Latest / ദൈവത്തിലുള്ള യഥാർത്ഥ ജീവിതം - TLIG / Ep 37: ഞാൻ ഏക ദൈവമാണ്, എനിക്ക് ഏക ശരീരമാണ്.
Transcript
- എപ്പിസോഡ് 37. 3/6/1987, ഇന്ന് സന്ദേശം എഴുതിയെടുക്കുന്ന സമയത്ത് വീണ്ടും തിന്മയാൽ ഞാൻ ആക്രമിക്കപ്പെട്ടു. പൂച്ചകൾ എന്റെ മേൽ ചാടുന്നത് പോലെയുള്ള അനുഭവമായിരുന്നു; നരകം മുഴുവനും കൂടി ഇളകി വന്നത് പോലെയുണ്ടായിരുന്നു. അവ എന്നെ ശല്യപ്പെടുത്തിക്കൊണ്ടിരുന്നതിനാൽ ഞാൻ ഒന്നിനോട് പറഞ്ഞു: "യേശുക്രിസ്തുവിന്റെ നാമത്തിൽ എന്നെ വിട്ടുപോയി തീയിൽ വീഴുക." അത് എന്നെ വിട്ടുപോയി. ഓരോന്നിനോടും ഇതുപോലെ തന്നെ യേശുവിന്റെ നാമത്തിൽ ആജ്ഞാപിച്ചപ്പോൾ അവയെല്ലാം എന്നെ വിട്ടുപോയി. യേശു എന്നോട് ഇപ്രകാരം പറഞ്ഞു: "എന്റെ നാമത്തിൽ ചോദിച്ചാൽ അത് ലഭിക്കുന്നതാണ്. എന്നാൽ യാചിക്കുന്നത് ലഭിക്കുമെന്ന വിശ്വാസത്തോടെ ആയിരിക്കണം നീ എന്നോട് യാചിക്കേണ്ടത്. ജീവിതത്തിൽ പ്രവർത്തിക്കുകയും പ്രാർത്ഥിക്കുകയും ചെയ്യുക. എന്റെ നാമത്തിൽ പ്രാർത്ഥിക്കുക, എന്റെ നാമത്തിൽ പ്രവർത്തിക്കുക. എന്റെ നാമത്തിൽ ചോദിക്കുക, എന്റെ നാമം പുനരുദ്ധരിക്കുക. എന്റെ പ്രതിബിംബമായിരിക്കുക. എന്നോടൊപ്പം പൊരുത്തപ്പെടുക. നിന്റെ ശിരസ്സ് എന്റെ നേർക്കുയർത്തുക. നീ ചോദിക്കുന്ന കാര്യത്തിൽ വിശ്വാസത്തോടെ ചോദിക്കുക." യേശു എന്നോട് പറഞ്ഞു: "പിശാചുകൾക്ക് ഞാൻ അപകടകാരി ആയ ശത്രുവായതിനാൽ അവ എന്നെ ഭയപ്പെടുന്നു. പിന്നീട് ഞാൻ എവിടെയാണ് നിൽക്കുന്നതെന്ന് എനിക്ക് മനസ്സിലായി. എന്റെ പാദങ്ങൾ നനഞ്ഞ ചെളിയിൽ ആണെന്ന് എനിക്ക് അനുഭവപ്പെട്ടു. ഒരു മിന്നൽ പോലെ നരകത്തിന്റെ സാമീപ്യം എനിക്ക് അനുഭവപ്പെട്ടു. അപ്പോൾ മാത്രമാണ് ഇന്ന് സന്ദേശം എഴുതിയെടുക്കുന്നതിനിടയിൽ എനിക്ക് അനുഭവപ്പെട്ട തിന്മയുടെ സ്വാധീനത്തിന്റെ കാരണമെല്ലാം എനിക്ക് മനസ്സിലായത്. ഇതേപ്പറ്റി ഞാൻ യേശുവിനോട് ചോദിച്ചപ്പോൾ അവിടുന്ന് എന്നോട് പറഞ്ഞു: "ഇത് മറ്റെവിടെയെങ്കിലും ആകുവാൻ പറ്റുമോ?" നമ്മൾ ഒരുമിച്ച് സാത്താന്റെ നരകവാതിലിനടുത്തുകൂടി മൃതരെ സുഖപ്പെടുത്തിക്കൊണ്ട് അവരെ നരകത്തിൽ നിന്ന് രക്ഷിച്ചുകൊണ്ട് കടന്നു പോവുകയായിരുന്നു. "വസൂലാ, നിന്നെ ഈ വിധത്തിലും ഉപയോഗപ്പെടുത്തുവാൻ എന്നെ അനുവദിക്കുക. ഇത് നിന്റെ ദൗത്യത്തിന്റെ ഒരു ഭാഗമാണ്." 4/6/1987, ഇന്ന് ദൈവം എന്നെ തന്റെ ഉള്ളങ്കയിൽ പൊക്കിയെടുത്തു. ഞാൻ എത്രമാത്രം ചെറുതാണെന്ന് അവിടുന്ന് എന്നെ ബോധ്യപ്പെടുത്തി. അവിടുത്തെ നേരെ നോക്കുവാൻ അവിടുന്ന് എന്നോട് ആവശ്യപ്പെട്ടു. ഞാൻ അപ്രകാരം നോക്കിയപ്പോൾ പുഞ്ചിരിച്ചുകൊണ്ടിരിക്കുന്ന ഭീമാകാരനായ ഒരു സുന്ദരനെ ദർശിച്ചു. "വസൂലാ, എന്നെ നോക്കുക. എന്റെ മുഖത്ത് നോക്കുക." യേശു സുന്ദരമായി പുഞ്ചിരിക്കുന്നതായി എനിക്ക് അനുഭവപ്പെട്ടു. അവിടുത്തെ കൈവെള്ളയിൽ ഞാൻ ഒരു ചെറിയ പൊട്ടുപോലെയാണെന്ന വിധം എനിക്ക് അനുഭവപ്പെട്ടു. "അതുകൊണ്ട് എനിക്കെന്താണ്? നീ ഒരു പിടി പൊടിയാണെങ്കിലും എനിക്കെന്താണ്? ഞാൻ നിന്നെ എത്രമാത്രം സ്നേഹിക്കുന്നു എന്ന് അനുഭവിച്ചറിയുക." അവിടുന്ന് വളരെ സുന്ദരനായിരുന്നു. "അതെ, ഞാൻ സുന്ദരനാണ്. വസൂലാ, ഞാൻ ഭൂമിയിൽ മനുഷ്യരൂപത്തിൽ ആയിരുന്നപ്പോഴത്തെ പറ്റി ധ്യാനിക്കുമ്പോൾ എന്നെപ്പറ്റി ഈ വിധത്തിൽ കരുതിക്കൊള്ളുക." "എന്നാൽ കർത്താവേ, അങ്ങ് യഥാർത്ഥത്തിൽ കാഴ്ചയിൽ എങ്ങനെയാണ്? അങ്ങയുടെ സവിശേഷതകൾ എന്തെല്ലാമാണ്?" "ഞാൻ എല്ലാമാണ്. ഞാൻ ആൽഫയും ഒമേഗയുമാണ്. ഞാൻ നിത്യനാണ്. ഞാൻ നിത്യജീവനാണ്. എന്നെ സ്നേഹിക്കുക. എന്നിൽ വസിക്കുക. ഒരിക്കലും എന്നെ ഭയപ്പെടരുത്. മനുഷ്യർ തെറ്റായി പഠിപ്പിച്ചിട്ടുള്ള ഈ ഭയത്തെ സ്നേഹത്താൽ മാറ്റിക്കളയുക. ഭയം കൂടാതെ എന്നിൽ ജീവിക്കുക. എന്നോട് എതിരിടുമ്പോൾ മാത്രം എന്നെ ഭയപ്പെടുക. ഞാൻ സ്നേഹമാണ്. എന്റെ ഹൃദയം സ്നേഹത്തിന്റെ അഗാധ സമുദ്രമാണെന്ന് അവരോട് പറയുക." 5/6/1987, വസൂലാ, കുരിശിന്റെ വഴിയിൽ എന്നെ കണ്ടുമുട്ടുക. അനുഗ്രഹീതയായിരിക്കുക. നമ്മൾ ഒന്നിച്ച് പ്രവർത്തിക്കും. "ഞാൻ യേശുവിന്റെ കുരിശിന്റെ വഴി ധ്യാനിച്ചിട്ടുണ്ടായിരുന്നില്ല. ഞാൻ ഒരു പുരോഹിതനെ തന്നെ കാത്തിരിക്കുകയായിരുന്നു. അദ്ദേഹത്തോട് യേശു എന്നോടൊപ്പം കുരിശിന്റെ വഴി ഒന്നിച്ച് ധ്യാനിക്കുവാൻ ആവശ്യപ്പെട്ടിരുന്നു. " 6/6/1987, യേശുവേ. "ഞാനാണ്. ദൈവത്തിന്റെ മുഖത്ത് നോക്കുക എന്നതിനർത്ഥം സ്നേഹം ദർശിച്ചിരിക്കുന്നു എന്നതാണ്." യേശുവിന്റെ തിരുക്കച്ചയിലുള്ള അവിടുത്തെ മുഖം ഞാൻ നോക്കുകയായിരുന്നു. "വസൂലാ, ഞാൻ നിന്നിൽ പൂർണമായി നിറഞ്ഞുനിൽക്കണമെന്ന് നീ ആഗ്രഹിക്കുന്നുണ്ടോ?" "അതെ, എന്റെ ദൈവമേ. ഇത് അങ്ങയുടെ ആഗ്രഹമാണെങ്കിൽ ഞാൻ അത് ആഗ്രഹിക്കുന്നു." "എങ്കിൽ എന്നെ സ്വതന്ത്രമായി പ്രവർത്തിക്കാൻ അനുവദിക്കുക. എന്നെ ഒരിക്കലും തടസ്സപ്പെടുത്തരുത്. എനിക്കുവേണ്ടി ജീവിക്കുക." "കർത്താവേ, ഞാൻ എങ്ങനെയാണ് അങ്ങയെ തടസ്സപ്പെടുത്തുന്നതെന്ന് എന്നോട് പറയുക. അങ്ങനെ തടസ്സങ്ങൾ നീക്കുവാൻ എനിക്ക് കഴിയുമല്ലോ." "വസൂലാ, പാപങ്ങളാണ് എന്നെ തടസ്സപ്പെടുത്തുന്നത്. ഞാൻ ആഗ്രഹിക്കുന്ന വിധത്തിൽ നിന്നിൽ പ്രവർത്തിക്കുവാൻ നീ എന്നെ അനുവദിക്കുമോ?" "അതെ, എന്റെ ദൈവമേ. പാപം ചെയ്യാതിരിക്കുവാൻ എന്നെ സഹായിക്കണമേ. എന്റെ പാപങ്ങൾ ക്ഷമിക്കണമേ. അങ്ങ് ആഗ്രഹിക്കുന്ന വിധത്തിൽ എന്നിൽ പ്രവർത്തിക്കണമേ. എന്റെ ഭീരുത്വത്തെ പരിഗണിക്കരുതേ. അങ്ങയുടെ ആഗ്രഹം നിവർത്തിക്കുന്നതിനുവേണ്ടി എന്നെ വലിച്ചു കൊണ്ടുപോകണമെങ്കിൽ അപ്രകാരം പ്രവർത്തിക്കുക. അങ്ങയുടെ പ്രവർത്തി അങ്ങ് ചെയ്താലും, അങ്ങയുടെ പ്രവർത്തിക്ക് ഞാൻ ഒരു തടസ്സമോ താമസമോ വരുത്തുവാൻ ഞാൻ ആഗ്രഹിക്കുന്നില്ല. എന്റെ ബലഹീനതകൾ മറന്നുകൊണ്ട് അങ്ങയുടെ ഇഷ്ടം എന്നിൽ നിവർത്തിക്കണമേ." "മകളെ, നിന്റെ വാക്കുകളിൽ ഞാൻ സംതൃപ്തനായിരിക്കുന്നു. വരൂ, ഞാൻ എന്റെ ദൗത്യം തുടരുന്നതാണ്. എന്റെ ആഗ്രഹം പൂർത്തിയാക്കുന്നതിന് സ്വതന്ത്രമായി പ്രവർത്തിക്കുവാൻ എന്നെ അനുവദിക്കുക. വരൂ, ഞാൻ എപ്രകാരമാണ് പ്രവർത്തിക്കുന്നതെന്ന് ഞാൻ വിശദീകരിക്കട്ടെ. വസൂലാ, ഞാൻ നിനക്ക് അനേകം കൃപാവരങ്ങൾ നൽകിയിട്ടുണ്ട്. എന്നാൽ നീ എന്റെ കൃപാവരങ്ങളെ അംഗീകരിക്കണമെന്ന് ഞാൻ ആഗ്രഹിക്കുന്നു. എന്നെ പ്രസാദിപ്പിക്കുകയും എന്നിൽ കൂടുതലായി വിശ്വസിക്കുകയും ചെയ്യുക." "ഞാൻ അങ്ങേക്ക് അപ്രീതി വരുത്തിയാൽ അങ്ങ് ഈ കൃപാവരങ്ങൾ എന്നിൽ നിന്ന് തിരിച്ചെടുക്കുമെന്ന് ഞാൻ ഭയപ്പെടുന്നു." "എന്തിന് ഞാൻ എന്റെ കൃപാവരങ്ങളെ നിന്നിൽ നിന്ന് പിൻവലിക്കണം?" "ഞാൻ നന്മയിൽ പുരോഗമിക്കാതിരിക്കുകയും യഥാസമയം അങ്ങയെ അനുഗമിക്കാതിരിക്കുകയും ചെയ്താൽ അങ്ങ് ഈ കൃപാവരങ്ങൾ പിൻവലിച്ചേക്കാം." "ഇല്ല, ഒരിക്കലുമില്ല." "അങ്ങയെ ഒരുവൻ പ്രസാദിപ്പിക്കുന്നില്ലെങ്കിൽ അങ്ങയുടെ കൃപാവരങ്ങൾ പിൻവലിക്കുന്നത് ശരിയാണെന്നാണ് എനിക്ക് തോന്നുന്നത്." "കുഞ്ഞേ, നിന്റെ ദൃഷ്ടിയിൽ ശരിയാണെന്ന് നിനക്ക് തോന്നും. ഞാൻ വന്ന് നിന്നെ തിരികെ കൊണ്ടുപോകുന്നതുവരെ ഞാൻ നിന്നെ പരിപോഷിപ്പിക്കും. എന്റെ ഭക്ഷണം ഞാൻ ഒരിക്കലും തടഞ്ഞുവെക്കുകയില്ല. നിനക്കുവേണ്ടി വർഷങ്ങൾ കാത്തുനിന്ന ഞാൻ, നിന്നെ എന്റെ ഹൃദയത്തോട് ചേർത്ത് നിർത്തുന്നതിനുവേണ്ടി വർഷങ്ങളോളം കാത്തുനിന്ന ഞാൻ, ഇപ്പോൾ എന്റെ ഭക്ഷണം നിന്നിൽ നിന്ന് എടുത്തുമാറ്റുമെന്നോ? വരൂ, നീ ആഗ്രഹിക്കുന്നിടത്തോളം നീ എന്നിൽ ചാരി വിശ്രമിക്കുക. ഞാൻ സ്നേഹമാണെന്ന് ഓർക്കണം. ഞാൻ സൗജന്യമായി നൽകുന്നു. ഞാൻ നൽകുന്നത് ഞാൻ ഒരിക്കലും തിരിച്ചെടുക്കുകയില്ല. എന്റെ വഴികളെപ്പറ്റി എപ്പോഴും ഞാൻ നിന്നെ ഓർമ്മിപ്പിക്കുന്നതാണ്. " 7/6/1987, വസൂലാ, എന്റെ മുഖത്തേക്ക് നോക്കുക. എന്നെ നോക്കുന്നത് എനിക്ക് ആശ്വാസം നൽകുന്നു. ഏറ്റവും ചെറിയ കാര്യം കൊണ്ടുപോലും എന്നെ ആശ്വസിപ്പിക്കുവാൻ കഴിയുമെന്ന് അവരോട് പറയുക. വരൂ, എന്നെ സ്നേഹിച്ചുകൊണ്ട് എന്നെ സ്തുതിക്കുക. "യേശു ഈ സന്ദേശം എഴുതുമ്പോൾ എന്റെ മുമ്പിലുണ്ടായിരുന്ന തിരുക്കച്ചയിലെ യേശുവിന്റെ തിരുമുഖത്തേക്ക് ഞാൻ നോക്കുകയായിരുന്നു." 8/6/1987, വസൂലാ, എന്റെ പ്രവർത്തികൾ നിറവേറ്റുവാൻ ഞാൻ ആഗ്രഹിക്കുന്നു. "ഞാൻ എന്താണ് ചെയ്യേണ്ടത്?" "ഞാൻ നിന്നെ നയിക്കും. ഞാൻ ഇനിയും കൂടുതലായി നിന്നെ നയിക്കും. എന്നിൽ ആശ്രയിക്കുക. നിനക്ക് എന്റെ സമാധാനം ഉണ്ടാകട്ടെ." 9/6/1987, ഇന്നലെ വൈകുന്നേരം ഞാൻ യേശുവിന്റെ മുഖം ആകാശത്ത് കാണുകയുണ്ടായി. ആകാശം വളരെ മനോഹരമായിരുന്നു. നല്ലൊരു ചിത്രകാരൻ വരച്ചതുപോലെ കാണപ്പെട്ടു. ദൈവത്തിൻറെ സൗന്ദര്യം ഞാൻ അവിടെ ദർശിച്ചു. അത് വളരെ പ്രകടവുമായിരുന്നു. "അതെ, വസൂലാ. എന്റെ സൃഷ്ടികളിൽ എന്നെ ദർശിക്കുകയും എന്നെ തിരിച്ചറിയുകയും എന്നെ സ്നേഹിക്കുകയും ചെയ്യുക." 10/6/1987, ഡാക്ക, ബംഗ്ലാദേശ്. അടുത്ത ദിവസം ഞങ്ങൾ ഇവിടെ നിന്ന് സ്ഥലം മാറുന്നതിനാൽ സാധനം പാക്ക് ചെയ്യുന്നതും മറ്റുമായി വളരെയധികം ജോലി തിരക്കുണ്ടായിരുന്നു. കർത്താവേ, ക്രിസ്തു അവബോധം എന്ന സിദ്ധാന്തത്തെക്കുറിച്ച് ഞാൻ ചിന്തിക്കുകയായിരുന്നു. ഇതിനർത്ഥം ഒരാളിന്റെ ഉള്ളിലുള്ള നന്മയുടെ ആന്തരിക ഭാവം. ഒരുപക്ഷേ ഇതിൻറെ സ്വാധീനത്തിൽ ആകുമോ ഞാൻ ഈ സന്ദേശങ്ങൾ എഴുതുന്നത്? "വസൂലാ, നമ്മൾ അയക്കപ്പെട്ട് ഒന്നായി തീർന്നിരിക്കുകയാണെന്ന് ഞാൻ നിന്നോട് പറഞ്ഞിട്ടുണ്ടല്ലോ. പ്രിയപ്പെട്ടവളേ, ഇതിനെ ദൈവത്തിലുള്ള യഥാർത്ഥ ജീവിതം എന്ന് വിളിക്കുക. എനിക്കുവേണ്ടി ജീവിക്കുക. നീ എഴുതണമെന്ന് ഞാൻ ആഗ്രഹിക്കുന്നത് ഇതാണ്. " ഇപ്പോൾ ദൈവം എന്താണ് എഴുതാൻ പോകുന്നതെന്ന് ഞാൻ ജിജ്ഞാസാപൂർവ്വം ചിന്തിക്കുകയായിരുന്നു. "കുഞ്ഞേ, എന്റെ അഭിലാഷങ്ങൾ." തിരുവചനത്തിൽ നിന്ന് ഒരു ഭാഗം ദൈവം എന്നെക്കൊണ്ട് വായിപ്പിച്ചു. "അതെ, ഉണർവോടെ എന്നെ ശ്രവിക്കുക. എന്റെ ദേവാലയത്തിൽ നീ എന്നെ വന്നു കാണുമോ? വസൂലാ, എന്റെ അടുക്കലേക്ക് വരൂ." "കർത്താവേ, ഏത് ദേവാലയമാണ് അങ്ങ് ഉദ്ദേശിക്കുന്നത്?" "എല്ലാ ദേവാലയങ്ങളും എന്റേതാണ്. അവ എനിക്കുള്ളതാണ്. അവ എന്റേത് മാത്രമാണ്. ഞാനാണ് സഭ. ഞാനാണ് സഭയുടെ ശിരസ്സ്." "യേശുവേ, എന്നാൽ അങ്ങ് പറഞ്ഞപ്പോൾ ഞാൻ കരുതിയത് ഒരു പ്രത്യേക ദേവാലയത്തിൽ വന്ന് ഞാൻ അങ്ങയെ കാണണമെന്നാണ്. " "നിനക്ക് ഏത് ദേവാലയത്തിലും ഏതു സമയത്തും എന്നെ വന്നു കാണാം. മറ്റുള്ളവരെപ്പോലെ ദേവാലയത്തെ വേർതിരിച്ചു കാണേണ്ട. എല്ലാ ദേവാലയങ്ങളും എനിക്കുള്ളതാണ്. ഞാൻ ഏകദൈവമാണ്. എനിക്കൊരു ശരീരമേയുള്ളൂ, സഭ. എന്റെ സഭയെ അവർ മുറിച്ച് വികലമാക്കിയിരിക്കുന്നു. തിരികല്ലുകളാൽ എന്റെ ശരീരമാകുന്ന സഭയെ നശിപ്പിച്ചിരിക്കുന്നു." "എന്റെ ദൈവമേ, അങ്ങ് വളരെ അസ്വസ്ഥനായിരിക്കുന്നതുപോലെ തോന്നുന്നു." "അസ്വസ്ഥനാണെന്നോ? വസൂലാ, എന്തുകൊണ്ടാണ് എന്റെ സഭയെ അതിക്രൂരമായി അംഗവിച്ഛേദനം ചെയ്തിരിക്കുന്നത്? " "ദൈവം വളരെ അസ്വസ്ഥനായി കാണപ്പെട്ടു. ജെറുസലേം ദേവാലയത്തിൽ നാണയമാറ്റക്കാരുടെ മേശകൾ അവിടുന്ന് മറിച്ചിട്ട സംഭവം അവിടുന്ന് എന്നെ ഓർമ്മിപ്പിച്ചു. ഇതുവരെ അവിടുന്ന് ഇത്രമാത്രം അസ്വസ്ഥനാകുന്നതായി ഞാൻ ഒരിക്കലും കണ്ടിട്ടുമില്ല, കേട്ടിട്ടുമില്ല." "വസൂലാ." "യേശുവേ." "ഞാനാണ്. " "അങ്ങ് യഥാർത്ഥത്തിൽ ഇത്രമാത്രം അസ്വസ്ഥനാണോ? " "അതെ, ഇത് ഞാനാണ്. അതെ, എനിക്കിപ്പോൾ എന്റെ വചനം നിന്നെ ഏൽപ്പിക്കുവാൻ കഴിയും. വസൂലാ, കൃപാവരം നിനക്ക് നൽകിയിരിക്കുന്നത് നിന്റെ താല്പര്യങ്ങൾക്ക് വേണ്ടിയല്ല. നേരെ മറിച്ച് എന്റെ വചനങ്ങൾ നിന്റെ മേൽ ആലേഖനം ചെയ്യപ്പെടുന്നതിനുവേണ്ടിയാണ് നിനക്ക് കൃപാവരങ്ങൾ നൽകിയിരിക്കുന്നത്. " "ഇതിനു മുമ്പൊരിക്കലും അങ്ങ് ഇത്രമാത്രം അസ്വസ്ഥനായതായി എനിക്ക് തോന്നിയിട്ടില്ല. അങ്ങ് തന്നെയല്ലേ?" "ഞാനാണ്. എന്റെ ശരീരം വേദനിക്കുന്നു. അത് വെട്ടിമുറിക്കപ്പെട്ടിരിക്കുന്നു. " "എന്റെ ദൈവമേ, എനിക്ക് എന്ത് ചെയ്യുവാൻ കഴിയും? ഞാൻ നിസ്സഹായയാണല്ലോ." "വസൂലാ, എനിക്കിതെല്ലാം അറിയാവുന്നതല്ലേ? അവസാനം വരെ ഞാൻ നിന്നെ ഉപയോഗപ്പെടുത്തും. മകളേ, എന്നെ ഒരിക്കലും ഭയപ്പെടരുത്. എന്റെ സഭയെ ഐക്യപ്പെടുത്തുന്നത് എന്റെ ശരീരമാകുന്ന സഭയുടെ മഹത്വമായിരിക്കും. പ്രിയപ്പെട്ടവളേ, സമാധാനം നിന്നോടുകൂടെ." "അതെ, കർത്താവേ, ഞാൻ ഇടത്തോട്ടും വലത്തോട്ടും പുറകോട്ടും നോക്കാതെ നേരെ മുന്നോട്ടു തന്നെ നോക്കും." "അതെ, ഞാൻ എപ്രകാരമാണ് പ്രവർത്തിക്കുന്നതെന്ന് ഗ്രഹിക്കുക. ഇപ്പോഴത്തെ പോലെ ശാന്തമായിരിക്കുക. എന്നെ പ്രസാദിപ്പിക്കുവാൻ തയ്യാറാവുക. എന്നോട് ഐക്യപ്പെട്ടൊന്നാകുക." "കർത്താവേ, അങ്ങയെ ശ്രദ്ധിക്കണമെന്ന് അങ്ങ് ആഗ്രഹിക്കുന്നവർ അങ്ങയെ ശ്രവിക്കുന്നില്ലെങ്കിലോ? അപ്പോൾ ഞാൻ എന്താണ് ചെയ്യേണ്ടത്? " "ഇപ്പോൾ നീ എന്നെക്കാളും ഒരു ചുവട് മുന്നിലാണ്. കുഞ്ഞേ, എന്നോടൊപ്പം നടക്കുക. അതെ, എന്നോടൊപ്പം എന്നെ അനുഗമിക്കുക. എന്നെ വിശ്വസിക്കുക. വരൂ, ഞാൻ നിന്നെ നയിക്കും." പെട്ടെന്ന് അസാധാരണമായി പട്ടികൊരിക്കുന്ന ശബ്ദം കേട്ടു. എന്റെ കിടപ്പുമുറിയുടെ കതക് തുറന്ന് ഒരു കള്ളൻ വാതിക്കിൽ വന്നു നിൽക്കുന്നു. മൂന്നു ദിവസം മുമ്പ് എന്റെ മുറിയിൽ കയറി പണം മോഷ്ടിച്ച കള്ളൻ തന്നെയാണ് അവിടെ നിൽക്കുന്നതെന്ന് എനിക്ക് മനസ്സിലായി. പുറത്തു പോകുവാൻ ഞാൻ അവനോട് ആവശ്യപ്പെട്ടു. അവൻ പുറത്തുപോയി. ഞാൻ അലാറം മുഴക്കി. ദൈവം എന്നോട് എന്തോ പറയുവാൻ ആഗ്രഹിക്കുന്നു എന്ന് എനിക്ക് മനസ്സിലായി. "വസൂലാ, ഞാൻ നിന്നെ ഒരു കാര്യം ഓർമ്മിപ്പിക്കുവാൻ ആഗ്രഹിക്കുന്നു. കവർച്ചക്കാരൻ നിന്റെ മുറിയിൽ പ്രവേശിച്ചപ്പോൾ നീ അവനെ പ്രതീക്ഷിച്ചിരുന്നോ? " "ഇല്ല." "ഇതുപോലെ തന്നെ ഞാനും വരും. കവർച്ചക്കാരനെ ആരും തിരിച്ചറിഞ്ഞില്ല. കാരണം ആരും അവനെ പ്രതീക്ഷിച്ചിരുന്നില്ല." "യേശുവേ, ഇവിടെ അർത്ഥമാക്കുന്നത് സാധനങ്ങൾ പാക്ക് ചെയ്തുകൊണ്ടിരിക്കുന്ന പത്ത് ജോലിക്കാരും മറ്റു ഓഫീസ് ജോലിക്കാരും മോഷ്ടാവിനെ കണ്ടിട്ടും അവൻ മോഷ്ടാവാണെന്ന് തിരിച്ചറിയുവാൻ കഴിഞ്ഞില്ല. കർത്താവ് പറഞ്ഞ ഈ അവസാനത്തെ വാചകം വളരെ പ്രധാനപ്പെട്ടതും പുറമെയുള്ളതിനേക്കാളും അർത്ഥം ഉൾക്കൊള്ളുന്നതുമാണ്." "വസൂലാ, ഈ വാചകം നിന്നെ പ്രത്യേകമായി എന്തെങ്കിലും ഓർമ്മിപ്പിച്ചുവോ? ഞാൻ നിന്നോട് പറയട്ടെ, കള്ളൻ പാപം ചെയ്തിട്ടുണ്ടായിരുന്നു. എന്നാൽ അവനെ കുറ്റം വിധിച്ചവർ അവരും പാപത്തിൽ തന്നെയല്ലേ ജീവിക്കുന്നത്?" "അങ്ങ് എന്താണ് അർത്ഥമാക്കുന്നതെന്ന് എനിക്ക് മനസ്സിലാകുന്നില്ല." "വസൂലാ, ഞാൻ ഇതെല്ലാം കണ്ടുകൊണ്ട് നിശബ്ദമായിരിക്കുമോ? " "കർത്താവേ, അങ്ങ് കള്ളനെ ന്യായീകരിക്കുകയാണോ? " "അല്ല, വസൂലാ. ഞാൻ കള്ളനെ ന്യായീകരിക്കുകയില്ല. പാപം ചെയ്യാത്ത ഒരാളുടെയെങ്കിലും പേര് പറയാമോ?" "ആരെങ്കിലും ഉണ്ടെന്ന് എനിക്ക് തോന്നുന്നില്ല." "വലിയ പാപങ്ങൾ, ചെറിയ പാപങ്ങൾ, എല്ലാം പാപങ്ങളാണ്. പാപം ചെയ്യുന്നത് എന്നെ വേദനിപ്പിക്കലാണ്. വസൂലാ, ഞാൻ അസംഖ്യം പാപങ്ങൾ കണ്ടുകൊണ്ടിരിക്കുന്നു. സ്നേഹം, പീഡ സഹിച്ചുകൊണ്ടിരിക്കുന്നു. സൃഷ്ടികളേ, സ്നേഹം വ്യഥ സഹിച്ചുകൊണ്ടിരിക്കുന്നു. സ്നേഹം തീവ്രമായി ദുഃഖിക്കുന്നു. എന്റെ സൃഷ്ടികളേ, സ്നേഹത്തിലേക്ക് മടങ്ങിവരൂ. മകളേ, എന്നെ സ്നേഹത്താൽ പൊതിയുക. പ്രിയപ്പെട്ടവളേ, പരിഹാരം ചെയ്യുക. പരിഹാരം ചെയ്യുക."