Latest / ദൈവത്തിലുള്ള യഥാർത്ഥ ജീവിതം - TLIG / Ep 54: ഞാൻ, യേശു, നിങ്ങളെ എല്ലാവരെയും സ്നേഹിക്കുന്നു.
Transcript
- എപ്പിസോഡ് 54. 24/11/1987. വസൂല, മാർഗരറ്റ് മേരി അലക്കോക്കിനോട് ഞാൻ പറഞ്ഞിട്ടുള്ള വാക്കുകൾ നീ വായിക്കുക. ഞാൻ മാർഗരറ്റിനോട് ഇപ്രകാരം പറഞ്ഞു: "എനിക്ക് ശത്രുക്കളും എന്നെ എതിർക്കുന്നവരും ഉണ്ടെങ്കിലും ഞാൻ അവരുടെ മധ്യേ ഭരണം നടത്തും." അതിനാൽ പ്രിയപ്പെട്ടവരെ, ധൈര്യമായിരിക്കുക. ഫ്രാൻസിലെ വിസിറ്റേഷൻ സന്യാസ സമൂഹത്തിലെ അംഗമായിരുന്ന മാർഗരറ്റ് മേരി അലക്കോക്കിന് 1647-1690-ൽ യേശു അവിടുത്തെ തിരുഹൃദയം വെളിപ്പെടുത്തി കൊടുത്തു. അതെ കർത്താവേ. പരിശുദ്ധ ത്രീത്വത്തെക്കുറിച്ച് എനിക്ക് ഗ്രഹിക്കുവാൻ സാധിക്കാതിരുന്നപ്പോൾ യേശു നൽകിയ ദർശനം: പ്രകാശത്തിന്റെ ഒരു ദർശനം. ഒരു ഗോളത്തിൽ നിന്ന് മറ്റൊന്നിലേക്ക് പ്രകാശം വരുന്നു. പുത്രൻ പിതാവിലായിരിക്കുമ്പോൾ പിതാവും പുത്രനും ഒന്നാണ്. പരിശുദ്ധ ത്രീത്വം ഏകമാണ്: പിതാവ്, പുത്രൻ, പരിശുദ്ധാത്മാവ്. പരിശുദ്ധ ത്രീത്വം മൂന്നെങ്കിലും ഒന്നാണ്, ഏകമാണ്; മൂന്ന് ദൈവീക വ്യക്തിത്വം എങ്കിലും സത്തയിൽ ഒരു ദൈവം. 25/11/1987. യേശു എന്റെ സമീപത്ത് ഇരിക്കുന്നതായി ഞാൻ ദർശിച്ചു. യേശുവേ, അങ്ങാണോ ഇവിടെ ഇരിക്കുന്നത്? ഞാനാണ്. നീ എന്നെ വിവേചിച്ചറിഞ്ഞിരിക്കുന്നു. വസൂല, നീ ഇപ്പോൾ എന്നിൽ അർപ്പിക്കുന്ന കടുകുമണിയെക്കാൾ ചെറുതായ നിന്റെ വിശ്വാസം കൊണ്ട് എന്നെ ദർശിക്കുവാനും, എന്നെ അനുഭവിച്ചറിയുവാനും, എന്നോടൊപ്പം എഴുതുവാനും നിന്നെ പ്രാപ്തയാക്കുവാൻ എനിക്ക് കഴിയും. വരൂ, ഞാൻ നിന്റെ പരിശുദ്ധനായ സന്തത സഹചാരി ആയിരിക്കും. പിന്നീട്. പ്രിയപ്പെട്ടവളേ, നീ ഭയപ്പെടേണ്ട ആവശ്യമില്ല. എന്തെന്നാൽ നീ ജനിക്കുന്നതിന് വളരെ മുമ്പ് തന്നെ എന്റെ പദ്ധതികൾ ഞാൻ വിഭാവനം