Latest / ദൈവത്തിലുള്ള യഥാർത്ഥ ജീവിതം - TLIG / Ep 89: എന്റെ എല്ലാ ശത്രുക്കളെയും ഞാൻ വെളിപ്പെടുത്തും
Transcript
- എപ്പിസോഡ് 89. 6. 03.1989, ദാനിയേൽ മാലാഖയുടെ സംഭാഷണം. നിനക്ക് സമാധാനം. ഞാൻ ദാനിയേൽ, നിന്റെ കാവൽ മാലാഖ. നിന്നെ നയിച്ചുകൊണ്ട് ഞാൻ നിന്നോടൊപ്പമുണ്ട്. ഞാൻ കർത്താവിന്റെ അഭിഷ്ടമാണ് പ്രവർത്തിക്കുന്നത്; ഇടവിടാതെ ഞാൻ നിനക്കുവേണ്ടി പ്രാർത്ഥിച്ചുകൊണ്ടിരിക്കുന്നു. കർത്താവ് നിനക്ക് നൽകുന്നതെല്ലാം സ്വീകരിക്കുവിൻ. തിന്മയെക്കുറിച്ച് ജാഗ്രത പാലിക്കുക. തിന്മ എന്നെ സമീപിക്കുമ്പോൾ, ദയവായി അതിനെ ഓടിച്ചുകളയണമേ. ദാനിയേൽ മാലാഖയുടെ സംഭാഷണം. ഞാൻ അങ്ങനെ ചെയ്യുന്നുണ്ട്. എന്റെ വസൂല, തീക്ഷ്ണതയോടെ പ്രാർത്ഥിക്കുവിൻ; എന്തെന്നാൽ ഈ തീക്ഷ്ണമായ പ്രാർത്ഥനയാണ് കർത്താവിന് ഇഷ്ടം. ഒരിക്കലും പ്രാർത്ഥന നിർത്തരുത്; വരൂ, സമാധാനത്തിൽ ആയിരിക്കുവിൻ. 8.03. 1989, കർത്താവേ. ഇത് ഞാനാണ്. നീ യോനാ പ്രവാചകന്റെ പുസ്തകം വായിക്കണമെന്ന് ഞാൻ നിർദ്ദേശിച്ചു. ഈ ദുഷിച്ച തലമുറയ്ക്കായി ഞാൻ ഒരുക്കിയിരിക്കുന്ന ശിക്ഷകളെ എപ്പോഴും എനിക്ക് പിൻവലിക്കാനാകുമെന്ന് നീയും എന്റെ എല്ലാ മക്കളും അറിഞ്ഞിരിക്കണം. എന്റെ നീതിയുടെ പാനപാത്രം കവിഞ്ഞൊഴുകണമെന്ന് ഞാൻ ആഗ്രഹിക്കുന്നില്ല. അതിനാൽ ഞാൻ നിങ്ങളോട് പറയുന്നു: പശ്ചാത്തപിക്കുവിൻ, ഉപവാസം അനുഷ്ഠിക്കുവിൻ, പരിശുദ്ധരായിരിക്കുവിൻ. കർത്താവേ. ഇത് ഞാനാണ്. കർത്താവേ, ചിലർ ഉപവസിക്കാനും പശ്ചാത്തപിക്കാനും പരിശ്രമിക്കുന്നു. അതു മതിയോ? ഞങ്ങൾ ശരിയായ പാതയിലാണോ? കഴിഞ്ഞ ഏതാനും വർഷങ്ങളിലായി നമ്മൾ അല്പം മെച്ചപ്പെട്ടിരിക്കുന്നെന്നും, നമ്മൾ ശരിയായ പാതയിലാണെന്നും എനിക്ക് തോന്നിയിരുന്നു. എന്റെ വസൂല, അനേകർ തങ്ങളുടെ ഉള്ളിൽ കുമിഞ്ഞുകൂടി കിടക്കുന്ന തിന്മകൾ നിമിത്തം നാശത്തിന്റെ പാതയിലാണ്. അവരുടെ ഉള്ളം രാത്രി പോലെ ഇരുണ്ടിരിക്കുന്നു; പിന്നെ എങ്ങനെ ഈ തലമുറ ശരിയായ പാതയിലാണെന്ന് നിനക്ക് പറയുവാൻ കഴിയും? ഞങ്ങൾ ഒരു മഹാ ദുരന്തത്തിന്റെ വക്കിലാണെന്ന് എല്ലാവരെയും അറിയിക്കാൻ ഞങ്ങൾക്ക് എന്ത് ചെയ്യാൻ കഴിയും? ചിലർക്ക് യാതൊന്നും അറിയില്ല. എന്റെ ആത്മാവിനെ ഞെരുക്കിക്കൊണ്ടിരിക്കുമ്പോൾ, എന്റെ സ്വന്തപ്പെട്ടവർ എന്റെ മുന്നറിയിപ്പുകളെ മൂടിക്കെട്ടിക്കൊണ്ടിരിക്കുമ്പോൾ, എന്റെ ആത്മാവിനെ അടിച്ചമർത്തിക്കൊണ്ട് പ്രവചനങ്ങളെ നിന്ദിക്കുമ്പോൾ, ഞങ്ങളുടെ പ്രത്യക്ഷപ്പെടലുകൾ സത്യമല്ലെന്ന് പ്രഖ്യാപിക്കുന്നതിൽ ആനന്ദം കൊള്ളുമ്പോൾ, ഞാൻ ഇനി സഹിക്കുകയില്ല. എന്റെ നീതി വിജയം വരിക്കും. ഇന്ന് ഞാൻ ഏറ്റവും കരുണാമയനായ സുഹൃത്തിനെപ്പോലെ നിങ്ങളുടെ അടുക്കലേക്ക് വരുന്നു; എന്നാൽ നാളെ ഞാൻ കർക്കശക്കാരനായ ന്യായാധിപനെപ്പോലെ നിങ്ങളുടെ ഇടയിലേക്ക് വരും. അവർ എന്റെ ആത്മാവിനെ അടിച്ചമർത്തുന്നു, എന്റെ അനുഗ്രഹങ്ങളെ പരിഹസിക്കുന്നു; ഇവരാണ് ഇന്നത്തെ കായന്മാർ. നിങ്ങൾ എല്ലാവരെയും ഞാൻ ഭോഷത്വത്തോളം സ്നേഹിക്കുന്നു. ഇത് എപ്പോഴും ഓർക്കണം: വലിയ പ്രായശ്ചിത്ത പ്രവർത്തികൾ നടത്തുമ്പോൾ മാത്രമേ ഞാൻ എന്റെ നീതിയുടെ കാര്യത്തിൽ ഇളവ് വരുത്തുകയുള്ളൂ. വിശുദ്ധ മിഖായേൽ മാലാഖയുടെ സംഭാഷണം. സ്നേഹം നിങ്ങളെ സ്നേഹിക്കുന്നു. ഇത് ഞാൻ, വിശുദ്ധ മിഖായേൽ മാലാഖയാണ്. ദൈവപൈതലേ, ദൈവത്തിന് യാതൊന്നും അസാധ്യമല്ല. വലിയ പ്രായശ്ചിത്ത പ്രവർത്തികൾ നടത്തേണ്ടതുണ്ട്. നിങ്ങളുടെ തലമുറ മാനസാന്തരപ്പെടുകയാണെങ്കിൽ, പരിശുദ്ധരിൽ പരിശുദ്ധനായവൻ അവിടുത്തെ ശിക്ഷയ്ക്ക് ഇളവ് ചെയ്യും. ചെവികൾ ഉള്ളവർ കേൾക്കട്ടെ. ദൈവത്തെ ഭയപ്പെടുന്നവർക്ക് അവിടുത്തെ കാരുണ്യം തലമുറകളോളം വ്യാപിക്കുന്നു. ജാഗരൂകരായിരിക്കുവിൻ. തെറ്റു തിരുത്തൽ ഒരിക്കലും അവസാനിപ്പിക്കരുത്. ഇപ്പോൾ നിങ്ങളെ പരിഹസിക്കുന്നവർ പിന്നീട് തങ്ങളുടെ പല്ലുകൾ ഇറുങ്ങും. ഈ ദുഷിച്ച തലമുറക്ക് വേണ്ടി വിശുദ്ധ മിഖായേൽ മാലാഖയായ ഞാൻ നിരന്തരം പ്രാർത്ഥിക്കുന്നു. കുഞ്ഞേ, പ്രാർത്ഥിക്കുക. കർത്താവിനെ അനുസരിക്കുക. നിങ്ങൾ എല്ലാവരുടെയും മേൽ അവിടുത്തെ പരിശുദ്ധാത്മാവിനെ വർഷിക്കുന്നതിനായി പ്രതി കർത്താവിനെ സ്തുതിക്കുവിൻ. വിശുദ്ധ മിഖായേൽ മാലാഖയെ, അങ്ങേയ്ക്ക് നന്ദി. നിനക്ക് സമാധാനം, വസൂല. അതെ, കർത്താവേ. ഇക്കാര്യം കൂടി ചേർത്ത് എഴുതുക: എന്റെ സ്വന്തം ജനങ്ങൾക്ക് അപ്പസ്തോലന്മാരുടെ വിശ്വാസപ്രമാണം ചൊല്ലുമ്പോൾ, ഞാൻ പരിശുദ്ധാത്മാവിൽ വിശ്വസിക്കുന്നു എന്ന് എങ്ങനെ സമാധാനത്തോടെ പ്രാർത്ഥിക്കുവാൻ കഴിയും? കാരണം അവരിൽ ഭൂരിപക്ഷവും പരിശുദ്ധാത്മാവിന്റെ പ്രവർത്തികളെ തിരസ്കരിക്കുകയും, അതിനെ നിഷേധിക്കുകയും, അതിനെ ഞെരുക്കുകയും ചെയ്യുന്നു. ഞാൻ സത്യമായി നിങ്ങളോട് പറയുന്നു: അവരിൽ ഞാൻ യാതൊരു വിശുദ്ധിയും കാണുന്നില്ല. ഈ ഇരുട്ടിൽ അവർ ഒരു ചെറിയ തീപ്പൊരി കാണുമ്പോൾ, കാറ്റുപോലെ അതിനെ വീശിക്കെടുത്തുവാൻ അവർ ഓടിവരുന്നു. ഇരുട്ടിൽ തന്നെ അവരുടെ ദുഷ്പ്രവർത്തികൾ തുടരാനും, അവ വെളിച്ചത്ത് വെളിപ്പെടാതിരിക്കാനുമായി തന്നെ. വസൂല, അവർക്ക് വെളിച്ചത്തിൽ ജീവിക്കാൻ ആഗ്രഹമില്ലെന്ന് തോന്നുന്നു. കർത്താവേ, എന്റെ വെളിച്ചമേ, ലോകത്തിന്റെ വെളിച്ചമേ, ഞാൻ അങ്ങയെ ആരാധിക്കുന്നു. വരൂ, നീ എന്നെ സന്തോഷിപ്പിക്കുന്നു. എന്റെ കുഞ്ഞേ, ഒരു ദിവസം നീ വെളിച്ചം മാത്രമേ കാണുകയുള്ളൂ. വെളിച്ചം മാത്രം. ഒരിക്കലും നിരാശപ്പെടരുത്; അവസാനം വരെ ഞാൻ നിന്നോടൊപ്പമുണ്ട്. കർത്താവായ യേശുവേ, അങ്ങേയ്ക്ക് നന്ദി. അങ്ങ് വാഴ്ത്തപ്പെട്ടവനാകട്ടെ. കർത്താവ് സ്തുതിക്കപ്പെടട്ടെ. 20.03.1989, ഫ്രാൻസ്, ലൂർദിൽ. വസൂല, ഇത് ഞാനാണ്, യേശു. നിന്നെ വഞ്ചിക്കുവാൻ വഞ്ചകനെ അനുവദിക്കരുത്. ഞാൻ നിനക്ക് നൽകിയിട്ടുള്ളതെല്ലാം എന്റെതാണ്. സാത്താൻ സംശയിക്കുവാൻ എന്നെ പ്രലോഭിപ്പിക്കുന്നു. എന്തിനാണ് നീ അവനെ ശ്രദ്ധിക്കുന്നത്? നിന്റെ ചെവികളെ ഞാൻ പരിശീലിപ്പിച്ചിട്ടുണ്ടല്ലോ. എന്നെ കാണുന്നതിന് നിന്റെ കണ്ണുകൾ ഞാൻ തുറന്നിട്ടുണ്ട്. പിന്നെ എന്തിന് നീ സംശയിക്കുന്നു? എന്റെ പല ദാസന്മാർക്കും നിനക്കുള്ളതുപോലെ അതേ വരം ഞാൻ നൽകിയിട്ടുണ്ട്. പിന്നെ എന്തിന് നീ സംശയിക്കുന്നു? വസൂല, എന്റെ കുഞ്ഞാടേ, പച്ച പുൽത്തകിടിയിൽ വിശ്രമിക്കുന്നതിന് നിന്നെ നയിക്കുന്ന നിന്റെ നല്ല ഇടയൻ ഞാനാണ്. എന്റെ കരങ്ങളിൽ ഞാൻ നിനക്ക് അഭയം നൽകുന്നു. എന്റെ നന്മകൾ കൊണ്ട് ഞാൻ നിന്നെ പോഷിപ്പിക്കുന്നു. എന്റെ ഹൃദയത്തിൽ വിശ്രമിക്കുവാൻ ഞാൻ നിന്നെ അനുവദിക്കുന്നു. എന്റെ കണ്ണുകൾ എപ്പോഴും നിന്റെ മേലുണ്ട്. പിന്നെ എന്തിന് നീ എന്റെ പ്രവർത്തികളെക്കുറിച്ച് സംശയിക്കുന്നു? കാരണം ഞാൻ തന്നെ നല്ലവളല്ല. എനിക്ക് അത് അറിയാം. എന്നാൽ നിന്നെ പരിപൂർണ്ണയാക്കാൻ എന്നെ അനുവദിക്കൂ. നമ്മുടെ ഈ ലോകം അന്ധകാരത്തിലാണെന്ന് ഞാൻ ചിന്തിച്ചുപോയി. യേശു ചിരിച്ചു. തുടർന്ന് ഊഷ്മളമായ ദൈവസ്നേഹം എന്നെ പൊതിയുന്നതായി എനിക്ക് അനുഭവപ്പെട്ടു. അത് വളരെ മനോഹരമായിരുന്നു. ഞാൻ സ്നേഹമാണ്. നമ്മൾ ഒരുമിച്ച്, ഞാനും നീയും. നിന്റെ കൈ എന്റെ കൈയിൽ. എന്റെ സാന്നിധ്യം നീ ഓർമ്മിക്കേണ്ടതിന് ഞാൻ നിന്റെ കരം വിടുകയില്ല. അതെ, കർത്താവേ. എന്നെ അത് കേൾപ്പിക്കുക. പിന്നീട് ഞങ്ങൾ ലൂർദിൽ എത്തി. പരിശുദ്ധ മാതാവ് വിശുദ്ധ ബർണതീത്തേക്ക് പ്രത്യക്ഷപ്പെട്ട സ്ഥലത്തുള്ള ഗ്രോട്ടോ സന്ദർശിക്കുവാൻ ഞങ്ങൾ പോയി. അവിടെ മാതാവിന്റെ പ്രത്യക്ഷപ്പെടലിന് ശേഷം ആദ്യമായി നിർമ്മിക്കപ്പെട്ട ദേവാലയവും ഞങ്ങൾ സന്ദർശിച്ചു. അവിടെ വച്ച് മാതാവിന്റെ ഒരു സന്ദേശം എനിക്ക് ലഭിച്ചു. മാതാവ് ഇപ്രകാരം പറഞ്ഞു. അവസാനം ഞങ്ങളുടെ ഹൃദയങ്ങൾ വിജയം വരിക്കും. 26.03.1989, ഗരബന്താൾ സന്ദർശിച്ചതിന് ശേഷം ലഭിച്ച സന്ദേശം. ഗരബന്താളിനെ വിശുദ്ധീകരിക്കണമെന്ന് ഞാൻ നിന്നോട് ആവശ്യപ്പെട്ടിരുന്നു. ഞാൻ നിന്നെ അവിടെ എത്തിച്ചു; ഇപ്പോൾ അത് പൂർത്തിയായിരിക്കുന്നു. ഓർക്കുക: എന്റെ വഴികൾ നിങ്ങളുടെ വഴികളല്ല. എന്റെ ആത്മാവിന് നിന്നിൽ വിശ്വസിക്കുവാൻ ഇടം ലഭിക്കേണ്ടതിന്, നിന്നെ തന്നെ പൂർണ്ണമായി എനിക്ക് വിട്ടുതരുവാൻ ഞാൻ നിന്നെ പഠിപ്പിച്ചിട്ടുണ്ട്. ഞാൻ നിന്നെ ഒരിക്കലും ഉപേക്ഷിക്കുകയില്ല. അവസാനം വരെ നിന്റെ ദൗത്യം പൂർത്തിയാക്കുവോളം ഞാൻ നിന്നെ ഉപയോഗപ്പെടുത്തുമെന്നാണ് ഉദ്ദേശിക്കുന്നത്. എന്റെ വിരൽ നിന്റെ മേൽ വെക്കാൻ അനുവദിക്കൂ. അങ്ങനെ നിന്റെ ദൈവത്തിന്റെ ആഗ്രഹങ്ങൾ നിന്നിൽ ആലേഖനം ചെയ്യപ്പെടട്ടെ. എന്റെ റോസാ പുഷ്പമേ, ഞാൻ നിന്നെ സ്നേഹിക്കുന്നു. ഇത്തരത്തിൽ നീ എന്നിലേക്ക് വരുന്നതിലൂടെ, നീ എന്റെ കല്പനകൾ പാലിക്കുകയും, നിന്റെ സ്വതന്ത്രമായ ഇച്ഛയെ എനിക്ക് സമർപ്പിക്കുകയുമാണ് ചെയ്യുന്നത്. എപ്പോഴും എനിക്ക് ഒന്നാം സ്ഥാനം നൽകുക. എന്നോടൊപ്പം നീ ചെലവഴിക്കുന്ന സമയം നീ എണ്ണരുത്. എപ്പോഴും എന്നോട് സ്ഥിരമായ ബന്ധത്തിൽ ഇരിക്കുവാൻ ആഗ്രഹിക്കുക. ഞാനാണ് നിന്റെ ജീവൻ. എന്നോട് ചേർന്ന് നിൽക്കുന്നത് നിനക്ക് അനുഗ്രഹമാണ്. ഞാൻ നിന്നെ എന്റെ തിരുഹൃദയത്തിന്റെ ആഴങ്ങളിലേക്ക് കൂടുതൽ ആകർഷിക്കുകയും, നിന്റെ ദേഹിയെ പൂർണ്ണതയിൽ എത്തിക്കുകയും ചെയ്യും. അതിനാൽ ഈ രീതിയിൽ നിന്നെ തന്നെ എന്റെ കരങ്ങളിലേക്ക് വിട്ടുതന്നുകൊണ്ട് എന്നെ പ്രസാദിപ്പിക്കുക. ആത്മവിശ്വാസമുള്ളവളായിരിക്കുക. വന്ന് എന്നെ സന്തോഷിപ്പിക്കുകയും എന്നെ സ്തുതിക്കുകയും ചെയ്യുക. നിന്റെയും മാതാവായ എന്റെ മാതാവ് നിന്നെ സംരക്ഷിക്കുകയും നയിക്കുകയും സഹായിക്കുകയും ചെയ്യുന്നു. മകളേ, മാതാവിനെ വാഴ്ത്തുക. ഒരിക്കലും പ്രാർത്ഥന നിർത്തരുത്. എന്റെ ദൈവമേ, അങ്ങയെ ഞാൻ ആരാധിക്കുന്നു. എന്നെ എപ്പോഴും ആരാധിക്കുക. ഇന്ന് വൈകുന്നേരം എനിക്ക് വളരെയധികം ക്ഷീണം അനുഭവപ്പെട്ടു. ദൈവം എനിക്ക് നൽകിയിരിക്കുന്ന ഈ ദൗത്യം എന്നെ ഞെരുക്കുന്നതായി എനിക്ക് തോന്നി. ഈ ത്യാഗങ്ങളെല്ലാം ഫലപ്രദമാകുമോ, അല്ലെങ്കിൽ അവയെല്ലാം വെറുതെയാകുമോ? ഒരിക്കലും നിർത്താൻ കഴിയാത്തതുപോലെ മുന്നോട്ട് പോകുവാൻ എനിക്ക് ശക്തിയുണ്ടാകുമോ, അല്ലെങ്കിൽ ഒരു ദിവസം അതെല്ലാം പരിധിവിട്ട് ഞാൻ ഇതെല്ലാം ഉപേക്ഷിക്കുമോ? എന്റെ സമാധാനം സ്വീകരിക്കുക. ഞാനും നിനക്ക് ഉപദേശം നൽകിയിരിക്കുന്നു. നീ ഭയപ്പെടേണ്ട. എന്റെ സഹനത്തിൽ പങ്കുചേരാൻ ഞാൻ നിന്നെ തിരഞ്ഞെടുത്തതിൽ സന്തോഷിക്കുക. അത്യധികം അമൂല്യമായ എന്റെ കുരിശ് നിന്റെ മേൽ വിശ്രമിക്കുന്നു. എനിക്ക് വിശ്രമിക്കേണ്ടതുണ്ട്. നീ എനിക്ക് നൽകുന്നതൊന്നും വെറുതെയാവുകയില്ല. യാതൊന്നും വൃഥാവിലാകുകയില്ല. ഞാൻ മഹത്വീകരിക്കപ്പെടുന്നു. എന്റെ ബലിയാടായി നിലകൊള്ളുക. സമാധാനത്തിന്റെയും സ്നേഹത്തിന്റെയും ആയ എന്റെ കുരിശ് എന്നോടൊപ്പം പങ്കിടുന്നതിന് പിതാവ് പ്രത്യേകമായി കൃപ നൽകി അനുഗ്രഹിച്ച പ്രിയപ്പെട്ട ബലിയാടാണ് നീ. ഒരു ബലിയാട് എന്ന നിലയിൽ ഈ ലോകത്തുണ്ടാകുന്ന കഷ്ടങ്ങളും ക്ലേശങ്ങളും ലഘുവായിരിക്കുകയില്ല. നീ ഈ ലോകത്തിന്റേതല്ലെന്ന് തിരിച്ചറിയുക. നീ ലോകത്തിന്റേതാണെന്ന മട്ടിൽ ജീവിക്കാത്തതുകൊണ്ടാണ് ലോകം നിന്നെ കുറ്റപ്പെടുത്തുന്നത്. അവരുടെ ശരീരം എപ്രകാരം ചാരമാകുമെന്നുള്ള യാഥാർത്ഥ്യം മറന്നുകൊണ്ട് അവർ നിന്നെ പരിഹസിക്കുന്നു. അതുകൊണ്ട് യാതൊന്നിനെക്കുറിച്ചും പരാതിപ്പെടാതിരിക്കാൻ ജാഗ്രത പാലിക്കുക. ഞാൻ നിന്നിൽ നിന്ന് ആവശ്യപ്പെടുന്നത് ഒരു പങ്കിടലാണ്. സ്നേഹം നിമിത്തം സ്നേഹവുമായി പങ്കുവെക്കുക. സ്നേഹത്തിന്റെ പാനപാത്രത്തിന് കൈപ്പുണ്ട്. വളരെയധികം കൈപ്പുണ്ട്. അത് എന്നോടൊപ്പം പങ്കിടാൻ നിനക്കാവില്ലേ? എന്നെ എതിർക്കരുത്. ഭൂമിയിൽ നിന്നുള്ള നിന്റെ അപേക്ഷ കേട്ടിട്ട് എപ്പോഴെങ്കിലും ഞാൻ നിന്നെ എതിർത്തിട്ടുണ്ടോ? ഞാൻ നിനക്ക് ഉറപ്പ് നൽകുന്നു: യാതൊന്നും വൃഥാവിലാകുകയില്ല. നീ നിസ്സഹായയാണെന്ന് ഞാൻ അനാദികാലം മുതലേ അറിഞ്ഞിരുന്നു. പ്രത്യേകമായ പരിചരണം ആവശ്യമുള്ള ഒരു റോസാ ചെടിയെപ്പോലെ ഞാൻ നിന്നെ പ്രത്യേകം കരുതലോടെ പരിചരിക്കുന്നു. ആവശ്യമുള്ളപ്പോൾ ഞാൻ നിന്റെ കമ്പുകൾ വെട്ടിയൊരുക്കുന്നു. എന്റെ കണ്ണുകൾ എപ്പോഴും നിന്റെ മേലുണ്ട്. ഒരു അപരിചിതൻ നിന്റെ പുഷ്പം പറിച്ചെടുക്കാതിരിക്കാൻ അസൂയയോടെ ഞാൻ നിന്നെ കാക്കുന്നു. ആരും നിന്നെ സ്പർശിക്കാൻ ഞാൻ അനുവദിക്കുകയില്ല. അല്ലാത്തപക്ഷം അവരുടെ വിരലുകൾ നിന്റെ ഇതളുകളെ ചുരുട്ടിക്കളയും. രാവും പകലും ഞാൻ നിനക്ക് കാവലിരിക്കുന്നു. ഞാനാണ് നിന്റെ കാവൽക്കാരൻ. അതിനാൽ ധൈര്യമായിരിക്കുക. ആരും നിന്നെ ഉപദ്രവിക്കുവാൻ ഞാൻ അനുവദിക്കുകയില്ല. അന്ന് വൈകുന്നേരം ഞാൻ വളരെയധികം ക്ഷീണിതയായിരുന്നു. കാരണം തലേദിവസം തുടർച്ചയായി 12 മണിക്കൂറോളം കാർ യാത്രയിലായിരുന്നു. ഞാൻ ജപമാല പ്രാർത്ഥിക്കുവാൻ തുടങ്ങി. ഫാത്തിമ മാതാവിന്റെ രൂപത്തിൽ ഞാൻ ശ്രദ്ധിച്ചുകൊണ്ടിരുന്നു. ജപമാലയിലെ നാലാമത്തെ രഹസ്യം ധ്യാനിച്ചുകൊണ്ടിരിക്കെ, പെട്ടെന്ന് മാതാവിന്റെ രൂപത്തിലെ മേലങ്കിയും വസ്ത്രങ്ങളും പ്രകാശമുള്ള വെള്ളിവർണ്ണമായി മാറിത്തുടങ്ങി. ആ പ്രകാശം അതിശക്തമായിരുന്നു. അത് രൂപത്തിന്റെ ഉള്ളിൽ നിന്ന് പുറപ്പെടുന്നതായിട്ടാണ് എനിക്ക് തോന്നിയത്. രൂപത്തിന് ജീവൻ വഹിക്കുന്നതായി എനിക്ക് തോന്നി. ഇത് ഏതാണ്ട് അഞ്ചു സെക്കൻഡ് നേരത്തേക്ക് ഉണ്ടായിരുന്നു. ഇത് വളരെ മനോഹരമായ അനുഭവമായിരുന്നു. ഇത് എന്നെ കൂടുതൽ തീഷ്ണമായി പ്രാർത്ഥിക്കുവാൻ സഹായിച്ചു. എനിക്ക് വലിയ സന്തോഷമുണ്ടായി. അടുത്ത ദിവസം ഞാൻ ജപമാല പ്രാർത്ഥിച്ചുകൊണ്ടിരിക്കെ, മാതാവിന്റെ കണ്ണുകളിലേക്ക് ശ്രദ്ധിച്ചു നോക്കി. ആ രൂപത്തിലെ മാതാവിന്റെ കണ്ണുകളിൽ ഒരെണ്ണത്തിന് ഒരു അപാഗത സംഭവിച്ചിരുന്നു. പെയിന്റ് പോയതുകൊണ്ടോ മറ്റോ സംഭവിച്ച ഒരു അപാഗത. അവിടെ ബ്രൗൺ കളർ കൊടുത്ത് കൺപോളയിലെ അപാഗത മാറ്റണമെന്ന് ഞാൻ വിചാരിച്ചിട്ടുണ്ടായിരുന്നു. എന്നാൽ ഇപ്പോൾ ആ അപാഗത അവിടെയില്ല. രൂപത്തിലെ മാതാവിന്റെ രണ്ടു കണ്ണുകളും പരിപൂർണ്ണമായിരുന്നു. 27.03.1989, യേശുവേ. ഇത് ഞാനാണ്. പ്രിയപ്പെട്ടവളേ, എന്റെ രാജ്യം വരും. എന്റെ മഹത്വത്തിനായി നിന്നെ ഉപയോഗിക്കുവാൻ എന്നെ അനുവദിക്കുക. നിന്റെ ദൈവമായ എന്നിൽ നിന്ന് നിന്റെ ആത്മാവ് വളരെ വിദൂരത്തിലാണെന്ന് തോന്നിയാലും, ഞാൻ നിന്നെ ഒരിക്കലും പരിത്യജിക്കുകയില്ല. പ്രിയപ്പെട്ട കുഞ്ഞേ, എന്നിൽ ആശ്രയിക്കുക. എന്നിൽ വിശ്വസിക്കുക. നിന്നിൽ പൂർണ്ണമായും സ്വതന്ത്രമായും വിശ്വസിക്കുവാൻ എന്റെ ആത്മാവിനെ അനുവദിക്കുക. എന്റെ കുഞ്ഞേ, എന്നെ അനുസരിച്ചുകൊണ്ടും എന്റെ താല്പര്യങ്ങൾ മാത്രം അന്വേഷിച്ചുകൊണ്ടും നീ എനിക്ക് പരിഹാരം ചെയ്യുക. ഞാൻ എപ്പോഴും നിന്റെ മുന്നിൽ തന്നെയുണ്ട്. അതിനാൽ അഭയസങ്കേതം ഇല്ലാത്തതും പച്ച പുൽത്തകിടികൾ ഇല്ലാത്തതും വരണ്ടുണങ്ങിയതുമായ ഈ താഴ്വര മുറിച്ചു കടക്കാൻ ഭയപ്പെടേണ്ട. ഈ താഴ്വരയിലെ അന്ധകാരം നിന്നെ ഭീതിയിൽ ആഴ്ത്തുന്നതായിട്ട് എനിക്കറിയാം. എന്നാൽ ഈ മരുഭൂമിയിലൂടെ ഞാൻ നയിച്ചിട്ടുള്ളവരിൽ ഒരുവനും ഒരിക്കലും ദാഹിച്ചിട്ടില്ലെന്ന് എന്നെക്കുറിച്ച് അറിയപ്പെടുന്നുണ്ടല്ലോ. വരണ്ട കാറ്റുകളിൽ നിന്ന് എന്റെ സ്നേഹത്താൽ നിന്നെ സംരക്ഷിക്കുവാൻ ഞാൻ നിന്റെ മുന്നിലുണ്ട്. എന്റെ വചനത്താൽ ഞാൻ നിന്നെ പോഷിപ്പിക്കുന്നു. നീ നടക്കുമ്പോൾ നിന്റെ പാതയെ ഞാൻ അനുഗ്രഹിച്ച് സജ്ജമാക്കും. നിന്റെ പാദങ്ങൾ കല്ലുകളിൽ തട്ടാതിരിക്കാൻ നിന്റെ വഴികളിലെ കല്ലുകളും പാറക്കഷ്ണങ്ങളും ഞാൻ എടുത്തുനീക്കും. നിന്റെ വഴി തുറക്കാനായി ഞാൻ അവയെല്ലാം മാറ്റിക്കളയും. എന്റെ പരിശുദ്ധ സാന്നിധ്യം നിന്റെ ശത്രുക്കൾ തന്നെയായ എന്റെ ശത്രുക്കളെ ഓടിച്ചു കളയും. നിന്നെ വലയം ചെയ്ത് സംരക്ഷിക്കുന്ന എന്റെ ദൂതന്മാർ നിന്റെ വഴിയിലുള്ള