാ ഞാൻ നിന്നോടൊപ്പമുണ്ട്. നിന്നെ പീഡിപ്പിക്കുന്നവരുടെ കൺമുമ്പിൽ വെച്ച് തന്നെ ഞാൻ നിന്നെ പരിപോഷിപ്പിക്കും. ഞാൻ നിന്നെ അഭിഷേകം ചെയ്തിരിക്കുന്നു; ഞാൻ നിന്നെ എപ്പോഴും തൃപ്തിപ്പെടുത്തും. എന്നാൽ ഞാൻ സ്നേഹത്തിന്റെയും അനന്തമായ കാരുണ്യത്തിന്റെയും അഗാധമായ സമുദ്രമാണ്. വരൂ, എന്റെ ഹൃദയമധ്യത്തിൽ വസിക്കുക. ഓ, കർത്താവേ, അങ്ങ് എന്റെ പ്രകാശവും രക്ഷയുമാണ്. ഞാൻ ഭയപ്പെടേണ്ടതില്ല. അങ്ങ് എനിക്ക് അഭയം നൽകുമെന്ന് എനിക്കറിയാം. പൂർണ്ണ ഹൃദയത്തോടെ ഞാൻ അങ്ങേക്ക് നന്ദി പറയുന്നു. എന്റെ ദൈവമായ കർത്താവേ, ഞാൻ അങ്ങയുടെ നാമത്തെ എന്നേക്കും മഹത്വപ്പെടുത്തുന്നു. എന്നോടുള്ള അങ്ങയുടെ സ്നേഹം വളരെ വലുതാണ്. എന്റെ അയോഗ്യതയുടെ മേൽ കരുണയുണ്ടാകണമേ. പുഷ്പമേ, ചെറുതായി നിലകൊള്ളുക. ആത്മാവിൽ വളരുക. എന്റെ നന്മയിൽ നിന്ന് പാനം ചെയ്യുക. വരൂ, എന്റെ വചനം എപ്പോഴും നിന്റെ മേൽ മുദ്രണം ചെയ്യുവാൻ എന്നെ അനുവദിക്കുക. വരൂ, നമുക്ക്—നമ്മൾ— അതെ, കർത്താവേ. 30/10/1987. എന്റെ സൃഷ്ടികൾക്കുള്ള മുന്നറിയിപ്പായി അനേകം അടയാളങ്ങൾ ഞാൻ അവർക്ക് നൽകിയിട്ടുണ്ട്. എന്റെ അഭിലാഷങ്ങൾ അവരെ അറിയിച്ച് അനേകം വിശുദ്ധരെ ഞാൻ അവരുടെ ഇടയിൽ ഉയർത്തിയിട്ടുണ്ട്. പക്ഷേ അവരെ അവർ ശ്രവിച്ചിട്ടുണ്ടോ? എന്തെങ്കിലും മാറ്റം അവരിൽ ഉണ്ടായിട്ടുണ്ടോ? കർത്താവേ, ഇത്തവണ അവർ അങ്ങയുടെ ഈ സന്ദേശത്തിൽ വിശ്വസിച്ചാൽ അവർക്ക് മാറ്റം വരികയും, അവർ സന്മനസ്സോടെ അങ്ങയുടെ സന്ദേശം വായിച്ച് അങ്ങയിൽ വിശ്വസിക്കുകയും, അവരുടെ സ്വന്തം താല്പര്യങ്ങൾ അന്വേഷിക്കാതെ പരസ്പരം ഐക്യപ്പെട്ടുകൊണ്ട് അങ്ങയെ മഹത്വപ്പെടുത്തുവാൻ തുനിയുകയും ചെയ്യാം. അല്ലയോ, വസൂല? വസൂല, തങ്ങൾ പരിഹസിക്കപ്പെട്ടേക്കാമെന്ന ഭയത്താൽ, തങ്ങളുടെ മേലധികാരികളോടുള്ള ഭയത്താൽ, എന്റെ സന്ദേശത്തിൽ വിശ്വസിക്കുന്നവരിൽ അനേകർ ഈ സന്ദേശത്തിലൂടെ ഞാനാണ് സംസാരിക്കുന്നതെന്ന് സമ്മതിക്കുന്നവർ പോലും ഭയപ്പെട്ടേക്കാം. അനേകർ എന്നിൽ നിന്നുള്ള മഹത്വത്തേക്കാൾ മനുഷ്യരിൽ നിന്നുള്ള മഹത്വത്തിന് മുൻഗണന നൽകും. എന്നെ ബഹുമാനിക്കുകയും എന്റെ സന്ദേശങ്ങൾ എല്ലാവരിലേക്കും പ്രചരിപ്പിക്കുകയും ചെയ്യുക. കർത്താവേ, അവർ എളിമപ്പെട്ട കുനിയുമായിരിക്കാം. അപ്പോൾ അവരുടെ മേൽ നിബന്ധിച്ചിരിക്കുന്ന എന്റെ നീതിയുടെ ന്യായവിധിയെ ഞാൻ എടുത്തുമാറ്റും. എന്നാൽ അവർ ഇപ്പോഴും എന്റെ ശരീരമായ സഭയെ ക്ലേശിപ്പിച്ചുകൊണ്ട് പരസ്പരം വിഷമുള്ള അസ്ത്രങ്ങൾ അയച്ചുകൊണ്ടിരിക്കുന്നു. സ്നേഹം അവരുടെ ഇടയിൽ നഷ്ടപ്പെട്ടിരിക്കുന്നതിനാൽ അവരുടെ മധ്യേ എപ്പോഴും അനൈക്യം നിലനിൽക്കും. വസൂല, ഞാൻ അവരെ സ്നേഹിച്ചതുപോലെ അവർ പരസ്പരം സ്നേഹിക്കണമെന്ന എന്റെ കല്പന അവർ അനുസരിച്ച് തങ്ങളെത്തന്നെ എളിമപ്പെടുത്തിയിരുന്നെങ്കിൽ എന്റെ ശരീരമായ സഭയിൽ ഐക്യം ഇന്ന് നിലനിൽക്കുമായിരുന്നു. അവർ തങ്ങളെത്തന്നെ എളിമപ്പെടുത്തിക്കൊണ്ട് എന്നെങ്കിലും പരസ്പരം പാദങ്ങൾ കഴുകിയിട്ടുണ്ടോ? ഞാൻ ചെയ്തത് നിങ്ങൾ ചെയ്യേണ്ടതിന് നിങ്ങൾക്കൊരു മാതൃകയായി ഞാൻ നിങ്ങളുടെ പാദങ്ങൾ കഴുകിക്കാണിച്ചില്ലേ? ഐക്യപ്പെടുവാൻ നിങ്ങൾ പ്രാപ്തരാകേണ്ടതിന് എളിമപ്പെടുക. എളിമപ്പെടുക. വസൂല, എന്റെ പ്രിയപ്പെട്ട ദാസനായ ജോൺ പോൾ രണ്ടാമൻ മാർപാപ്പ, എന്റെ സന്ദേശം ശ്രവിക്കുവാനുള്ള സമയം സമാഗതമായിരിക്കുന്നു. അവന്റെ നിലവിളി ഞാൻ കേട്ടിരിക്കുന്നു; അവന്റെ നിലവിളി സ്വർഗ്ഗത്തിൽ എത്തിയിരിക്കുന്നു; അവന്റെ നിലവിളി പ്രപഞ്ചം മുഴുവനിലും പ്രതിധ്വനിക്കുന്നു; അവന്റെ നിലവിളി എന്റെ ചെവികളിൽ എത്തിയിരിക്കുന്നു. ഞാൻ നിന്നോട് പറയട്ടെ: കുറഞ്ഞ കാലത്തിനുള്ളിൽ ഒരു ആട്ടിൻകൂട്ടവും ഒരു ഇടയനും ആകും. എന്റെ എല്ലാ ആടുകളെയും ഞാൻ നയിക്കും. ഇപ്പോൾ ഈ തൊഴുത്തിൽ പെടാത്തവയെ പോലും ഞാൻ നയിക്കും. സ്നേഹം നിന്നെ ഐക്യപ്പെടുത്തും; എന്നാൽ അതിനുമുമ്പ് വലിയ ദുരിതങ്ങൾ ഉണ്ടാകും. ആകാശഗോളങ്ങളെല്ലാം പ്രകമ്പനം കൊള്ളും. മകളേ, ജാഗരൂകയായിരിക്കുക. എന്റെ നിർദ്ദേശങ്ങൾ മറ്റുള്ളവരിലേക്ക് പ്രചരിപ്പിക്കുക. എന്റെ സന്ദേശം പ്രചരിപ്പിക്കുമ്പോൾ നിനക്ക് മനസ്സിലാകും ഇതെല്ലാം എന്റെ തിരുവചനങ്ങളിലും ഉണ്ടെന്ന്. യേശുവേ, പരിശുദ്ധ മറിയമേ, ഇതെല്ലാം കേൾക്കുമ്പോൾ സഭയിലെ ഉന്നതാധികാരികൾ എന്തു പറയും? പരിശുദ്ധ മാതാവേ, എന്റെ അവസ്ഥ മനസ്സിലാക്കണമേ. ആ ഉന്നതാധികാരികളെ അഭിമുഖീകരിക്കാനുള്ള അവസ്ഥയിൽ അല്ല ഞാൻ. വസൂല, ഭയപ്പെടേണ്ട. നിന്റെ കഴിവില്ലായ്മ യേശുവിനെ ആകർഷിക്കുന്നു. ചെറുതായി നിലകൊള്ളുക. പരിശുദ്ധ മറിയമേ, ഉന്നതാധികാരികൾ ഈ സന്ദേശം ശ്രവിക്കാതിരുന്നാൽ എന്തു ചെയ്യും? കുഞ്ഞേ, ഈ ദൈവീക വെളിപാടായിരിക്കും യേശുവിന്റെ അവസാനത്തെ മുന്നറിയിപ്പ്. ഈ സന്ദേശം അവർ ശ്രവിക്കാതിരിക്കുകയോ ഗ്രഹിക്കാതിരിക്കുകയോ ചെയ്താൽ ദൈവത്തിന്റെ കരം അവരുടെ മേൽ പതിച്ച് അവരെ പ്രഹരിക്കുവാൻ ഞാൻ അനുവദിക്കും. വസൂല, നീ ആകെ ചെയ്യേണ്ടത് യേശുവിനെ സ്നേഹിക്കുക എന്നത് മാത്രമാണ്. നീ ജാഗരൂകയായിരിക്കുക. എന്തെന്നാൽ കോപാകുലനായ സാത്താൻ എല്ലാത്തരത്തിലുള്ള കിണുകളും നിനക്കെതിരെ പ്രയോഗിക്കും. ഭയപ്പെടേണ്ട. ഞാൻ നിന്നെ കാത്തുസംരക്ഷിക്കുന്നു. പരിശുദ്ധ മറിയമേ, എന്നെ പ്രോത്സാഹിപ്പിക്കുന്നതിനെ ഓർത്ത് ഞാൻ അങ്ങേക്ക് നന്ദി പറയുന്നു. എന്നെ കാത്തുസംരക്ഷിക്കുന്നതിനെ ഓർത്ത് ഞാൻ അങ്ങേക്ക് നന്ദി പറയുന്നു. ഞാൻ അങ്ങയെ വാഴ്ത്തുന്നു. വസൂല, എന്റെ കുഞ്ഞേ, ഞാൻ നിന്നെ അനുഗ്രഹിക്കുന്നു. 3/11/1987. വരൂ, സ്നേഹം നിന്നെ പരിശീലിപ്പിക്കും. പിതാവേ, എന്നെ അനുവദിക്കണമേ, ഇത് അങ്ങയുടെ ഇഷ്ടമാണെങ്കിൽ. എന്നിങ്ങനെയുള്ള വാക്കുകൾ കേൾക്കുന്നതിൽ ഞാൻ ആനന്ദിക്കുന്നു എന്ന കാര്യം എല്ലാവരും അറിയട്ടെ. നിന്റെ പ്രാർത്ഥനകളിൽ ഈ വാക്കുകൾ ഉണ്ടാകുമ്പോൾ അവ എന്നെ ശക്തമായി ആകർഷിക്കുന്നു. ചോദിക്കുക, നിങ്ങൾക്ക് ലഭിക്കും. ഈ വാക്കുകൾ എപ്പോഴും ഓർക്കുക. വസൂല, വരൂ, എന്റെ സമാധാനം നിനക്കുണ്ടാകട്ടെ. യേശുവേ, ഞാൻ അങ്ങയെ സ്നേഹിക്കുന്നു. അങ്ങയെ സ്തുതിക്കുവാൻ എന്നെ അനുവദിക്കണമേ. പ്രിയപ്പെട്ടവളേ, ഞാൻ നിന്നെ അനുഗ്രഹിക്കുന്നു. 5/11/1987. എന്നെ വിശ്വസിക്കുക. ഞാൻ ആഗ്രഹിക്കുന്നിടത്തേക്ക് നിന്നെ നയിക്കുവാൻ എന്നെ അനുവദിക്കുക. നിന്റെ കരം എന്റെ കരത്തിൽ പിടിക്കുക. യാതൊരു ഭയവും വേണ്ട. മുറിവേൽക്കപ്പെട്ട എന്റെ ശരീരമായ സഭയുടെ ഉള്ളറകളിലേക്ക് ഞാൻ നിന്നെ നയിക്കും. വസൂല, എന്റെ വചനങ്ങൾ പൂർത്തീകരിക്കുക. മകളേ, ഭയപ്പെടേണ്ട. നീ എന്റെ പൂന്തോട്ടം അലങ്കരിക്കണമെന്ന് ഞാൻ ആഗ്രഹിക്കുന്നു. നീതിമാനായ പിതാവേ, എനിക്ക് ഭയമില്ലെന്ന് പറയുവാൻ എനിക്ക് കഴിയില്ല. എന്നെ സഹായിച്ചാലും. അങ്ങയുടെ ശക്തി സ്വീകരിക്കുവാൻ എന്നെ അനുവദിക്കണമേ. അങ്ങയുടെ പ്രകാശത്തിൽ അങ്ങയിൽ വസിക്കുവാൻ എന്നെ അനുവദിക്കണമേ. എന്നെ ഉപേക്ഷിക്കരുതേ. അങ്ങയുടെ അഭിലാഷങ്ങൾ പൂർത്തീകരിക്കുവാൻ എന്നെ ഉപയോഗിക്കണമെന്ന് അങ്ങ് ആഗ്രഹിക്കുന്നുണ്ടെങ്കിൽ എന്നെ അതിന് യോഗ്യയാക്കണമേ. അങ്ങയുടെ കരുണയാൽ എന്റെ ബലഹീനതകളും കഴിവില്ലായ്മയും ക്ഷമിക്കണമെന്ന് ഞാൻ അങ്ങയോട് അപേക്ഷിക്കുന്നു. അങ്ങയുടെ ഹൃദയം പ്രചോദിപ്പിക്കുന്നതുപോലെ എന്നോട് പ്രവർത്തിക്കണമേ. എന്റെ ഇഷ്ടമല്ല, അങ്ങയുടെ ഇഷ്ടം നിറവേറട്ടെ. ആമേൻ. സ്നേഹം നിന്നെ സഹായിക്കും. എന്റെ വചനം പ്രചരിക്കപ്പെട്ടു കഴിയുമ്പോൾ നീ എന്റെ അടുക്കലേക്ക് വരും. നീ പ്രവാസത്തിൽ കഴിയുന്നത് എനിക്ക് സഹിക്കാനാവുന്നില്ല. നിനക്ക് വേണ്ടി ഞാൻ തീക്ഷ്ണമായി ആഗ്രഹിക്കുന്നു. പിതാവേ, എത്ര വലിയ ആനന്ദമാണ് അങ്ങ് എനിക്ക് നൽകിയത്. എത്ര വലിയ സന്തോഷവും സമാശ്വാസവുമാണ് അങ്ങ് എന്റെ അന്തരംഗത്തിന് നൽകുന്നത്. എനിക്ക് വലിയ ആനന്ദമുണ്ട്. അതെ, പ്രിയപ്പെട്ടവളേ, എന്നെ സ്നേഹിക്കുക. എന്നെ ആഗ്രഹിക്കുക. ഞാൻ താമസിയാതെ നിന്റെ അടുക്കലേക്ക് വരുന്നതായിരിക്കും. എന്നാൽ നീ ഈ ലോകത്തിൽ ജീവിക്കുമ്പോൾ എന്നെ പാനം ചെയ്തുകൊണ്ട്, എന്നെ ഭക്ഷിച്ചുകൊണ്ട്, എന്നെ സ്തുതിച്ചുകൊണ്ട്, എന്നെ മഹത്വപ്പെടുത്തിക്കൊണ്ട് എന്നോട് ചേർന്നിരിക്കുക. അങ്ങനെ ഞാൻ നിന്നിൽ പൂർണ്ണമായി ആനന്ദിക്കട്ടെ. ലോകം നിന്നെ തള്ളിപ്പറയുന്നുണ്ടെങ്കിൽ നീ നിരാശപ്പെടേണ്ട. എന്തെന്നാൽ ശരീരത്തോടെ ഞാൻ ഈ ഭൂമിയിൽ കഴിഞ്ഞപ്പോൾ ഞാൻ ഈ ലോകത്തിന്റേത് അല്ലാതിരുന്നതുപോലെ നീയും ഈ ലോകത്തിന്റേതല്ല. ഞാൻ നിന്റെ പിതാവാണ്; നീ എന്നിൽ വസിക്കുന്നതുപോലെ ഞാനും നിന്നിൽ വസിക്കുന്നു. എന്റെ നാമത്തെ ആദരിക്കുക; എന്റെ ശരീരമായ സഭയെ മഹത്വപ്പെടുത്തുക; എന്റെ സ്നേഹത്തിൽ വസിക്കുക. ഞാൻ നിന്നെ കൈവിടുകയോ പരിത്യജിക്കുകയോ ചെയ്യുകയില്ല. അതിനാൽ, പ്രിയപ്പെട്ടവളേ, ആരെയും ഭയപ്പെടേണ്ട. പരിശുദ്ധിയുടെ ഫലം പുറപ്പെടുവിക്കുന്ന എന്റെ സന്ദേശത്തിന്റെ വിത്തുകൾ വിതയ്ക്കുക. പരിശുദ്ധയായിരിക്കുക, എന്തെന്നാൽ ഞാൻ പരിശുദ്ധനാണ്. ദൈവം അവിടുത്തെ മക്കളോടും പ്രപഞ്ചം മുഴുവനോടും അവിടുത്തെ ശരീരമായ സഭയോടും പറയുന്നത് സമാധാനവും സ്നേഹവുമാണ്. മനുഷ്യർ തങ്ങളുടെ ഭോഷത്വം പരിത്യജിക്കുകയാണെങ്കിൽ അവിടുന്ന് പറയുന്നത് അവർക്ക് കേൾക്കുവാൻ സാധിക്കും. കർത്താവായ ദൈവം അരുളി ചെയ്യുന്നത് ഞാൻ കേൾക്കും. അവിടുത്തെ ഭയപ്പെടുന്നവർക്ക് രക്ഷ സമീപസ്ഥമാണ്. മഹത്വം നമ്മുടെ ദേശത്ത് കുടികൊള്ളും. കാരുണ്യവും വിശ്വസ്തതയും തമ്മിൽ ആശ്ലേഷിക്കും. നീതിയും സമാധാനവും പരസ്പരം ചുംബിക്കും. എപ്പോഴും നീതി അവിടുത്തെ അനുഗമിക്കുന്നു. സമാധാനം അവിടുത്തെ അനുധാവനം ചെയ്യുന്നു. സങ്കീർത്തനം 85:8-12ലെ ദൈവവചന ഭാഗത്തോട് ഏതാനും വാക്കുകൾ ചേർത്ത് ഞാൻ എഴുതിയതാണ്. പ്രിയപ്പെട്ടവളേ, ഞാൻ ഇപ്രകാരം പറഞ്ഞിട്ടുണ്ടല്ലോ: ഞാൻ എന്റെ ഉപവനം നനയ്ക്കുകയും തോട്ടം കുതിർക്കുകയും ചെയ്യുമെന്ന് ഞാൻ പറഞ്ഞു. ഇതാ, എന്റെ തോട് നദിയായി, എന്റെ നദി സമുദ്രമായി. ഞാൻ വീണ്ടും എന്റെ ഉപദേശത്തെ പ്രഭാതം പോലെ പ്രകാശമാനമാക്കും; അതിന്റെ കാന്തി വിദൂരങ്ങളിലേക്കും പ്രസരിപ്പിക്കും. ഞാൻ ഇനിയും എന്റെ പ്രബോധനങ്ങൾ പ്രവചനം പോലെ ചൊരിയുകയും ഭാവി തലമുറകൾക്ക് നൽകുകയും ചെയ്യും. പ്രഭാഷകൻ 24:31 മുതൽ 33 വരെയുള്ള വചനങ്ങൾ. എന്റെ ശരീരമായ സഭയെ ഞാൻ മഹത്വപ്പെടുത്തിക്കൊണ്ട് എന്റെ പ്രകാശം വിദൂരങ്ങളിലേക്ക് ഞാൻ പ്രസരിപ്പിക്കും. അതിനാൽ വരൂ, എന്റെ കരം പിടിക്കുക; ഞാൻ നിന്നെ നയിക്കട്ടെ. മകളേ, ഇന്ന് അധികം ജോലി ചെയ്യേണ്ട; എന്റെ ഹൃദയത്തിൽ വിശ്രമിക്കുക.