Latest / ദൈവത്തിലുള്ള യഥാർത്ഥ ജീവിതം - TLIG / Ep 91: കർത്താവു നല്ലവനാണ്! അവിടുത്തെ കാരുണ്യം നിത്യമാണ്!
Transcript
- എപ്പിസോഡ് 91. 5/4/1989, "എന്റെ യേശുവേ." ഇത് ഞാനാണ്; നിന്റെ ഇഷ്ടം എനിക്ക് സമർപ്പിച്ചുകൊണ്ട് നീ എന്റെ അടുക്കൽ വരുന്ന ഈ നിമിഷങ്ങളിൽ ഞാൻ എത്രമാത്രം സന്തോഷിക്കുന്നു. എന്നോടൊപ്പം നിലകൊള്ളുക; എന്റെ മക്കൾക്കുള്ള സന്ദേശം ഞാൻ എഴുതാം. 1989 ഏപ്രിൽ 21-നുള്ള യോഗത്തിന് വേണ്ടിയുള്ള സന്ദേശം യേശു എഴുതും. യോഗത്തിൽ എഫേസോസുകാർക്കുള്ള ലേഖനം 4-ാം അധ്യായം 17 മുതൽ 32 വരെയും 5-ാം അധ്യായം 1 മുതൽ 20 വരെയുള്ള തിരുവചനങ്ങൾ വായിക്കുവാൻ യേശു എന്നോട് ആവശ്യപ്പെട്ടു. "സമാധാനം നിങ്ങളോടുകൂടെ." ഞാൻ കർത്താവാണ്; ഞാനാണ് വചനം. ഞാൻ നിങ്ങളുടെ ഇടയിൽ ഉണ്ട്. എന്റെ കുഞ്ഞുമക്കളേ, എന്റെ സാന്നിധ്യം അനുഭവിച്ചറിയുക; നിങ്ങളെല്ലാവരും ഇവിടെ ഒന്നായി സമ്മേളിച്ചിരിക്കുന്നതിൽ എന്റെ തിരുഹൃദയം സന്തോഷിക്കുന്നു. ഇവിടെ യേശു ഉദ്ദേശിച്ചത് എല്ലാ ക്രിസ്ത്യാനികളെയും ആണ്: റോമൻ കത്തോലിക്കർ, പ്രൊട്ടസ്റ്റന്റുകാർ, ഓർത്തഡോക്സുകാർ. പരിശുദ്ധിയുടെ പാതയിൽ നിങ്ങളെ അഭിവൃത്തിപ്പെടുത്തണമെന്ന് ഞാൻ ഉദ്ദേശിക്കുന്നു. എന്റെ പാതയിലേക്ക് ഇനിയും പ്രവേശിച്ചിട്ടില്ലാത്തവരെ ഞാൻ ഉപേക്ഷിക്കുകയില്ല; ഞാൻ തിരികെ ചെന്ന് അവരെ അന്വേഷിക്കും. ഞാൻ നിങ്ങൾ ഓരോരുത്തരെയും പിടിച്ച്, നീതിയുടെയും പരിശുദ്ധിയുടെയും എന്റെ പാത നിങ്ങൾക്ക് ഞാൻ കാണിച്ചുതരും. ഞാൻ നിങ്ങളെ പൊക്കിയെടുത്ത് സംവഹിക്കും; ഒരു വത്സല പിതാവിനെപ്പോലെ ഞാൻ നിങ്ങളെ വളർത്തുകയും, എന്റെ പ്രമാണങ്ങൾ നിങ്ങളെ പഠിപ്പിക്കുകയും ചെയ്യും. സ്നേഹത്തിന്റെ എന്റെ ആത്മാവിനെ നിങ്ങൾക്ക് നൽകിക്കൊണ്ട് ഞാൻ നിങ്ങളെ അഭിവൃത്തിപ്പെടുത്തും. നിങ്ങൾ എന്നെ പൂർണ്ണ ഹൃദയത്തോടെ സ്നേഹിക്കാനും, ഞാൻ നിങ്ങളെ സ്നേഹിക്കുന്നതുപോലെ നിങ്ങൾ പരസ്പരം സ്നേഹിക്കാനും, സ്നേഹത്തിന്റെ ഗുരുവായ ഞാൻ നിങ്ങളെ പഠിപ്പിക്കും. ഇതായിരിക്കും എന്നിലേക്കുള്ള ആദ്യത്തെ ചവിട്ടുപടി. എങ്ങനെയാണ് തനിയെ നടക്കുന്നത് എന്നറിയാത്ത കുഞ്ഞുകുട്ടികളെപ്പോലെയാണ് ഞാൻ നിങ്ങളെ കരുതുന്നത്. എന്റെ ഇരു കരങ്ങളും ഞാൻ നിങ്ങൾക്ക് നീട്ടി നൽകും; നിങ്ങളുടെ കുഞ്ഞു കരങ്ങൾ എന്റെ കരങ്ങളിൽ നിങ്ങൾ വയ്ക്കും. അങ്ങനെ നമ്മൾ ഒരുമിച്ച്, നിങ്ങളും ഞാനും, ഏതാനും ചുവടുകൾ മുന്നോട്ട് വയ്ക്കും. ഇപ്പോൾ ഞാൻ എത്രമാത്രം സന്തോഷിക്കുന്നുണ്ടെന്ന് നിങ്ങൾക്കറിയാമോ? യേശു വളരെ സന്തോഷിക്കുന്നതായി കണ്ടു. നിങ്ങൾ നിങ്ങളെത്തന്നെ പൂർണ്ണമായും എനിക്ക് തുറന്നു തരാൻ തയ്യാറാവുകയാണെങ്കിൽ, ഞാൻ നിങ്ങളെ അഭിവൃത്തിപ്പെടുത്തുകയും നിങ്ങളുടെ ദേഹിയെ അലങ്കരിച്ച് പരിപൂർണ്ണമാക്കുകയും ചെയ്യും. എന്റെ പ്രമാണങ്ങൾ നിങ്ങളെ പഠിപ്പിക്കാൻ എന്നെ അനുവദിക്കുക; എങ്ങനെയാണ് എന്റെ പ്രമാണങ്ങൾ പാലിക്കേണ്ടതെന്ന് ഞാൻ നിങ്ങളെ പഠിപ്പിച്ചുതരും. എന്നിൽ നിന്ന് പഠിക്കാൻ ആഗ്രഹിക്കുന്നവർക്ക് സദ്ഗുണങ്ങളുടെ കവാടം ഞാൻ തുറന്നു തരും. അതെ, ഞാൻ തന്നെ, എന്റെ സ്വന്തം കൈകൾ കൊണ്ട്, എന്റെ ഫലങ്ങൾ നിങ്ങളുടെ വായിൽ വെച്ചു തരും. എന്നോട് ഒട്ടിച്ചേർന്ന് നിൽക്കുക; ഉഗ്രമായ ക്രോധം അഴിച്ചുവിട്ടിരിക്കുന്ന ഇടങ്ങളിൽ, ഈ ക്ലേശകരമായ സമയത്ത്, ഞാൻ നിങ്ങളെ രക്ഷിക്കും. ഈ സമയത്ത് ഇടം വലം തിരിച്ചറിയാനാവാതെ അനേകർ ആശയക്കുഴപ്പത്തിൽ നിബധിക്കും. ഇന്ന് മുമ്പത്തേക്കാൾ അധികമായി ദുഷ്ടനും പിശാചുക്കളും നിങ്ങളെ എല്ലാവരെയും വഞ്ചിക്കുവാൻ ശ്രമിച്ചുകൊണ്ട്, നിങ്ങൾക്ക് വേണ്ടി കെണികൾ ഒരുക്കിക്കൊണ്ട്, ഈ ഭൂമിയുടെ ഓരോ മൂലയിലും ചുറ്റി സഞ്ചരിക്കുന്നു. ഇക്കാരണത്താലാണ് ഇടവിടാതെ പ്രാർത്ഥിക്കാൻ ഞാൻ നിങ്ങളോട് ആവശ്യപ്പെടുന്നത്. നിങ്ങളെ ഉറങ്ങുന്നവരായി കണ്ടെത്താൻ എന്റെ ശത്രുവിനെ അനുവദിക്കരുത്. ഈ ദിവസങ്ങളിൽ ജാഗ്രതയോടെ വർത്തിക്കുക; നിങ്ങളുടെ ഉള്ളിൽ ഒരു ശൂന്യമായ ഇടവും കണ്ടെത്താൻ അവനെ അനുവദിക്കരുത്. അതിനാൽ എന്റെ വചനത്താലും, എന്റെ സ്നേഹത്താലും, എന്റെ സമാധാനത്താലും, എന്റെ നന്മകളാലും നിങ്ങളെ തന്നെ നിറയ്ക്കുവിൻ. ചെറിയ വെള്ള ഓസ്തിയിൽ എന്നെ സ്വീകരിക്കാൻ പരിശുദ്ധ കുർബാനയിൽ സജീവമായി പങ്കുചേരുക; അതുവഴി നിങ്ങൾ പ്രലോഭനങ്ങൾക്ക് കീഴടങ്ങുകയില്ല. ഇടവിടാതെ പ്രാർത്ഥിക്കുവിൻ; നിങ്ങളുടെ ആവശ്യങ്ങൾ നിങ്ങൾക്കറിയാവുന്നതിനേക്കാൾ കൂടുതലായി, നിങ്ങൾ അവ എന്നോട് ചോദിക്കുന്നതിനു മുമ്പ് തന്നെ ഞാൻ അവ അറിയുന്നു. നിങ്ങളുടെ ഹൃദയം ഞാൻ അറിയുന്നു; സാധ്യമായ ഓരോ അവസരങ്ങളിലും എന്നെ അഭിമുഖീകരിച്ച് പ്രാർത്ഥിക്കുക. ഈ ഭൂമിയിലെ പ്രാർത്ഥനയുടെ കുറവ് പരിഹരിക്കാൻ പ്രാർത്ഥിക്കുക. നിങ്ങൾക്ക് ചുറ്റും ചുറ്റിക്കറങ്ങിക്കൊണ്ടിരിക്കുന്ന എല്ലാ തിന്മകളിൽ നിന്നും നിങ്ങളെ സംരക്ഷിക്കുന്നതിന്, നിങ്ങളുടെ പ്രാർത്ഥനകൾ നിങ്ങളുടെ പടച്ചട്ടയാകട്ടെ. സ്നേഹത്താൽ പിശാചിനെ നിരായുധനാക്കുവിൻ; സ്നേഹമായിരിക്കട്ടെ നിങ്ങളുടെ ആയുധം. എല്ലാവർക്കും കാണേണ്ടതിന് സമാധാനം നിങ്ങളുടെ നെറ്റിത്തടത്തിൽ എഴുതപ്പെടട്ടെ; എല്ലാവരോടും സമാധാനത്തിൽ വർത്തിക്കുവിൻ. നിങ്ങളുടെ ശരീരത്തിലെ ഓരോ അവയവത്തെയും എന്റെ പക്ഷത്തുനിന്ന് യുദ്ധം ചെയ്യുന്ന ആയുധമാക്കി മാറ്റണം; അപ്പോൾ പാപം നിങ്ങളുടെ മേൽ ഒരിക്കലും ആധിപത്യം പുലർത്തുകയില്ല. റോമാക്കാർക്ക് എഴുതിയ ലേഖനം 6-ാം അധ്യായം 34-ാം തിരുവചനം: "എന്റെ വചനം നിങ്ങളുടെ വിളക്കായിരിക്കട്ടെ; മനുഷ്യരുടെ ഹൃദയങ്ങളെ നേടുന്നതിനും അവരെ മാനസാന്തരപ്പെടുത്തുന്നതിനുമായി സ്നേഹത്തിന്റെയും സമാധാനത്തിന്റെയും ആയ എന്റെ സന്ദേശം ലോകത്തിന്റെ ഓരോ മൂലയിലേക്കും വ്യാപിപ്പിക്കുക." എന്നെ ഇതുവരെ അറിഞ്ഞിട്ടില്ലാത്തവർ വന്ന് എന്റെ തിരുഹൃദയം സ്നേഹം ജ്വലിക്കുന്ന എത്ര വലിയ ചൂളയാണെന്ന് അറിയട്ടെ; സ്നേഹജ്വാലയാൽ കത്തുന്ന എന്റെ തിരുഹൃദയം അവർ വന്ന് അനുഭവിച്ചറിയട്ടെ. നിങ്ങൾ അങ്ങനെ എന്നെ സമീപിക്കുമ്പോൾ, നിങ്ങളുടെ ഹൃദയം സ്നേഹക്കുറവാൽ കഠിനവും വരണ്ടതുമായിരുന്നാലും, എന്റെ സ്നേഹജ്വാലയാൽ ഞാൻ അതിനെ ആകർഷിച്ച് അതിനെ ഒരു ജീവനുള്ള ഒരു വിളക്കാക്കി മാറ്റും. പ്രിയപ്പെട്ടവരെ, എന്റെ ആത്മാവാൽ അനുഗ്രഹിക്കപ്പെട്ടിരിക്കുന്നവരെ, നിങ്ങളിൽ ചിലർ ഇപ്പോഴും എന്നെ എതിർക്കുന്നത് കണ്ടിട്ട് എന്റെ ഹൃദയം വളരെ വേദനിക്കുന്നു. ഞാൻ എപ്പോഴെങ്കിലും അവിശ്വസ്തനായിട്ടുണ്ടെന്ന് അറിയപ്പെട്ടിട്ടുണ്ടോ? നിങ്ങളെ ഒരിക്കലും തള്ളിക്കളയാത്ത, ദുരിതകാലങ്ങളിൽ നിങ്ങളെ ഒരിക്കലും പരിത്യജിക്കാത്ത, എപ്പോഴും വിശ്വസ്തനായവനാണ് ഞാൻ. ഞാൻ നിങ്ങളെ ഒരിക്കലും പരിത്യജിച്ചിട്ടില്ല; ഒരു യുവാവ് തന്റെ പ്രിയതമയെ പിന്തുടരുന്നതുപോലെ ഞാൻ നിങ്ങളെ പിന്തുടരും. എന്നാൽ വലിയ സ്നേഹത്തോടെ, ഉന്നതത്തിൽ നിന്ന് നിങ്ങളെ നോക്കുന്ന നിങ്ങളുടെ വിശ്വസ്തനായ ദൈവമാണ് ഞാൻ. നിങ്ങൾ എന്റെ അടുക്കൽ വന്ന് നിങ്ങളുടെ സഹനങ്ങൾ എനിക്ക് സ്നേഹപൂർവ്വം സമർപ്പിക്കുക; ഞാനും നിങ്ങളും, നിങ്ങളും ഞാനും ഒന്നുചേർന്ന് ആ സഹനങ്ങളെ പങ്കുവയ്ക്കും. എന്റെ പുത്രിമാരെ, പുത്രന്മാരെ, നമുക്ക് ഒരുമിച്ച് "സ്വർഗ്ഗസ്ഥനായ ഞങ്ങളുടെ പിതാവേ" എന്ന പ്രാർത്ഥന പ്രാർത്ഥിക്കാമോ? പ്രാർത്ഥിക്കുന്നതിനു മുമ്പ്, നിങ്ങളെ തന്നെ ശാന്തരാക്കി, ഹൃദയത്തിൽ നിന്ന് സാവധാനം പ്രാർത്ഥിക്കുക. നിങ്ങൾ എന്താണ് പറയുന്നതെന്ന് ധ്യാനിച്ചുകൊണ്ടുള്ള നിങ്ങളുടെ പ്രാർത്ഥന പിതാവിന്റെ സന്നിധിയിൽ എത്തട്ടെ. ഞാൻ നിങ്ങളെ ശ്രദ്ധിച്ചുകൊണ്ടിരിക്കുന്നു; എന്റെ രാജ്യം വരും, എന്റെ ഇഷ്ടം സ്വർഗ്ഗത്തിലെ പോലെ ഭൂമിയിലും നിറവേറും. ഇപ്പോഴുള്ള അന്ധകാരത്തിനു പകരം ഞാൻ പ്രകാശം വരുത്തും; ദുഷ്ടതയ്ക്ക് പകരമായി ഞാൻ സ്നേഹം കൊണ്ടുവരും; ഈ ആലസ്യത്തിനു പകരമായി നിങ്ങളുടെ ചുവടുകളെ നയിക്കുവാനുള്ള ഉജ്ജ്വല പ്രകാശം ഞാൻ സ്ഥാപിക്കും. ഞാൻ നിങ്ങളെ നിരാശരാക്കുകയില്ല; എന്റെ സ്നേഹവാത്സല്യത്താൽ ഞാൻ നിങ്ങളുടെ വ്രണങ്ങളെ സൗഖ്യമാക്കുകയും, നിങ്ങളുടെ മലിനതകളെ ശുദ്ധമാക്കുകയും ചെയ്യും. അതിനാൽ എന്റെ അടുക്കൽ വന്ന് എന്നെ സ്നേഹിക്കുവിൻ; നിങ്ങളുടെ സ്നേഹം എന്റെ നീതിയുടെ ജ്വാലയെ ശമിപ്പിക്കട്ടെ. നിങ്ങളുടെ ഹൃദയത്തിൽ നിന്നുള്ള നിങ്ങളുടെ പ്രാർത്ഥനകൾ എന്റെ മുറിവുകൾക്ക് ആശ്വാസമേകട്ടെ; നിങ്ങളുടെ പ്രാർത്ഥനകൾ കുന്തിരിക്കധൂപം പോലെ സ്വർഗ്ഗത്തിലേക്ക് ഉയർന്ന് എന്നെ മഹത്വപ്പെടുത്തുകയും സ്തുതിക്കുകയും ചെയ്യട്ടെ. രാത്രിയിൽ വന്ന് എന്റെ മുന്തിരിത്തോട്ടം നശിപ്പിച്ച് മുന്തിരിപ്പഴം നൽകാതിരിക്കാൻ ശ്രമിക്കുന്നവരുടെ തെറ്റുകൾക്ക് പരിഹാരം ചെയ്യുക; നന്മ ചെയ്യുക; തിന്മ ചെയ്യുന്നത് അവസാനിപ്പിക്കുക. നിങ്ങൾ എന്ത് ചെയ്താലും അത് എന്റെ മഹത്വത്തിനായി ചെയ്യുവിൻ. പ്രിയപ്പെട്ടവരെ, വരൂ; എന്നോടൊപ്പം എന്റെ കുരിശു വഹിക്കാൻ പങ്കുചേരുക. സ്നേഹത്തിനും സമാധാനത്തിനും ഐക്യത്തിനും വേണ്ടി എന്റെ കുരിശു നിലവിളിക്കുന്നു. നമ്മൾ ഒന്നിച്ച് എന്റെ കുരിശു വഹിക്കും; നിങ്ങളും ഞാനും, ഞാനും നിങ്ങളും, സ്നേഹത്തിൽ ഐക്യപ്പെട്ട് എന്റെ കുരിശു വഹിക്കും. കർത്താവായ യേശുക്രിസ്തുവായ ഞാൻ നിങ്ങൾക്കെല്ലാവർക്കും എന്റെ അനുഗ്രഹങ്ങൾ നൽകുന്നു; ഐക്യപ്പെട്ട് ഒന്നായി തീരുവിൻ. പിന്നീട്. പുഷ്പമേ, എന്റെ സമാധാനം ഞാൻ നിനക്ക് നൽകുന്നു; എന്റെ ആത്മാവ് നിന്റെ മേൽ ഉണ്ട്. ആദ്യ നൂറ്റാണ്ടിൽ എന്നപോലെ, സഭയുടെ ആരംഭകാലത്ത് എന്ന പണ്ടത്തെ പോലെ, നിങ്ങൾ സ്നേഹത്തിൽ ജീവിച്ചുകൊണ്ട് എന്റെ മടങ്ങിവരവ് വരെ എന്റെ സഭയെ നവീകരിക്കുക. സ്നേഹവും സമാധാനവും നൽകിക്കൊണ്ട് മൃതരായി കഴിയുന്നവരെ ഉയർപ്പിക്കുക; ഭൂതങ്ങളുടെ ഈ ദേശം അങ്ങനെ പുതിയ ജീവിതത്തെ ജനിപ്പിക്കട്ടെ. പ്രിയപ്പെട്ടവരെ, എന്റെ മഹിമയാർന്ന ആ ദിനത്തെ ഞാൻ എത്രമാത്രം തീക്ഷ്ണമായി ആഗ്രഹിക്കുന്നു. പിന്നീട്, നമ്മുടെ പരിശുദ്ധ മാതാവ് യോഗത്തിനായി സന്ദേശം നൽകുന്നു: "എന്റെ കുഞ്ഞേ, നിനക്ക് ജ്ഞാനം നൽകിയതിന് കർത്താവിനെ സ്തുതിക്കുക." കർത്താവിന്റെ കരുണയ്ക്കും അവിടുത്തെ സ്നേഹത്തിനും, അവിടുത്തെ പ്രവർത്തികളിൽ എന്നെ പങ്കുചേർത്തതിനും കർത്താവ് സ്തുതിക്കപ്പെടട്ടെ. എന്റെ കുഞ്ഞുമക്കൾക്കുള്ള സന്ദേശം ഇതാ: "മക്കളേ, എന്റെ സമാധാനം നിങ്ങളോടുകൂടെ." പ്രിയപ്പെട്ടവരെ, ലാളിത്യത്തോടെ ദൈവത്തെ സമീപിക്കുവിൻ; കുട്ടികളെപ്പോലെ ആയിരിക്കുവിൻ; കാരണം കർത്താവിനെ പരീക്ഷിക്കാത്തവരാണ് അവിടുത്തെ കണ്ടെത്തുന്നത്. കർത്താവ് വിനയമുള്ളവർക്കും അവിടുത്തെ അവിശ്വസിക്കാത്തവർക്കും തന്നെ വെളിപ്പെടുത്തുന്നു. എന്റെ മക്കളേ, സർവ്വശക്തനായവനെ പരീക്ഷിക്കുന്നതിലൂടെ മൂളർ ആശയക്കുഴപ്പത്തിലായി തീരുന്നു. ഇല്ല, ഞാനും ഒരിക്കലും കാപട്യം നിറഞ്ഞ മനുഷ്യരിലേക്ക് പ്രവേശിക്കുകയില്ല. അതിനാൽ നിങ്ങളുടെ ഹൃദയങ്ങൾ കർത്താവിനായി തുറക്കുക; ഹൃദയലാളിത്യത്തോടെ അവിടുത്തെ സ്വീകരിക്കുക. നിങ്ങൾ കർത്താവിൽ ആശ്രയിക്കുവിൻ; എന്തെന്നാൽ അപ്പോൾ നിങ്ങൾ ജ്ഞാനത്തിലായിരിക്കും ആശ്രയിക്കുന്നത്. പ്രാർത്ഥനയിലൂടെ കർത്താവിലുള്ള നിങ്ങളുടെ വിശ്വാസത്തെ വർധിപ്പിക്കുക; വിശ്വാസം ഉണ്ടായിരിക്കുന്നത് തന്നെയും കർത്താവ് നൽകുന്ന ഒരു കൃപയാണ്. എന്റെ പ്രിയപ്പെട്ടവരെ, എന്റെ വിമല ഹൃദയത്തിലേക്ക് വരുവിൻ; ഞാൻ നിങ്ങൾക്ക് വിശ്രമമേകാം. കഷ്ടപ്പെടുന്ന എല്ലാവരും, വേദനിക്കുന്ന എല്ലാവരും എന്റെ അടുക്കലേക്ക് വരുവിൻ; ഞാൻ നിങ്ങളുടെ മാതാവായതുകൊണ്ട്, ദുരിതത്തിൽ ആയിരിക്കുന്ന തന്റെ മകനെ ആശ്വസിപ്പിക്കുന്ന ഏതൊരു അമ്മയെയും പോലെ, ഞാനും നിങ്ങളെ ആശ്വസിപ്പിക്കും. ഞാൻ അതിലും കൂടുതലായി ചെയ്യും; ഞാൻ പിതാവിനോട് നിങ്ങൾക്കുവേണ്ടി മാധ്യസ്ഥം വഹിച്ചു പ്രാർത്ഥിക്കും; ഞാൻ നിങ്ങളെ ഒരിക്കലും നിരാശപ്പെടുത്തുകയില്ല. വരൂ, ഞങ്ങളുടെ ഹൃദയങ്ങളിൽ നിങ്ങൾ അഭയം പ്രാപിക്കുവിൻ; ഇപ്പോൾ ഞങ്ങളുടെ ഹൃദയങ്ങളെ ഞെരുക്കിക്കൊണ്ടിരിക്കുന്ന ഈ മുള്ളുമാലയുടെ മുള്ളുകൾ നഷ്ടപ്പെടുകയും, മുള്ളുകളുടെ സ്ഥാനത്ത് പുതിയ പുഷ്പങ്ങളെ വിരിയിക്കുന്ന തളിർപ്പുകൾ ഉണ്ടാവുകയും ചെയ്യട്ടെ. ദൈവത്തിൽ വിശ്വസിക്കുക; ദൈവത്തിൽ ആശ്രയിക്കുക; പിതാവിന്റെയും പുത്രന്റെയും പരിശുദ്ധാത്മാവിന്റെയും നാമത്തിൽ ഞാൻ നിങ്ങളെല്ലാവരെയും അനുഗ്രഹിക്കുന്നു. ആമേൻ. ഇതാ, വിശുദ്ധ മിഖായേൽ മാലാഖ: "ദൈവത്തിന്റെ മക്കളെ, സാത്താനെ ശ്രവിക്കുകയോ അവനോട് സംസാരിക്കുകയോ ചെയ്യരുത്. " നുണ പറയുന്നത് പിശാചിനോട് സംസാരിക്കുന്നതുപോലെയാണ്; നിങ്ങളിൽ കോപം സൂക്ഷിക്കുന്നത് പിശാചിന് നിങ്ങളിൽ ഇടം നൽകുന്നതുപോലെയാണ്. നിങ്ങളുടെ നാവ് നിങ്ങളുടെ വീഴ്ചയ്ക്ക് കാരണമാകാതിരിക്കട്ടെ. എന്നോട് പ്രാർത്ഥിക്കുക; ഞാൻ നിങ്ങൾക്കുവേണ്ടി മാധ്യസ്ഥം വഹിച്ചു പ്രാർത്ഥിക്കും. ദൈവത്തിലും അവിടുത്തെ അനന്തകാരുണ്യത്തിലും വിശ്വസിക്കുക; നിങ്ങളെല്ലാവരെയും ഞാൻ അനുഗ്രഹിക്കുന്നു. 11/4/1989: ഇന്ന് യഥാർത്ഥ പീഡനം ആരംഭിക്കുന്നു. ഈ വർഷത്തെ ഗ്രീക്ക് ഓർത്തഡോക്സ് ഈസ്റ്ററിൽ ഞാൻ അവിടുത്തെ പീഡാസഹനം അനുഭവിക്കുമെന്ന് യേശു എനിക്ക് മനസ്സിലാക്കി തന്നു. നമ്മൾ ഈസ്റ്ററിനോട് അടുത്തിരിക്കുന്നു. കർത്താവേ, ഞാൻ വ്യാജപ്രവാചക ആണെന്ന് പലരും ആരോപിക്കുന്നു. എനിക്ക് ലഭിക്കുന്ന ഈ സന്ദേശം ദൈവീകമല്ലെന്ന് പറയാൻ അവർ എനിക്കെതിരായി തെളിവുകൾ, അവ കള്ളമാണെങ്കിലും, തിരയുകയാണ്. ഇതിനോടകം പല കള്ളസാക്ഷികളും ഉണ്ട്. മറ്റൊരു കരിസ്മാറ്റിക് പ്രസ്ഥാനത്തെ നശിപ്പിക്കാൻ ഞാൻ പിശാചിന്റെ കയ്യിലെ ആയുധമാണെന്നാണ് മറ്റൊരു ആരോപണം. എന്നെ മുറുകെ പിടിക്കുക; നിനക്ക് സമാധാനം. എന്റെ മകളെ, എനിക്ക് യാതൊന്നും നിഷേധിക്കരുത്. ഞങ്ങൾ രണ്ടുപേരും, യേശുവും മാതാവും, നിന്നോടൊപ്പം ഉണ്ടെന്ന് ഓർക്കുക. ഇത് സാത്താന്റെ പുകയാണെന്ന് വിശ്വസിക്കുക; പുക ഒരിക്കലും അധികം നേരം നിലനിൽക്കുകയില്ല; അത് ആവിയായി അപ്രത്യക്ഷമായി പോകും. വസൂല, നിന്റെ ദൈവമായ ഞാൻ നിന്നെ, നിനക്ക് സ്വർഗ്ഗത്തിൽ എത്തുമ്പോൾ മാത്രം മനസ്സിലാക്കാൻ കഴിയുന്ന അനന്തമായ സ്നേഹത്താൽ സ്നേഹിക്കുന്നു. എന്റെ കുഞ്ഞേ, നിനക്കെതിരായി പറയപ്പെടുന്ന എല്ലാ അപവാദങ്ങളെയും എല്ലാ വ്യാജ ആരോപണങ്ങളെയും പ്രതി നീ അനുഗ്രഹിക്കപ്പെടട്ടെ. നീ സന്തോഷിക്കുക; എന്തെന്നാൽ സ്വർഗ്ഗത്തിൽ നിന്റെ പ്രതിഫലം വലുതായിരിക്കും. ഇപ്പോൾ നീ എന്നെ വിശ്വസിക്കുന്നുവോ? ഞാൻ പീഡിപ്പിക്കപ്പെട്ടതുപോലെ നീയും പീഡിപ്പിക്കപ്പെടുമെന്ന് എത്രയോ തവണ ഞാൻ നിന്നോട് പറഞ്ഞിട്ടുണ്ട്. എന്റെ സന്ദേശം ഹൃദയങ്ങളെ ആകർഷിക്കും; എന്നാൽ ഇതിനിടയിലും ചിലർ നിനക്കെതിരെ തിരിയും. അവർ എന്റെ സന്ദേശങ്ങളെ കുറ്റപ്പെടുത്തുമ്പോൾ എന്നെ തന്നെയാണ് കുറ്റപ്പെടുത്തുന്നതെന്ന് അറിയാതെ തന്നെ. അവർ നിന്നിൽ കുറ്റം കണ്ടെത്താൻ വേണ്ടി കർക്കശമായ പരിശോധന നടത്തുമെന്ന് ഞാൻ പറഞ്ഞിട്ടില്ലേ? അവർ ഇപ്രകാരം ഞാൻ അറിയിച്ചിട്ടുള്ള മറ്റുള്ളവരോടും പ്രവർത്തിച്ചിട്ടുള്ളതുപോലെ തന്നെ. നിന്നെ പീഡിപ്പിക്കുന്നവർക്ക് വേണ്ടി പ്രാർത്ഥിക്കുവിൻ; നിനക്കെതിരെ കുറ്റം ആരോപിക്കുന്നവർക്ക് വേണ്ടി പ്രാർത്ഥിക്കുവിൻ; അവരോട് പൂർണ്ണ ഹൃദയത്തോടെ ക്ഷമിക്കുവിൻ. വസൂല, ഞാൻ സ്നേഹമാണെന്ന് പഠിക്കുക; എന്നെ സ്നേഹിക്കുക. മറ്റുള്ളവർക്ക് നൽകാൻ ഈ സ്നേഹം എനിക്ക് അത്യാവശ്യമാണ്. ഞാൻ നിന്നെ സ്നേഹിക്കുന്നതുപോലെ എന്റെ സഹോദരങ്ങളെയും