മുള്ളുകളും ഞെരിഞ്ഞിലുകളും വേഗത്തിൽ മുറിച്ചു കളയുന്നു. എന്റെ കുഞ്ഞേ, നിന്റെ രക്ഷകനായ ഞാൻ നിന്നെ കുത്തിക്കീറാൻ ഈ മുള്ളുകളെ അനുവദിക്കുകയില്ല. പ്രിയപ്പെട്ടവളേ, എന്നിൽ ആശ്രയിക്കുക. ഞാൻ സർവ്വശക്തനാണ്. ഞാൻ ഏറ്റവും പരമോന്നതനാണ്. ഞാൻ നിന്നിൽ നിന്ന് ആവശ്യപ്പെടുന്നത് സ്നേഹം, സ്നേഹം, സ്നേഹം മാത്രമാണ്. അതിനാൽ വരൂ, എന്നോടൊപ്പം സ്നേഹം പങ്കുവെക്കൂ. ഞാനായിരിക്കട്ടെ നിന്റെ ആനന്ദം. അല്ലയോ, വസൂല, നിന്റെ ശിശുസഹജമായ ഹൃദയത്തോടെ എന്നെ സ്നേഹിക്കുകയും സമാശ്വസിപ്പിക്കുകയും ചെയ്യുക. വരൂ, എന്റെ തലയ്ക്ക് വിശ്രമമേകുക. എന്റെ തലയിണചാരിയാവുക. എന്റെ പാദപീഠമാവുക. എന്റെ സ്വർഗ്ഗമാവുക. ഈ മരണത്തിന്റെ താഴ്വരയിലൂടെ നിന്നെ നയിക്കാൻ എന്നെ അനുവദിക്കൂ. താമസിയാതെ ഈ നിർജ്ജനതയിൽ നിന്ന് എന്റെ ഭവനത്തിലേക്ക് നിന്നെ ഞാൻ കൊണ്ടുപോകും. ആ ഭവനം നിന്റെയും ഭവനമാണ്. എന്റെ കുഞ്ഞേ, എന്നോടൊന്നായി തീരുക. അല്ലയോ, പ്രിയപ്പെട്ട കുഞ്ഞേ, നിന്റെ രക്ഷകനായ എന്നെ നീ സമാശ്വസിപ്പിക്കാമോ? എന്നെ വിസ്മയകരമായി നയിക്കുന്ന നമ്മുടെ കർത്താവ് വാഴ്ത്തപ്പെടട്ടെ. കർത്താവേ, അങ്ങയെ ഭയപ്പെടുന്നവർക്ക് വേണ്ടി അങ്ങ് സൂക്ഷിച്ചിരിക്കുന്ന അങ്ങയുടെ നന്മ എത്ര വലുതാണ്. അങ്ങയിൽ ആശ്രയിക്കുന്നവർക്ക് അങ്ങയുടെ നന്മകൾ സകല മനുഷ്യരും കാണേണ്ടതിനായി അങ്ങ് നൽകുന്നു. നമ്മുടെ കർത്താവും രക്ഷകനുമായവനിൽ ആനന്ദിക്കുക. നീതിമാന്മാരെ ആനന്ദത്തോടെ ഉല്ലസിക്കുക. ഹൃദയപരമാർത്ഥതയുള്ളവരെ ആഹ്ലാദാനന്ദം മുഴക്കുവിൻ. എന്റെ എല്ലാ ശത്രുക്കളുടെയും മുഖം മൂടി ഞാൻ നീക്കും. എന്നിലേക്കുള്ള വഴിയിൽ തടസ്സമുണ്ടാക്കുന്നവരെ ഞാൻ തുടച്ചുനീക്കും. ഒരിക്കൽ കൂടി എന്റെ പരിശുദ്ധ മുഖം ഞാൻ വെളിപ്പെടുത്തും. നൈർമല്യവും പരിശുദ്ധിയും സത്യസന്ധതയും കൊണ്ട് ഈ മരുഭൂമിയെ ഞാൻ ആവരണം ചെയ്യും. സ്നേഹവും സമാധാനവും നിങ്ങളോടൊപ്പം വസിക്കും. ഞാൻ നിങ്ങളോടൊപ്പം വസിക്കുമെന്നും നിങ്ങൾ എന്റേതായിരിക്കുമെന്നും ഞാൻ പറഞ്ഞിട്ടില്ലയോ? എന്റെ കുഞ്ഞേ, എന്റെ ആത്മാവ് അഹങ്കാരികളെ എതിർക്കുമെന്നും ജ്ഞാനം വിനീതർക്കും ലളിത ഹൃദയർക്കും നൽകപ്പെടുമെന്നും അവരെ ഓർമ്മിപ്പിക്കുക. വരൂ.