ചെയ്തിട്ടുണ്ട്. നീ എനിക്ക് ശുശ്രൂഷ ചെയ്യുമെന്ന് അനാദികാലം മുതലേ ഞാൻ അറിഞ്ഞിരുന്നു. നീ എന്ത് പറയുമെന്നോ അഥവാ എന്ത് പ്രവർത്തിക്കുമെന്നോ ഓർത്ത് നിന്റെ ഹൃദയം അസ്വസ്ഥമാകരുത്. കാരണം കർത്താവായ ഞാൻ നിന്റെ അധരങ്ങളിൽ എന്റെ വചനങ്ങൾ നിക്ഷേപിക്കും. ഞാൻ നിന്നെ നയിച്ചുകൊണ്ടിരിക്കുന്നു; നീ എന്നിലാണ്, നീ എന്റെ സ്നേഹത്തിലാണ്. ഞാൻ നിന്നെ വിശുദ്ധീകരിച്ചിരിക്കുന്നു; നീ അനുഗ്രഹിക്കപ്പെട്ടിരിക്കുന്നു. രക്തം വാർന്നൊലിക്കുന്ന എന്റെ ശരീരമായ സഭയുടെ ഏറ്റവും ഉള്ളറകളിലേക്ക് ഞാൻ നിന്നെ നയിച്ചുകൊണ്ടിരിക്കുന്നു. എന്റെ ഇഷ്ടം നിറവേറ്റി കൊണ്ട് എന്റെ അഭിലാഷങ്ങൾ പൂർത്തിയാക്കുക. നിനക്ക് വിവേചനപരത്തിനുള്ള കൃപ നൽകിക്കൊണ്ട് ഞാൻ നിന്നെ സഹായിക്കും. എന്നിൽ വസിക്കുക. പ്രിയപ്പെട്ടവളേ, നിന്റെ എല്ലാ ബലഹീനതകളും എനിക്ക് നൽകുക; നിന്റെ എല്ലാ പ്രശ്നങ്ങളും എനിക്ക് നൽകുക. എന്റെ ശക്തി അവയെ ഇല്ലാതാക്കട്ടെ. എന്നെ മഹത്വപ്പെടുത്തി കൊണ്ട് നിനക്കുവേണ്ടി ഞാൻ നിശ്ചയിച്ചിരിക്കുന്ന എല്ലാ പ്രവർത്തികളും നീ നിറവേറ്റും. എന്നെ വിശ്വസിക്കുക, ഞാൻ നിന്നെ താങ്ങിനിർത്തും. എന്റെ കരത്താൽ അനുഗ്രഹിക്കപ്പെട്ടവളേ, ഞാൻ നിന്നെ എന്റെ ഹൃദയത്തിൽ സൂക്ഷിക്കുന്നതുപോലെ നീയും എന്നെ നിന്റെ ഹൃദയത്തിൽ സൂക്ഷിക്കണം. മറ്റുള്ളവരെ പ്രചോദിപ്പിക്കുവാൻ നിനക്ക് കഴിയേണ്ടതിന് എന്റെ ഹൃദയത്തിൽ നിന്നുള്ള കൃപ കൊണ്ട് നിന്റെ ഹൃദയത്തെ നിറയ്ക്കുക. കർത്താവായ ഞാൻ നിന്നെ പരിപോഷിപ്പിക്കും. എന്നെ വിശ്വസിക്കുക; ആത്മവിശ്വാസം അനുഭവിക്കുക. പ്രിയപ്പെട്ടവളേ, വരൂ, വന്ന് എന്നിൽ വിശ്രമിക്കുക. കർത്താവായ ഞാൻ നിന്റെ എല്ലാ ഉദ്യമങ്ങളെയും അനുഗ്രഹിക്കുന്നു. വസൂല, എന്റെ കരം പിടിക്കുക; എന്റെ കരം പിടിച്ച് എന്നെ അനുഗമിക്കുക. യേശു എന്റെ അന്തരാത്മാവിനെ നയിച്ചു. യേശു എന്നെ വലിച്ചുകൊണ്ടുപോയി. അവിടുന്ന് എന്നെ വിശുദ്ധ പത്രോസിന്റെ ബസിലിക്കയിലേക്ക് കൊണ്ടുപോയി; അവിടുന്ന് കൈ നീട്ടി. ചൂണ്ടുവിരൽ കൊണ്ട് ഏകാന്തനായി ഇരിക്കുന്ന ഒരാളെ എനിക്ക് കാണിച്ചുതന്നു. അദ്ദേഹം ജോൺ പോൾ രണ്ടാമൻ മാർപാപ്പ ആയിരുന്നു. അദ്ദേഹം തനിയെ ധ്യാനനിമഗ്നനായി ഇരിക്കുകയായിരുന്നു. വസൂല, നീ കാണുന്നുണ്ടോ? അവൻ കാത്തിരിക്കുകയാണ്; അവൻ കാത്തിരിക്കുന്നു. പിതാവേ, അങ്ങയുടെ പദ്ധതികൾ നിറവേറട്ടെ. ആമേൻ. എഴുതപ്പെട്ടിട്ടുള്ള എന്റെ എല്ലാ സന്ദേശങ്ങളും അദ്ദേഹത്തിന് കൊടുക്കണം. പ്രിയപ്പെട്ടവളേ, വരൂ. സമയം സമാഗതമായിരിക്കുന്നു. ഭയപ്പെടരുത്. ഞാൻ നിന്റെ മുന്നിലുണ്ടെന്ന് ഓർക്കുക. ഞാൻ ആരംഭിച്ചതും അനുഗ്രഹിച്ചതുമായ എല്ലാം ഞാൻ പൂർത്തീകരിക്കും. സ്നേഹം നിന്നെ സ്നേഹിക്കുകയും നയിക്കുകയും ചെയ്യുന്നു. നിന്റെ കരം എന്റെ കരത്തിനുള്ളിൽ സൂക്ഷിക്കുക; നമുക്ക്, നമ്മൾ. അതെ കർത്താവേ, നമ്മൾ ഒരുമിച്ച്. യേശുവേ, ഞാൻ അങ്ങയെ എത്രയധികം സ്നേഹിക്കുന്നു. യേശു നമുക്ക് നൽകുവാനായി അവിടുത്തെ ഹൃദയം അവിടുത്തെ ഉള്ളം കയ്യിൽ പിടിച്ചുകൊണ്ട് ഇതാ വരുന്നു. സാത്താന്റെ വലകളിൽ നിന്ന് നമ്മെ രക്ഷിക്കുന്നതിന് സ്നേഹമായ യേശു അവിടുത്തെ ഹൃദയവുമായി ഇതാ നമ്മുടെ അടുക്കലേക്ക് വരുന്നു. കർത്താവേ, ഞാൻ അങ്ങയെ സ്നേഹിക്കുന്നു. പ്രിയപ്പെട്ടവളേ, ഇതെല്ലാം കണ്ടിട്ട് എനിക്ക് എങ്ങനെ നിന്നെ വിട്ടുപോകാൻ കഴിയും? എന്റെ പൂർണ്ണ ഹൃദയത്തോടെ ഞാൻ നിന്നെ സ്നേഹിക്കുന്നു. എന്റെ പൂർണ്ണ ഹൃദയത്തോടെ ഞാൻ നിങ്ങൾ എല്ലാവരെയും സ്നേഹിക്കുന്നു. ഞാൻ യേശുവിന്റെ ഹൃദയം അനുഭവിച്ചറിഞ്ഞു. അവരുടെ ഇനിയുമായ സ്നേഹമാണ് യേശുവിന് നമ്മോടുള്ളത്. 