സ്നേഹിക്കുവിൻ. എന്നാൽ കർത്താവേ, ചിലർ പൂർണ്ണമായി അന്ധരായി തീർന്നിരിക്കുന്നു. കുഞ്ഞേ, എന്നിൽ വിശ്വസിക്കുക; എന്റെ പ്രകാശത്താൽ ഞാൻ അനേകരെ പ്രകാശിപ്പിക്കും; എന്റെ പ്രകാശം അനേകരിൽ പ്രശോഭിക്കും. എന്റെ ആത്മാവിനാൽ അനുഗ്രഹിക്കപ്പെട്ടവളേ, എന്റെ പീഡാസഹനം നീ മറന്നുപോയോ? ദൈവം ഇപ്രകാരം എന്നെ വിളിക്കുമ്പോൾ ഞാൻ ഉരുകി പോകുന്നതായി എനിക്ക് തോന്നുന്നു. എന്റെ ദേഹിയെ പോലെ ഈ ശരീരം എനിക്ക് കൂടുതൽ ഭാരമായി അനുഭവപ്പെടുന്നു. സ്നേഹം നിമിത്തം ഞാൻ സഹിച്ചു; ഇപ്പോൾ എന്നോട് ഐക്യപ്പെട്ട ഒന്നായി തീരുക. എല്ലാം ഇങ്ങനെ സംഭവിക്കാൻ അനുവദിച്ചത് ഞാനാണ്. എന്റെ പീഡാസഹനത്തിൽ ഞാൻ കുടിച്ച അതേ പാനപാത്രത്തിന്റെ രുചി നീ രുചിച്ചറിയേണ്ടതിനാണ്. യേശു അവിടുത്തെ പാനപാത്രം പങ്കുവയ്ക്കുവാൻ എന്നോട് പറയുന്നതുപോലെയാണ് സംസാരിച്ചത്. ഞാൻ നിന്നെ സ്നേഹിക്കുന്നു; എനിക്ക് നിന്നോടുള്ള സ്നേഹം നിമിത്തമാണ് ഇത്തവണ എന്റെ പാനപാത്രത്തിൽ നിന്ന് കുടിക്കാൻ നിന്നെ ഞാൻ അനുവദിച്ചത്. ഞാൻ വിനീതരായ ചെറിയ മനുഷ്യരെ ഉയർത്തിയെടുത്ത് രൂപപ്പെടുത്തുകയും എന്റെ പീഡാസഹനത്തിന്റെ പ്രതിരൂപങ്ങളാക്കി അവരെ മാറ്റുകയും ചെയ്യും. എന്റെ ദിവ്യകരങ്ങളിൽ മറ്റൊരു ചെറിയ ക്രൂശിത രൂപമായി രൂപപ്പെടുവാൻ വേണ്ടി നിന്റെ ഹൃദയവും ദേഹിയും എനിക്ക് നീ സമർപ്പിച്ചിരിക്കുന്നതിനാൽ നീ അനുഗ്രഹീതയാണ്. ദേഹി, നീ ആനന്ദിക്കുക; ഞാൻ നിനക്ക് നൽകിയ ദാനത്തിൽ സന്തോഷിച്ച് ആനന്ദിക്കുക. കുഞ്ഞേ, നീ ജീവിക്കുന്ന അതേ ആകാശത്തിന് കീഴിൽ മറഞ്ഞിരിക്കുന്ന ഭീകര ചെന്നായ്ക്കളും ഉണ്ടെന്ന് നീ ഓർക്കണം. ഞാൻ നിനക്ക് മുന്നറിയിപ്പ് നൽകിയിട്ടുള്ള കള്ളപ്രവാചകന്മാരാണ് അവർ. ഈ ആളുകളെ കുറിച്ച് വിശുദ്ധ ഗ്രന്ഥത്തിൽ നിന്ന് ഒരു ഉത്തരം നൽകണമെന്ന് ഞാൻ കർത്താവിനോട് അപേക്ഷിച്ചു. ഞാൻ ബൈബിൾ തുറന്നപ്പോൾ എന്റെ വിരൽ വെച്ചിരുന്ന തിരുവചന ഭാഗം ജെറമിയ 23-ാം അധ്യായം 10 മുതൽ ഉള്ളതായിരുന്നു; വ്യാജപ്രവാചകന്മാരെ കുറിച്ചുള്ളതായിരുന്നു ആ തിരുവചന ഭാഗം. പ്രിയപ്പെട്ടവളേ, ഭയപ്പെടരുത്; ഞാൻ നിന്റെ മുന്നിലുണ്ട്. അവർ നിനക്കെതിരായി പറയുന്ന എല്ലാ അപവാദങ്ങളെയും പ്രതി സന്തോഷിക്കുവിൻ. എന്റെ കണ്ണുകൾ അവരെ നിരീക്ഷിക്കുന്നുണ്ട്; അവർ പറയുന്നത് ഞാൻ കേൾക്കുന്നുണ്ട്; അവരുടെ ഹൃദയം ഞാൻ അനുഭവിച്ചറിയുന്നുണ്ട്. അതെ, കർത്താവേ, അങ്ങ് എന്നോടൊപ്പമുണ്ട്; എനിക്ക് യാതൊന്നും ഭയപ്പെടാനില്ല. ധൈര്യമായിട്ടിരിക്കുക; നിന്റെ ദൗത്യം പൂർത്തിയാക്കുവാനുള്ള ശക്തി ഞാൻ നിനക്ക് നൽകും. നമ്മൾ നമുക്ക് എന്നെന്നേക്കും. ഈ പീഡാസഹനങ്ങൾ മതിയായിട്ടില്ലെന്ന പോലെ, ഞങ്ങളുടെ യോഗങ്ങൾക്കായി ഞങ്ങൾ വാടകയ്ക്ക് എടുത്ത ഹാൾ ഞങ്ങൾക്ക് നിഷേധിക്കപ്പെട്ടു. ഏറെ നാൾ മുമ്പ് തന്നെ ഞങ്ങൾക്ക് റിസർവ് ചെയ്തിട്ടുള്ളതായിരുന്നു ആ ഹാൾ. അവർ ഇപ്പോൾ പറയുന്നത്, അവരുടെ ഹാളിൽ മതപ്രസ്ഥാനങ്ങളുടെ പരിപാടികൾ അനുവദിക്കുകയില്ലെന്ന്. യോഗം നടക്കാൻ ഒരാഴ്ച മാത്രം ബാക്കിയുള്ളപ്പോൾ, 200 പേർക്ക് സമ്മേളിക്കാനുള്ള