28/11/1987. കുഞ്ഞേ, എന്റെ പൂന്തോട്ടം അലങ്കരിക്കുക. ഇപ്പോഴത്തെ സ്ഥിതിയിൽ വരൾച്ച മാത്രമാണ് ഞാൻ കാണുന്നത്. വരൾച്ച എന്റെ പൂന്തോട്ടത്തിന്മേൽ ഭരണം നടത്തിക്കൊണ്ടിരിക്കുന്നു. ഉഷ്ണക്കാറ്റ് വീശിക്കൊണ്ടിരിക്കുന്നു; പൂന്തോട്ടത്തിൽ അവശേഷിച്ചിരിക്കുന്നവയെ കൂടെ അത് ഉണക്കി കളയും. എന്റെ പുഷ്പങ്ങൾക്ക് ജലസേചനം അത്യാവശ്യമായിരിക്കുന്നു. അല്ലാത്തപക്ഷം ഓരോ ചെടിയും നശിച്ചുപോകും. പൂക്കാലത്ത് എന്റെ പൂമട്ടുകൾ വിരിയുകയില്ല. ഒന്നിനു പിന്നാലെ മറ്റൊന്നായി അവയെല്ലാം നശിച്ചുപോകും. എന്റെ മക്കൾ ഇതൊന്ന് കേട്ടിരുന്നെങ്കിൽ. എന്റെ ദൈവമേ, ഒരു തീരുമാനത്തിൽ എത്തുവാൻ എന്താണ് ഇത്ര ബുദ്ധിമുട്ട്? എന്തുകൊണ്ടാണ് ഇക്കാര്യത്തിനുവേണ്ടി മാസങ്ങളും വർഷങ്ങളും കാത്തിരിക്കേണ്ടത്? പരസ്പരം സ്നേഹിക്കുന്നതിനും ഒരു കുടുംബവുമായി ഐക്യപ്പെടുന്നതിനും യഥാർത്ഥത്തിൽ ഇത്രമാത്രം ബുദ്ധിമുട്ടുണ്ടോ? ഇവർ തന്നെയല്ലേ എല്ലാവരും പരസ്പരം സ്നേഹിക്കണമെന്നും ത്യാഗം അനുഷ്ഠിക്കുന്നതിനും ദാനധർമ്മം ചെയ്യുന്നതിനും പഠിക്കണമെന്ന് ഞങ്ങളെ പഠിപ്പിക്കുന്നത്? സഭകൾ ഐക്യപ്പെടുന്നതിന് വർഷങ്ങൾ വേണ്ടിവരുമോ? ഇതിനുവേണ്ടി പ്രത്യേക കൗൺസിലുകളും സമ്മേളനങ്ങളും അവർക്ക് യഥാർത്ഥത്തിൽ ആവശ്യമുണ്ടോ? എന്തുകൊണ്ട് അവർക്ക് ഒരു നിർണായകമായ സമ്മേളനം വിളിച്ചുചേർത്ത് പരസ്പരം ഐക്യപ്പെട്ടുകൊണ്ട് പത്രോസിന് അധികാരം കൈമാറിക്കൊണ്ട് അങ്ങയെ പ്രസാദിപ്പിച്ച് അങ്ങേയ്ക്ക് ഒരു പുഞ്ചിരി സമ്മാനിക്കുവാൻ കഴിയുന്നില്ല? എന്റെ കുഞ്ഞേ, നിന്റെ നിർമ്മലമായ ലാളിത്യത്തെ ഞാൻ വളരെയധികം സ്നേഹിക്കുന്നു. നീ ചിന്തിക്കുന്ന വിധം ശിശുസഹജമായ ബാലിശമാണ്. കുഞ്ഞുങ്ങൾ എന്റെ ബലഹീനതയാണ്. നിനക്കറിയാമല്ലോ, കുഞ്ഞുങ്ങൾ തമ്മിൽ വഴക്കിടുമ്പോൾ അവരുടെ ഭിന്നത അധികസമയം നീണ്ടുനിൽക്കുന്നില്ലെന്ന്. കാരണം അവർക്ക് വൈരമില്ല. മകളേ, ഇവർ കുഞ്ഞുങ്ങളല്ല. ഒരിക്കൽ അവർക്കുണ്ടായിരുന്ന എല്ലാ നിഷ്കളങ്കതയും അവർക്ക് നഷ്ടമായിരിക്കുന്നു. അവരുടെ ലാളിത്യവും വിശുദ്ധിയും അവർക്ക് നഷ്ടപ്പെട്ടിരിക്കുന്നു. അതിനുപകരമായി നിഷ്കളങ്കതയുടെ സ്ഥാനത്ത് വൈരവും, ലാളിത്യത്തിന്റെ സ്ഥാനത്ത് വ്യർത്ഥാഭിമാനവും, പരിശുദ്ധിയുടെ സ്ഥാനത്ത് അശുദ്ധിയും, വിനയത്തിന്റെ സ്ഥാനത്ത് മതഭ്രാന്തും അവർ പടുത്തുയർത്തിക്കൊണ്ടിരിക്കുന്നു. കുഞ്ഞേ, ഇക്കാരണത്താലാണ് യേശുവായ ഞാൻ എങ്ങനെയുള്ളവനാണെന്ന് അവരെ ഓർമ്മിപ്പിക്കുവാൻ അവരുടെ ഇടയിലേക്ക് ഇറങ്ങിവരുന്നത്. നഗ്നപാദനായി, വിനയാന്യതനായി ഞാൻ വരും. ഞാൻ എന്റെ സ്വന്തം ഭവനത്തിൽ പ്രവേശിച്ച് മുട്ടുകുത്തിക്കൊണ്ട് എന്റെ സമർപ്പിതരായ ശുശ്രൂഷകരുടെ പാദങ്ങൾ കഴുകും. വസൂല, കരയരുത്. ഇതെല്ലാം ഐക്യത്തിനുവേണ്ടിയാണ്. ഞാൻ നിന്നെ ഉപയോഗപ്പെടുത്തട്ടെ. ഇത് യേശുവായ ഞാനല്ല എന്ന് അവർക്ക് ഇത്തവണ നിഷേധിക്കുവാൻ കഴിയുകയില്ല. കാരണം ഞാൻ ഇക്കാര്യം സംഭവിക്കുന്നതിന് മുമ്പ് തന്നെ മുൻകൂട്ടി പറഞ്ഞിരിക്കുന്നു. എന്റെ ദാസനായ ഇരുപത്തിമൂന്നാം ജോൺ മാർപാപ്പയ്ക്ക് ഞാൻ നൽകിയ പ്രചോദനങ്ങൾ അടങ്ങുന്ന പുസ്തകത്തിന്റെ ഒരു ഭാഗം വായിക്കുവാൻ ഞാൻ നിന്നെ ഇടയാക്കിയല്ലോ. അതിന്റെ ബാക്കി ഭാഗം? കർത്താവേ, അതിന്റെ ബാക്കി ഭാഗം എവിടെ? എന്റെ സഭ അനുഭവിക്കാനിരിക്കുന്ന ഭീകരമായ, ദുരിതപൂർണ്ണമായ സഹനങ്ങളെക്കുറിച്ച് ഞാൻ അവന്റെ ചെവിയിൽ പറഞ്ഞുകൊടുത്തിട്ടുണ്ട്. യേശുവായ ഞാൻ നിങ്ങളെല്ലാവരെയും സ്നേഹിക്കുന്നു. എന്നിൽ വസിക്കുക; എന്റെ സ്നേഹത്തിൽ വസിക്കുക. 29/11/1987. വസൂല, എനിക്കുവേണ്ടി കൂടുതൽ ത്യാഗപ്രവർത്തികൾ ചെയ്യുവാൻ നീ ഇപ്പോൾ ഒരുക്കമാണോ? കർത്താവേ, അങ്ങേയ്ക്ക് ഇഷ്ടമുള്ള വിധം എന്നെ ഉപയോഗിക്കാം. ഞാൻ അങ്ങയുടെ മുമ്പിൽ എന്നെത്തന്നെ പരിപൂർണ്ണമായി സമർപ്പിച്ചിരിക്കുന്നു. ഓരോ ദിവസവും ഞാൻ വീണ്ടും വീണ്ടും എന്നെ അങ്ങേയ്ക്ക് സമർപ്പിക്കുന്നു. എന്നിൽ വസിക്കുക; എന്റെ സ്നേഹത്തിൽ വസിക്കുക. മകളേ, നിനക്ക് അനേകം പരീക്ഷണങ്ങൾ ഉണ്ടാകും. യേശു എനിക്ക് മുന്നറിയിപ്പ് തരുകയായിരുന്നു. അപ്പോഴും നിന്റെ ദൈവമായ എനിക്കുവേണ്ടി കൂടുതൽ ത്യാഗങ്ങൾ അനുഷ്ഠിക്കുമോ? മുന്നറിയിപ്പ് നൽകിയതിനു ശേഷം ദൈവം എന്റെ സ്വാതന്ത്ര്യം സ്വീകരിച്ചതിനു ശേഷം എന്നോട് വീണ്ടും ഇപ്രകാരം ചോദിക്കുന്നു: എന്റെ ദൈവമേ, എന്റെ ജീവിതത്തെ അങ്ങയുടെ കരങ്ങളിലേക്ക് സ്വീകരിച്ചാലും, അങ്ങയുടെ തിരുഹൃദയത്തിന്റെ അഭീഷ്ടമനുസരിച്ച് എന്നോട് പ്രവർത്തിച്ചുകൊള്ളുക. എന്റെ ഏറ്റവും പ്രിയപ്പെട്ട മണവാട്ടി, അങ്ങനെയെങ്കിൽ നീ എന്റെ കുരിശിലേക്ക് ഒന്ന് നോക്കുക. ഞാൻ നോക്കി, യേശുവിനോടൊപ്പം വളരെ വലിയ ഒരു കറുത്ത കുരിശ് ഞാൻ കണ്ടു. എന്റെ പിതാവിനെ മഹത്വപ്പെടുത്തി കൊണ്ട് ഞാൻ ആ കുരിശിൽ ആണികൊണ്ട് തറക്കപ്പെട്ടു. എന്താണ് നിന്നെ കാത്തിരിക്കുന്നതെന്ന് നിനക്ക് മനസ്സിലായോ? കർത്താവായ ഞാൻ എന്റെ ഈ കുരിശ് നീയുമായി പങ്കുവയ്ക്കും. നിനക്ക് സഹിക്കുവാൻ സാധിക്കുന്നതിന്റെ പരമാവധി സഹനങ്ങൾ നീ വഹിക്കും. കുഞ്ഞേ, നിന്റെ സഹനശേഷി ഞാൻ വർദ്ധിപ്പിക്കും. പിതാവേ, അങ്ങയുടെ തിരുഹൃദയത്തിന് ഇഷ്ടമുള്ള വിധം അങ്ങേയ്ക്ക് കൂടുതൽ മഹത്വം നൽകുന്ന എന്തും എന്നോട് പ്രവർത്തിക്കുക. അങ്ങിൽ വരുന്നതെല്ലാം എന്നെ സംതൃപ്തമാക്കുന്നു. എന്നോട് അനുസരണമുള്ളവളായിരുന്നുകൊണ്ട് എന്നെ പ്രസാദിപ്പിക്കുക. നിന്റെ എന്നോടുള്ള അനുസരണം പിശാചിനെ നിസ്സഹായനാക്കുകയും അവനെ ഓടിച്ചുകളയുകയും ചെയ്യും. 30/11/1987. യേശുവേ. ഇത് ഞാനാണ്. യേശുവായ ഞാൻ നിങ്ങൾ എല്ലാവർക്കും ഉറപ്പു തരുന്നു: എന്റെ സഭ ഐക്യപ്പെട്ട് ഒന്നായിത്തീരും. പ്രിയപ്പെട്ടവളേ, എന്നോട് വിശ്വസ്തയായിരിക്കുക; എന്നിൽ വിശ്വാസം അർപ്പിക്കുക. ആത്മവിശ്വാസമുള്ളവളായിരിക്കുക.