ഹാൾ സംഘടിപ്പിക്കാനുള്ള ഉത്തരവാദിത്വം എന്റെ മേൽ വന്നു. എന്നാൽ ഞങ്ങളുടെ രക്ഷയ്ക്ക് കർത്താവ് വന്നു. കർത്താവിന്റെ സഭയിൽ തന്നെ ഒരു ചെറിയ കപ്പൂച്ചിൻ ദേവാലയത്തിൽ സമ്മേളിക്കാനുള്ള സാഹചര്യം കർത്താവ് ഒരുക്കി. യേശുവിന്റെ സന്ദേശത്തെ പീഡിപ്പിക്കുന്നവർക്കായിട്ടുള്ള ഒരു അടയാളമായി, ഏറ്റവും വിനീതരും ദരിദ്രരുമായ കപ്പൂച്ചിൻ സഹോദരന്മാരെ കർത്താവ് തെരഞ്ഞെടുത്തു. 23/4/1989: പ്രാർത്ഥനയ്ക്ക് ശേഷം സന്ദേശം വായിച്ചു; വിശുദ്ധ മോറിസിന്റെ ചെറിയ ദേവാലയം നിറയെ ആളുകൾ ഉണ്ടായിരുന്നു. അവിടുത്തെ നാമത്തിൽ ഞങ്ങളെ ഒരുമിച്ചു കൂടുവാൻ അനുവദിച്ച കർത്താവ് വാഴ്ത്തപ്പെടട്ടെ. യാതൊരു യോഗ്യതകളും ഇല്ലാത്തവർക്ക് പോലും കർത്താവ് നല്ലവനാകുന്നു. എന്റെ കർത്താവേ, ഞങ്ങളുടെ പ്രാർത്ഥനകൾക്ക് അങ്ങ് മറുപടി നൽകി. അങ്ങയുടെ പ്രിയപ്പെട്ട മക്കളുടെ ഉപവാസത്തിനും ത്യാഗത്തിനും അങ്ങ് മറുപടി നൽകി. കർത്താവേ, ഞങ്ങൾ അങ്ങയുടെ നാമത്തെ സ്തുതിക്കുന്നു. എന്റെ കർത്താവ് നല്ലവനാണ്; അവിടുത്തെ സ്നേഹം ശാശ്വതമാണ്; അവിടുത്തെ വിശ്വസ്തത തലമുറകളോളം നിൽക്കുന്നു. നമുക്ക് കർത്താവിനെ സേവിക്കാം. നിങ്ങളെ സ്നേഹിക്കുന്ന കർത്താവാണ് ഞാൻ; നിങ്ങളെ ഉപദ്രവിക്കുന്നവരുടെ കൺമുമ്പിൽ ഞാൻ നിങ്ങളെ പോഷിപ്പിക്കും. ഇടയന്റെ വിളി കേട്ട് തിരിച്ചറിഞ്ഞ നിങ്ങളെല്ലാവരും അനുഗ്രഹിക്കപ്പെടട്ടെ. ത്യാഗങ്ങൾ എനിക്ക് അർപ്പിച്ച നിങ്ങളെല്ലാവരും അനുഗ്രഹിക്കപ്പെടട്ടെ. എന്നോട് ഒട്ടിച്ചേർന്ന് നിൽക്കുന്ന എല്ലാവരെയും ഞാൻ അനുഗ്രഹിക്കുന്നു. എന്റെ കരങ്ങളാണ് നിങ്ങളുടെ തൊട്ടിൽ; എന്റെ തിരുഹൃദയമാണ് നിങ്ങളുടെ അഭയകേന്ദ്രം. ഞാനാണ് നിങ്ങളുടെ ദൈവം; നിങ്ങൾ എന്റെ ജനമാണ്. പ്രിയപ്പെട്ടവരെ, ആനന്ദിക്കുക; നിങ്ങൾ ആനന്ദിക്കുവിൻ. എന്റെ സ്വരം ഈ ദുർബലമായ ഉപകരണത്തിലൂടെ നൽകുന്നത് എന്തുകൊണ്ടാണെന്ന് മനസ്സിലാക്കാൻ ശ്രമിക്കരുത്. ഹൃദയലാളിത്യത്തോടെ വിശ്വസിക്കുക; എന്നെ പരീക്ഷിക്കുന്നത് ഒഴിവാക്കുക. നിഷ്കളങ്കരെയും നിർമ്മലരായ കുഞ്ഞുങ്ങളെയും പോലെ, എന്റെ ദൃഷ്ടിയിൽ പ്രസാദമുള്ളവരായി തീരുവിൻ. എന്റെ തിരുഹൃദയത്തെ നോക്കുവിൻ; എന്റെ ഹൃദയം നിങ്ങൾക്കെല്ലാവർക്കും വെളിപ്പെടുത്തിക്കൊണ്ട് ഞാൻ നിങ്ങളുടെ മുമ്പിൽ നിലകൊള്ളുന്നു. നിങ്ങളോടുള്ള എന്റെ തീക്ഷ്ണമായ സ്നേഹം അനുഭവിച്ചറിയുക. എന്നെ എതിർക്കരുത്; എന്റെ യാചനയെ എതിർക്കരുത്; എന്റെ അടുക്കലേക്ക് വരൂ. നിങ്ങളെ എന്റെ തിരുഹൃദയത്തിന്റെ ആഴങ്ങളിലേക്ക് പ്രവേശിപ്പിക്കുവാൻ എന്നെ അനുവദിക്കുക. എന്റെ ഹൃദയം നിങ്ങളുടെ അഭയമായി തീരട്ടെ. എന്റെ പ്രിയപ്പെട്ടവരെ, എങ്ങനെയാണ് നിങ്ങളുടെ രക്ഷയ്ക്ക് വരാതിരിക്കാൻ എനിക്ക് കഴിയുക? ഉന്നതമായ സ്നേഹത്തിന്റെ ഉറവിടമായ ഞാൻ നിങ്ങളെ എപ്പോഴെങ്കിലും ഉപേക്ഷിക്കുമോ? നിങ്ങളുടെ സങ്കടത്തിന്റെ നിലവിളി സ്വർഗ്ഗം മുഴുവനിലും മുഴങ്ങി; ഭൂമിയിൽ നിന്നുള്ള നിങ്ങളുടെ അപേക്ഷ ഞാൻ കേട്ടു. പ്രിയപ്പെട്ടവരെ, നിങ്ങൾ ഭയപ്പെടേണ്ട; എന്റെ കണ്ണുകൾ എല്ലാം കാണുന്നു; ഞാൻ സർവ്വവും കേൾക്കുന്നു. സത്യമായി ഞാൻ നിങ്ങളോട് പറയുന്നു; നിങ്ങൾ വയ്ക്കുന്ന ഓരോ ചുവടും ഞാൻ അനുഗ്രഹിക്കുന്നു. ഞാൻ നിങ്ങളുടെ വിശ്വസ്തനായ പരിപാലകനാണ്; എന്റെ സ്വന്തം കൈകൊണ്ട് തന്നെ ഞാൻ എന്റെ മുന്തിരിത്തോട്ടത്തിന് ജലസേചനം നടത്തുകയും അതിനെ സംരക്ഷിക്കുകയും ചെയ്യും. രാത്രിയിൽ അന്യർ അതിൽ പ്രവേശിക്കാതിരിക്കാനായി ഞാൻ അതിന് കാവലിരിക്കും. എന്റെ മുന്തിരിത്തോട്ടം കാണാൻ ആഗ്രഹിക്കുന്നവർ പകൽ സമയത്ത് വരട്ടെ; കുറുക്കന്മാരാണ് രാത്രികാലങ്ങളിൽ വരുന്നത്. അതുകൊണ്ട്, വിവേകമുള്ളവരെ പോലെ പുലരിയിൽ എഴുന്നേറ്റ് എന്റെ മുന്തിരിത്തോട്ടം സന്ദർശിക്കുവിൻ. കർത്താവായ ഞാനാണ് എന്റെ മുന്തിരിത്തോട്ടത്തിന്റെ കാവൽക്കാരൻ; എന്റെ അനന്ത സ്നേഹത്താലും വലിയ കരുണയാലും എന്റെ മുന്തിരിത്തോട്ടത്തെ പുനസ്ഥാപിക്കാൻ ഞാൻ വരുന്നു. നിങ്ങൾ സന്തോഷിക്കുവിൻ; നിങ്ങളുടെ സ്തുതികൾ സ്വർഗ്ഗം കേൾക്കട്ടെ; നിങ്ങൾ ആനന്ദിക്കുവിൻ; കർത്താവിന്റെ മഹത്വത്തെ ഉദ്ഘോഷിക്കുവിൻ. എന്റെ വചനം വഹിക്കുന്ന ചെറിയ വക്താക്കൾ ആകുക; ഇപ്പോൾ ഉറങ്ങുന്നവർ നിങ്ങളുടെ ശബ്ദത്താൽ ഉണരട്ടെ. എല്ലാ ജനതകളോടും എന്റെ സ്നേഹം പ്രഘോഷിക്കുവിൻ. അങ്ങനെ, എന്നിൽ നിന്ന് അകന്നുപോയവർ തിരികെ വരട്ടെ; അവരുടെ ഹൃദയം വരണ്ടതും, അവരുടെ പാപങ്ങൾ രക്തവർണ്ണമായതാണെങ്കിലും, ഞാൻ അവരെ തിരസ്കരിക്കുകയില്ല. എന്റെ ക്ഷമിക്കുന്ന ഹൃദയത്തിന്റെ സമ്പത്തുകൾ ഞാൻ അവർക്ക് കാണിച്ചു കൊടുക്കും. അനന്തത്തോടെ ഗാനം ആലപിക്കുവിൻ; എന്തെന്നാൽ, അന്ത്യം വരെ ഞാൻ നിങ്ങളോട് കൂടെ ഉണ്ടായിരിക്കും. 28/4/1989: കർത്താവേ, ഇത് ഞാനാണ്. കർത്താവേ, നന്ദി. കർത്താവേ, അങ്ങ് ഞങ്ങളുടെ മേൽ വർഷിച്ചു കൊണ്ടിരിക്കുന്ന അത്ഭുതകരങ്ങളായ പ്രവർത്തികളെ പ്രതി ഞാൻ അങ്ങേയ്ക്ക് നന്ദി പറയുന്നു. എന്റെ ഹൃദയം ആനന്ദിക്കുന്നു; ഞാൻ അങ്ങയുടെ പരിശുദ്ധ നാമത്തെ മഹത്വപ്പെടുത്തുന്നു. കർത്താവേ, എന്നെ സംരക്ഷിക്കുന്ന പരിചയാണ് അങ്ങ്; അങ്ങാണ് നീതിമാനായ ന്യായാധിപൻ. എന്റെ ഇച്ഛയെ ഞാൻ അങ്ങേയ്ക്ക് സമർപ്പിക്കുന്നു. എന്റെ വസൂല, എപ്പോഴും നിന്റെ ഇച്ഛയെ എനിക്ക് സമർപ്പിക്കുക; എപ്പോഴും എന്റെ സേവനത്തിൽ ആയിരിക്കുക; എന്റെ എഴുത്തുപലകയായിരിക്കുവാൻ സന്നദ്ധയാവുക. നിന്റെ കരത്തെ ഉപയോഗിക്കുവാൻ എന്നെ അനുവദിക്കുക; എനിക്ക് യാതൊന്നും നിഷേധിക്കരുത്. അപ്പോൾ ഞാൻ നിന്നിൽ പ്രവർത്തിക്കും; നിന്റെ മേലുള്ള എന്റെ പിടുത്തം ദൃഢതരമാക്കാൻ എന്നെ അനുവദിക്കുക. പ്രിയപ്പെട്ടവളെ, എന്നെക്കൂടാതെ നീ എത്രമാത്രം ഉപയോഗശൂന്യമാണെന്ന കാര്യം തിരിച്ചറിയുക; ഞാൻ ജ്ഞാനമാണ്. നിന്റെ മരണത്തിനു ശേഷവും എന്റെ സന്ദേശം പലരും വായിക്കും; സ്നേഹവും വിശ്വാസവും പ്രത്യാശയും വർദ്ധിപ്പിക്കാൻ ഈ ഭൂമിയുടെ ഓരോ കോണിലേക്കും അത് എത്തും. എന്റെ കുഞ്ഞേ, എന്നിൽ വിശ്വസിക്കുക; ഞാനാണ് നിന്റെ ഗുരു; ഞാനാണ് നിന്റെ രക്ഷകൻ; ഞാനാണ് നിന്റെ സമാധാനം; ഞാനാണ് നിന്റെ സൃഷ്ടാവ്; ഞാനാണ് നിന്നെ ഏറ്റവും അധികം സ്നേഹിക്കുന്നവൻ.